ଜିସାୟ 65

ବିଚାର୍‌ ଆରି ଉଦାର୍‌

1 ଜାଜା ଆନିଂକେ ସାଲ୍ୟାଃକୁ ଆଡିଂଆର୍‌ଗେ ଣ୍ଡୁ, ମେଇଂ ଆନିଂକେ ତୁର୍‌ଡିଂଆର୍‌କେ; ଜାଜା ଆନିଂକେ ତୁର୍‌ଆଡିଂଆର୍‌ଗେ ଣ୍ଡୁ, ମେଇଂ ଆନିଂକେ ଅବାଆର୍‌କେ, ଆରି ଜାଜା ଜାତି ନିଂନେ ଣ୍ଡୁ ଡାଗ୍‌ଡିଂଆର୍‌ଗେ, ଆମେଇଂକେ ଡିଗ୍‌ ନିଂ ବାସଙ୍ଗ୍‌ଣ୍ଡିଂକେ, କେଲା, ନିଂ ପିଙ୍ଗ୍‌ଚାଃ ନ୍ଲେଃକେ । 2 ଜାଜା ନିଜର୍‌ ନିଜର୍‌ ଚିନ୍ତା ଅନୁସାରେ କାରାପ୍‌ ଗାଲି ଅଲେଙ୍ଗ୍‌ଆର୍‌ଏ, ଦେକ୍‌ରକମ୍‌ ବିରଦି ରେମୁଆଁଇଂ ଆଡ଼ାତ୍ରା ନିଂ ପ୍ରାଃସ୍ମି ଜାକ ନିଜର୍‌ ନ୍ତି ମେଲେ ନେବକେ; 3 ଆତେନ୍‌ ରେମୁଆଁଇଂ ଡୁଗ୍‌ଡିଅରିଆ ବଲି ଡିଂଚେଃ ଆରି ଉଃଡ଼ିକ୍ଲିଗ୍‌ ଇଟା ଆଡ଼ାତ୍ରା ଦୁପ୍‌ ଆଃମଃଚେ ନେନେ ସାର୍ମୁଆଃ ସେଃମଁ କାଲାଆଃ ଆନେକେ ବିରକ୍ତ ଆଃଡିଂମ୍ୟାଃଆର୍‌କେ । 4 ମେଇଂ ରାଃଚ୍ୟା ଜାଗାଅରିଆ କମ୍ୟାଃଆର୍‌କେ ଆରି ବୁଃଡ଼ି ଲାଏଃକ୍ନେ ଜାଗା‍ଅରିଆ ମିଡିଗ୍‌ ଡୁଲେଗ୍‌ମ୍ୟାଃଆର୍‌କେ; ମେଇଂ ଗୁବୁଗ୍‌ ଚିଲି ଚଙ୍ଗ୍‌ମ୍ୟାଃଆର୍‌କେ ଆରି ମେଇଂନେ ଗାରିଆମୁତା‍ଅରିଆ ଗିନ୍‌ ଲାଗେମ୍ୟାଃକ୍ନେ ଚିଲିନେ ଣ୍ଡିଆଃ ଆଃ ଲେଃଏ; 5 ମେଇଂ ବାସଙ୍ଗ୍‌ମ୍ୟାଃଆର୍‌କେ, ନିଜର୍‌ ଜାଗା‍ଅରିଆ ତୁଆଁ, ନେ ଡାଗ୍ରା ଆପାଙ୍ଗ୍‌ଗେ, ମେଃଡାଗ୍‌ଲା ନେ ନାଁ ବାନ୍‌ ପବିତ୍ର; ଆକ୍‌ମେଇଂ ନେନେ ମ୍‌ମୁଁଅରିଆ ଦରମ୍‌ ରକମ୍‌ ପ୍ରାଃସ୍ମି ଡୁଆ ଲାଏଃକ୍ନେ ସୁଆ ରକମ୍‌ । 6 କେଲା, ନେ ସେଃମଁ ଆକେନ୍‌ ଗୁଆର୍‌କ୍ନେ ଲାଏଃକେ; ନେ ବୁଙ୍ଗ୍‌ଚେଃ ନେଲେଃ ଣ୍ଡୁ, ମାତର୍‌ ପ୍ରତିପଲ୍‌ ନେବିଃଏ, ହାଁ, ନେ ମେଇଂନେ ନ୍ତିଅରିଆ ପ୍ରତିପଲ୍‌ ନେବିଃଏ, 7 ସଦାପ୍ରବୁ ବାସଙ୍ଗ୍‌ଡିଂକେ, କଣ୍ଡାଇଂ ଆଡ଼ାତ୍ରା ଦୁପ୍‌ ଆଃଡୁଆନାବକେ ଆରି ଡାଆଁ କଣ୍ଡାଇଂ ଆଡ଼ାତ୍ରା ଆନେକେ ନିନ୍ଦା ଡିଂପେବକେ ଜେ ପେ, ପେନେ ପାପ୍‌ ଆରି ପେନେ ନ୍ତାଞ୍ଜାଃଇଂନେ ପାପ୍‌ ସାପାନେ ପ୍ରତିପଲ୍‌ ନେ ଏକାତର୍‌କେ ନେବିଃଏ; ଆକେନ୍‌ସାଃ ନେ ପର୍‌ତୁମ୍‌ ମେଇଂନେ କାମ୍‌ନେ ଇସାବ୍‌ ଡିଂଚେଃ ମେଇଂନେ ନ୍ତିଅରିଆ ନେବିଃଏ । 8 ସଦାପ୍ରବୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ଅଙ୍ଗୁର୍‌ ଜୁପାଅରିଆ ଡିରକମ୍‌ ତ୍ମି ଅଙ୍ଗୁର୍‌ ରସ୍‌ ମିଲେଏ ଆରି ରେମୁଆଁଇଂ ବାସଙ୍ଗ୍‌ମ୍ୟାଃଆର୍‌କେ, ଆକେନ୍‌ ନସ୍‌ଟ ଆରାଃଡିଂଗେ, ମେଃଡାଗ୍‌ଲା ଆକ୍‌ଅରିଆ ଆସିର୍ବାଦ୍‌ ଲାଏଃକେ; ଦେତ୍‌ରକମ୍‌ ନେ ନିଜର୍‌ ଦାସ‍ଇଂ ନ୍‌ସାଃ ନେଡିଂଏ, ନେ ସାପାରେକେ ବିନାସ୍‌ ନେରାଃଡିଂ ଣ୍ଡୁ । 9 ବାରି, ନେ ଯାକୁବବାନ୍‌ ମୁଇଂ ବଂସ ଆରି ଯିହୁଦାବାନ୍‌ ନେନେ କଣ୍ଡାନେ ମୁଇଂ ନେତା ନେରାଃତାର୍‌ଏ ଆରି ନେନେ ସ୍ରିନେବକ୍ନେ ରେମୁଆଁଇଂ ଆତେନ୍‌ ଅଦିକାର୍‌ ଡିଂଆର୍‌ଏ ଆରି ନେନେ ଦାସ‍ଇଂ ଆତ୍‌ଅରିଆ ବାସା‍ଆର୍‌ଏ । 10 ଆରି, ନେନେ ମୁଃଡ଼ି ରେମୁଆଁଇଂ ଆନେକେ ତୁର୍‌ଡିଂଆର୍‌କେ, ମେଇଂନେ ନ୍‌ସାଃ ଶାରୋଣ ମୁଇଂ ସାଲାମିଃ ଆରି ଆଖୋର କଣ୍ଡା ଅରେଃ ଗିମିଃ ଡୁଲେଗ୍‌ନେ ଜାଗା ଡିଂଏ । 11 ମାତର୍‌ ସଦାପ୍ରବୁକେ ଆନ୍ତାର୍‌ନାଡିଂକେ, ନେନେ ପବିତ୍ର କଣ୍ଡାକେ ଆବଃନାଡିଂକେ, ଭାଗ୍ୟ ମାପ୍‌ରୁ ମ୍ନିରେ ଉଗ୍‌ଚଙ୍ଗ୍‌ନେ ଜିନିସ୍‌ ସଜେ ପେଡିଂକେ ଆରି ନିରୂପଣୀ ଦେବିନେ ମ୍ନିରେ ଆଃମିସୁଃକ୍ନେ ଅଙ୍ଗୁର୍‌ ରସ୍‌ ବର୍ତି ଆଃଡିଂପେଡିଂକେ ଜେ ପେ, 12 ଆପେକେ ନେ କାଣ୍ଡା ନ୍‌ସାଃ ନେରାଃରେଏ ଆରି ପେ ସାପାରେ ବଲି ଡିଂନେ ଜାଗା‍ଅରିଆ ପେବ୍ରିଙ୍ଗ୍‌ଏ; ମେଃଡାଗ୍‌ଲା ନିଂ ୱାନେ ବେଲା ପେ ଉତର୍‌ ପେବିଃକେ ଣ୍ଡୁ; ନିଂ ବାସଙ୍ଗ୍‌ନେ ବେଲା ପେ ପେଦ୍ରିଗ୍‌କେ ଣ୍ଡୁ; ମାତର୍‌ ନିଂ ମ୍‌ମୁଁଆଃଅରିଆ ମେଃନେ ଦଦ୍ୟା, ଆତେନ୍‌ ଆଃ ପେ ପେଡିଂକେ ଆରି ମେଃଅରିଆ ନିଂ ଇକ୍‌ଚା ନ୍ନାଡିଂ ଣ୍ଡୁ, ଆତେନ୍‌ ଆଃ ପେସ୍ରିକେ । 13 ଏନ୍‌ସାଃ ମାପ୍‌ରୁ ସଦାପ୍ରବୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, କେଲା, ନିଂନେ ଦାସ‍ଇଂ ଉଗ୍‌ଚଙ୍ଗ୍‌ଆର୍‌ଏ, ମାତର୍‌ ପେ କିଡ଼େସଃ ପେଲେଃଏ; କେଲା, ନିଂନେ ଦାସ‍ଇଂ ଉଗ୍‌ଆର୍‌ଏ, ମାତର୍‌ ଆପେକେ ଉଗ୍‌ଡ୍ୟାଃ ଡ‍ଏ; କେଲା, ନିଂନେ ଦାସ‍ଇଂ ସାର୍ଦା ଡିଂଆର୍‌ଏ, ମାତର୍‌ ପେ ଗିଆସଃ ପେଡିଂଏ; 14 କେଲା, ନିଂନେ ଦାସ‍ଇଂ ମନ୍‌ନେ ସୁକ୍‌ ନ୍‌ସାଃ ଅସ୍‌ମାର୍‌ ସାର୍‌ଆର୍‌ଏ, ମାତର୍‌ ପେ ମନ୍‌ନେ ଦୁକ୍‌ ନ୍‌ସାଃ ପେଅଃଏ ଆରି ଆତ୍ମା କଲ୍‌ବଲ୍ ଡିଙ୍ଗ୍‌ଚେ ହାୟ୍‌ ହାୟ୍‌ ପେଡିଂଏ । 15 ବାରି, ପେ ନେ ନେସ୍ରିକ୍ନେ ରେମୁଆଁଇଂନେ ଡାଗ୍ରା ପେନେ ମ୍ନି ଅବିସାପ୍‌ ପଦ୍‌ ବାବ୍‌ରେ ଲେଃଏ ଆରି ମାପ୍‌ରୁ, ମାପ୍‌ରୁ ଆନାକେ ବାଗୁଏଃଏ; ଆରି, ମେଁ ନିଜର୍‌ ଦାସ‍ଇଂକେ ବିନ୍‌ ମ୍ନିରେ ଡାଉ ଆଃଡିଂଏ; 16 ତେଲା ମୁଃଡ଼ି ରେମୁଆଁ ମଞ୍ଚ୍‌ପୁର୍‌ଅରିଆ ନିଜ୍‌କେ ଆସିର୍ବାଦ୍‌ ଡିଂଆର୍‌ଏ, ମେଁ ସତ୍‌ ପର୍‌ମେସର୍‌ଅରିଆ ନିଜ୍‌କେ ଆସିର୍ବାଦ୍‌ ଡିଂଏ ଆରି ମୁଃଡ଼ି ରେମୁଆଁ ମଞ୍ଚ୍‌ପୁର୍‌ଅରିଆ ପାର୍‌ମାନ୍‌ ଡିଂଏ, ମେଁ ସତ୍‌ ପର୍‌ମେସର୍‌ନେ ବାନ୍‌ ପାର୍‌ମାନ୍‌ ଡିଂଏ; ମେଃନ୍‌ସାଃଡାଗ୍‌ଲା ଅଃସେକାଲ୍‌ନେ ଦୁକ୍‌କସ୍‌ଟ ସାପା ସ୍ଲ ଡିଂଲାଏଃକେ ଆରି ଆତେନ୍‌ ସାପା ନିଂନେ ମ୍‌ମୁଁଆଃଅରିଆ ବାନ୍ ବୁଃଡ଼ି ଲାଏଃକେ ।

ତ୍ମିରେ ତିଆର୍‌ ଡିଙ୍ଗ୍‌ନେ

17 ମେଃଡାଗ୍‌ଲା କେଲା, ନିଂ ତ୍ମି କିତଙ୍ଗ୍‌ଇନି ଆରି ତ୍ମି ମଞ୍ଚ୍‌ପୁର୍‌ ନେରାଃରେଏ ଆରି ଅଃସେ କାଲ୍‌ନେ ସାମୁଆଁ ସାପା ନେ ଏଃତେ ଣ୍ଡୁ, କି ମନେ ଆପାଙ୍ଗ୍‌ ଣ୍ଡୁ । 18 ମାତର୍‌ ମେଃନେ ନିଂ ଣ୍ଡ୍ରାଃରେଏ, ପେ କାଲାଆଃ ଆତ୍‌ଅରିଆ ସାର୍ଦା ଡିଂଚେ ସୁକ୍‌ ପେଡିଂଏ; ମେଃଡାଗ୍‌ଲା କେଲା, ନିଂ ଯିରୂଶାଲମକେ ସୁକ୍‌ ରକମ୍‌ ଆରି ଆତ୍‌ନେ ରେମୁଆଁଇଂକେ ସୁକ୍‌ନେ ଗଡ଼େଅ ଆଃଡିଂଚେ ନେରାଃରେଏ । 19 ବାରି, ନିଂ ଯିରୂଶାଲମଅରିଆ ସୁକ୍‌ ନେରାଃଡିଂଏ ଆରି ନିଂନେ ରେମୁଆଁଇଂନେଅରିଆ ସାର୍ଦା ଣ୍ଡ୍ରାଃଡିଂଏ; ବାରି, ତେନ୍‌ ବିତ୍ରେ ମନେ ତ୍ଲାଗ୍‌ଚେ ଅଃନେ ସବ୍‌ଦ, କି ଅଃନେ ସବ୍‌ଦ ଆରି ଆନ୍ନାଙ୍ଗ୍‌ସା ଣ୍ଡୁ । 20 ତେନ୍‌ ବେଲାବାନ୍‌ ତେନ୍‌ ଜାଗା‍ଅରିଆ ଗଣ୍ଡାଃ ଦିନ୍‌ନେ ଚିର୍ଲାଃଅ କି ଡକ୍ରା ରେମୁଆଁ ଆରି ଆଲେଃ ଣ୍ଡୁ; ମେଃଡାଗ୍‌ଲା ଙ୍ଗିର୍‌ବଃଅ ମୁଇଂସ ମୁଆଁ ବ‍ଏସ୍‌ ଅନୁସାରେ ଗୁଏଃଏ ଆରି ପାପି ମୁଇଂସ ମୁଆଁନେ ରେମୁଆଁ ଡିଂଚେଃ ଅବିସାପ୍‌ ବାଏ । 21 ବାରି, ରେମୁଆଁଇଂ ଡୁଆ ଆଃରେଚେଃ ଆତ୍‌ଅରିଆ ବାସାଆର୍‌ଏ ଆରି ମେଇଂ ଅଙ୍ଗୁର୍‌ ଡୁଗ୍‌ଡି ଆଃରେଚେଃ ଆତ୍‌ନେ ଚୁଚୁ ଚଂଆର୍‌ଏ । 22 ମେଇଂ ଆଃରେଆର୍‌ଲା, ବିନ୍‌ ଜାଡିଗ୍‌ ଆତ୍‌ତେ ଆବାସା ଣ୍ଡୁ; ମେଇଂ ଉଙ୍ଗ୍‌ଆର୍‌ଲା, ବିନ୍‌ ଜାଡିଗ୍‌ ଚୁଚୁ ଆଚଂଆର୍‌ ଣ୍ଡୁ; ମେଃଡାଗ୍‌ଲା ନେନେ ରେମୁଆଁଇଂନେ ବ‍ଏସ୍‌ ସ୍ଲାଃନେ ବ‍ଏସ୍‌ ରକମ୍‌ ଡିଂଏ ଆରି ନେ ନେସ୍ରିକ୍ନେ ରେମୁଆଁଇଂ ଚ୍ଲେ କାଲ୍‌ ଜାକ ନିଜର୍‌ ନ୍ତି ଏଃତେ ଆଃରେକ୍ନେ କାମ୍‌ନେ ଚୁଚୁ ବାଆର୍‌ଏ । 23 ମେଇଂ ବେକାର୍‌ କାମ୍‌ ଆଡିଂଆର୍‌ ଣ୍ଡୁ, କି ବିପଦ୍‌ ନ୍‌ସାଃ ଜନମ୍‌ ଆବିଃଆର୍‌ ଣ୍ଡୁ; ମେଃଡାଗ୍‌ଲା ମେଇଂ ଆରି ମେଇଂନେ ଏଃତେ ମେଇଂନେ ଗଡ଼େଇଂ, ସଦାପ୍ରବୁନେ ଆସିର୍ବାଦ୍‌ ବାଲାଏଃକ୍ନେ ରେମୁଆଁ ଡିଂଏ । 24 ବାରି, ଆକେନ୍‌ ଗଟେଏ ଜେ, ମେଇଂ ୱାନେ ସିସେ ନେ ଉତର୍‌ ନେବିଃଏ ଆରି ମେଇଂ ସାମୁଆଁ ବାସଙ୍ଗ୍‌ନେ ଦାପ୍ରେ ନେ ନେଦ୍ରିଗ୍‌ଏ । 25 ନାକା ଆରି ଉଙ୍ଗ୍‌ମେଣ୍ଡା ମୁଇଂଅରିଆ ଚେଃମୁଆଁ ଚଙ୍ଗ୍‌ଆର୍‌ଏ ଆରି ସିଂଅଁ ଅରେଃ ରକମ୍‌ ନାଡ଼ା ଚଙ୍ଗ୍‌ଏ; ବାରି, ଦୁଲି ବୁବଃନେ କାଦି ଡିଂଏ । ମେଇଂ ନେନେ ପବିତ୍ର କଣ୍ଡାନେ ମେଃଡିଗ୍‌ ଜାଗା‍ଅରିଆ ଇଂସା କି ବିନାସ୍‌ ଆଡିଂଆର୍‌ ଣ୍ଡୁ, ସଦାପ୍ରବୁ ଆକେନ୍‌ ବାସଙ୍ଗ୍‌ଡିଂକେ ।