1 ମାତର୍‌ ଅ ଯାକୁବ, ଜା ଆନାକେ ଆଃରେକେ, ଅ ଇସ୍ରାଏଲ୍‌, ଜା ଆନାକେ ଆଃରେକେ, ଆତେନ୍‌ ମାପ୍‌ରୁ ଏବେ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ; ଆବ୍‌ଟଗେ, ମେଃଡାଗ୍‌ଲା ନେ ଆନାକେ ଉଦାର୍‌ ଡିଂନେବକେ; ନେ ନାଁନେ ମ୍ନି ସାଃଚେ ଆନାକେ ୱାନେବକେ, ନାଁ ନେଁନେ ରେମୁଆଁ । 2 ନାଁ ଣ୍ଡିଆଃ ବିତ୍ରେ ବିଃଚେ ୱେନେ ବେଲା ନେଁ ନାଁନେ ଏଃତେ ନେଲେଃଏ, ଲଣ୍ଡ୍ୟାଃପାଃଡ଼୍ୟାଃ ବିତ୍ରେ ନା‍ଅଲେଙ୍ଗ୍‌ଲା, ଆତେନ୍‌ ସାପା ଆନାକେ ଆରାଃଲଗ୍‌ଡ୍ୟାଃ ଣ୍ଡୁ; ନାଁ ସୁଆ ବିତ୍ରେ ଅଲେଙ୍ଗ୍‌ନେ ବେଲା ନାଗିଃ ଣ୍ଡୁ, କି ପୁଟୁଆଃସ ଆନାକେ ଇରିଃ ଆରାଡିଙ୍ଗ୍‌ ଣ୍ଡୁ । 3 ମେଃଡାଗ୍‌ଲା ନେ ମାପ୍‌ରୁ, ପେନେ ପର୍‌ମେସର୍‌, ଇସ୍ରାଏଲ୍‌ନେ ପବିତ୍ର ଇସ୍‌ପର୍‌, ଆନାକେ ଉଦାର୍ ଉଦାର୍‌ ଡିଂଣ୍ଡ୍ରେ; ମେଁ ଆନେକେ ମୁକ୍‌ତି ବାନେ ମିସର୍ ଦେଶ୍‌କେ ଆରି ଆନାକେ ଆନ୍ତାର୍‌ଚେ କୂଶ ଆରି ଶିବା ଦେସ୍‌ ବିଃନେବକେ । 4 ନାଁ ନେଁ ମ୍‌ମୁଁଆଃଅରିଆ ଜାବର୍‌ ମୁଲ୍ୟ ଆରି ମ୍ନାଃ ରେମୁଆଁ ଡିଂନାଲାଏଃକେ ଆରି ନେ ଆନାକେ ଆଲାଦ୍‌ ଡିଂନେବକେ; ଏନ୍‌ସାଃ ନେ ନାଁ ବାଦୁଲ୍‌ ରେମୁଆଁଇଂକେ ଆରି ନାଁ ଜିବନ୍‌ନେ ବାଦୁଲ୍‌ ରେମୁଆଁ ଜାତିକେ ନେବିଃଏ । 5 ଆବ୍‌ଟଗେ; ମେଃଡାଗ୍‌ଲା ନେ ନାଁ ଏଃତେ ନେଲାଏଃକେ; ନେ ପୁରୁବ୍‌ ଦିଗ୍‌ବାନ୍‌ ନାଁ ବଂସକେ ଡୁଙ୍ଗ୍‌ନେପାଙ୍ଗ୍‌ଏ ଆରି ଲଗ୍‌ସ୍ନି ଦିଗ୍‌ବାନ୍‌ ଆନାକେ ନେରାଃସିଙ୍ଗ୍‌ଏ; 6 ନେ ଉତର୍‌ ଦିଗ୍‌କେ ନେବାସଙ୍ଗ୍‌ଏ, ଆନ୍ତାର୍‌ବିଃ ଆରି ଦକିନ୍‌ ଦିଗ୍‌କେ ନେବାସଙ୍ଗ୍‌ଏ, ତାଃୱାଁ ଆବଗେ; ନେଉଙ୍ଗ୍‌ଇଂକେ ସ୍ଲବାନ୍‌ ଡୁଙ୍ଗ୍‌ପାଙ୍ଗ୍‌ବିଃ ଆରି ସେଲାଇଂକେ ପୁର୍‌ତିବିନେ ମୁଇଂ ଆଡ଼ାନିଆ ଡୁଙ୍ଗ୍‌ପାଙ୍ଗ୍‌ବିଃଲା । 7 ନେ ମ୍ନିରେ ଜା ଡାଉ ଡିଙ୍ଗ୍‌ଲେକେ ଆରି ଆଜାକେ ନେ ନେନେ ଗଉରବ୍‌ ଡିଙ୍ଗ୍‌ସା ଆଃରେନେବକେ, ଦେକ୍‌ରକମ୍‌ ସାପା ରେମୁଆଁକେ ଡୁଙ୍ଗ୍‌ପାଙ୍ଗ୍‌ଲା; ନେ ଆମେକେ ଆଃରେନେବକେ; ହାଁ, ନେ ଆମେକେ ଆଃରେନେବକେ ।

8 ମ୍‌ମୁଁଆଃ ଲାଏଃଚେ କାଣା ଆରି ନ୍ଲୁଗ୍‌ ଲାଏଃଚେ ବ‍ଇରା, ଆକେନ୍‌ ରେମୁଆଁଇଂକେ ଆଃତାର୍‌ଚେ ଡୁଙ୍ଗ୍‌ପାଙ୍ଗ୍‌ଲା । 9 ସାପା ଦେସ୍‌ଣ୍ଡ୍ରେ ମୁଇଂଅରିଆ ରିସିଙ୍ଗ୍‌ଆର୍‌ଲେଃ ଆରି ସାପା ରେମୁଆଁ ଜାତି ମୁଇଂଅରିଆ ରିସିଙ୍ଗ୍‌ଆର୍‌ଲେଃ; ମେଇଂନେ ବିତ୍ରେ ଜାଣ୍ଡେଃ ଆକେନ୍‌ ବାସଙ୍ଗ୍‌ ୟାଏ ଆରି ସିସେନେ ସାମୁଆଁଇଂ ଆନେକେ ଆଃସୁଏଃ ୟାଏ ? ମେଇଂ ନିର୍ଦସି ଡିଂନ୍‌ସାଃ ନିଜର୍‌ ନିଜର୍‌ ସାକି‍ଇଂକେ ଡୁଙ୍ଗ୍‌ପାଙ୍ଗ୍‌ଆର୍‌ଲେଃ; ଣ୍ଡୁଲା ମେଇଂ ଦ୍ରିଗ୍‌ଚେଃ ଆକେନ୍‌ ସତ୍‌ ଡାଗ୍‌ଚେଃ ବାସଙ୍ଗ୍‌ଆର୍‌ଲେଃ । 10 ମାପ୍‌ରୁ ବାସଙ୍ଗ୍‌ଡିଂକେ, ପେ ଡିରକମ୍‌ ମ୍ୟାଃଚେ ନେଅରିଆ ବିସ୍‌ବାସ୍‌ ପେଡିଂଏ ଆରି ନେ ଆତେନ୍‌ ଡାଗ୍‌ଚେଃ ପେବୁଜେଏ, ଆକେନ୍‌ସାଃ ପେ ନେନେ ସାକି ଆରି ନେଙ୍ଗ୍ ସ୍ରିମ୍ୱକ୍ନେ ଦାସ୍‌; ନେ ସିସେ ମେଃଡିଗ୍‌ ଇସ୍‌ପର୍‌ ତିଆର୍‌ ଆଡିଂକେ ଣ୍ଡୁ, କି ନେ ଇଡ଼ିଂ ଆରି ଜା ଆଡିଂ ଣ୍ଡୁ । 11 ନେ, ନେ ଆଃ ମାପ୍‌ରୁ ନେଲାଏଃକେ ଆରି ଆନେ ଆନ୍ତାର୍‌ଚେଃ ଆରି ଜା ଉଦାର୍‌ ଡିଂଣ୍ଡ୍ରେ ଣ୍ଡୁ । 12 ନେ ବାସଙ୍ଗ୍‌ନେବକେ ଆରି ନେ ରକ୍ୟା ଡିଂନେବକେ ଆରି ନେ ଆଃସୁଏଃନେବକେ, ଆରି ପେନେ ବିତ୍ରେ ମେଃଡିଗ୍‌ ବିଦେସି‍ନେ ଦେବ୍‌ତା ଆଲେଃଗେ; ଏନ୍‌ସାଃ ମାପ୍‌ରୁ ବାସଙ୍ଗ୍‌ଡିଂକେ, ପେ ନେନେ ସାକି ପେଲାଏଃକେ ଆରି ନେ ଆଃ ପର୍‌ମେସର୍‌ ନେଲାଏଃକେ । 13 ହାଁ, ଞ୍ଜିର୍‌ ଡିଙ୍ଗ୍‌ନେ ସିସେବାନ୍‌ ନେ ନେଲାଏଃକେ ଆରି ନେନେ ନ୍ତିବାନ୍‌ ଉଦାର୍‌ ଡିଂଣ୍ଡ୍ରେ ଜାଡିଗ୍‌ ଣ୍ଡୁ; ନେ କାମ୍‌ ନେଡିଂଏ, ଆରି ଜା ଆତେନ୍‌ ବିନେ ଆଃଡିଂଏ ?

14 ପେନେ ରକ୍ୟା ଡିଂଣ୍ଡ୍ରେ, ଇସ୍ରାଏଲ୍‌ନେ ପବିତ୍ର ସଦାପ୍ରବୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ନେ ପେନେ ନ୍‌ସାଃ ବାବିଲ୍‌ଅରିଆ ରେମୁଆଁ ବେନେବକେ ଆରି ନେ ତେନ୍‌ ସାପାକେ ଲାଗ୍‌ଡଣ୍ଡ୍ରେ ରକମ୍‌ ଡୁଙ୍ଗ୍‌ନେପାଙ୍ଗ୍‌ଏ; କଲଦୀୟ‍ଇଂକେ ଆଃ ମେଇଂନେ ତରାନିଆ ଆଃଅ ଆଃଅଚେ ଡୁଙ୍ଗ୍‌ନେପାଙ୍ଗ୍‌ଏ । 15 ନେ ମାପ୍‌ରୁ ପେନେ ପବିତ୍ର ରକମ୍‌, ଇସ୍ରାଏଲ୍‌ନେ ସୃସ୍‌ଟିକର୍ତା, ପେନେ ରାଜା ନେଲାଏଃକେ । 16 ଜା କେଣ୍ଡିଆଃଅରିଆ ଗାଲି ଆରି ଜାବର୍‌ ଣ୍ଡିଆଃଅରିଆ ଗାଲି ଆଃଡିଂକେ; 17 ଜା ରତ୍‌ ଆରି ଗଡ଼ା, ସନ୍ୟ ଆରି ଜୁଜ୍‌ ଡିଂଣ୍ଡ୍ରେକେ ଆଃତାର୍‌ଚେ ଡୁଙ୍ଗ୍‌ପାଙ୍ଗ୍‌ଏ । ମେଇଂ ମୁଇଂମାଡ୍‌ରେ ଆଲ ଡୁଲେଗ୍‌ଚେ ଆରି ଆତଃଡ଼୍ୟାଆର୍‌ ଣ୍ଡୁ, ମେଇଂ ଆଃଡୁଆବକ୍ନେ ସାଲ୍‌ତା ରକମ୍‌ ଲିଗ୍‌ୱେଆର୍‌ଏ; ଆତେନ୍‌ ମାପ୍‌ରୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ; 18 ପେ ସିସେ ସାମୁଆଁ ସାପା ଆଏତେଗେପା, କି ବାୱିର୍‌ ସାମୁଆଁ ସାପା ଚିନ୍ତା ଆଡିଂଗେପା । 19 କେଲା, ନେ ମୁଇଂ ତ୍ମି କାମ୍‌ ନେଡିଂଏ; ଆତେନ୍‌ ଏବେ ପଃଡ଼୍ୟାଃଏ; ପେ କି ଆତେନ୍‌ ପେମ୍ୟାଃ ଣ୍ଡୁ ? ଆରି, ନେ କଣ୍ଡା ବିତ୍ରେ ଗାଲି ଆରି ବାଲିଲଃଅରିଆ ଲଣ୍ଡିଆଃପାଃଡ଼୍ୟାଃ ନେରାଃଡିଂଏ । 20 କଣ୍ଡାନେ ପସୁଇଂ, ନାକା ଆରି କୁର୍ମା ପିଗ୍‌ଇଂ ନେନେ ପ୍ରସଂସା ଡିଂଆର୍‌ଏ; ମେଃଡାଗ୍‌ଲା ନେ ନିଜେ ସ୍ରିନେବକ୍ନେ ରେମୁଆଁଇଂନେ ଉଗ୍‌ ନ୍‌ସାଃ କଣ୍ଡା ବିତ୍ରେ ଣ୍ଡିଆଃ ଆରି ବାଲିଲଃଅରିଆ ଲଣ୍ଡ୍ୟାଃପାଃଡ଼୍ୟା ଆଃର୍ମେଲେଃ; 21 ଆତେନ୍‌ ରେମୁଆଁଇଂକେ ନେ ନିଜର୍‌ ପ୍ରସଂସାକେ ବାସଙ୍ଗ୍‌ ନ୍‌ସାଃ ଆଃରେ ନେବକେ ।

22 ଏଲେଡିଗ୍‌ ଅ ଯାକୁବ, ପେ ନେ ଡାଗ୍ରା ପାର୍‌ତନା ଡିଂନାବକେ ଣ୍ଡୁ; ଅ ଇସ୍ରାଏଲ୍‌, ପେ ନେ ଆତ୍‌ଲା ହାଲିଆ ଡିଂନାଲାଏଃକେ ।

23 ନା ନେନେ ସୁଆ ବଲି ନ୍‌ସାଃ ମେଣ୍ଡାଇଂକେ ନେ ଡାଗ୍ରା ଡୁଙ୍ଗ୍‌ପେପାଙ୍ଗ୍‌କେ ଣ୍ଡୁ; କି ପେ ନିଜର୍‌ ବଲି ପୁଜା ବିଃନେ ବାନ୍‌ ନେ ଏତେ ବାଃଲିର୍‌ ବାତା ନାଡିଙ୍ଗ୍‌କେ ଣ୍ଡୁ । ନେ ବଲି ଜିନିସ୍‌ ନ୍‌ସାଃ ଆନାକେ ଚାକର୍‌ କାମ୍‌ ନେରାଃଡିଂକେ ଣ୍ଡୁ; କି ବାସ୍ନା ବିଃନେ ଦୁପ୍‌ ଆତ୍‌ଲା ଆନାକେ ହାଲିଆ ନେରାଃଡିଂକେ ଣ୍ଡୁ । 24 ନା ରୁପା ଡାବୁ ବିଃଚେ ନେ ନ୍‌ସାଃ ବାସ୍‌ନାକ୍ନେ ଦୁପ୍‌ ବିଆର୍‌ ନାବକେ ଣ୍ଡୁ, କି ନା ବଲି ନାବିଃକ୍ନେ କ୍ରି ଅରିଆ ଆନେକେ ସାନ୍ତି ନାରାଃଡିଂକେ ଣ୍ଡୁ; ମାତର୍‌ ପେ ନିଜର୍‌ ପାପ୍‌ବାନ୍‌ ଆନେକେ ଚାକର୍‌ କାମ୍‌ ଆଃଡିଂନାବକେ, ପେ ନିଜର୍‌ ବିନ୍‌ ବିନ୍‌ ପାପ୍‌ କାମ୍‌ଅରିଆ ଆନେକେ ହାଲିଆ ଆଃଡିଂନାବକେ । 25 ନେ, ନେ ଆଃ ନିଜର୍‌ ନ୍‌ସାଃ ନାନେ ପାପ୍‌ କାମ୍‌ ସାପା କେମା ଡିଂଲେଃ ଆରି ନାନେ ପାପ୍‌ ସାପାକେ ନେ ମନେ ନେତ୍ଲାଗ୍ ଣ୍ଡୁ । 26 ଆନେକେ ମନେ ଏତେ ବିଃଲା; ନେ ନିଜର୍‌ ନିଜର୍‌ ବିତ୍ରେନେ ବିଚାର୍‌ ନେଃଡିଂପା; ପେ ଦସ୍‌ ମାଡିଙ୍ଗ୍‌ ନ୍‌ସାଃ ନିଜର୍‌ ସାମୁଆଁ ବାସଙ୍ଗ୍‌ । 27 ପେନେ ପର୍‌ତୁମ୍ ନ୍ତା ଞ୍ଜାନେ ଆବା ପାପ୍‌ ଡିଂବକେ ଆରି ନାଡାଗ୍ରା ଲେକ୍ନେ ରେମୁଆଁଇଂ ନେ ବିରୁଦ୍‌ରେ ପାପ୍‌ କାମ୍‌ ଡିଂବ‍ଆର୍‌କେ । 28 ଆକେନ୍‌ସାଃ ନେ ପବିତ୍ର ଜାଗାନେ ନେତାଇଂକେ ଅପବିତ୍ର ନେରାଃଡିଂଏ, ନେ ଯାକୁବକେ ଅବିସାପ୍‌ ନେବିଏ ଆରି ଇସ୍ରାଏଲ୍‌କେ ନିନ୍ଦା ନେଡିଂଏ ।