ଜିସାୟ 47

ବାବିଲ୍‌ନେ ବିଚାର୍‌

1 ଆଗୋ ବାବିଲ୍‌ନେ ମାବିହେକ୍ନେ ସେଲାଇଂ, ପେ ଜାର୍‌ଚେଃ ଦୁଲିଅରିଆ କଲାପା; ଆଗୋ କଲଦୀୟନେ ସେଲାଇଂ, ସିଂଆଁସନ୍‌ ଆନ୍ତାର୍‌ଚେଃ ତୁବଃଅରିଆ କଲାପା; ମେଃଡାଗ୍‌ଲା ପେ ଆରି ବ୍ନୁ ଆରି ବ୍ନୁ ଗାଗ୍‌ଡ଼େ ଡାଗ୍‌ଚେଃ ପେଲେଃଣ୍ଡୁ । 2 ପିନେଡିର୍‌ ରାଙ୍ଗ୍‌ୱେଚେଃ କିଆଉଁଆଃ ଉଃପା, ପେନେ ଅଡ଼୍‌ନା ତଃପା, ସକାପାଟାଇ ତଃବିଃପା, ଞ୍ଚ ଖାଲି ଆଃଡିଂପା, ଲଣ୍ଡ୍ୟାଃପାଃଡ଼୍ୟା ଅଲେଙ୍ଗ୍‌ଚେଃ ୱେଲାପା । 3 ପେନେ ଡୁମ୍‌ଡା ଗାଗ୍‌ଡ଼େ ତ୍ନାଏ, ହାଁ, ପେନେ ଗିଆସଃନେ ସାମୁଆଁ ତ୍ନାଏ; ନେ ପ୍ରତିସଦ୍‌ ରାଙ୍ଗ୍‌ନେଡ‍ଏ, ବାରି ଜାନେଡିଗ୍‌ ଗୁଆରି ନେମାନେଃ ଣ୍ଡୁ । 4 ନେନେ ରକ୍ୟା ଡିଂଣ୍ଡ୍ରେ ଇସ୍ରାଏଲ୍‌ନେ ପବିତ୍ର ଇସ୍‌ପର୍‌, ସନ୍ୟାଦିପତି ମାପ୍‌ରୁ, ମେଁନେ ମ୍ନି । 5 ଆଗୋ କଲଦୀୟଇଂନେ ସେଲାଇଂ, ପେ ତାଙ୍ଗ୍‌କିଗ୍‌ଅରିଆ ୱେଚେଃ ଚୁପ୍‌ଚାପ୍‌ ଡିଂଚେ କଲାପା; ମେଃଡାଗ୍‌ଲା ରାଜ୍ୟ‍ଇଂନେ ସାସନ୍ ଡିଂନେ ଇଃସାଙ୍ଗ୍‌ବୁଏଃ ଡାଗ୍‌ଚେଃ ପେ ଆରି ଡାଉ ପେଡିଂଣ୍ଡୁ । 6 ନେ ନିଜର୍‌ ରେମୁଆଁଇଂ ଆଡ଼ାତ୍ରା ରିସା ଡିଂଚେଃ ନିଜର୍‌ ଅଦିକାର୍‌କେ ଅପବିତ୍ର ନେରାଃଡିଂକେ ଆରି ନା ନ୍ତିଅରିଆ ଆମେଇଂକେ ନେଅପେଃକେ; ନାଁ ମେଇଂନେ ଆଡ଼ାତ୍ରା ମେଃଡିଗ୍‌ ଲିବିସଃ ନାରାଃସୁଏଃକେ ଣ୍ଡୁ; ନାଁ ଡକ୍ରା ରେମୁଆଁ ଆଡ଼ାତ୍ରା ନାଁନେ ଅଜନ୍‌କ୍ନେ ରିଗ୍‌ନ ଆଃନିଗ୍‌ ନାବକେ । 7 ବାରି, ନାଁ ନାବାସଙ୍ଗ୍‌କେ, ନେ ଜୁଗ୍‌ଜୁଗ୍‌ ଇଃସାଙ୍ଗ୍‌ବୁଏଃ ଡିଂଚେଃ ନେଲେଃଏ; ଏନ୍‌ସାଃ ପେ ଆକେନ୍‌ ସାପା ବିସ‍ଏରେ ଦିଆନ୍‌ ନାବିଃକେ ଣ୍ଡୁ, କି ଆତ୍‌ନେ ସାରାସାରି ଗଟେନେ ବିସୟ୍‌ରେ ମନେ ନାଏତେକେ ଣ୍ଡୁ । 8 ଏନ୍‌ସାଃ ଅଃ ସୁକ୍‌ ବାପେଡିଂକ୍ନେ ସେଲାମ୍ବୁଏଃଇଂ, ଏବେ ଆକେନ୍‌ ଦ୍ରିଗ୍‌ପା, ପେ ମାବ୍‌ଟକୁଣ୍ଟା ବାସାଚେଃ ମନେ ମନେ ବାସଙ୍ଗ୍‌ପେଡିଂକେ, ନେ ନେଲାଏଃକେ, ଆନେକେ ଆନ୍ତାର୍‌ଚେଃ ଆରି ଜାଡିଗ୍‌ ଣ୍ଡୁ; ନେ ଗୁଏଃସାଙ୍ଗ୍‌କୁଏଃ ରକମ୍‌ ନେକ ଣ୍ଡୁ, କି ଗଡ଼େଇଂକେ ଉଙ୍ଗ୍‌ ଆନ୍ତାର୍‌ଚେ ନେକ ଣ୍ଡୁ; 9 ମାତର୍‌ ଉଙ୍ଗ୍‌ ଆନ୍ତାର୍‌ନେ ଆରି ଗୁଏଃସାଙ୍ଗ୍‌କୁଏଃ ଏନ୍‌ ମ୍ବାକ୍ଲିଗ୍‌ ମୁଇଂ ବେଲା, ମୁଇଂ ଦିନା ନାଁ ଆଡ଼ାତ୍ରା ଗଟେଏ; ନାଁନେ ଗୁଲୁଏ ଡିସାରି ଆରି ମାଲେ ଗୁନିଆ ଲେଃଲା ଡିଗ୍‌, ତେନ୍‌ ମ୍ବାକ୍ଲିଗ୍‌ ପୁରାପୁରି ବାବ୍‌ରେ ନାଁ ଆଡ଼ାତ୍ରା ଗଟେଏ । 10 ମେଃଡାଗ୍‌ଲା ନାଁ ନିଜର୍‌ କାରାପ୍‌ କାମ୍‌ଅରିଆ ଆସା ନାବକେ; ନାଁ ବାସଙ୍ଗ୍‌ନାବକେ, ଜାଡିଗ୍‌ ଆନେକେ କିକେ ଆଡିଂକେ ଣ୍ଡୁ, ନାଁନେ ବୁଦି ଆରି ସିକ୍ୟା ଆନାକେ ଦଦ୍ୟା ଆଃଡିଂବକେ; ବାରି ନାଁ ନିଜର୍‌ ମନେ ମନେ ବାସଙ୍ଗ୍‌ନାବକେ, ନେ ନେଲାଏଃକେ, ଆନେକେ ଆନ୍ତାର୍‌ଚେଃ ଆରି ଜାଡିଗ୍‌ ଣ୍ଡୁ । 11 ଏନ୍‌ସାଃ ପେ ଆଡ଼ାତ୍ରା ଦୁକ୍‌ କସ୍‌ଟ ପାଙ୍ଗ୍‌ଏ, ପେ ଆତେନ୍‌ ପାଙ୍ଗ୍‌ନେ ପେମ୍ୟାଃ ଣ୍ଡୁ; ବାରି, ପେ ଆଡ଼ାତ୍ରା ବିପଦ୍‌ ପାଙ୍ଗ୍‌ଏ, ପେ ଆତେନ୍‌ ସ୍ଲ ଆଃଡିଂ ପେୟା ଣ୍ଡୁ; ଆରି, ମେଃନେ ପେ ମ୍ୟାଃପେଡିଂକେ ଣ୍ଡୁ, ଦେକ୍‌ରକମ୍‌ ବିନାସ୍‌ ମାରିୟାଃତୁଗ୍‌ ପେ ଆଡ଼ାତ୍ରା ପାଙ୍ଗ୍‌ଏ । 12 ପେ ଚିର୍ଲାଃଅବାନ୍‌ ନିଜର୍‌ ମୁଃଡ଼ି ଗୁନିଆ ଆରି ଗୁଲୁଏ ଡିସାରିଅରିଆ କାମ୍‌ ଡିଂଚେଃ ପାଙ୍ଗ୍‌ପେଲାଏଃକେ, ଏବେ ଆତେନ୍‌ ଡିଙ୍ଗ୍‍ପା । ଇଙ୍ଗ୍‌ଚାଃ ଆପେକେ ସାଇଜ ଡିଙ୍ଗ୍‍ୟାଏ, ଇଙ୍ଗ୍‌ଚାଃ ପେ ଜିତେ ପେୟାଏ । 13 ନା ନାନେ ଗୁଲୁଏ ଉପାୟ୍ ଡିଙ୍ଗ୍‌ଚେ ହାଲିଆ ଡିଂପେଲାଏଃକେ; ଏବେ ପାଞ୍ଜି କେଣ୍ଡ୍ରେଇଂ, ଜଗ୍‌ କିକେଣ୍ଡ୍ରେ, ଆର୍କେକେ ଶୁଭ‍ ବିଃଣ୍ଡ୍ରେଇଂ ତୁଆଁଆର୍‌ଲେଃ ଆରି ପେ ଆଡ଼ାତ୍ରା ମେଃ ମେଃ ଗଟେଏ, ଆତ୍‌ବାନ୍‌ ଆନାକେ ରକ୍ୟା ଡିଂଆର୍‌ଲେଃ । 14 କେଲାପା, ମେଇଂ ନାଡ଼ା ରକମ୍‌ ଡିଂଆର୍‌ଏ; ସୁଆ ଆମେଇଂକେ ଆଃଗିଃଏ; ମେଇଂ ପୁଟୁଆଃସବାନ୍‌ ନିଜ୍‌କେ ରକ୍ୟା ଆଃଡିଂ ଆୟାଆର୍‌ ଣ୍ଡୁ । ଆତେନ୍‌ ଉସୁମ୍‌ ନ୍‌ସାଃ ଡୁଆକ୍ନେ ବୁରେଃସ ଣ୍ଡୁଲା ତେନ୍‌ ସେଃମଁ କୁକନ୍‌ସାଃ ସୁଆ ରକମ୍‌ ଆଡିଂ ଣ୍ଡୁ । 15 ମେଃ ମେଃ ବିସ‍ଏରେ ପେ କାମ୍‌ ଡିଂପେବକେ, ତେନ୍‌ ସାପା ପେ ଆଡ଼ାତ୍ରା ଦେକ୍‌ରକମ୍‌ ଡିଂଏ; ପେନେ ସେଲାଙ୍ଗିରେବାନ୍‌ ଜାଜା ପେ ଏଃତେ ବେପାର୍‌ ଡିଂବ‍ଆର୍‌କେ, ମେଇଂନେ ସାପାରେ ଆଙ୍କ୍‌ଆନ୍ତେ ଅଲେଙ୍ଗ୍‌ଚେଃ ନିଜର୍‌ ନିଜର୍‌ ଜାଗା‍ଅରିଆ ୱେଆର୍‌ଏ, ଆପେକେ ରକ୍ୟା ଆଃଡିଂନ୍‌ସାଃ ଜାଡିଗ୍‌ ଆଲେଃଆର୍‌ଣ୍ଡୁ ।