1 ରେମୁଆଁ ଣ୍ଡୁନେ ଦେସ୍‌ ଆରି ଣ୍ଡିଆଃ ଣ୍ଡୁନେ ଜାଗା ସାର୍ଦା ଡିଂଏ; ଆରି, ବାଲିଲଃ ଜାଗା ଉସାସ୍‌ ଡିଂଚେ ଗୋଲାପ୍‌ ସାରି ରକମ୍‌ ସାରିଚେ ଚୁଏ । 2 ଆତେନ୍‌ ଜାବର୍‌ ଡିଂଚେ ସାରିଏ ଆରି ଚୁଏ, ବାରି ସାର୍ଦା ଆରି ଅସ୍‌ମାର୍‌ ସାର୍‌ଚେ ଉସାସ୍‌ ଡିଂଏ; ଲିବାନୋନ୍‌ନେ ତାରାସ୍‌, କର୍ମିଲ୍‌ ଆରି ଶାରୋଣନେ ମ‍ଇମା ଆମେକେ ବିଃଏ; ମେଇଂ ମାପ୍‌ରୁନେ ସବା ଆରି ନେନେ ପର୍‌ମେସର୍‌ନେ ତାରାସ୍‌ କେଆର୍‌ଏ । 3 ପେ ସାତାଲୁ ନ୍ତିକେ ଡାଟ୍‌ ଆଃଡିଂପା ଆରି ଜୁର୍‌ଡିଃ ଡିଂଡିଂକ୍ନେ ମାଣ୍ଡିକେ ଚୁପ୍‌ ଆଃଡିଂପା । 4 ବୁଟମେଗ୍‌ ରେମୁଆଁକେ ଆକେନ୍‌ ବାସଙ୍ଗ୍‌, ସାହାସିକ୍‌ ଡିଂପା, ଆବ୍‌ଟଗେପା; କେଲାପା, ପେନେ ପର୍‌ମେସର୍‌ ପ୍ରତିସଦ୍‌ ସାଃଚେ ପାଙ୍ଗ୍‌ଏ ଆରି ପର୍‌ମେସର୍‌ ଡଣ୍ଡ୍‌ ବିଃନ୍‌ସାଃ ପାଙ୍ଗ୍‌ଏ । ମେଁ ପାଙ୍ଗ୍‌ଚେ ଆପେକେ ଉଦାର୍‌ ଡିଙ୍ଗ୍‌ଏ । 5 ଅଃତେନ୍‌ବେଲା କାଣାଇଂନେ ମ୍‌ମୁଁଆଃ ତ୍ନାଏ ଆରି ବ‍ଇରାଇଂନେ ନ୍ଲୁଗ୍‌ ରଃୱେଏ । 6 ଅଃତେନ୍‌ବେଲା ଚଟା ରେମୁଆଁ ଏଲା ରକମ୍‌ ପୁଏଃଏ ଆରି କନ୍ଦାଇଂନେ ନ୍ଲିୟା ଅସ୍‌ମାର୍‌ ସାର୍‌ଏ; ଆରି କଣ୍ଡାବାନ୍‌ ଣ୍ଡିଆ ତାର୍‌ଏ ଆରି ବାଲିଲଃଅରିଆ ଜଲା ତାର୍‌ଏ । 7 ବାରି, ବାଲିଲଃ ଜାଗା କେଣ୍ଡିଆଃ ଡିଂୱେଏ ଆରି ନ୍‌ସୁଆର୍ୟାଃକ୍ନେ ତୁବଃ ଜଲାଡ଼୍ୟାଃ ଡିଂୱେଏ; ନାକାଇଂନେ ଡୁଆ ବିତ୍ରେ ମେଇଂନେ ଡୁଲେଗ୍‌ନେ ଜାଗା‍ଅରିଆ ଚେଃମୁଆଁ, ନାଲ୍‌ ଆରି ଣ୍ଡିଆଃ ଆଃଡ଼ାଃ ଲେଃକ୍ନେ ନାଡ଼ା ସ୍ଲାଃ ମ୍ନାଃଏ । 8 ବାରି, ଆତ୍‌ଅରିଆ ମୁଇଂ ଅସାର୍‌ ଗାଲି ଡିଂଏ, ଆତେନ୍‌ ପବିତ୍ର ଗାଲି ଡାଗ୍‌ଚେ ବାସଙ୍ଗ୍‌ଆର୍‌ଏ; ଆତେନ୍‌ ମୁଇଂ ମେଇଂନେ ଆତ୍‌ଲା ଡିଂଏ, ମାତର୍‌ ମେଃଡିଗ୍‌ ଅସୁଚି ରେମୁଆଁ ଆତେନ୍‌ ଆଡ଼ାତ୍ରା ଆ‍ଅଲେଙ୍ଗ୍‌ ଣ୍ଡୁ; ଗାଲି ଅଲେଙ୍ଗ୍‌ ରେମୁଆଁ ଆରି ଅଗ୍ୟାନ୍‌ ରେମୁଆଁଇଂ ଡିଗ୍‌ ଆତାନ୍ ଗାଲି ଅଲେଙ୍ଗ୍‌ ନ୍‌ସାଃ ଆବ୍‌ଟଆର୍ ଣ୍ଡୁ । 9 ଆତ୍‌ଅରିଆ ସିଂଅଁ ଡିଗ୍‌ ଆଲେଃ ଣ୍ଡୁ, କି ମେଃଡିଗ୍‌ ଜନ୍ତୁ ତେନ୍‌ ଆଡ଼ାତ୍ରା ଆୱେ ଣ୍ଡୁ, ମେଇଂ ଆତ୍‌ଅରିଆ ଆତ୍ନାଆର୍‌ ଣ୍ଡୁ, ମାତର୍‌ ଉଦାର୍‌ ବାକ୍ନେ ରେମୁଆଁଇଂ ଆତ୍‌ଅରିଆ ୱେଆର୍‌ଏ; 10 ବାରି, ମାପ୍‌ରୁନେ ବାନ୍‌ ଉଦାର୍‌ ବାକ୍ନେ ରେମୁଆଁଇଂ ଆଣ୍ଡେ ଆର୍‌ଏ ଆରି ଅସ୍‌ମାର୍‌ ସାର୍‌ ସାର୍‌ଚେ ସିୟୋନ‍ଅରିଆ ପିଙ୍ଗ୍‌ଚାଃଆର୍‌ଏ ଆରି କାଲାଆଃ ଲେଃନେ ସାର୍ଦା ମେଇଂନେ ବାଆଃନେ ମୁକୁଟ୍‌ ଡିଂଏ; ମେଇଂ ସାର୍ଦା ଆରି ସୁକ୍‌ ବାଆର୍‌ଏ, ବାରି ଦୁକ୍‌ ଆରି ଅଃନେ ସ୍ଲ ଡିଙ୍ଗ୍‌ୱେଏ ।