1 ଏଲେଡିଗ୍‌ ଅ ନେନେ ଚାକର୍‌ ଯାକୁବ ଆରି ନେ ସ୍ରିନେବକ୍ନେ ଇସ୍ରାଏଲ୍‌, ଏବେ ଦ୍ରିଗ୍‌ପା; 2 ଜା ଆପେକେ ଆଃରେକେ ଆରି ଗର୍ବେବାନ୍‌ ଆନାକେ ଆଃରେକେ, ଜା ନାନେ ସାଆଜ୍ୟ ଡିଂଏ, ଆତେନ୍‌ ମାପ୍‌ରୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ; ଅ ନେନେ ଦାସ ଯାକୁବ, ଅ ନେଙ୍ଗ୍‌ ସ୍ରିମ୍ଵକ୍ନେ ଯିଶୁରୁଣ, ଆବ୍‌ଟଗେ । 3 ମେଃଡାଗ୍‌ଲା ନେ ‌ଉଗ୍‌ଡ୍ୟାଃରେ ଆଡ଼ାତ୍ରା ଣ୍ଡିଆଃ ଆରି ନ୍‌ସୁଆର୍‌କ୍ନେ ତୁବଃ ଆଡ଼ାତ୍ରା ଣ୍ଡିଆଃ ନେରାଃଜାର୍‌ଏ; ନେ ନାଁନେ ବଂସ ଆଡ଼ାତ୍ରା ନିଜର୍‌ ଆତ୍ମା ନେବିଃଏ ଆରି ନାନେ ଗଡ଼େଇଂ ଆଡ଼ାତ୍ରା ଆସିର୍ବାଦ୍‌ ନେଡିଙ୍ଗ୍‌ଏ; 4 ତେଲା ମେଇଂ ଲଣ୍ଡିଆଃ ଆଃଡ଼ାଃନେ ବାଇଶୀ ମିନିକ୍ନେ ସ୍ଲାଃ ରକମ୍‌ ଚେଃମୁଆଁ ବିତ୍ରେ ପଃଡ଼୍ୟାଃଆର୍‌ଏ । 5 ମୁଇଂଡା ବାସଙ୍ଗ୍‌ଏ, "ନେ ମାପ୍‌ରୁନେ ରେମୁଆଁ; ଆର୍‌ମୁଇଂଡା ଯାକୁବ ମ୍ନିରେ ନିଜ୍‌କେ ପରିଚୟ୍‌ ବିଃଏ; ଆରି ମୁଇଂଡା ମାପ୍‌ରୁନେ ମ୍ନି ନିଜର୍‌ ନ୍ତିଅରିଆ ଗୁଆର୍‌ଏ ଆରି ନିଜର୍‌ ଇସ୍ରାଏଲ୍‌ ବଂସ ମ୍ନିରେ ନିଜ୍‌କେ ମ୍ନା ଆଡିଙ୍ଗ୍‌ଏ ।" 6 ମାପ୍‌ରୁ, ଇସ୍ରାଏଲ୍‌ନେ ଇଃସାଙ୍ଗ୍‌, ଇସ୍ରାଏଲ୍‌ନେ ଇଃସାଙ୍ଗ୍‌ ଆରି ମେଁନେ ପାପ୍‌ବାନ୍‌ ରକ୍ୟା ଡିଂଣ୍ଡ୍ରେ ସନ୍ୟାଦିପତି ମାପ୍‌ରୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ; "ନେ ସିସେ ଆରି ସାରାସାରି, ବାରି ଆନେକେ ଆନ୍ତାର୍‌ଚେ ପର୍‌ମେସର୍‌ ଆରି ଣ୍ଡୁ । 7 ନେ ଆତେନ୍‌ ବାୱିର୍‌ ରେମୁଆଁଇଂକେ ତାଃୱାଁନେ ବେଲାବାନ୍‌ ନେ ରକମ୍‌ ଜା ୱାଏ ଆରି ଆତେନ୍‌ ବାସଙ୍ଗ୍‌ଏ ଆରି ସମାନ୍‌ ବେଲା ନେ ନ୍‌ସାଃ ଆତେନ୍‌ ସଜେଏ ? ବାରି, ମେଃ ମେଃ ଡାଗ୍ରା ପାଙ୍ଗ୍‌ଡିଂକେ ଆରି ମେଃ ମେଃ ଗଟେଏ, ଆତେନ୍‌ ମେଇଂ ବାସଙ୍ଗ୍‌ଆର୍‌ଲେଃ । 8 ପେ ଇରିୟାଃତୁଗ୍‌ କି ଆବ୍‌ଟଗେପା; ନେ ମେଃନେ ସିସେବାନ୍‌ ପେ ଡାଗ୍ରା ବାସଙ୍ଗ୍‌ନେବକେ ଆରି ଆପେକେ ଆତେନ୍‌ ଆଃମ୍ୟାଃନେବକେ ଣ୍ଡୁ ? ପେ ନେନେ ସାକି । ଆନେଙ୍ଗ୍‌କେ ଆନ୍ତାର୍‌ଚେ ଆରି ଜା ପର୍‌ମେସର୍‌ ଲାଏଃକେ ? ଆନେଙ୍ଗ୍ ଆନ୍ତାର୍‌ଚେ ମୁଃଡ଼ି ଦେବ୍‌ତା ଲାଏଃକେ ? ନେଙ୍ଗ୍ ଆରି ଆଜାକେ ନ୍ନାମ୍ୟାଃକେ ଣ୍ଡୁ ।"

9 ଜାଜା ମୁର୍ତି ଆଃରେଆର୍‌ଏ, ଆତେନ୍‌ ସାପା ବେକାର୍‌ ଆରି ମେଇଂନେ ମନ୍‌ ଇକ୍‌ଚା କାମ୍‌ଇଂ କାମ୍‌ଅରିଆ ଆପାଙ୍ଗ୍‌ ଣ୍ଡୁ; ମେଇଂ ଡିରକମ୍‌ ଗିଆସଃଆର୍‌ଏ, ଆକେନ୍‌ସାଃ ମେଇଂନେ ନିଜର୍‌ ସାକି‍ରେଇଂ ଆକେଆର୍‌ ଣ୍ଡୁ, କି ଆମ୍ୟାଃଆର୍‌ ଣ୍ଡୁ । 10 ଆଣ୍ଡିନେ ମେଃଡିଗ୍‌ ବିସ‍ଏରେ କାମ୍‌ ଆବିଃ ଣ୍ଡୁ, ଦେକ୍‌ରକମ୍‌ ଦେବ୍‌ତା ଜା ଆଃରେବକେ, ବା ମୁର୍ତି ଜାଣ୍ଡେଃ ଚଞ୍ଚ୍‌ ଏଃତେ ଆଃରେବକେ ? 11 କେଲା, ମେଁନେ ସାଙ୍ଗଡ଼େଇଂ ସାପାରେ ଗିଆସଃଆର୍‌ଏ; ବାରି, ମୁର୍ତି ଆଃରେଣ୍ଡ୍ରେ ମେଇଂ ରେମୁଆଁ ମାତର୍‌; ତେନ୍‌ ସାପାରେ ମୁଇଂଅରିଆ ରିସିଙ୍ଗ୍‌ଆର୍‌ଲେଃ, ମେଇଂ ତୁଆଁଆର୍‌ଲେଃ; ମେଇଂ ଇରିୟାଃତୁଗ୍‌ଆର୍‌ଏ, ମେଇଂ ଏକାତର୍‌କେ ଗିଆସଃଆର୍‌ଏ । 12 ଆଃରେଣ୍ଡ୍ରେ ଲୁଆ ସାଜ ଆଃରେଚେଃ ବୁରେଃସ‍ ଏତେ କାମ୍‌ ଡିଂଏ ଆରି ଆମ୍ବାର୍‌ ଏଃତେ ଆତେନ୍‌ ଆଃରେଚେଃ ନିଜର୍‌ ବପୁକ୍ନେ ଜେବା ଏଃତେ ଆତେନ୍‌ ଆଃରେଏ; ହାଁ, ଆମେକେ କିଡ଼େସଃ ଡିଂଏ ଆରି ମେଁନେ ବପୁ ଗଣ୍ଡାଃ ଡିଂୱେଏ, ମେଁ ଣ୍ଡିଆଃ ମାଉଗ୍‌ଚେଃ ହାଲିଆ ଡିଂୱେଏ । 13 ଆଃରେଣ୍ଡ୍ରେ ମେଁ ସୁତା ଗୁଃଏ । ମେଁ ଏଲେଃସ ଏଃତେ ଚିନ୍‌ ବିଃଏ, ମେଁ ରନ୍ଦା ଆଃପୁଏଚେଃ ରୁପ୍‌ ଆଃଡିଂଚେଃ କମ୍ପାସ ଏଃତେ ଚିନ୍‌ ବିଃଏ ଆରି ଡୁଆ ଆଃବାସାନ୍‌ସାଃ ରେମୁଆଁନେ ରୁପ୍‌ ଆରି ସବା ତ୍ନାନେ ଇସାବ୍‌ରେ ଆତେନ୍‌ ଆଃରେଏ । 14 ମେଁ ନିଜର୍‌ ନ୍‌ସାଃ ଏରସ ସ୍ଲାଃ ଗୁଆଃମ୍ୟାଃକେ, ତର୍ସା ଆରି ଅଲୋନ ସ୍ଲାଃ ରାଙ୍ଗ୍‌ୱେମ୍ୟାଃକେ, ମେଁ କଣ୍ଡାନେ ସ୍ଲାଃ ବିତ୍ରେବାନ୍‌ ମୁଇଂ ସ୍ଲାଃ ନିଜର୍‌ ନ୍‌ସାଃ ଡାଟ୍‌ ଆଃଡିଂଏ; ମେଁ ଦେବଦାରୁ ସ୍ଲାଃ ଉଙ୍ଗ୍‌ମ୍ୟାଃକେ ଆରି ଣ୍ଡିଆଃ ଗୁର୍‌ଚେ ଆମେକେ ଆତେନ୍‌ ଆଃମ୍ନାଃଏ । 15 ଆକେନ୍‌ ଇଡ଼ିଂ ଆତେନ୍‌ ରେମୁଆଁଇଂନେ ଗୁଇଗ୍‌ନେ ସୁଆ ଡିଂଏ; ମେଁ ଆତ୍‌ବାନ୍‌ ଉଃଡ଼ିକ୍ଲିଗ୍‌ ରାଙ୍ଗ୍‌ୱିଗ୍‌ଚେଃ ସୁଆ ସିଗିର୍‌ଏ; ଆରି, ମେଁ ଆତେନ୍‌ ଗୁଇଗ୍‌ଚେଃ ରୁଟି ସିର୍‌ଏ; ଆରି, ମୁଇଂ ଦେବ୍‌ତା ଆଃରେଚେଃ ଆତେନ୍‌ ପୁଜା ଡିଂମ୍ୟାଃକେ; ମେଁ ମୁଇଂ ମୁର୍ତି ଆଃରେଚେ ମେଁ ସେଃମଁ ମୁଣ୍ଡିଆ ବଗ୍‌ମ୍ୟାଃକେ । 16 ମେଁ ଆତ୍‌ବାନ୍‌ ମୁଇଂ ବାଗ୍‌ ସୁଆ‍ ଅରିଆ ଆଃଗିଃଏ; ବିନ୍‌ ବାଗ୍‌ ମେଁ ଚିଲି ଡୁଏଚେଃ ଚଙ୍ଗ୍‌ମ୍ୟାଃକେ ଆରି ସିର୍‌କ୍ନେ ଚିଲି ଡୁଏ ଚଙ୍ଗ୍‌ଚେଃ ସାନ୍ତି ଡିଙ୍ଗ୍‌ଏ, ଆରି ମେଁ ସୁଆ ସିଗିର୍‌ଚେଃ ବାସଙ୍ଗ୍‌ମ୍ୟାଃକେ, ଆଃ, ନେ ଉସୁମ୍‌ ନେଡିଂଗେ, ନେ ସୁଆ ନେକେକେ । 17 ବାରି, ମେଁ ଆତ୍‌ନେ ବାକି ସୁଆବାନ୍‌ ମୁଇଂ ଦେବ୍‌ତା ଆଃରେଏ, ନିଜର୍‌ ନ୍ତି ଏଃତେ ମୁର୍ତି ଆଃରେଏ; ମେଁ ମେଁ ସେଃମଁ ମୁଣ୍ଡିଆ ବଗ୍‌ଚେଃ ପୁଜା ଡିଂଏ ଆରି ମେଁ ଡାଗ୍ରା ପାର୍‌ତନା ଡିଂଚେଃ ବାସଙ୍ଗ୍‌ଏ, ଆନେକେ ରକ୍ୟା ଡିଂ, ନାଁ ନେନେ ଦେବ୍‌ତା । 18 ମେଇଂ ଆମ୍ୟାଃଆର୍‌କେ ଣ୍ଡୁ, କି ଚିନ୍ତା ଆଡିଂଆର୍‌ ଣ୍ଡୁ, ମେଃଡାଗ୍‌ଲା ମେଇଂ ଡିରକମ୍‌କି କିକେ ଆୟାଆର୍‌ ଣ୍ଡୁ, ଆକେନ୍‌ସାଃ ମେଇଂନେ ମ୍‌ମୁଁଆଃ ଆରି ମେଇଂ ଡିରକମ୍‌କି ବୁଜେ ଆୟାଆର୍‌ ଣ୍ଡୁ, ଆକେନ୍‌ସାଃ ମେଇଂନେ ମନ୍‌କେ ମେଁ ବନ୍ଦ୍‌ ଆଃଡିଂବକେ । 19 ଜାଡିଗ୍‌ ଆଏତେ ଆର୍‌ଣ୍ଡୁ, କି ଆକେନ୍‌ ବାସଙ୍ଗ୍‌ ନ୍‌ସାଃ ଜାନେଡିଗ୍‌ ଗିଆନ୍‌ କି ବୁଦି ଣ୍ଡୁ ଜେ, ଆଣ୍ଡିନେ ମୁଇଂ ବାଗ୍‌ ରାଙ୍ଗ୍‌ୱେଚେଃ ନେଃ ସୁଆ‍ଅରିଆ ଆଃଗିଃ ନେଃବକେ ଆରି ଆଣ୍ଡିନେ ଡୁଆକ୍ନେ ବୁରେଃସ ରାଙ୍ଗ୍‌ୱେଚେଃ ରୁଟି ଡୁଏ ନେଃବକେ ଆରି ଚିଲି ଡୁଏଚେଃ ଚଙ୍ଗ୍‌ନେବକେ, ଆତ୍‌ନେ ବାକି ବାଗ୍‌ ରାଙ୍ଗ୍‌ୱେଚେଃ ଗିନ୍‌ ରକମ୍‌ନେ ଜିନିସ୍‌ ନେଃରାଃରେଏ ? ନେ କି ମେତଗ୍‌ ସୁଆ ସିସେ ମୁଣ୍ଡିଆ ନେଃବଗ୍‌ଏ ? 20 ମେଁ ଉକ୍‌ସ ଚଙ୍ଗ୍‌ମ୍ୟାଃକେ; ମେଁ ଡିରକମ୍‌ ନିଜର୍‌ ଜିବନ୍‌ ଆଃମ୍ବ୍ର ଆୟାଣ୍ଡୁ, କି ନେନେ ଇଞ୍ଚନ୍ତିଅରିଆ କି ମିଚ୍‌ ଣ୍ଡୁ, ଆକେନ୍‌ ବାସଙ୍ଗ୍‌ ଆୟାଣ୍ଡୁ, ଆକେନ୍‌ସାଃ ବେମର୍‌ ମନ୍‌ ଆମେକେ କରାପ୍‌ ଗାଲି ଆଃସୁଏଃବକେ ।

21 ଅ ଯାକୁବ, ଅ ଇସ୍ରାଏଲ୍‌, ପେ ଆକେନ୍‌ ସାମୁଆଁ ମନେ ଏତେପା, ମେଃଡାଗ୍‌ଲା ପେ ନେନେ ଚାକର୍‌; ନେ ଆପେକେ ଆଃରେନେବକେ; ପେ ନେନେ ଚାକର୍‌; ଅ ଇସ୍ରାଏଲ୍‌, ନେ ଆପେକେ ନେଆବଃ ଣ୍ଡୁ । 22 ନିଂ ନାଁନେ ଅଦରମ୍ ସାମୁଆଁ ସାପା କୁବାଙ୍ଗ୍‌ ତାଉଲଃ ନିୟାଇ ରକମ୍ ଆରି ନାଁନେ ପାପ୍‌କେ ତ୍ରିଗ୍‌ଡ୍ୟାଃ ସମାନ୍‌ ଗ୍ୱେଃଡ଼୍ୟାଃବ୍ନ; ନିଂ ଡାଗ୍ରା ଆଣ୍ଡେ ପାଙ୍ଗ୍‌ଲା; ମେଃଡାଗ୍‌ଲା ନିଂ ଆନାକେ ପାପ୍‌ବାନ୍‌ ଉଦାର୍‌ ଡିଂମ୍ବକେ । 23 ଅ କିତଙ୍ଗ୍‌ଇନି, ଅସ୍‌ମାର୍‌ ସାର୍‌, ମେଃଡାଗ୍‌ଲା ମାପ୍‌ରୁ ଆକେନ୍‌ ପୁରନ୍‌ ଆଃଡିଂବକେ; ଅ ମଚ୍‌ପୁର୍‌ନେ ବିତ୍ରେ ବାସା ଲାଏକ୍ନେ ସାପାରେ, ସାର୍ଦା ଡିଂପା; ଅ ମ୍ନାଃ କଣ୍ଡାଇଂ, ଅ ଡାଆଁ କଣ୍ଡାଇଂ ଆରି ତେନ୍‌ ବିତ୍ରେ ଲାଏଃକ୍ନେ ସ୍ଲାଃ, ପେ ୱାସାର୍‌ଚେଃ ଅସ୍‌ମାର୍‌ ସାର୍‌ପା; ମେଃଡାଗ୍‌ଲା ମାପ୍‌ରୁ ଯାକୁବକେ ଉଦାର୍‌ ଆଃଡିଂବକେ ଆରି ଇସ୍ରାଏଲ୍‌ ବିତ୍ରେ ନିଜ୍‌କେ ଗୌରବ୍‌ ଡିଂଆର୍‌ଏ । 24 ପେନେ ରକ୍ୟା ଡିଂଣ୍ଡ୍ରେ ମାପ୍‌ରୁ, ଗର୍ବେବାନ୍‌ ଜା ଆନାକେ ଆଃରେବକେ, ମେଁ ଆକେନ୍‌ ବାସଙ୍ଗ୍‌ଡିଂକେ; ନେ ମାପ୍‌ରୁ, ନେ ସାପା କାମ୍‌ ପୁରନ୍‌ ନେଡିଂଏ; ନେ ମୁଇଂଡା ଆଃ କିତଙ୍ଗ୍‌ଇନି ଅସାର୍‌ ନେରାଃଡିଂଏ; ନେ ମଚ୍‌ପୁର୍‌କେ ଚ୍ଲେ ନେରାଃଡିଂଏ; ନେନେ ସାଙ୍ଗ ଜାଣ୍ଡେଃ ? 25 ନେ ନାଲେଣ୍ଡ୍ରେଇଂନେ ଚିନ୍‌ଇଂ ସାପା ବେକାର୍‌ ନେରାଃଡିଂଏ ଆରି ମନ୍ତର୍‌ ଡିଂଣ୍ଡ୍ରେଇଂକେ ବାୟା ନେରାଃଡିଂଏ; ନେ ଜ୍ଞାନି‍ଇଂକେ ପ୍ଲାଃ ଆଃଡିଙ୍ଗ୍‌ ନେବିଃଏ ଆରି ମେଇଂନେ ଗିଆନ୍‌କେ ମୁର୍‌କ ରେମୁଆଁ ସୁଗୁଆ ନେରାଃଡିଂଏ; 26 ନେ ନିଜର୍‌ ଦାସନେ ସାମୁଆଁ ପୁରା ନେରାଡିଙ୍ଗ୍‌ଏ ଆରି କବର୍ ବିଃଣ୍ଡ୍ରେନେ ଉପାୟ୍ ପୁରନ୍‌ ନେରାଃଡିଂଏ; ନେ ଯିରୂଶାଲମ ବିସଏରେ ନେବାସଙ୍ଗ୍‌ଏ, ଆତେନ୍‌ ବାସାନେ ଡୁଆ ଡିଂଏ ଆରି ଯିହୁଦାନେ ଇନି‍ଇଂ ବିସ‍ଏରେ ନେବାସଙ୍ଗ୍‌ଏ, ତେନ୍‌ ସାପା ବାର୍‌ମୁଇଂତର୍‌ ତିଆର୍‌ ଡିଂଏ, ବାରି ନେ ଆତ୍‌ଅରିଆ ଉଜାଡ଼େବକ୍ନେ ଜାଗା ସାପା ବାର୍‌ମୁଇଂତର୍‌ ନେରାଃରେଏ; 27 ନେ ସ୍ରିଡ଼ିଆଃକେ ନେବାସଙ୍ଗ୍‌ଏ, ନ୍‌ସୁଆର୍‌ ୱେଲା; ବାରି, ନେ ନାଁନେ ଲଣ୍ଡ୍ୟାଃପାଃଡ଼୍ୟା ସାପା ନେରାଃନ୍‌ସୁଆର୍‌ଏ; 28 ନେ କୋରସ୍‌ ବିସ‍ଏରେ ନେବାସଙ୍ଗ୍‌ଏ, ମେଁ ନେ ରାସିନେ ତୁର୍ତ୍ୟାରେ ଆରି ନେନେ ଇକ୍‌ଚା ପୁରନ୍‌ ଡିଂଏ; ମେଁ ଯିରୂଶାଲମ ବିସ‍ଏରେ ବାସଙ୍ଗ୍‌ଏ, ଆତେନ୍‌ ବାର୍‌ମୁଇଂତର୍‌ ତିଆର୍‌ ଡିଂଏ ଆରି ମନ୍ଦିର୍‌କେ ବାସଙ୍ଗ୍‌ଏ, ନାନେ ପାଣ୍ଡୁସନ୍‌ ତିଆର୍‌ ଡିଂଏ ।