ଦାମାସ୍କସ୍ ଆଡ଼ାତ୍ରା ବବିସତ୍ ସାମୁଆଁ
1 ଦମ୍ମେଶକ ଆଡ଼ାତ୍ରା ପାଙ୍ଗ୍ନେ ମୁଇଂ ଦୁକ୍ ସାମୁଆଁ । ସଦାପ୍ରବୁ ବାସଙ୍ଗ୍ଏ ଜେ, ଦମ୍ମେଶକନ୍ୟା ଏହେନେ ସାପା ଗଟେଏ, ଦମ୍ମେଶକ ବାରି ଇନି ଡିଙ୍ଗ୍ଚେ ଆଲେଃ ଣ୍ଡୁ । ଆତାନ୍ ଦଂସ ଡିଙ୍ଗ୍ୱେଏ ।
2 ଅରୋୟରନେ ଇନି ସାପା ରେମୁଆଁଇଂ ଆନ୍ତାର୍ ବିଃଆର୍ଏ । ଆତାନ୍ ସାପା ମେଣ୍ଡା ମାନ୍ଦା ନ୍ସା ଡିଙ୍ଗ୍ଏ, ମେଇଂ ଆତ୍ଡାଗ୍ରା ଡୁଲେଗ୍ଆର୍ଏ । ବାରି ଜାଣ୍ଡେ ଆମେଇଂକେ ବାଃଟ ଆୟା ଣ୍ଡୁ ।
3 ବାରି, ଇଫ୍ରୟିମବାନ୍ ଦୁର୍ଗ ବାରି ଦମ୍ମେଶକବାନ୍ ରାଇଜ୍ ବାରି ଅରାମନେ ବାଃଗା ଲାଏଃକ୍ନେ ନାସ୍ ଡିଙ୍ଗ୍ଏ । ସାପାବାନ୍ ବପୁ ମାପ୍ରୁ ବାସଙ୍ଗ୍ଏ, "ଆତାନ୍ ସାପା ଇସ୍ରାଏଲ୍ନେ ଗଡ଼େଇଂ ଆଣ୍ଡେଙ୍ଗ୍ନେ ମହିମା ଡିଙ୍ଗ୍ଏ ।"
4 ଆତାନ୍ ବେଲା ଯାକୁବନେ ମହିମା ନସ୍ଟ ଡିଙ୍ଗ୍ଏ । ଯାକୁବ ଗାଗ୍ଡ଼େନେ ବପୁ ଡା ୱେଏ ।
5 ରଫାୟୀମ ଆଡ଼ାତ୍ରା କିଆଉଁଆଃ ୱେଃନେ ବେଲା ଡିରକମ୍ ଗଟେଏ ଦେତ୍ରକମ୍ ଗଟେଏ । ଲିଜନେ କିଆଉଁଆଃ ୱେଃନେ ବେଲା କିଆନେ କେଡ଼୍ ଗୁଆଃ କେଲା ବାରି ମୁଞ୍ଜି ଆଣ୍ଡେଙ୍ଗ୍ ରାସିଙ୍ଗ୍ ବେଲା ଦେତ୍ରକମ୍ ଗଟେଏ ।
6 "ଆତାନ୍ ବେଲା ରେମୁଆଁଇଂ ଜୀତ ସ୍ଲାଃନେ ଚୁଚୁ ରାସିଙ୍ଗ୍କେ ରକମ୍ ଡିଙ୍ଗ୍ଆର୍ଏ । ମାତ୍ରମ୍ ସ୍ଲାଃନେ ତିଆର୍ କେନ୍ଦାନ୍ୟା ମ୍ୱାକ୍ଲିଗ୍ ଞ୍ଜିକ୍ଲିଗ୍ ଚୁଚୁ ଲେଃୱେଏ । ଚୁଚୁ ଲାଏଃକ୍ନେ ସ୍ଲାଃନ୍ୟା ଡିଗ୍ ଅଁକ୍ଲିଗ୍ ମାଲିକ୍ଲିଗ୍ ଚୁଚୁ ରୁଏଃ ବେଲା ଲେଃୱେଏ । ଦେତ୍ରକମ୍ ଅବସ୍ତା ଇନି ଆଣ୍ଡେଙ୍ଗ୍ ଡାଗ୍ରା ଗଟେଏ ।" ସାପାଟୁ ବପୁନେ ମାପ୍ରୁ ଆତାନ୍ ବାସଙ୍ଗ୍ବକେ ।
7 ଆତାନ୍ ଦିନ୍ ରେମୁଆଁଇଂ ମେଇଂନେ ସୃଷ୍ଟିକର୍ତାକେ କେଆର୍ଏ । ମେଁନେ ମ୍ମୁଆଁ ଇସ୍ରାଏଲ୍ନେ ପବିତ୍ର ଇସ୍ପର୍ନିଆ ମ୍ମୁଆଁ କେଆର୍ଏ ।
8 ମେଇଂ ନିଜର୍ ନ୍ତିଏତେ ତିଆର୍ ଡିଙ୍ଗ୍କ୍ନେ ଯଜ୍ଞ ବେଦି ଆଡ଼ାତ୍ରା ମ୍ମୁଆଃ ଆକେ ଣ୍ଡୁ । ବାରି ନିଜର୍ ନ୍ତି ଏତେ ତିଆର୍ ଡିଙ୍ଗ୍କ୍ନେ ଆଶେରା ମୁର୍ତି ଣ୍ଡୁଲା ସ୍ନି ଦେବ୍ତାଇଂ ଆଡ଼ାତ୍ରା ଆକେଆର୍ ଣ୍ଡୁ ।
9 ଆତାନ୍ ଦିନ୍ ଇନିଇଙ୍ଗ୍ ଦଂସ ଡିଙ୍ଗ୍ୱେଏ । ଆତାନ୍ଇଂ ଇସ୍ରାଏଲ ପାଙ୍ଗ୍ନେ ବୁଟଚେ କଣ୍ଡା ବାରି ମରୁବୁମି ରକମ୍ ଡିଙ୍ଗ୍ୱେଆର୍ଏ । ଅଃସେ ଇସ୍ରାଏଲ ରେମୁଆଁଇଂ ବୁଟଚେ ଲାଗ୍ଡ ଲେଃଆର୍ଗେ । ବାରି ମେଇଂ ବବିସତ୍ରେ ଇସ୍ରାଏଲ ପାଙ୍ଗ୍ନେ ବୁଟଚେ ଦଂସ ଡିଙ୍ଗ୍ଆର୍ଏ ।
10 ଏନ୍ ଗଟେଏ ଡାଗ୍ଲା ପେଇଂ ନିଜର୍ ଉଦାର୍କର୍ତା ପର୍ମେସର୍କେ ଆବଃ ପେବକେ । ପର୍ମେସର୍ ପେଇଂନେ ରକ୍ୟା ଡିଙ୍ଗ୍ଏ । ଏନ୍ ପେ ଚିନ୍ତା ପେଡିଂକେ ଣ୍ଡୁ । ପେଇଂ ବିଦେସ୍ବାନ୍ ସୁନ୍ଦର୍ ସୁନ୍ଦର୍ ଅଙ୍ଗୁର୍ ସ୍ଲାଃ ରାଙ୍ଗ୍ପାଙ୍ଗ୍ଚେ କଲମ୍ ଆଡିଙ୍ଗ୍ ପେବକେ ମାତ୍ରମ୍ ଆତାନ୍ ଅଃନା ଚୁଚୁ ଆଚୁ ଣ୍ଡୁ ।
11 ପେନେ ଅଙ୍ଗୁର୍ ସ୍ଲାଃ ମେଃସୁଆ ଉଙ୍ଗ୍ପେଡିଙ୍ଗ୍କେ ବାରି ମେଁନେ ପିତୁର୍ ପାକା ତୁରାଃ ତେଚେଃ ଜତନ୍ ଡିଙ୍ଗ୍ପେଡିଙ୍ଗ୍କେ । ବାର୍ମୁଇଂ ଦିନ୍ ଞ୍ଜିର୍ନୁଗ୍ ଆତାନ୍ ଆଣ୍ଡେଙ୍ଗ୍ ସାରୀନେ କେପେଡିଙ୍ଗ୍କେ । ମାତ୍ରମ୍ ଉଡ଼ିବେଲା ଚୁଚୁ ରୁଏନେ ବେଲା ଚୁଚୁ ରୁଏଃନ୍ସା ୱେ ପେଡିଙ୍ଗ୍କେ, ମାତର୍ ଆତାନ୍ଇଂ ଗୁଏଃୱେଲେଃଏ । ରଗ୍ ସାପା ସ୍ଲାଃକେ ଆଗୁଏ ବିଃବକେ ।
12 ଆହା ! ଗୁଲୁଏ ଜାତିନେ କଲ୍କଲା ଅଁପା । ମେଇଂ କେଣ୍ଡିଆନେ ବୁରାଣ୍ଡ୍ୟାଃ ରକମ୍ ଜାବର୍ ୱାସାର୍ ଆର୍ଙ୍କେ । ଗୁଲୁଏ ଦେସ୍ନେ ରେମୁଆଁ ପାଙ୍ଗ୍ଆର୍ଙ୍କେ । ମେଇଂ ଜାବର୍ ବୁରାଣ୍ଡ୍ୟାଃ ରକମ୍ ପାଙ୍ଗ୍ଆର୍ଙ୍କେ ।
13 ଗୁଲୁଏ ଦେସ୍ନେ ରେମୁଆଁଇଂ ଆତାନ୍ ବୁରାଣ୍ଡ୍ୟାଃ ରକମ୍ ଡିଙ୍ଗ୍ଆର୍ଏ । ପର୍ମେସର୍ ଆମେଇଂକେ କରାପ୍ ସାମୁଆଁ ଆଃଅଁଏ । ତେସା ମେଇଂ ଲାଗ୍ଡ ଆର୍ଏ । ୱେଡ଼୍ୟାନ୍ୟା ଦୁଲି ୱାଲେଃକ୍ନେ ରକମ୍, ଗଲିଆ ୱେଡ଼୍ୟାଗୁର୍ୟାଃ ଦୁଲି ୱାଲେଃକେ ରକମ୍ ମେଇଂ ୱାଲେ ଆର୍ଏ ।
14 ଲମ୍ଡିଗ୍ ବେଲା ମେଇଂ ବୁଟମେଗ୍ ଆର୍ଏ ବାରି ଞ୍ଜିର୍ନୁଗ୍ ମେଇଂ ଆଲେଃଆର୍ ଣ୍ଡୁ । ନେନେ ଡଙ୍ଗାରେଇଂନେ ବାଗ୍ ଆରି ନେନେ ଡଙ୍ଗା ରାଙ୍ଗ୍ଡବକ୍ନେ ରେମୁଆଁଇଂନେ ବାଟା ଆକେନ୍ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)