ଜିସାୟ 42

ମାପ୍‌ରୁ ବାଚେବକ୍ନେ ସେବକ

1 ଆଜାକେ ନେଃ ନେସାଃଏ, ଦେକ୍‌ରକମ୍‌ ନେନେ ଦାସ୍‌କେ, ଜାନେଅରିଆ ନେନେ ମନ୍‌ ଲେଃକେ, ଦେକ୍‌ରକମ୍‌ ନେନେ ସ୍ରିନେବକ୍ନେ ରେମୁଆଁକେ କେଲା; ନେ ମେଁନେ ଆଡ଼ାତ୍ରା ନେନେ ଆତ୍ମା ବିଃନେବକେ; ମେଁ ସର୍‌ତେ ଦେସ୍‌ନେ ବିତ୍ରେ ସତ୍‌ ବିଚାର୍‌ ଡୁଙ୍ଗ୍‌ପାଙ୍ଗ୍‌ଏ । 2 ମେଁ କିର କି ଜାବର୍‌ ସବ୍‌ଦ ଆଡିଂ ଣ୍ଡୁ, କି ଅସାର୍‌ ଗାଲିନିଆ ନାନେ ସାମୁଆଁ ଆରାଃଅଁ ଣ୍ଡୁ । 3 ମେଁ ପସ୍‌କା ଚେଃମୁଆନେ ନାଲାକେ ଆପାକ୍‌ଚି ଣ୍ଡୁ ଆରି ମାଃସ ତାର୍‌ନେ ସଲ୍‌ତା ଆରାଃଲିଗ୍‌ ଣ୍ଡୁ; ମେଁ ସତ୍‌ ବାବ୍‌ରେ ସତ୍‌ ବିଚାର୍‌ ଡୁଙ୍ଗ୍‌ପାଙ୍ଗ୍‌ଏ । 4 ମେଁ ମଚ୍‌ପୁର୍‌ଅରିଆ ସତ୍‌ ବିଚାର୍‌ ମାଡିଂନେ ଜାକ ମେଁ ସାତାଲୁ ଆରି ମନ୍‌ ଆବାଙ୍ଗେ ଣ୍ଡୁ । ଆରି, କେଣ୍ଡିଆ ମଜେ ଲେକ୍ନେ କୁପ୍‌ଲିଇଂ ମେଁନେ ନିଅମ୍‌କେ ଉର୍‌ ଲେଃଆର୍‌ଏ । 5 ମେଁ କିତଙ୍ଗ୍‌ଇନି ତିଆର୍‌ ଡିଂଚେ ଅସାର୍‌ ଆଃଡିଂକେ; ଜା ତୁବଃ ଆଲ ଆରି ଆତ୍‌ଅରିଆ ଜନମ୍‌ ଡିଂକ୍ନେ ସାପା ଜିନିଷ୍‌କେ ବେବିଃକେ; ଜା ତେନ୍‌ ଆଡ଼ାତ୍ରା ଲେଃକ୍ନେ ସାପା ରେମୁଆଁକେ ପୁଣ୍ଡା ରାଙ୍ଗ୍‌ଡନେ ପୁଣ୍ଡା ଗୁଃନେ ବିଃଏ ଆରି ତେନ୍‌ ବିତ୍ରେ ଅଲେଙ୍ଗ୍‌ଡାଲ୍ୟାଣ୍ଡ୍ରେକେ ଜିବନ୍‌ ବିଃଏ, ଆତେନ୍‌ ମାପ୍‌ରୁ ପର୍‌ମେସର୍‌ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ; 6 ନେ ମାପ୍‌ରୁ, ଦର୍ମରେ ଆନାକେ ୱା ନେବକେ ଆରି ନାଁନେ ନ୍ତି ସାଃଚେ ଆନାକେ ରକ୍ୟା ନେଡିଂଏ, ଆରି କାନାଇଂକେ ମ୍‌ମୁଁଆଃ ଆଃକେନେ ନ୍‌ସା, ବନ୍ଦି‍ଇଂକେ ଜେଲ୍‌କାନାବାନ୍‌ ଆରି ତାଙ୍ଗ୍‌କିଗ୍‌ଅରିଆ କଲେଃଆର୍‌କ୍ନେ ରେମୁଆଁଇଂକେ ବନ୍ଦି ଡୁଆବାନ୍‌ ଆଃତାର୍‌ଚେ ଡୁଙ୍ଗ୍‌ପାଙ୍ଗ୍‌ ନ୍‌ସାଃ, 7 ନେ ଆନାକେ ରେମୁଆଁଇଂନେ ନିଅମ୍‌ ରକମ୍‌ ଆରି ସାପା ଦେସ୍‌ନେ ତାର୍କିଗ୍‌ ରକମ୍‌ ଆଃଡିଂଚେ ନାବାଚେଏ । 8 ନେ ମାପ୍‌ରୁ, ଆକେନ୍‌ ନେନେ ମ୍ନି; ବାରି, ନେ ନେନେ ମ‍ଇମା ବିନ୍‌ ରେମୁଆଁକେ ନେଃବି ଣ୍ଡୁ, କି ନେନେ ପ୍ରସଂସା ଆଃରେକ୍ନେ ମୁର୍ତି‍ଇଂକେ ନେବିଃ ଣ୍ଡୁ । 9 କେଲା, ଅଃସେନେ ସାମୁଆଁଇଂ ପୁରନ୍‌ ଡିଂଗେ, ଆରି ନେ ତ୍ମି ସାମୁଆଁ ସାପା ଆଃସୁଏ ନେବକେ; ତେନ୍‌ ସାପା ଗଟେନେ ସିସେ ତେନ୍‌ ସାମୁଆଁ ନେ ଆପେକେ ନେରାଃମ୍ୟାଏ ।

ମହିମାନେ ଅସ୍‌ମାର୍‌

10 ଅ କେଣ୍ଡିଆଃଅରିଆ ୱେନେ ରେମୁଆଁ ଆରି କେଣ୍ଡିଆଃ ମଜେ ଲାଏଃକ୍ନେ ସାପାରେ, ଅ କୁପ୍‌ଲି ଇଂ ଆରି ଆତ୍‌ଅରିଆ ବାସାନେ ରେମୁଆଁଇଂ, ପେ ସାପାରେ ମାପ୍‌ରୁନେ ମ୍ନିରେ ତ୍ମି ଅସ୍‌ମାର୍‌ ଆରି ମଚ୍‌ପୁର୍‌ନେ କନେ କନେ ପ୍ରସଂସା ଡିଂପା । 11 ବାଲିଲନିଆ ଆରି ଆତ୍‌ନେ ସହର୍‌ ସାପା, କେଦାର୍‌ଅରିଆ ବାସାକ୍ନେ ହିନି ସାପା ଜାବର୍‌ ୱାଃସାର୍‌ଆର୍‌ଲେଃ; ସେଲା ଇନିନିଆ ବାସାଣ୍ଡ୍ରେ ସାର୍‌ଆର୍‌ଲେଃ, କଣ୍ଡାନେ ଟିପେବାନ୍‌ ମେଇଂ ୱାସାର୍‌ ଆର୍‌ଲେଃ । 12 ମେଇଂ ମାପ୍‌ରୁକେ ଗଉରବ୍‌ ବିଃଆର୍‌ଲେ ଆରି କେଣ୍ଡିଆ ମଜେ ଲେକ୍ନେ କୁପ୍‌ଲିଇଂ ବିତ୍ରେ ମେଁନେ ପ୍ରସଂସା ବାସଙ୍ଗ୍‌ଆର୍‌ଲେଃ । 13 ମାପ୍‌ରୁ ବିର ରକମ୍‌ ପାଙ୍ଗ୍‌ଏ, ମେଁ ବିରନେ ନିଆୟ୍‌ ମେଁନେ ସାର୍ଦା ଜାବର୍‌ ଆଃଡିଂଏ । ମେଁ ଜାବର୍‌ ୱାଃସାର୍‌ଏ, ହାଁ, ମେଁ ଜାବର୍‌ ୱାଃସାର୍‌ଏ; ମେଁ ନିଜର୍‌ ସତ୍ରୁଇଂନେ ବିରୁଦ୍‌ରେ ମ୍ନା ବପୁ ଆଃକେଏ ।

ପର୍‌ମେସର୍‌ନେ ପାର୍‌ମାନ୍

14 ନେ ଜାବର୍‌ ଦିନ୍‌ ବୁଙ୍ଗ୍‌ନେଲାଏଃକେ; ନେ ବୁଙ୍ଗ୍‌ଲାଏଃଚେ ନିଜ୍‌କେ ଆଲିଆ ଆଃଡିଂନେବକେ; ଏବେ ନେ ଣ୍ଡିଆଃକୁମାନେ ସେଲାମ୍ବୁଏଃ ସୁଗୁଆ ନେୱାଏ; ନେ ମୁଇଂତର୍‌କେ ଚ୍ଲେ ପୁଣ୍ଡା ଗୁଃଚେ ୱାସାର୍‌ନେ । 15 ନେ କଣ୍ଡା ଆରି ମ୍ନାଃ ମ୍ନାଃ କଣ୍ଡାଇଂକେ ବିନାସ୍‌ ନେରାଃଡିଂଏ ଆରି ଆତ୍‌ନେ ଚେଃମୁଆଁ ସାପା ଆଃନ୍‌ସୁଆର୍‌ ନେବିଃଏ; ଆରି, ନେ ଲଣ୍ଡିଆଃପାଃଡ଼୍ୟାଃକେ କୁପ୍‌ଲିକେ ଆରି ଣ୍ଡିଆଃଲେକ୍ନେ ଜାଗାକେ ଆଃନ୍‌ସୁଆର୍‌ ନେବିଃଏ । 16 ବାରି, ନେ କାନାଇଂକେ ମେଇଂନେ ଆମ୍ୟାଃକ୍ନେ ଗାଲିପାକା ରାଙ୍ଗ୍‌ନେପାଙ୍ଗ୍‌ଏ; ଆଣ୍ଡିନେ ଗାଲି ମେଇଂ ଆମ୍ୟାଃଆର୍‌ ଣ୍ଡୁ, ଆତେନ୍‌ ସାପା ଗାଲିଅରିଆ ଆମେଇଂକେ ନେବେଏ; ନେ ମେଇଂନେ ସେଃମଁ ତାଙ୍ଗ୍‌କିଗ୍‌କେ ତାର୍କିଗ୍‌ ଆରି ଆଡ଼୍‌କି ବିଡ଼୍‌କି ଡିଂଲାଏଃକ୍ନେ ଜାଗା ସାପାକେ ସିଦା ନେରାଃଡିଂଏ । ଆକେନ୍‌ ସାପା କାମ୍‌ ନେ ଡିଂଚେ ଆମେଇଂକେ ନେଆନ୍ତାର୍‌ ଣ୍ଡୁ । 17 ଜାଜା ନ୍ତି ଏଃତେ ଆଃରେକ୍ନେ ମୁର୍ତିଅରିଆ ବିସ୍‌ବାସ୍‌ ଡିଂଆର୍‌ଏ ଆରି ଚଞ୍ଚ୍‌ ଏଃତେ ଆଃରେକ୍ନେ ମୁର୍ତିକେ ପେ ନେନେ ଇସ୍‌ପର୍‌ ଡାଗ୍‌ଚେ ବାସଙ୍ଗ୍‌ଆର୍‌ଏ, ମେଇଂ ସାର୍ମୁଆଃ ବୁଃଡ଼ିଚେ ଆରି ଜାବର୍‌ ଗିଆସଃଆର୍‌ଏ ।

ଇସ୍ରାଏଲ୍‌ ସିକେନ୍‌ସା ଆୟାଆର୍‌କେ

18 ଅ ବ‍ଇରାଇଂ ଦ୍ରିଗ୍‌ପା; ଅ କାଣାଇଂ, ପେ କିକେନ୍‌ସାଃ କେଲାପା । 19 ନେନେ ଚାକର୍‌କେ ଆନ୍ତାର୍‌ଚେଃ କାଣା ଜାଣ୍ଡେଃ ? ବାରି ନେ କବର୍‌ ବିଃନେ ଦୁତ୍‌ ରକମ୍‌ ଜାଣ୍ଡେଃ ବଇରା ? ନେ ଏଃତେ ମିସୁଃଚେ ଲାଏଃକ୍ନେ ରେମୁଆଁ ରକମ୍‌ କାଣା ଆରି ମାପ୍‌ରୁନେ ଦାସ୍‌ ରକମ୍‌ କାଣା ଜାଣ୍ଡେଃ ? 20 ପେ ଗୁଲୁଏ ସାମୁଆଁ କିକେ ପେଡିଂକେ, ମାତର୍‌ ଦିଆନ୍‌ ବିଃପେଡିଂକେ ଣ୍ଡୁ; ମେଁନେ ନ୍ଲୁଗ୍‌ ଲାଏଃକେ, ମାତର୍‌ ମେଁ ଦ୍ରିଗ୍‌ଆଡିଂକେ । 21 ମାପ୍‌ରୁ ନିଜର୍‌ ଦର୍ମ ସାମୁଆଁରେ ନିଅମ୍‌କେ ମ୍ନାଃ ଆଡିଙ୍ଗ୍‌ସା ଆରି ଗୌରବ୍ ଆଃଡିଂନ୍‌ସାଃ ଇକ୍‌ଚା ଡିଂକେ । 22 ମାତର୍‌ ଆକେନ୍‌ ରେମୁଆଁଇଂ ଟେକେ ରାଙ୍ଗ୍‌ୱେବକେ ଆରି ଡଙ୍ଗାବଆର୍‌କେ । ତେନ୍‌ ସାପାରେ କୁରୁଅରିଆ ପାସି ଡିଙ୍ଗ୍‌ଲେ ଆର୍‌କେ ଆରି ଜେଲ୍‌ ଡୁଆ ନିଆ ବୁଃଡ଼ିଲେ ଆର୍‌କେ । ଆମେଇଂକେ ସାଃ ବ ଆର୍‌କେ ବାରି ଆମେଇଂକେ ରକ୍ୟା ଡିଂଣ୍ଡ୍ରେ ଜାଡିଗ୍‌ ଣ୍ଡୁ; ମେଇଂ ଡଙ୍ଗାକ୍ନେ ରକମ୍‌ ଡିଂନ୍‌ସାଃ ଲେଃଆର୍‌କେ ଆରି ଆଃଆଣ୍ଡେ ବିଃପା ଡାଗ୍‌ଚେଃ ବାସଙ୍ଗ୍‌ଣ୍ଡ୍ରେ ଜାଡିଗ୍‌ ଣ୍ଡୁ । 23 ଆକେନ୍‌ ସାମୁଆଁ ଜା ଦ୍ରିଗ୍‌ଏ ଆରି ଦ୍ରିଗ୍‌ଚେଃ ଇଡ଼ିଂଡେ ନ୍‌ସାଃ ଦିଆନ୍‌ ବିଃଏ, ପେନେ ବିତ୍ରେ ଦେକ୍‌ରକମ୍‌ ରେମୁଆଁ ଜା ଲାଏଃକେ ? 24 ଯାକୁବକେ ଡଙ୍ଗା ବ୍ନ ରକମ୍‌ ଡିଂନ୍‌ସାଃ ଆରି ଇସ୍ରାଏଲ୍‌କେ ଗୁଃରାଙ୍ଗ୍‌ଣ୍ଡ୍ରେନେ ନ୍ତିଅରିଆ ଜା ଆଃସାଃ ବିଃକେ ? ଜାନେ ବିରୁଦ୍‌ରେ କି ନେ ପାପ୍‌ ଡିଂନେବକେ ଆରି ଜାନେ ଗାଲିଅରିଆ କି ରେମୁଆଁଇଂ ଅଲେଙ୍ଗ୍‌ ନ୍‌ସାଃ ରାଜି ଆଡିଂଆର୍‌କେ ଣ୍ଡୁ, ବା ମେଇଂ ଜାନେ ନିଅମ୍‌କେ ଅମାନି ଡିଂଆର୍‌କେ, ଆତେନ୍‌ ମାପ୍‌ରୁ କି ଆକେନ୍‌ ଡିଂଆବକେ ? 25 ଏନ୍‌ସାଃ ମେଁ ମେଁନେ ଆଡ଼ାତ୍ରା ମେଁନେ ରିସା ଆରି ଜୁଦ୍ ଡିଙ୍ଗ୍‌ନେ ବପୁ କିଗ୍‌ବିଃକେ; ତେଲା ଆତେନ୍‌ କ୍ଲିଗ୍‌ପାକା ସୁଆ ଡୁଆ ୱେକେ, ମାତର୍‌ ମେଁ ଆମ୍ୟାଃକେ ଣ୍ଡୁ; ବାରି, ସୁଆ ଆମେକେ ଆଃଗିଃ ବିଃକେ, ଏଲେଡିଗ୍‌ ମେଁ ଦିଆନ୍‌ ଆବିଃକେ ଣ୍ଡୁ ।