ଜିସାୟ 34

ସତ୍ରୁଇଂ ରେମୁଆଁଇଂକେ ଇସ୍‌ପର୍‌ନେ ଡଣ୍ଡ୍‌

1 ଅ ଦେଶ୍‌ନେ ରେମୁଆଁଇଂ, ଡାଗ୍ରା ପାଙ୍ଗ୍‌ଚେ ଦ୍ରିଗ୍‌ପା, ଅ କୁଟୁମ୍‌ କୁଟୁମ୍‌ ରେମୁଆଁଇଂ, ପେ ମନ୍‌ଦ୍ୟାନ୍‌ ବିଃଚେ ଦ୍ରିଗ୍‌ପା; ଦର୍‌ତନି ଆରି ଆତ୍‌ଅରିଆ ଲେକ୍ନେ ରେମୁଆଁଇଂ ଦ୍ରିଗ୍‌ପା । ଆରି ଆତ୍‌ଅରିଆ ଜନମ୍‌ ଡିଙ୍ଗ୍‌କ୍ନେ ସାପା ଜିନିସ୍‌ ଦ୍ରିଗ୍‌ ଆର୍‌ଏ । 2 ମେଃଡାଗ୍‌ଲା ଜାତି ଜାତି ସାପାରେନେ ଆଡ଼ାତ୍ରା ମାପ୍‌ରୁନେ ରିସା ଆରି ମେଇଂନେ ସନ୍ୟ‍ଇଂନେ ଆଡ଼ାତ୍ରା ମେଁନେ ଜାବର୍‌ ରିସା ଲେଃକେ; ମେଁ ଆମେଇଂକେ ପୁରାପୁରି ବାବ୍‌ରେ ବିନାସ୍‌ ଆଃଡିଂବକେ, ମେଁ ଆମେଇଂକେ ବାଗୁଏଃନେ ନ୍‌ସାଃ ଅପେଃ ବିଃବକେ । 3 ମେଇଂନେ ଗୁଏଃକ୍ନେ ରେମୁଆଁଇଂ ବାଏରେ ଜଗ୍‌ତାଲାଗ୍‌ ବିଃଏ, ମେଇଂନେ ମଡ଼ାବାନ୍‌ ବାସ୍‌ନା ତାର୍‌ଏ ଆରି ମେଇଂନେ ମ୍‌ମ୍ୟାଁବାନ୍‌ କଣ୍ଡାଇଂ ଡୁଙ୍ଗ୍‌ଡିୟାଃ ୱେଏ । 4 ବାରି, କିତଙ୍ଗ୍‌ନେ ସ୍ନି, ଆର୍କେ ଆରି ଚାଙ୍କୁଆ ସାପାରେ ଲଃଆର୍‌ଏ ଆରି କିତଙ୍ଗ୍‌ଇନି ସାପା ଗୁଆର୍‌କ୍ନେ କାଗଜ୍‌ ରକମ୍‌ ୱେ ୱେଆର୍‌ଏ; ଆରି, ଡିରକମ୍‌ ଅଙ୍ଗୁର୍‌ ଲିଲିନେ ଉଲିଆଃ ଆରି ଲିୱା ସ୍ଲାଃନେ ଉଲିଆଃ ଲଃପାଃ ୱେଡିଂକେ, ଦେତ୍‌ରକମ୍‌ ମେଇଂନେ ସ୍ନି, ଆର୍କେ ଆରି ଚାଙ୍କୁଆ ସାପା ଲଃଆର୍‌ଏ । 5 ମେଃଡାଗ୍‌ଲା ନିଂନେ କାଣ୍ଡା କିତଙ୍ଗ୍‌ଇନିନିଆ ଆର୍ମେଚେ ବକେ, ବିଚାର୍‌ ପୁରନ୍‌ ଡିଂନ୍‌ସାଃ ଆତେନ୍‌ ଇଦୋମ୍‌ନେ ଆରି ନିଂନେ ଅବିସାପ୍‌ ବାକ୍ନେ ରେମୁଆଁଇଂନେ ଆଡ଼ାତ୍ରା ପଡ଼େଏ । 6 ମାପ୍‌ରୁନେ କାଣ୍ଡା ମ୍‌ମ୍ୟାଁ‍ ସୁଲୁଏ ବିସେକେ ରକମ୍‌ ଚଙ୍ଗ୍‌ବକେ ଆରି କ୍ରିଅରିଆ ଆରି ଗିମିଃଇଂନେ ସୁଲୁଏଃନେ କ୍ରି ଏଃତେ ମ୍ନାଃ ଡିଂଲେଃକେ; ମେଃଡାଗ୍‌ଲା ବସ୍ରାନିଆ ମାପ୍‌ରୁନେ ମୁଇଂ ପସୁ ବଲି ଆରି ଇଦୋମ ଦେସ୍‌ଅରିଆ ମୁଇଂ ମ୍ନାଃ ହତ୍ୟା ଡିଂଏ । 7 ବାରି, ମେଇଂନେ ଏଃତେ କଣ୍ଡାନେ ଅରେଃ, ଗ୍ଲେଃଇଂ ଏଃତେ ଙ୍ଗିରେ ଗ୍ଲେଃ ପାଙ୍ଗ୍‌ଆର୍‌ଏ; ତେଲା ମେଇଂନେ ଦେସ୍‌ ମ୍‌ମ୍ୟାଁଅରିଆ ବୁସାଃଆର୍‌ଏ ଆରି ମେଇଂନେ ତୁବଃ କ୍ରିଅରିଆ ମ୍ନାଃଆର୍‌ଏ । 8 ମେଃଡାଗ୍‌ଲା ଆକେନ୍‌ ମାପ୍‌ରୁନେ ପ୍ରତିସଦ୍‌ନେ ଦିନ୍‌, ଆକେନ୍‌ ସିୟୋନନେ ୱିଙ୍ଗ୍‌ଆଃରିଙ୍ଗ୍‌ଆଃ ବିସ‍ଏରେ ଚୁଚୁ ବାଦୁଲ୍‌ ଚୁଚୁ ବିଃନେ ମୁଆଁ । 9 ବାରି, ଆତ୍‌ନେ ଇଦୋମ୍‌ ଲଣ୍ଡିଆଃ ସାପା ଦୁପ୍‌ରେ ମାଃସଏ ଆରି ଆତ୍‌ନେ ଦୁଲି ବାସ୍ନାରେ ବଦ୍‌ଲେ ୱେଏ ଆରି ଆତ୍‌ନେ ତୁବଃ ଡୁଆଡିଂକ୍ନେ ଦୁପ୍‌ ରକମ୍‌ ଡିଂଏ । 10 ଆତେନ୍‌ ଦୁପ୍ ସ୍ମି ମିଡିଗ୍‌ ଆଲିଗ୍‌ ଣ୍ଡୁ; ଆତ୍‌ନେ ମାଃସ କାଲାଆଃ ଡୁଆଲେଃଏ; ନ୍ତାଞ୍ଜା କାଲ୍‌ ଜାକ ଆତେନ୍‌ ମରୁଭୂମି ଡିଂଚେ ଲେଃଏ; ମାଡାନେ କାଲ୍‌ ଜାକ ଆତେନ୍‌ ଗାଲି ବିଃଚେ ଜାଡିଗ୍‌ ଆ‍ଅଲେଙ୍ଗ୍‌ଆର୍‌ । 11 ମାତର୍‌ ରାବନ୍‌ ପିଗ୍‌ ଆରି ଗିଚେଙ୍ଗ୍‌ ଆତେନ୍‌ ଅଦିକାର୍‌ ଡିଂଆର୍‌ଏ; ଆରି କୁର୍‌ମା ଆରି ଗିଃଗ୍ୟାଃ ତେନ୍‌ ବିତ୍ରେ ବାସାଆର୍‌ଏ; ବାରି, ମେଁ ଇଦୋମ ଆଡ଼ାତ୍ରା ମେଃଡିଗ୍‌ ଆଲେକ୍ନେ ଜିନିସ୍‌ ରକମ୍‌ ମାପେନେ ଗେହେଃ ଆରି ନସ୍‌ଟ ମାଡିଙ୍ଗ୍‌ନେ ଉଲୁମ୍‌ ଆରେଃଏ । 12 ମେଇଂ ଆତ୍‌ଅରିଆ ଲେକ୍ନେ ବନ୍ଦିଆଇଂକେ ସାସନ୍‌ ଡିଂନେ ୱାଆର୍‌ଏ; ମାତର୍‌ ଜାଡିଗ୍‌ ଆତ୍‌ଅରିଆ ଆଲେଃଆର୍‌ ଆରି ଆତ୍‌ନେ ସାସନ୍‌ ଡିଂନେ ନେତା ସାପାରେ ବିନାସ୍‌ ଡିଂୱେଆର୍‌ଏ । 13 ଆତ୍‌ନେ ଡୁଆଅରିଆ ଗ୍ରେଃ ଆରି ଆତ୍‌ନେ ମ୍ନାଃ ଡୁଆଅରିଆ ଗେ ପୁଆଃ ଆରି ଗ୍ରେଃ ଲିଲି ମ୍ନାଃଏ ଆରି ଆତେନ୍‌ ନାକାଇଂନେ ବାସାନେ ଜାଗା ଆରି କୁର୍ମା ପିଗ୍‌ଇଂନେ ଚଙ୍ଗାଃନେ ଜାଗା ଡିଂଏ । 14 ବାରି, ଆତ୍‌ଅରିଆ କଣ୍ଡାନେ ପସୁଇଂ ନାକାଇଂ ଏଃତେ ମିସୁଃଆର୍‌ଏ ଆରି ଗିମିଃ ମେଁ ସାଙ଼୍ଗ୍‌କେ ୱାଏ । ଆରି, ମିଡିଗ୍‌ ବେଲା ଆତ୍‌ଅରିଆ ସେଁଆରେ ବାସାଚେ ପୁଣ୍ଡେନେ ଜାଗା ବାଏ । 15 ତେନ୍‌ ଜାଗା‍ଅରିଆ କୁର୍ମା ନିଜର୍‌ ଉଙ୍ଗ୍‌ଚ୍ୟାଃ ଡିଂଚେ ନ୍ତାଃ ବିଃଏ ଆରି ଉଙ୍ଗ୍‌ ଗଗ୍‌ଚେ ନିଜର୍‌ ଡେନାନେ ନ୍ଲୁଡ଼୍ୟାଃ ଆଲ ରାଃସିଙ୍ଗ୍‌ଏ; ଆରି, ରାବନ୍‌ ପିଗ୍‌ଇଂ ସାପାରେ ନିଜର୍‌ ନିଜର୍‌ ସାଙ୍ଗାଡ଼ି ଏଃତେ ଆତ୍‌ଅରିଆ ରିସିଙ୍ଗ୍‌ଆର୍‌ଏ । 16 ପେ ମାପ୍‌ରୁନେ ସାସ୍ତର୍‌ବାନ୍‌ ତୁର୍‌ଚେ ପଡ଼େପା; ଆକ୍ମେଇଂନେବାନ୍‌ ଜାଡିଗ୍‌ ମାଲେଃଚେ ଆଲେଃଆର୍‌, ଜାଡିଗ୍‌ ସାଙ୍ଗାଡ଼ି ମାଲେଃଚେ ଆଲେଃଆର୍‌; ମେଃଡାଗ୍‌ଲା ନିଂ ତୁମୁଁଆଃବାନ୍‌ ମେଁ ଆକେନ୍‌ ଆଦେସ୍‌ ଡିଂବକେ ଆରି ମେଁନେ ଆତ୍ମା ଆମେଇଂକେ ରାଃସିଙ୍ଗ୍‌ବକେ । 17 ବାରି, ମେଁ ମେଇଂନେ ନ୍‌ସାଃ ବାଟାଚେ ବକେ ଆରି ମେଁନେ ନ୍ତି ତୁଲେନେ କେଜିଗୁଣ୍ଡୁ ଏତେ ବାଟାଚେ ଆମେଇଂକେ ବିଃବକେ । ମେଇଂ ସାପାଦିନା ଆତ୍‌ଅରିଆ ଲେଃଆର୍‌ଏ, ମେଇଂ ଜୁଗ୍‌ ଜୁଗ୍‌ ଜାକ ଆତେନ୍‌ ବିତ୍ରେ ବାସାଆର୍‌ଏ ।