1 ଡାଗ୍ଲା ସଦାପ୍ରବୁ ଯାକୁବ ଆଡ଼ାତ୍ରା ଦୟା ଡିଙ୍ଗ୍‌ଏ । ମେଁ ବାରି ଇସ୍ରାଏଲ ରେମୁଆଁକେ ସ୍ରିଏ । ଆତାନ୍‌ ବେଲା ଆମେଇଂକେ ମେଇଂନେ ଦେସ୍‌ ଆଃଆଣ୍ଡେ ବିଃଏ । ଏନ୍‌ ଇଡ଼ିଙ୍ଗ୍‌ ବିଦେସ୍‌ ରେମୁଆଁଇଂ ମେଇଂନେ ଏତେ ମିସେ ଆର୍‌ଏ । ମେଇଂ ଯାକୁବନେ କୁଟୁମ୍‌ ଏଃତେ କୁଡ଼େ ଆର୍‌ଏ ।

2 ବିଦେସି ଇଂ ଇସ୍ରାଏଲ୍‌ନେ ରେମୁଆଁଇଂକେ ମେଇଂନେ ଦେସ୍‌ନ୍ୟା ବାସା ଆର୍‌ଏ । ବିନ୍‌ କୁଟୁମ୍‌ନେ ଙ୍ଗିର୍‌ବୟ ବାରି ସେଲାମ୍ବୁଏଃ ଇଂ ଇସ୍ରାଏଲ୍‌ନେ ଚାକର୍‌ ଡିଙ୍ଗ୍‌ଏ, ଡାଗ୍ଲା ଅଃସେ ମେଇଂ ଇସ୍ରାଏଲ୍‌ନେ ରେମୁଆଁଇଂକେ ଚାକର୍‌ ଚାକ୍‌ରାନି ଆଡିଙ୍ଗ୍‌ ବକେ । ମାତ୍ରମ୍‌ ଏବେ ଇସ୍ରାଏଲ ଆମେଇଂକେ ପରାସ୍ତ ଆଡିଙ୍ଗ୍‌ଏ ବାରି ଆମେଇଂକେ ସାସନ୍‌ ଡିଙ୍ଗ୍‌ଏ ।

3 ସଦାପ୍ରବୁ ପେନେ ଦୁକ୍‌ ବାରି କସ୍‌ଟ କାମ୍‌କେ ସ୍ଲ ଆଡିଙ୍ଗ୍‌ଏ ବାରି ଆପେକେ ମେଁ ପୁଣ୍ଡେନେ ବିଃଏ । ଡାଗ୍ଲା ଅଃସେ ପେଇଂ ଚାକର୍‌ ପେଲେଃକେ ବାରି କସ୍ଟ କାମ୍‌ ଡିଙ୍ଗ୍‌ ପେବକେ । ତେସା ସଦାପ୍ରବୁ ପେନେ କସ୍ଟ ସ୍ଲ ଆଡିଙ୍ଗ୍‌ଏ ।

4 ଆତାନ୍‌ ବେଲା ପେ ବାବିଲ୍ ଇଃସାଙ୍ଗ୍‌ ବିରୁଦ୍‌ରେ ଆକେନ୍ ସାମୁଆଁ ଡୁଙ୍ଗ୍‌ୱେଚେ ପେବାସଙ୍ଗ୍‌ଏ, ଦେକ୍‌ରକମ୍ ବାଗୁଏଃଟୁଗୁଏଃ ଡିଂଣ୍ଡ୍ରେ ଡିରକମ୍ ନାସ୍ ଡିଙ୍ଗ୍‌ଲାଏକେ ! ସୁନାନେ ଇନି ଡିରକମ୍ ନାସ୍ ଡିଙ୍ଗ୍‌ଲାଏକେ !

5 ଜାଣ୍ଡେଇଂ ରିସାରେ ଗୁଲେ ଜାତିକେ ପୁଣ୍ଡା ଣ୍ଡୁକୁଟା ବାଗୁଏ ଆର୍‌କେ ଆରି ଗୁଲେ ଦେସ୍‌ନେ ରେମୁଆଁଇଂକେ ରିସାରେ ସାସନ୍‌ ଡିଙ୍ଗ୍‌ଚେଃ ପୁଣ୍ଡାଣ୍ଡୁ ରକମ୍ କସ୍‌ଟ ବିଆର୍‌କେ ।

6 ସଦାପ୍ରବୁ ଆତାନ୍‌ ଦୁସ୍ଟଇଂନେ ଡୁଡୁ ବାରି ସାସନ୍‌ ଡିଙ୍ଗ୍‌ଣ୍ଡ୍ରେନେ ରିସାକେ ପାକ୍‌ଚି ଜଗ୍‌ତ୍ଲାଗ୍‌ ବକେ ।

7 ସାପା ମଚ୍‌ପୁର୍‌ ସାନ୍ତି ବାରି ସୁସ୍‌ତ ଡିଙ୍ଗ୍‌ଲେଃକେ । ମେଇଂ ସାର୍ଦାରେ ଅସ୍‌ମାର୍‌ ସାର୍‌ ଆର୍‌ଙ୍କେ ।

8 ଦେକ୍‌ରକମ୍‌ ଲିବାନୋନନେ ଦେବଦାରୁ ବାରି ଏରସ ସ୍ଲାଃ ସାପା ନା ବିସ‍ଏରେ ସାର୍‌ଦା ଡିଙ୍ଗ୍‌ଚେ ବାସଙ୍ଗ୍‌ମ୍ୟାଃକେ, "ନା ଦଂସ ଡିଙ୍ଗ୍‌କ୍ନେବାନ୍ ମେଃଡିଗ୍ ଇଃସାଙ୍ଗ୍‌ ଆନେକେ ସିତଗ୍‌ ଜଗ୍‌ତ୍ଲାଗ୍‌ ନ୍‌ସାଃ ଏବେ ଜାକ ଆତଃଡ଼୍ୟାଃକେ ଣ୍ଡୁ ।"

9 ନା ପାଙ୍ଗ୍‌ନେ ବେଲା ନା ଏଃତେ ବେଟ୍‌ଗାଟ୍‌ ଡିଙ୍ଗ୍‌ନ୍‌ସା ଆଲ ଲେକ୍ନେ ପାତାଲ୍‌ ଆନାକେ ଗାଲି ଆଃକେ । ଆତେନ୍‌ ନା ଆତ୍‌ଲା ଗୁଏଃଲାଏଃକ୍ନେ ରେମୁଆଁଇଂକେ, ପୁର୍‌ତିବିନେ ମ୍ନାରେଇଂକେ ତିଆର୍‌ ଆଡିଙ୍ଗ୍‌ପା । ଆତେନ୍‌ କୁଟୁମ୍‌ ରେମୁଆଁକେ ରାଜା ସାସନ୍‌ବାନ୍‌ ମେଙ୍ଗ୍‌ନେ ସିଂଆଁସନ୍‌ବାନ୍‌ ଆତଡ଼ିଆବକେ ।

10 ମେଇଂ ସାପାରେ ଉତର୍‌ ବିଃଚେ ଆପେକେ ବାସଙ୍ଗ୍‌ଏ, ପେ ଡିଗ୍‌ ମେଃନେ ନେ ରକମ୍‌ ଦୁର୍ବଲ୍‌ ପେଡିଙ୍ଗ୍‌କେ ? ପେ ମେଃନେ ନେନେ ସମାନ୍‌ ପେଡିଙ୍ଗ୍‌କେ ?

11 ନାନେ ସୁନ୍ଦର୍‌ ଆରି ନାନେ ପ୍ନିଃନେ ଇଲ୍‌ଏଁ ପାତାଲ୍‌ ଜାକ ଜାର୍‌ଲାଏଃକେ । ବୁଇଃ ନା ଡୁଲେଗ୍‌ନେ ସିଙ୍ଗ୍‌ଲାନେ ଆଲ ବିଚେ ୱେଏ ଲେଃକେ ଆରି ବୁବଃଉଂ ନାନେ ଗାଗ୍‌ଡ଼େ ପିତୁର୍‌ପାକା ଡାବିଃବକେ ।

12 ଏ ଲୁଶିପର୍ ! ଞ୍ଜିର୍‌ନୁଗ୍‌ ତାର୍‌ନେ ଚାଙ୍କୁଆ* ! ନା ଡିରକମ୍‌ ସର୍‌ଗେବାନ୍‌ ଆଲ ନାଲଃକେ ! କୁଟୁମ୍‌କେ ନା ପେ ଆଲ ଆଃଡିଙ୍ଗ୍‌ନାବଗେ, ନା ଡିରକମ୍‌ ତୁବନିଆ ନାଲଃକେ !

13 ନା ନିଜେ ନିଜେ ବାସଙ୍ଗ୍‌ ନାଡିଙ୍ଗ୍‌କେ, "ନେଙ୍ଗ୍‌ ସରଗ୍‌ପୁରେ ଣ୍ଡେଏ, ନେ ପର୍‌ମେସର୍‌ନେ ଚାଙ୍କୁଆଇଂନେ ଆଡ଼ାତ୍ରା ମେଁନେ ସିଂଆଁସନ୍‌ ଆଡ଼ାତ୍ରା ନେକଏ, ନେ ଉତର୍‌ ଦିଗ୍‌ ପାକା ଲେକ୍ନେ ସମାଗମ* ଡାଗ୍ଲା ମୁଇଂଡାଗ୍ରା ରିସିଙ୍ଗ୍‌ନେ ଜାଗା କଣ୍ଡାନିଆ ନେତୁଆଁଏ ।

14 ନେ ତ୍ରିଗ୍‌ଡିଆବାନ୍‌ ଆଡ଼ାତ୍ରାବାନ୍‌ ଆଡ଼ାତ୍ରା ନେଡେଃଏ । ବାରି ସାପାବାନ୍‌ ସକ୍‌ତିଶାଲି ପର୍‌ମେସର୍‌ ରକମ୍‌ ଣ୍ଡିଙ୍ଗ୍‌ଏ ।"

15 ମାତ୍ରମ୍‌ ପେ ପାତାଲ୍‌ନେ ଆଲ ଜଗ୍‌ତ୍ଲାଗ୍‌ବିଃଏ ।

16 ଜାଣ୍ଡେଇଂ ଆନାକେ କେଆର୍‌ଏ, ମେଇଂ ଟିକିନିକି ବାବ୍‌ରେ କେଚେଃ ନା ବିସ‍ଏରେ ଚିନ୍ତା ଡିଂଚେଃ ବାସଙ୍ଗ୍‌ଆର୍‌ଏ, ଜା ପୁର୍‌ତିବିକେ ଅର୍‌ବର୍‌ ଆଃଡିଙ୍ଗ୍‌କେ, ଜା ରାଇଜ୍‌ ସାପାକେ ତର୍‌ବର୍‌ ଆଃଡିଙ୍ଗ୍‌ବିଃକେ ।

17 ଜା ମଚ୍‌ପୁର୍‌କେ ବାଲିଲଃ ଜାଗା ରକମ୍‌ ଆଡିଙ୍ଗ୍‌କେ ଆରି ଆତ୍‌ଅରିଆ ଲେକ୍ନେ ଇନି ସାପାକେ ନାସ୍‌ ଆଡିଙ୍ଗ୍‌କେ । ଜା ମେଁନେ ବନ୍ଦି ଡିଙ୍ଗ୍‌ଲାଏଃକ୍ନେ ରେମୁଆଁଇଂକେ ମେଙ୍ଗ୍‌ନେ ଡୁଆ ୱେନ୍‌ସା ଆହାନ୍ତାର୍‌କେ ଣ୍ଡୁ । ମେଁ ମେଁନେ ଆତେନ୍‌ ରେମୁଆଁ ?

18 କୁଟୁମ୍‌ଇଂନେ ରାଜାଇଂ, ଆରି ମେଙ୍ଗ୍‌ନେ ସାପାରେ ଡିଗ୍‌, ମ‍ଇମାରେ ନିଜର୍‌ ନିଜର୍‌ନେ ଡୁଆନିଆ ଡୁଲେଗ୍‌ଲେଃକେ ।

19 ମାତ୍ରମ୍‌ ନାଁ ଗ୍ରୁନା ଡିଙ୍ଗ୍‌କ୍ନେ କେନ୍ଦା ରକମ୍‌ ଡିଙ୍ଗ୍‌ନାଲେକେ, କାଣ୍ଡା ପଃଚେଃ ଆରି ବାରି ସ୍ରି କୁରୁ ବ୍ରି ବିତ୍ରେ ତିପଗ୍‌କ୍ନେ ରେମୁଆଁ ରକମ୍‌ ତିପଗ୍‌ ନାଲେଃକେ । ନିଜର୍‌ ରାଚ୍ୟାବାନ୍‌ ସ୍ଲ ତିପଗ୍‌ ନାଲେଃକେ । ନାଁ ଞ୍ଚ ଏତେ ଲେଚାର୍‌କ୍ନେ ମଡ଼ା ରକମ୍‌ ଡିଙ୍ଗ୍‌ ନାଲେଃକେ ।

20 ନାଁ ମେଇଂନେ ଏତେ ରାଚ୍ୟାନ୍ୟା ଆତି ଆବିଆର୍‌ ଣ୍ଡୁ । ଡାଗ୍ଲା ନାଁ ନିଜର୍‌ ଦେସ୍‌କେ ଦଂସ ଆଡିଙ୍ଗ୍‌ ନାବକେ, ନାଁ ନିଜର୍‌ ରେମୁଆଁଇଂକେ ବାଗୁଏଃ ନାବକେ । କରାପ୍‌ କାମ୍‌ ଡିଙ୍ଗ୍‌ଣ୍ଡ୍ରେନେ ବଂସନେ ମ୍ନି ଅଃନାଡିଗ୍‌ ଆୱାଆର୍‌ ଣ୍ଡୁ ।

21 ମେଇଂନେ ଉଂଡେଇଂ ତଃଡ଼ିଆଃଚେ ଯେନ୍ତିକି ପୁର୍‌ତିବିକେ ଅଦିକାର୍‌ ଆଡିଙ୍ଗ୍ ଆରି ମଚ୍‌ପୁର୍‌କେ ଇନି ଏଃତେ ବର୍ତି ଆରାଃଡିଙ୍ଗ୍, ଆତେନ୍‌ସାଃ ପେ ମେଙ୍ଗ୍‌ନେ ନ୍ତା ଞ୍ଜାଇଂନେ ପାପ୍‌ ନ୍‌ସାଃ ମେଇଙ୍ଗ୍ ଆତ୍‌ଲା ବାଗୁଏଃନେ ଜାଗା ଆଃର୍ମେ ।

22 ସାପାବାନ୍ ବପୁ ମାପ୍‌ରୁ ବାସଙ୍ଗ୍‌କେ, "ନେଙ୍ଗ୍‌ ମେଇଂନେ ବିରଦ୍‌ରେ ନ୍ତଡ଼୍ୟାଏ ବାରି ଜୁଦ୍‌ ଣ୍ଡିଙ୍ଗ୍‌ଏ । ନେଙ୍ଗ୍‌ ବାବିଲ୍ ଇନି ଦଂସ ଆଡିଙ୍ଗ୍‌ ମ୍ୱିଏ । ମେଁନେ ସାପା ରେମୁଆଁକେ ତେରେପେତେ ଆଡିଙ୍ଗ୍‌ ମ୍ୱିଏ । ବାକି ରେମୁଆଁ ଆରି ମେଇଂନେ ଗଡ଼େଇଂ ଦଂସ ଆଃଡିଙ୍ଗ୍‌ ମ୍ୱିଃଏ ।" ସଦାପ୍ରବୁ ନିଜେ ଏନ୍‌ସାପା ବାଲିର୍‌ ବକେ ।

23 ଆରି ସାପାବାନ୍ ବପୁ ମାପ୍‌ରୁ ବାରି ବାସଙ୍ଗ୍‌କେ, "ନେ ଆତେନ୍‌ ଇନିକେ କୁର୍‌ମା ପ୍ଲିଗ୍‌ ବାସାନେ ଡୁଆ ରକମ୍‌ ଆଡିଙ୍ଗ୍‌ ମ୍ୱିଏ ବାରି ଣ୍ଡିଆ ସାପା ବର୍ତି ଆଡିଙ୍ଗ୍‌ ମ୍ୱିଏ । ନେଙ୍ଗ୍‌ ଆମେକେ ନାସ୍ ଆଡିଙ୍ଗ୍‌ନେ ଚ୍ନଃ ଏଃତେ ଆମେକେ ସାପା ବିନାସ୍‌ ଆଡିଙ୍ଗ୍‌ ମ୍ୱିଃଏ ।"

24 ସାପାବାନ୍ ବପୁ ମାପ୍‌ରୁ ପାର୍‌ମାନ୍‌ ଡିଙ୍ଗ୍‌ଚେ ବାସଙ୍ଗ୍‌ ବକେ, "ନେଙ୍ଗ୍‌ ମନେ ବାବେ ନ୍‌ଲ୍ଲେକେ ସତେଆ ଆତାନ୍‌ ଗଟେଏ । ବାରି ନେଙ୍ଗ୍‌ ଡିରକମ୍‌ ଉପାୟ୍ ଡିଙ୍ଗ୍‌ ମ୍ୱକେ ଦେତ୍‌ ରକମ୍‌ ଡିଙ୍ଗ୍‌ଏ ।

25 ନେଙ୍ଗ୍‌ ନିଜର୍‌ ରାଇଜ୍‌ନ୍ୟା ଅଶୂରନେ ଇସାଙ୍ଗ୍‌କେ ପାକ୍‌ଚିନେବିଏ । ନେଙ୍ଗ୍‌ନେ କଣ୍ଡା ଆଡ଼ାତ୍ରା ଆମେଇଂକେ ଞ୍ଚନ୍ୟା ଲେଚାର୍‌ ମ୍ୱିଏ । ଡାଗ୍ଲା ଆତାନ୍‌ ଇଃସାଙ୍ଗ୍‌ ନେଙ୍ଗ୍‌ନେ ଗଡ଼େଇଂକେ ଚାକର୍‌ ଆଡିଙ୍ଗ୍‌ ବକେ ବାରି ମେଇଂନେ ଜେବାନ୍ୟା ରିଗ୍‌ନ ଲାଦେ ବକେ । ଆତାନ୍‌ ରିଗ୍‌ନ ଯିହୁଦା ଜେବା ବାନ୍‌ ସ୍ଲ ଡିଙ୍ଗ୍‌ଏ ।

26 ଏନ୍‌ ନେଙ୍ଗ୍‌ନେ ଉପାୟ୍ ସାପା ମଚ୍‌ପୁର୍‌ ନ୍‌ସାଃ ଲାଏଃକେ । ଆରି ଆକେନ୍ ନ୍ତି ସାପା କୁଟୁମ୍‌ ଆଡ଼ାତ୍ରା ଆଲମ୍ୱେବକେ ।"

27 ଡାଗ୍ଲା କାଲାଆଃନେ ମାପ୍‌ରୁ ଆତେନ୍ ଜଜନା ଡିଙ୍ଗ୍‌ ବକେ ବାରି ଆତାନ୍‌ ଜାଣ୍ଡେ ମନା ଡିଙ୍ଗ୍‌ଏ ? ବାରି ମେଁନେ ନ୍ତି ଆଲମ୍ୱେ ବକେ ବାରି ଆତାନ୍‌ ଜାଣ୍ଡେ ଆଃହାଣ୍ଡେ ଡୁଙ୍ଗ୍‌ପାଙ୍ଗ୍‌ଏ ?

28 ଆଡିନେ ମୁଆଁ ଆହସ୍‌ ଇଃସାଙ୍ଗ୍‌ ଗୁଏଃକେ, ଆତାନ୍‌ ମୁଆଁନେ ଆକେନ୍‌ ବବିସତ୍‌ ସାମୁଆଁ ।

29 ଅ ପଲେଷ୍ଟୀୟ, ଆଣ୍ଡିନେ ଡଣ୍ଡ୍‌ ଆପେକେ ବିନାସ୍‌ ଆଡିଙ୍ଗ୍‌କେ, ଆତେନ୍‌ ପାକ୍‌ଚିୱେଲେକେ ଡାଗ୍‌ଚେ ପେ ସାପାରେ ସାର୍‌ଦା ଆଡିଙ୍ଗ୍‌ପା । ମେଃଡାଗ୍‌ଲା ବୁବଃନେ ମୁଲେବାନ୍‌ ବାରିମୁଇଂ ବିସ୍‌ ଲାଏଃକ୍ନେ ବୁବଃ ତାର୍‌ଏ ଆରି ଆକ୍ମେନେ ଚୁଚୁ ବିସ୍‌ ରକମ୍‌ ଡିଙ୍ଗ୍‌ଏ ଆରି ସୁଆ ଆଃଡୁଆଚେ ୱାଲେଃନେ ବୁବଃ ରକମ୍‌ ଡିଙ୍ଗ୍‌ଏ ।

30 ବାରି, ଅର୍‌କିତ୍‌ନେ ରେମୁଆଁନେ ପର୍‌ତୁମ୍‌ ଜନମ୍‌ ଡିଙ୍ଗ୍‌କ୍ନେ ଉଂଡେ ଚଙ୍ଗ୍‌ ଆର୍‌ଏ ଆରି ମେଃଡିଗ୍‌ ଆଲେକ୍ନେ ରେମୁଆଁଇଂ ମାବ୍‌ଟଚେ ଡୁଲେଗ୍‌ ଆର୍‌ଏ । ଆରି, ନେ ମୁର୍‌ଡି ଏତେ ନାନେ ପଲେଷ୍ଟୀୟ ରେମୁଆଁଇଂକେ ନସ୍‌ଟ ନେରାଡିଙ୍ଗ୍‌ଏ ଆରି ନାନେ ବାକି ସାପାରେକେ ନେବାଗୁଏଃଏ ।

31 ଅ ଇନିନିଆ ଲେକ୍ନେ ର୍ଣ୍ଣସାଙ୍ଗ୍‌ ଅଃ । ଅ ଇନି, ଅଃପା । ଅ ପଲେଷ୍ଟୀୟ, ନାନେ ସାପା ଇନି ଜାକ ତର୍‌ବର୍‌ ଡିଂୱେଲାଏଃକେ । ଉତର୍‌ ଦିଗ୍‌ବାନ୍‌ ମାଃସ ଡିଙ୍ଗ୍‌ଚେ ପାଙ୍ଗ୍‌ଡିଙ୍ଗ୍‌କେ ବାରି ଜା ଡିଗ୍‌ ସମାନ୍‌ ଗଟେନେ ବେଲା ସୁଲ ଆତୁଆଁଆର୍‌କେ ଣ୍ଡୁ ।

32 ଆରି ଆକେନ୍‌ କୁଟୁମ୍‌ନେ କବର୍ ବିଃଣ୍ଡ୍ରେକେ ମେଁ ଉତର୍‌ ନେବାସଙ୍ଗ୍‌ଏ ? ଆକେନ୍‌ ଜେ ସଦାପ୍ରବୁ ସିୟୋନନେ ପାଣ୍ଡୁସନ୍‌କେ ଆରେବକେ ଆରି ଆତ୍‌ଅରିଆ ମେଁନେ ଦୁକ୍‌ରେ ଲେକ୍ନେ ରେମୁଆଁଇଂକେ ପୁଣ୍ଡେନେ ବିଃମ୍ୟାଃ ।