ବବିସତ୍ନେ ରାଜା
1 ଅଃସେ ରେମୁଆଁଇଂ ବାବେଆର୍କେ ସବୂଲୂନ ଦେସ୍ ଆରି ନପ୍ତାଲୀ ଦେସ୍ ମ୍ନା ଆଲେଃକେ । ମାତ୍ରମ୍ ଇଡ଼ିଙ୍ଗ୍ ପର୍ମେସର୍ ଆତାନ୍ ଦେସ୍ ଆଣ୍ଡେଙ୍ଗ୍କେ ମ୍ନା ଆଡିଙ୍ଗ୍ ବିଃକେ । କେଣ୍ଡିଆ ଡାଗ୍ରା ଯର୍ଦ୍ଦନ କେଣ୍ଡିଆନେ ଇନୁମେତା ଗାଲିଲୀନେ ଅଣଯିହୁଦି ଇଂକେ ସକ୍ତିସାଲି ଆଡିଙ୍ଗ୍ଏ ।
2 ଆତେନ୍ ରେମୁଆଁଇଂ ତାଙ୍ଗ୍କିଗ୍ ଡାଗ୍ରା ଅଲେଙ୍ଗ୍ମ୍ୟାଃଆର୍କେ, ମାତ୍ରମ୍ ମେଇଂ ମୁଇଂ ମ୍ନାଃ ତାର୍କିଗ୍ କେଲେଃଆର୍କେ । ମେଇଂ ଗୁଏଃକ୍ନେ ରକମ୍ ତାଙ୍ଗ୍କିଗ୍ନ୍ୟା ବାସା ଲେଃଆର୍କେ, ମାତ୍ରମ୍ ଆତେନ୍ "ତାର୍କିଗ୍" ଆମେଇଂକେ ତାର୍କିଗ୍ ଆଃଡିଙ୍ଗ୍ବକେ ।
3 ନାଁ ଆତାନ୍ ଦେସ୍ନେ ରେମୁଆଁଇଂକେ ଜାବର୍ ସକ୍ୟା ଆଡିଙ୍ଗ୍ଚେ ମେଇଂ ସାର୍ଦା ଆଃଡିଙ୍ଗ୍ନାବକେ । ମେଇଂ କିଆ ୱେନେ କେଲା ଡିରକମ୍ ସାର୍ଦା ଡିଙ୍ଗ୍ମ୍ୟାଃ ଆତେନ୍କେ ବେସି ସାର୍ଦା ଡିଙ୍ଗ୍ମ୍ୟାଃ, ଡଙ୍ଗାକ୍ନେ ଜିନିସ୍ ବାଟାନେ ବେଲା ମେଇଂ ବେସି ସାର୍ଦା ଡିଙ୍ଗ୍ମ୍ୟାଃ ।
4 ଦେକ୍ରକମ୍ ମେନ୍ସା ଡିଙ୍ଗ୍ଏ, ଡାଗ୍ଲା ପେ ମେଇଂନେ ଲିଗିଙ୍ଗ୍କ୍ନେ ଅଜନ୍ ଡୁଙ୍ଗ୍ ପେବକେ । ମେଇଂନେ କାନ୍ଦ୍ନିଆ ଡୁଙ୍ଗ୍ଲେକ୍ନେ ରିଗ୍ନ ବାରି ବାହୁଙ୍ଗି ଆଡିନେ କି ସତ୍ରୁଇଂ ପେନେ ରେମୁଆଁକେ ଡଣ୍ଡ୍ ବିନ୍ସା ବେବଆର୍ ଡିଙ୍ଗ୍କ୍ନେ ଆମେକେ ପେ ସ୍ଲ ଆଡିଙ୍ଗ୍ପା । ମିଦିୟନକେ ଜିତେକେ ରକମ୍ ଏନ୍ ଡିଙ୍ଗ୍ଏ ।
5 ଜୁଦ୍ଡାଗ୍ରା ବେବଆର୍ ଡିଙ୍ଗ୍କ୍ନେ ସାପା ଚପଲ୍ ଦଂସ ଡିଙ୍ଗ୍ଏ । ସାପା ମ୍ମ୍ୟାଁ ଉଗ୍କ୍ନେ ସକା ଡିଗ୍ ଦଂସ ଡିଙ୍ଗ୍ଏ । ଆତାନ୍ ସାପା ସୁଆନ୍ୟା ବାବିଃନେ ସୁଆ ରକମ୍ ଡିଙ୍ଗ୍ଏ ।
6 ଉଡ଼ିବେଲା ନେ ଆତ୍ଲା ମୁଇଂ ଗଡ଼େଅ ଜନମ୍ ଡିଙ୍ଗ୍ଏ ଆତାନ୍ ବେଲା ଏନ୍ସାପା ଗଟେଏ । ରେମୁଆଁଇଂନେ ଅଜନ୍ ଡୁଙ୍ଗ୍ଏ ମେଁ ମ୍ନି "ଆଶ୍ଚର୍ୟ୍ୟ ମନ୍ତ୍ରୀ, ସକ୍ତିସାଲି ପର୍ମେସର୍, ଜାଣ୍ଡେ ମାଡାନେ କାଲ୍ନେ ଆବା, ସାନ୍ତି ରାଜା ଡିଙ୍ଗ୍ଏ ।"
7 ମେଁନେ ରାଇଜ୍ନ୍ୟା ସାସନ୍ ବାରି ସାନ୍ତି ପାଙ୍ଗ୍ଏ । ଏନ୍ ଦାଉଦନେ ପରିବାର୍ନେ ସିଂଆଁସନ୍ନେ କେମତା ମ୍ନାଏ । ଆତାନ୍ ଇଃସାଙ୍ଗ୍ ନ୍ୟାୟ୍ ବାରି ଦରମ୍ ବପୁରେ ଜୁଗ୍ ଜୁଗ୍ ଜାକ ରାଇଜ୍ ସାସନ୍ ଡିଙ୍ଗ୍ଏ । ସାପାବାନ୍ ବପୁ ମାପ୍ରୁ ମେଁ ରେମୁଆଁଇଂ ନ୍ସା ମାଡାନେ ଆଲାଦ୍ ଲ୍ଲେକେ ବାରି ଏନ୍ ସାର୍ଦା ନ୍ସା ମେଁ ଏନ୍ସାପା ଡିଙ୍ଗ୍ଏ ।
ସଦାପ୍ରବୁ ଇସ୍ରାଏଲ୍କେ ଡଣ୍ଡ୍ ବିଏ
8 ନେଙ୍ଗ୍ନେ ମାପ୍ରୁ ଯାକୁବନେ ଡାଗ୍ରା ମୁଇଂ ବ୍ନାଲିର୍ ବାସଙ୍ଗ୍ ମ୍ୱେକେ । ଆତାନ୍ ବ୍ନାଲିର୍ ଇସ୍ରାଏଲ ବିରଦ୍ରେ କାମ୍ ଡିଙ୍ଗ୍ଏ ।
9 ଏନ୍ଇଡ଼ିଙ୍ଗ୍ ଇଫ୍ରୟିମନେ ସାପା ରେମୁଆଁ ବାରି ଦେକ୍ରକମ୍ କି ଶମରୀୟାନେ ଡକ୍ରାଡୁକ୍ରି ରେମୁଆଁଇଂ ମ୍ୟାଃଆର୍ଏ ଜେ, ପର୍ମେସର୍ ଆମେଇଂକେ ଡଣ୍ଡ୍ ବିଃଏ । ଆତାନ୍ ରେମୁଆଁଇଂ ବାରି ଆଙ୍କାର୍ ଡିଙ୍ଗ୍ଚେ ବଡ଼୍ପନ୍ ବାସଙ୍ଗ୍ଆର୍ଏ ।
10 "ଆକାନ୍ ଇଟା ସାପା ଗିସେ ୱେଏ, ମାତର୍ ନେ ବାର୍ମୁଇଂତର୍ ଡାଟ୍ ବ୍ରି ଏଃତେ ଆମେକେ ତିଆର୍ ନେଡିଙ୍ଗ୍ଏ । ଲିୱା ସ୍ଲାଃ ଆଣ୍ଡେଙ୍ଗ୍ ସିତଗ୍କ୍ନେ ଇଡ଼ିଙ୍ଗ୍ ନେ ଆତ୍ଡାଗ୍ରା ଏରସ ସ୍ଲାଃ ନେଉଙ୍ଗ୍ଏ । ବାରି ଏନ୍ ତ୍ମି ସ୍ଲାଃ ଆଣ୍ଡେଙ୍ଗ୍ ମ୍ନା ବାରି ସକ୍ତିସାଲି ଡିଙ୍ଗ୍ଏ ।"
11 ତେସା ସଦାପ୍ରବୁ ଇସ୍ରାଏଲ ବିରଦ୍ରେ ଜୁଦ୍ ଡିଙ୍ଗ୍ ନ୍ସା ମୁଇଂ କୁଟୁମ୍ ତିଆର୍ ଡିଙ୍ଗ୍ଏ । ସଦାପ୍ରବୁ ରତ୍ସୀନନେ ପାକା ଜୁଦ୍ ଡିଙ୍ଗ୍ଣ୍ଡ୍ରେକେ ମେଁନେ ବିରଦ୍ରେ ବେଏ ।
12 ଏନ୍ଇଡ଼ିଙ୍ଗ୍ ସଦାପ୍ରବୁ ଅରାମୀୟଇଂକେ ପୁରୁବ୍ ଦିଗ୍ବାନ୍ ବାରି ପଲେଷ୍ଟୀୟଇଂକେ ଲଗ୍ସ୍ନି ଦିଗ୍ବାନ୍ ରାଙ୍ଗ୍ପାଙ୍ଗ୍ଏ । ଆତାନ୍ ସତ୍ରୁ ଆଣ୍ଡେଙ୍ଗ୍ ମୁଇଂଡାଗ୍ରା ଇସ୍ରାଏଲ ଦଲ୍କେ ଜିତେଆର୍ଏ । ଏଲେଡିଗ୍ ସଦାପ୍ରବୁ ଇସ୍ରାଏଲ ଆଡ଼ାତ୍ରା ରିସା ଡିଙ୍ଗ୍ଏ ବାରି ମେଁନେ ରେମୁଆଁଇଂକେ ଡଣ୍ଡ୍ ବିଃନ୍ସାଃ ତିଆର୍ ଡିଙ୍ଗ୍ଏ ।
13 ପର୍ମେସର୍ ଡଣ୍ଡ୍ ବିଃଲା ଡିଗ୍ ମେଇଂ ପାପ୍ ଡିଙ୍ଗ୍ ନ୍ସା ଆଆନ୍ତାର୍ ଣ୍ଡୁ । ମେଇଂ ମେଁନେ ଡାଗ୍ରା ଆପାଙ୍ଗ୍ ଆର୍ ଣ୍ଡୁ ଣ୍ଡୁଲା ସାପାବାନ୍ ବପୁ ମାପ୍ରୁନେ ପ୍ଲା ଆୱେ ଆର୍ ଣ୍ଡୁ ।
14 ତେସା ସଦାପ୍ରବୁ ଇସ୍ରାଏଲ୍ନେ ବାଆଃ ବାରି ପ୍ଲା ସିତଗ୍ ଜଗ୍ତ୍ଲାଗ୍ଏ । ବାରି ଡିଗ୍ କଜ୍ରି କେନ୍ଦା ବାରି ଣ୍ଡିଆଃନିଆ ଲାଏଃକ୍ନେ ଚେଃମୁଆଁ ମୁଇଂ ଦିନ୍ରେ ଗୁଆଃଜଗ୍ତ୍ଲିଗ୍ଏ ।
15 ମ୍ନା ମ୍ନାରେ ଆରି ସକ୍ତିସାଲି ରେମୁଆଁ ଆତେନ୍ ବାଃଆ ରକମ୍ ଡିଙ୍ଗ୍ଏ, ବାରି ମିଚ୍ ବାସଙ୍ଗ୍ଣ୍ଡ୍ରେ ବବିସତ୍ ବକ୍ତାଇଂ ପ୍ଲା ରକମ୍ ।
16 ଡାଗ୍ଲା ଏନ୍ ରେମୁଆଁଇଂ ଗାଲି ଆଃସୁଏଃଣ୍ଡ୍ରେ ଆମେଇଂକେ ବାୟା ଆଡିଙ୍ଗ୍ ଆର୍ଏ, ବାରି ଜାଣ୍ଡେଇଂ ମେଇଂନେ ଏଃତେ ଗାଲି ଅଲେଙ୍ଗ୍ ଆର୍ଏ ମେଇଂ ନସ୍ଟ ଡିଙ୍ଗ୍ ଆର୍ଏ ।
17 ଏନ୍ସା ମାପ୍ରୁ ମେଇଂନେ ଙ୍ଗିର୍ବୁଏଃଇଂନେ ଡାଗ୍ରା ସାର୍ଦା ଆଡିଙ୍ଗ୍ ଣ୍ଡୁ, ମେଇଂନେ ଆବା ଣ୍ଡୁନେ ଗଡ଼େଇଂ ବାରି ଗୋଏଃସାଙ୍ଗ୍କୁଏଃ ଆଡ଼ାତ୍ରା ଦୟା ଆଡିଙ୍ଗ୍ ଣ୍ଡୁ । ମେନ୍ସା ଡାଗ୍ଲା ସାପା ରେମୁଆଁ ଦରମ୍ ଣ୍ଡୁ, ଦୁରାଚାରି ବାରି ସାପା ମିଚ୍ ବ୍ନାସା ବାସଙ୍ଗ୍ଣ୍ଡ୍ରେ । ଆକାନ୍ ସାପା ଡିଙ୍ଗ୍ଲା ଡିଗ୍ ମେଁନେ ରିସା ସାନ୍ତି ଆଡିଙ୍ଗ୍ ଣ୍ଡୁ । ମାତ୍ରମ୍ ମେଁନେ ନ୍ତି ସେନୁଗ୍ ରକମ୍ ଚ୍ଲେ ଲାଏଃକେ ।
18 ମେଁ ଡାଗ୍ଲା ଦୁସ୍ଟ ରେମୁଆଁ ସୁଆରକମ୍ ଡୁଆଏ । ଆତାନ୍ କାଟାକଲି ବାରି ଗ୍ରେ ସ୍ଲାଃ ଡାବିଃଏ । ବାରି ଆତାନ୍ କଣ୍ଡାନେ ଲାଟାବୁଟାନ୍ୟା ଡୁଆଚେ ତାଙ୍ଗ୍କିଗ୍ ମାଃସ ରକମ୍ ମାଃସ ଡିଙ୍ଗ୍ଚେ ଆଡ଼ାତ୍ରା ତଃଡ଼୍ୟାଃଏ ।
19 ସାପାବାନ୍ ବପୁ ମାପ୍ରୁ ଅଃକେନ୍ ରିସା ଡିଙ୍ଗ୍ଏ ଜେ ସାପା ଦେସ୍ ସୁଆନ୍ୟା ଗିସେ ୱେଏ ବାରି ସାପା ରେମୁଆଁ ଗିସେ ୱେ ଆର୍ଏ । ଜାଣ୍ଡେ ଡିଗ୍ ରେମୁଆଁ ମେଁନେ ବୟାଁକେ ଦୟା ଆଡିଙ୍ଗ୍ ଣ୍ଡୁ ।
20 ରେମୁଆଁଇଂ ଇଞ୍ଚଙ୍ଗ୍ନ୍ତି ଏଃତେ ଦାପେ ଦାପେ ଚଙ୍ଗ୍ ଆର୍ଏ, ମାତ୍ରମ୍ ଆମେଇଂକେ କେଡ଼େସଃଏ । ବେଃସ୍ୟାଃତି ଏତେ ଚଙ୍ଗ୍ଆର୍ଏ ଆତାନ୍ ଆପାସେଃ ଣ୍ଡୁ । ଏନ୍ ଇଡ଼ିଙ୍ଗ୍ ମେଇଂ ନିଜର୍ ଗଡ଼େଇଂନେ ଚିଲି ଚଙ୍ଗ୍ ଆର୍ଏ ।
21 ଏନ୍ ଅରତ୍ ଡିଙ୍ଗ୍ଡିଂକେ ମନଃଶି ଇଫ୍ରୟିମ ବିରଦ୍ରେ ବାରି ଇଫ୍ରୟିମ ମନଃଶି ବିରଦ୍ରେ ଯୁଦ୍ ଡିଙ୍ଗ୍ଏ ବାରି ମେଇଂ ମ୍ୱାୟା ଯିହୁଦା ବିରଦ୍ରେ ଜୁଦ୍ ଡିଙ୍ଗ୍ ଆର୍ଏ । ଏଲେଡିଗ୍ ସଦାପ୍ରବୁ ଇସ୍ରାଏଲ୍ନେ ରେମୁଆଁଇଂନେ ଆଡ଼ାତ୍ରା ରିସା ବାରି ଆମେଇଂକେ ଡଣ୍ଡ୍ ବିଃନେ ସାନ୍ତି ଆଡିଙ୍ଗ୍ ଣ୍ଡୁ । ମାତର୍ ମେଁନେ ନ୍ତି ସିସେ ରକମ୍ ଲମ୍ବେଚେ ଲେଃକେ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)