1 ଏବେ ନେଙ୍ଗ୍‌ନେ ପ୍ରିୟତମ ପର୍‌ମେସର୍‌ନେ ଉଦେସ୍‌ରେ ମୁଇଂ ଅସ୍‌ମାର୍‌ ନ୍‌ସାର୍‌ଏ । ଏନ୍‌ ଅସ୍‌ମାର୍‌ ନେଙ୍ଗ୍‌ନେ ପ୍ରିୟତମ ମାପ୍‌ରୁ ବାରି ଇଶ୍ରାୟେଲନେ ଅଙ୍ଗୁର୍‌ ଡୁଗ୍‌ଡି ବିସଏରେ । ନେଙ୍ଗ୍‌ନେ ପ୍ରିୟତମ ମାପ୍‌ରୁନେ କତ୍‌ଲେକ୍ନେ ମୁଇଂ କଣ୍ଡା ଆଡ଼ାତ୍ରା ମୁଇଂ ଅଙ୍ଗୁର୍‌ ଡୁଗ୍‌ଡି ଲ୍ଲେକେ ।

2 ନେଙ୍ଗ୍‌ନେ ପ୍ରିୟତମ ଡୁଗ୍‌ଡିକେ ଗଃ ଗଃଚେ ବ୍ରି ସାପା ଜଗ୍ ଆଃତାର୍‌କେ । ଆତ୍‌ଡାଗ୍ରା ମାଣ୍ଡାକ୍ନେ ଅଙ୍ଗୁର୍‌ ସ୍ଲାଃ ଉଂକେ । ମେଁ ଡୁଗ୍‌ଡିନେ ମଜେ ମୁଇଂ ସୁନ୍ଦର୍‌ ବାରି ତିଆର୍‌ ଡୁଆ ଆଃରେଚେ ବାରି ଅଙ୍ଗୁର୍ କୁଣ୍ଡ୍‌ ଆଃରେକେ । ମେଁ ନିମାଣ୍ଡା ଅଙ୍ଗୁର୍‌ ଚୁଏ ଡାଗ୍‌ଚେ ଉର୍‌କେ, ମାତ୍ରମ୍‌ ନିମାଣ୍ଡା ବାଦୁଲ୍‌ରେ ଦଦିଆ ଅଙ୍ଗୁର୍ ଚୁ ଚୁକେ ।

3 ତେସା ପର୍‌ମେସର୍‌ ବାସଙ୍ଗ୍‌କେ, "ଅ ଯିରୂଶାଲମ ବାରି ଯିହୁଦାନେ ରେମୁଆଁଇଂ ନେଙ୍ଗ୍‌ନେ ବାରି ନେଙ୍ଗ୍‌ନେ ଅଙ୍ଗୁର୍‌ ଡୁଗ୍‌ଡି ବିସଏରେ ବିଚାର୍‌ ଡିଙ୍ଗ୍‌ପା ।

4 ନେଙ୍ଗ୍‌ନେ ଏନ୍‌ ଅଙ୍ଗୁର୍‌ ଡୁଗ୍‌ଡି ନ୍‌ସାଃ ନେଙ୍ଗ୍‌ ଜାବର୍‌ ମେଁନି ଡିଙ୍ଗ୍‌ମ୍ପାୟା, ମେଁନେ ଡିଙ୍ଗ୍‌ନେ ନେଙ୍ଗ୍‌ ସାପା ଡିଙ୍ଗ୍‌ ମ୍ୱକେ । ନେଙ୍ଗ୍‌ ନିମାଣ୍ଡା ଅଙ୍ଗୁର୍‌ ଚୁ ଚୁଏ ଡାଗ୍‌ଚେ ଆସା ଡିଙ୍ଗ୍‌ ନ୍‌ଲେଗେ । ମାତ୍ରମ୍‌ ଆତ୍‌ଡାଗ୍ରା ଦଦିଆ ଅଙ୍ଗୁର୍‌ ଚୁ ଚୁକେ । ଏନ୍‌ ମେନ୍‌ସା ଗଟେକେ ?

5 ଆତେନ୍ ଏବେ ଦ୍ରିଗ୍‌ପା, ଏବେ ନେଙ୍ଗ୍‌ ନେଙ୍ଗ୍‌ନେ ଅଙ୍ଗୁର୍‌ ଡୁଗ୍‌ଡି ନ୍‌ସାଃ ମେଁନି ଣ୍ଡିଙ୍ଗ୍‌ଏ, ଆତାନ୍‌ ଆପେକେ ମ୍ୱାସଙ୍ଗ୍‌ଏ । ନେଙ୍ଗ୍ ଆତ୍‌ଅରିଆନେ ତୁରାଃ ତଃମ୍ୱିଏ, ଆତ୍‌ଅରିଆ ଆମେକେ ଆଃଗି ନେବିଏ । ନେଙ୍ଗ୍ ଆତ୍‌ଅରିଆନେ କାଗ୍‌ବଃକେ ନସ୍‌ଟ ଆଃଡିଙ୍ଗ୍‌ମ୍ୱିଏ, ଆତ୍‌ଅରିଆ ଆମେକେ ଲେଚାର୍ ନେବିଏ ।

6 ନେଙ୍ଗ୍‌ନେ ଆତାନ୍‌ ଅଙ୍ଗୁର୍ ଡୁଗ୍‌ଡିକେ ପାକ୍‌ଚି ମ୍ୱିଏ । ମୁଡ଼ି ରେମୁଆଁ ଆତାନ୍‌ ସ୍ଲାଃ ଆଣ୍ଡେଙ୍ଗ୍‌ନେ ଜତନ୍‌ ଆଡିଙ୍ଗ୍‌ ଣ୍ଡୁ ଣ୍ଡୁଲା ଆତାନ୍‌ ଡୁଗ୍‌ଡି ନିଆ ଜାଣ୍ଡେ ଆଲିଗ୍‌ ଆର୍‌ ଣ୍ଡୁ । ଆତ୍‌ଡାଗ୍ରା ଗ୍ରେ ବାରି ବିନ୍‌ ବିନ୍‌ନେ ଚେମୁଆଁ ତଃଡ଼୍ୟାଃଏ । ଆତାନ୍‌ ଡୁଗ୍‌ଡିନ୍ୟା ଣ୍ଡିଆ ଆଗୁର୍‌ ନ୍‌ସା ନେଙ୍ଗ୍‌ ତ୍ରିଗ୍‌ଡ୍ୟାଃକେ ଆଦେସ୍‌ ମ୍ୱିଏ ।"

7 ଇସ୍ରାଏଲନେ କୁଟୁମ୍‌କେ ସାପା ସକ୍‌ତିସାଲି ମାପ୍‌ରୁନେ ଅଙ୍ଗୁର୍‌ ଡୁଗ୍‌ଡି ବାରି ଯିହୁଦାନେ ରେମୁଆଁ ମେଁ ବଲ୍ ବାଡିଙ୍ଗ୍‌କ୍ନେ ନେ ଅଙ୍ଗୁର୍‌ ଡୁଗ୍‌ଡି ବାରି ଯିହୁଦାନେ ରେମୁଆଁ ମେଁନେ ବଲ୍ ବାଡିଙ୍ଗ୍‌କ୍ନେ ଅଙ୍ଗୁର୍ ଲିଲିନେ ଅଙ୍ଗୁର୍ ଚୁ । ମାପ୍‌ରୁ ଆତ୍‌ଡାଗ୍ରା ନ୍ୟାୟ୍ ଆସା ଡିଙ୍ଗ୍‌ଡିଙ୍ଗ୍‌କେ ମାତର୍‌ ଆତ୍‌ଡାଗ୍ରା ଗୁଏଃନେ ଲାଏଃକେ । ମାପ୍‌ରୁ ଆତ୍‌ଡାଗ୍ରା ଦରମ୍‌ ଆସା ଡିଙ୍ଗ୍‌ ଡିଙ୍ଗ୍‌କେ ମାତ୍ରମ୍‌ ଆତ୍‌ଡାଗ୍ରା ଦୁକ୍‌ ଲ୍ଲେକେ । ଆତ୍‌ଡାଗ୍ରା ରେମୁଆଁଇଂ ମାତର୍‌ ଅଃଆର୍‌ଡିଂକେ ।

8 ଦେସ୍‌ନ୍ନିଆ ଆରି ଜାଗା ଆଲେ ଣ୍ଡୁ ଆରି ପେଇଂ ଯେନ୍ତିକି ଆତ୍ ଅରିଆ ମୁଇଂଜା ପେବାସାଏ, ଆତେନ୍‌ସା ଡୁଆ ଆଡ଼ାତ୍ରା ଡୁଆ, ଲିଜକେ ଲିଜ ଆଃମିସେ ପେଡିଙ୍ଗ୍‌କେ ଜେ ପେ, କେଲାପା, ପେନେ ବଏଙ୍କାର୍‌ ଦିନ୍ ପାଙ୍ଗ୍‌ଡିଙ୍ଗ୍‌କେ !

9 ସାପାବାନ୍ ମ୍ନା ମାପ୍‌ରୁ ନେଙ୍ଗ୍‌ନେ ନ୍ଲୁଗ୍‌ନିଆ ବାସଙ୍ଗ୍‌ମ୍ୟାଃକେ, "ସତ୍‌ ଗୁଲେ ଡୁଆ ନାସ୍ ଡିଙ୍ଗ୍‌ଏ, ଆରି ମ୍ନା ମ୍ନାଃ ଡୁଆ ଆରି ସବାକ୍ନେ ଡୁଆଇଂନିଆ ଜା ଡିଗ୍ ଆବାସା ଆର୍ ଣ୍ଡୁ ।

10 ଗୁଆ ଏକର୍‌ ଜାଗାନେ ଅଙ୍ଗୁର୍‌ ଡୁଗ୍‌ଡି ବାନ୍‌ ମାତର୍ ମୁଇଂ ଙ୍କୁଇ ଅଙ୍ଗୁର୍‌ ରସ୍‌ ତାର୍‌ଏ ବାରି ଗୁଆ ମାନ୍‌ ମୁଞ୍ଜି ବାନ୍‌ ମୁଇଂ ମାନ୍‌ କିଆଉଁଆଃ ଡିଙ୍ଗ୍‌ଏ ।"

11 ଜାଣ୍ଡେଇଂ ଉଗ୍‌ନ୍‌ସା ଞ୍ଜିର୍‌ନୁଗ୍‌ ତଡ଼୍ୟାଆର୍‌ଏ, ଅଙ୍ଗୁର୍‌ରସ୍‌ ବୁସାଃ ଜାକ ଉଗ୍‌ ଉଗ୍‌ଚେ ମେଇଂ ମିଡିଗ୍‌ ଜାକ ଉଗ୍‌ଚେଃ ଲେଃଆର୍‌ଏ, ମେଇଂ ଅବିସାପ୍‌ନେ ରେମୁଆଁଇଂ ।

12 ପେ ବୁଜିନିଆ ଅଙ୍ଗୁର୍‌ ରସ୍‌, ବିନା, ମର୍‌ଦଲ୍‌, ବାଉଁସି ବାରି ବିନ୍‌ ବିନ୍‌ନେ ବଗ୍‌ଡେଙ୍ଗ୍‌ନେ ଜିନିସ୍‌ ପେବକେ । ମାତର୍‌ ସଦାପ୍ରବୁନେ କାମ୍‌ ଦ୍ୟାନ୍‌ ପେବିକେ ଣ୍ଡୁ । ସଦାପ୍ରବୁନେ ନ୍ତି ଜାବର୍‌ ଜିନିସ୍‌ ତିଆର୍‌ ଡିଙ୍ଗ୍‌ ବକେ ମାତର୍‌ ପେଇଂ ଆତାନ୍‌ ଦ୍ୟାନ୍‌ ପେବିକେ ଣ୍ଡୁ । ତେସା ଆକାନ୍‌ ପେଇଂ ନ୍‌ସା ଅବିସାପ୍‌ ରକମ୍‌ ଡିଙ୍ଗ୍‌ଏ ।

13 ଆତେନ୍‌ସା ନେଙ୍ଗ୍‌ନେ ରେମୁଆଁଇଂ ଗିଆନ୍‌ ଅବାବ୍‌ ନ୍‌ସାଃ ବନ୍ଦି ଡିଙ୍ଗ୍‌ଲେ ଆର୍‌କେ । ବାରି, ମେଙ୍ଗ୍‌ନେ ସନ୍‌ମାନ୍‌ ବାନେ ରେମୁଆଁଇଂ କିଡ଼େସଃ ଲେଃଆର୍‌ଏ ଆରି ମେଙ୍ଗ୍‌ନେ ରେମୁଆଁ ସାପା ଉଗ୍‌ଡିଆଡଃଚେ କଲ୍‌ବଲ୍ ଡିଙ୍ଗ୍‌ୱେ ଆର୍‌ଏ ।

14 ଆତେନ୍‌ସା ପାତାଲ୍ ମେଁନେ ସୁଲୁଏଃକେ ମେଲା ବିଏ ଆରି ମେଁନେ ତୁମୁଆଃକେ ମେଲା ଆଡିଙ୍ଗ୍‌ବକେ । ବାରି ମେଙ୍ଗ୍‌ନେ ମହିମା, ମେଙ୍ଗ୍‌ନେ ରେମୁଆଁ ସାପା, ମେଙ୍ଗ୍‌ନେ ୱିଙ୍ଗ୍‌ଆଃରିଙ୍ଗ୍‌ଆଃ ଆରି ମେଙ୍ଗ୍‌ନେ ବିତ୍ରେବାନ୍ ସାର୍ଦା ଡିଙ୍ଗ୍‌ଣ୍ଡ୍ରେ ଆତ୍‌ଅରିଆ ପାଙ୍ଗ୍ଆର୍‌ଏ ।

15 ବାରି, ସାଦାସିଦା ରେମୁଆଁଇଂନେ ସାର୍ମୁଆଃ ନ୍‌ସାର୍‌ଏ ଆରି ମ୍ନା ରେ ଡାଆଁ ଡିଙ୍ଗ୍‌ଏ, ବାରି ଜା ନିଜର୍ ସାମ୍‌ନାରେ ମ୍ନା ଡାଗ୍‌ଚେ ବାବେ ଆର୍‌ଏ ଆମେଇଂକେ ଡାଆଁ ଆଡିଙ୍ଗ୍‌ଏ

16 ବାରି ସାପାବାନ୍ ମ୍ନା ମାପ୍‌ରୁ ନିମାଣ୍ଡା ବିଚାର୍‌ ଡିଙ୍ଗ୍‌ଏ ବାରି ଦରମ୍ ରକମ୍‌ନେ ପର୍‌ମେସର୍‌ ଦାର୍‌ମିକ୍ ସାମୁଆଁରେ ପବିତ୍ର ଡାଗ୍‌ଚେ ମାନେଃଏ ।

17 ଆତେନ୍‌ ବେଲା ମେଣ୍ଡାନେ ଉଂଡେଇଂ ନିଜର୍‌ ଚଙ୍ଗାଃନେ ଜାଗାନ୍ନିଆ ଚଙ୍ଗାଃକ୍ନେ ରକମ୍ ଚଙ୍ଗାଃଆର୍‌ଏ, ବାରି, ଦେସ୍‍ ଦେସ୍‍ ଅଲେଙ୍ଗ୍‌ଣ୍ଡ୍ରେ ଗାଗ୍‌ଡ଼େକ୍ନେ ରେମୁଆଁଇଂନେ ନାସ୍ ଡିଙ୍ଗ୍‌ଲେକ୍ନେ ଜାଗାନ୍ନିଆ ଚଙ୍ଗାଃଆର୍‌ଏ ।

18 ଜାଣ୍ଡେଇଂ ମୁଲ୍ୟ ଣ୍ଡୁନେ ଗେହେଃନିଆ ପାପ୍‌ ଡିଙ୍ଗ୍‌ବଆର୍‌କେ ଆରି ଶଗଡ଼୍‌ନ୍ୟା ଗାଗ୍‌ନେ ଗେହେଃନିଆ ପାପ୍ ଆଡିଙ୍ଗ୍‌ସା ମନ୍‌ ଆଃଡିଙ୍ଗ୍‌ଏ, ମେଇଂ ଡଣ୍ଡ୍‌ ବାନେ ରେମୁଆଁଇଂ ।

19 ମେଇଂ ବାସଙ୍ଗ୍‌ମ୍ୟାଃକେ, "ନେ ଡିରକମ୍ ତୁର୍ ନେୟାଏ, ଆତାନ୍‌ସା ମେଁ ଜିଆ ଡିଙ୍ଗ‌ଲେଃ, ମେଁ ମେଁନେ କାମ୍ ଜିଆ ଡିଙ୍ଗ୍‌ଲେ । ଆରି, ନେ ଯେନ୍ତିକି ନେମ୍ୟାଃଏ, ଆତେନ୍‌ସା ଇସ୍ରାଏଲ୍‌ନେ ପବିତ୍ର ରକମ୍‌ନେ ରେମୁଆଁନେ କରାପ୍ ଜଜ୍‌ନା ଡିଙ୍ଗ୍‌ଚେ ଗଟେଲେଃ ।"

20 ରେମୁଆଁଇଂ ନିମାଣ୍ଡାଃକେ କରାପ୍‌ ବାରି ଦଦ୍ୟାକେ ନିମାଣ୍ଡା ବାସଙ୍ଗ୍‌ଆର୍‌ଏ । ବାରି ମେଇଂ ତାଙ୍ଗ୍‌କିଗ୍‌କେ ତାର୍‌କିଗ୍‌ ବାରି ତାର୍‌କିଗ୍‌କେ ତାଙ୍ଗ୍‌କିଗ୍‌ ଚିନ୍ତା ଡିଙ୍ଗ୍‌ଆର୍‌ଏ ବାରି ମ୍ୱ୍ରେକେ ବିସେଃ ବାରି ବିସେଃକେ ମ୍ୱ୍ରେ ମନେ ଡିଙ୍ଗ୍‌ଆର୍‌ଏ ମେଇଂ ଅବିସାପ୍‌ନେ ରେମୁଆଁଇଂ ।

21 ଜାଣ୍ଡେଇଂ ନିଜର୍‌ ନିଜର୍‌ ମ୍ମୁଆଃନ୍ୟା ଜ୍ଞାନବାନ୍‌ ବାରି ନିଜର୍‌ ନିଜର୍‌ ବୁଦିରେ ବୁଦିମାନ୍‌ ମେଇଂ ଅବିସାପ୍‌ନେ ରେମୁଆଁଇଂ ।

22 ଜାଣ୍ଡେଇଂ ଅଙ୍ଗୁର୍‌ରସ୍‌ ଉଗ୍‌ନ୍‌ସା ବିରବାର ଆରି ସାଗ୍‌ରାକେ ଆଃମିସୁଃନ୍‌ସାଃ ବିରବାର,

23 ଜାଣ୍ଡେଇଂ ଲାଞ୍ଚ୍‌ ନ୍‌ସା ଦୁସ୍‌ଟକେ ନିର୍ଦସ୍‌ ଆଡିଙ୍ଗ୍‌ ଆର୍‌ଏ ବାରି ଦରମ୍‌ ରେମୁଆଁନେ ଦର୍ମକେ ମେଁବାନ୍‌ ସ୍ଲ ଆଡିଙ୍ଗ୍‌ ଆର୍‌ଏ, ମେଇଂ ଅବିସାପ୍‌ନେ ରେମୁଆଁଇଂ ।

24 ଆତେନ୍‌ସା ସୁଆନେ ନ୍ଲିୟା ଡିରକମ୍ ପିଆଲ୍‌କେ ଆଃଗିଏ ଆରି ନ୍‌ସାର୍‌କ୍ନେ ଚେଃମୁଆଁ ଡିରକମ୍ ସୁଆନିଆ ଗିଃଚେ ଉଗ୍‌ସ ଡିଙ୍ଗ୍‌ୱେଏ, ଦେତ୍‌ରକମ୍ ମେଙ୍ଗ୍‌ନେ ବୁନ୍ଦ୍ ରୁବୁଗ୍‌ ୱେଏ ଆରି ମେଙ୍ଗ୍‌ନେ ସାରି ଦୁଲି ରକମ୍ ୱାଲେ ୱେଏ । ମେଃଡାଗ୍‌ଲା ମେଇଂ ସାପାବାନ୍ ସନ୍ୟାଦିପତି ମାପ୍‌ରୁନେ ନିଅମ୍‌କେ ପାଲନ୍ ଡିଂଆବଆର୍‌କେ ଆରି ଇସ୍ରାଏଲ୍‌ନେ ପବିତ୍ର ସାମୁଆଁକେ ଅମାନି ଡିଙ୍ଗ୍‌ବଆର୍‌କେ ।

25 ତେସା ସଦାପ୍ରବୁ ମେଇଂନେ ଆଡ଼ାତ୍ରା ଜାବର୍‌ ରିସା ଡିଙ୍ଗ୍‌ଲେଃକେ । ମେଁ ମେଁନେ ନ୍ତି ଆଲମ୍ୱେଚେ ଆମେଇଂକେ ଡଣ୍ଡ୍‌ ବିଃଏ । ଦେକ୍‌ରକମ୍‌ କି କଣ୍ଡା ଆଣ୍ଡେଙ୍ଗ୍‌ ବୁଟ ଇରିୟା ୱେଆର୍‌ଏ ବାରି ଗୁଏଃକ୍ନେ ଗାଗ୍‌ଡ଼େ ଆଣ୍ଡେଙ୍ଗ୍‌ କାଚ୍‌ରା ରକମ୍‌ ଲଃଲେଃଏ । ଦେକ୍‌ରକମ୍‌ କି ପର୍‌ମେସର୍‌ନେ ରିସା ଗଣ୍ଡା ଆଡିଙ୍ଗ୍‌ ଣ୍ଡୁ ବାରି ମେଁନେ ନ୍ତି ଆମେଇଂକେ ଡଣ୍ଡ୍‌ ବିଃଏ ।

26 କେଲାପା ପର୍‌ମେସର୍‌ ସ୍ଲ ଦେସ୍‌ନେ କୁଟୁମ୍‌ଇଂନେ ଆଡ଼ାତ୍ରା ବାସଙ୍ଗ୍‌ଡିଂକେ । ମେଁ ମେଁନେ ଜେଣ୍ଡା ଆଃୱାଲେଃଚେ ଆମେଇଂକେ ୱାନ୍‌ସା ପୁଇଃତିଗ୍‌ଡିଂକେ । ସ୍ଲ ଦେସ୍‌ବାନ୍‌ ସତ୍ରୁ ପାଙ୍ଗ୍‌କେ । ମେଇଂ ଅଃକେନ୍‌ ଦାପେ ପାଙ୍ଗ୍‌ଆର୍‌ଙ୍କେ ଜେ ଦେସ୍‌ ଡାଗ୍ରା ଦାପ୍ରେ ପିଙ୍ଗ୍‌ଚା ଆର୍‌ଏ ।

27 ମେଇଂନେ ବିତ୍ରେ ଜାଣ୍ଡେ ଆଲାକାଃଆର୍‌ ଣ୍ଡୁ, ଲେଃ ଆଟେପ୍ଲଃଆର୍‌ ଣ୍ଡୁ । ଜାଣ୍ଡେ ଆଲେମୁଆଃ ଣ୍ଡୁ ଲେଃ ଆଡୁଲେଗ୍‌ଆର୍‌ ଣ୍ଡୁ, ମେଇଂନେ ନ୍‌ସାଃନେ ବେଲ୍‌ଟୁ ଆପୁଏଃଚଗ୍‌ ଣ୍ଡୁ ଲେଃ ମେଇଂନେ ଚପଲ୍‌ ଆଟିକ୍‌ଚି ଣ୍ଡୁ ।

28 ମେଇଂନେ ଙାଁ ଡିଗ୍‌ ଲାଏଃକେ ବାରି ମେଇଂନେ ଆଁୟାଁଃ ରାବଆର୍‌କେ । ମେଇଂନେ ଗଡ଼ାଇଂନେ ଞ୍ଚୁଏଚ ଜିଗ୍‌ଜାଗ୍‌କ୍ନେ ବ୍ରି ରକମ୍‌ ଡିଙ୍ଗ୍‌ଲେକେ ବାରି ମେଇଂନେ ରତ୍‌ନେ ଚକା ଗଲିଆ ୱେଡ଼୍ୟାଃ ରକମ୍‌ ଡିଙ୍ଗ୍‌ଲେକେ ।

29 ମେଇଂନେ ଗର୍‌ଜନ୍ ସିଂଅଁ ଗର୍‌ଜନ୍‌ ରକମ୍‌, ମେଇଂ ଙ୍ଗିରେ ସିଂଅଁ ରକମ୍‌ ଗର୍‌ଜନ୍ ଡିଙ୍ଗ୍‌ଏ । ବାରି ମେଇଂ ଗର୍‌ଜନ୍ ଡିଙ୍ଗ୍‌ଚେ ଆରି ସାଃଚେ ବାରି ନିରାପଦ୍‌ରେ ଆମେକେ ରାଙ୍ଗ୍‌ୱେ ଆର୍‌ଏ ଆରି ଆମେକେ ଉଦାର୍‌ ଡିଙ୍ଗ୍‌ନ୍‌ସା ଜାଡିଗ୍‌ ଆଲେଃ ଣ୍ଡୁ ।

30 ବାରି ମେଇଂ ଆତାନ୍‌ ଦିନ୍‌ କେଣ୍ଡିଆନେ ଗର୍‌ଜନ୍‌ ରକମ୍‌ ରେମୁଆଁଇଂନେ ଆଡ଼ାତ୍ରା ସାରଆର୍‌ଏ । ଆତେନ୍‌ ଦିନା ଜଦି ଜା ଦେସ୍‌ ଆଡ଼ାତ୍ରା କେଆର୍‌ଏ, ତେଲା କେଲାପା, ତାଙ୍ଗ୍‌କିଗ୍‌ ବାରି କସ୍‌ଟ ପାଙ୍ଗ୍‌ଏ, ବାରି ଆତାନ୍‌ ଜାଗାନିଆନେ ତାରାସ୍‌ ତ୍ରିଗ୍‌ଡ୍ୟାନ୍ୟା ଆଡ଼ାତ୍ରା ତାଙ୍ଗ୍‌କିଗ୍‌ ଡିଙ୍ଗ୍‌ୱେଏ ।