ଜିସାୟ 62

ସିୟୋନନେ ତ୍ମି ମିନି

1 ଉଃଡ଼ିପର୍‌ ଜାକ ସିୟୋନନେ ଦର୍ମ ତାର୍କିଗ୍‌ନେ ନ୍ୟାୟ୍‌ ଆରି ମେଁନେ ପରିତ୍ରାନ୍‌ ଡୁଆଡିଂକ୍ନେ କୁପିସନେ ନ୍ୟାୟ୍‌ ଆତ୍ନା ଣ୍ଡୁ, ଅଃତେନ୍‌ପର୍‌ ଜାକ ନେ ଆତେନ୍‌ ନ୍‌ସାଃ ଚୁପ୍‌ଚାପ୍‌ ନେଡିଂ ଣ୍ଡୁ ଆରି ଯିରୂଶାଲମ ନ୍‌ସାଃ ନେପୁଣ୍ଡେ ଣ୍ଡୁ । 2 ବାରି, ବିନ୍‌ ଦେସ୍‌ନେ ରେମୁଆଁଇଂ ପେନେ ଦର୍ମ ଆରି ସାପା ଇଃସାଙ୍ଗ୍‌ ପେନେ ତାର୍କିଗ୍‌ କେଆର୍‌ଏ; ଆରି, ପେ ସଦାପ୍ରବୁନେ ତୁମୁଁଆଃବାନ୍ ମୁଇଂ ତ୍ମି ମିନି ସ୍ନାମୁଁଆଃ ନାଡିଂଏ । 3 ଆରି, ପେ ସଦାପ୍ରବୁନେ ନ୍ତିଅରିଆ ମୁଇଂ ସୁନ୍ଦର୍‌ ସାଜ ରକମ୍‌ ଆରି ପେନେ ପର୍‌ମେସର୍‌ନେ ନ୍ତିଅରିଆ ମୁଇଂ ମୁକୁଟ୍ ରକମ୍‌ ଡିଂଏ । 4 ପେ ଆନ୍ତାର୍‌ପେଲେଗେ ଡାଗ୍‌ଚେ ଆରି ମିନି ପେବା ଣ୍ଡୁ, କି ନାନେ ଦେସ୍‌ ଗୁଏଃସାଙ୍ଗ୍‌କୁଏଃ ଡାଗ୍‌ଚେ ଆରି ଆୱାଆର୍‌ ଣ୍ଡୁ । ମାତର୍‌ ନା ହିପ୍‌ସିପା*62:4 ପରମେସର୍‌ ମେଁ ଡାଗ୍ରା ସାର୍‌ଦା ଲେଃକେ ଆରି ନାନେ ଦେସ୍‌ ବୀୟଲା*62:4 ବିବା ଡିଙ୍ଗ୍‌ପେଲେଃକେ ମିନିରେ ମ୍ୟାଃଆର୍‌ଏ । ମେଃଡାଗ୍‌ଲା ସଦାପ୍ରବୁ ନା ଡାଗ୍ରା ସାନ୍ତି ବାମ୍ୟାଃକେ ଆରି ନାନେ ଦେସ୍‌ ବିବା ଡିଙ୍ଗ୍‌ଏ । 5 ଙ୍ଗିରେ ରେମୁଆଁ ଡିରକମ୍‌ ସେଲା‍ଅକେ ବିବା ଡିଂଆର୍‌ଏ, ଦେତ୍‌ରକମ୍‌ ପେଉଙ୍ଗ୍‌ଇଂ ଆନାକେ ବିବା ଡିଂଆର୍‌ଏ; ବାରି ଙ୍ଗିରେ ଡିରକମ୍‌ ବିବା ଡିଙ୍ଗ୍‌କ୍ନେ ସେଲା‍ଅରିଆ ସାର୍ଦା ଡିଂଏ, ଦେତ୍‌ରକମ୍‌ ପେନେ ପର୍‌ମେସର୍‌ ପେ ଡାଗ୍ରା ସାର୍ଦା ଡିଂଏ । 6 ଅ ଯିରୂଶାଲମ, ନେ ପେନେ କାନ୍ତି ଆଡ଼ାତ୍ରା ଉର୍‌ଣ୍ଡ୍ରେ ଆଃତୁଆଁ ନେବକେ; ମେଇଂ ସ୍ମି କି ମିଡିଗ୍‌ ଅଃନାଡିଗ୍‌ ଚୁପ୍‌ଚାପ୍‌ ଆଡିଂଆର୍‌ ଣ୍ଡୁ । 7 ଅ ସଦାପ୍ରବୁକେ ମନେ ଆଃଏତେ ବିଃଣ୍ଡ୍ରେ, ଉଃଡ଼ିପର୍‌ ଜାକ ଯିରୂଶାଲମକେ ତିଆର୍ ଆଡିଙ୍ଗ୍‌ଆର୍ ଆରାଃରେ ଣ୍ଡୁ ଆରି ମଞ୍ଚ୍‌ପୁର୍‌ ବିତ୍ରେ ଆମେକେ ପ୍ରସଂସାନେ ଉଙ୍ଗ୍‌ ଆରାଃଡିଂଆର୍‌, ଅଃତେନ୍‌ପର୍‌ ଜାକ ପେ ଆପୁଣ୍ଡେଗେପା, କି ଆମେକେ ପୁଣ୍ଡେନ୍‌ସାଃ ଆବିଃଗେପା । 8 ସଦାପ୍ରବୁ ନିଜର୍‌ ବେଃସ୍ୟାଃ ନ୍ତି ଆରି ବପୁକ୍ନେ ନ୍ତି ଏଃତେ ପାର୍‌ମାନ୍‌ ଡିଂବକେ, ଡିଲାଡିଗ୍‌ ନେ ନାଁନେ କିଆଉଁଆଃ ନାଁନେ ସତ୍ରୁଇଂନେ କାଦି ନ୍‌ସାଃ ଆରି ନେବିଃ ଣ୍ଡୁ ଆରି ଆଣ୍ଡି ନ୍‌ସାଃ ପେ କସ୍‌ଟ ଡିଂପେବକେ, ପେନେ ଆତେନ୍‌ ଦ୍ରାକ୍ୟା ରସ୍‌ ବିଦେସି‍ଇଂ ଆରି ଆଉଗ୍‌ଆର୍‌ ଣ୍ଡୁ । 9 ମାତର୍‌ ଜାଜା ଆତେନ୍‌ ରାଃସିଙ୍ଗ୍‌ବ‍ଆର୍‌କେ, ମେଇଂ ଆତେନ୍‌ ଚଙ୍ଗ୍‌ଉଗ୍‌ଚେଃ ସଦାପ୍ରବୁନେ ପ୍ରସଂସା ଡିଂଆର୍‌ଏ ଆରି ଜାଜା ଆତେନ୍‌ ରାଃସିଙ୍ଗ୍‌ବ‍ଆର୍‌କେ, ମେଇଂ ନେନେ ପବିତ୍ର ଜାଗାନେ ବାଜାର୍‌ ମଜେ ଆତେନ୍‌ ଆଃଉଗ୍‌ଆର୍‌ଏ । 10 ପେ ୱେଲାପା, ଇନି ଗାଲି ବିଃଚେ ୱେଲାପା; ରେମୁଆଁଇଂନେ ଗାଲି ଆଃରେପା; ତିଆର୍‌ ଆଃଡିଂପା, ଅସାର୍‌ ଗାଲି ତିଆର୍‌ ଆଃଡିଂପା; ବ୍ରି ସାପା ଆଃତାର୍‌ଚେଃ ରାଃସିଙ୍ଗ୍‌ପା; ସାପା ଜେଣ୍ଡା ନ୍‌ସାଃ ମୁଇଂ ଜେଣ୍ଡା ଲିଙ୍ଗ୍‌ପା । 11 କେଲାପା, ସଦାପ୍ରବୁନେ ମଞ୍ଚ୍‌ପୁର୍‌ନେ ସାରାସାରି ଜାକ ଆକେନ୍‌ ବାସଙ୍ଗ୍‌ବ‍ଆର୍‌କେ, ପେ ସିୟୋନନେ ସେଲା‍ଅକେ ବାସଙ୍ଗ୍‌, କେଲା, ନାଁନେ ପରିତ୍ରାନ୍‌ ପାଙ୍ଗ୍‌ଡିଂକେ, କେଲା, ମେଁନେ ପୁରୁସ୍‌କାର୍‌ ମେଁ ଏଃତେ ଲାଏଃକେ ଆରି ମେଁନେ ପ୍ରତିଦାନ୍‌ ମେଁନେ ସେଃମଁ ଲାଏଃକେ । 12 ବାରି, ରେମୁଆଁଇଂ ଆମେଇଂକେ ପବିତ୍ର ରେମୁଆଁ, ସଦାପ୍ରବୁନେ ଉଦାର୍‌ ଡାଗ୍‌ଚେଃ ୱାଆର୍‌ଏ; ଆରି, ପେ ତୁତୁର୍‌ଣ୍ଡ୍ରେ, ଆନ୍ତାର୍‌କ୍ନେ ଇନି ଡାଗ୍‌ଚେଃ ସ୍ନାମୁଁଆଃ ଡିଂଏ ।