ଜିସାୟ 41

ଇସ୍ରାଏଲ୍‌କେ ଇସ୍‌ପର୍‌ ସାନ୍ତି ବିନେ

1 ଅ କୁପ୍‌ଲି ନିଆ ଲେକ୍ନେ ରେମୁଆଁଇଂ, ନେ ସାମ୍‌ନାରେ ବୁଙ୍ଗ୍‌ ଲାଃଲା ଆରି ରେମୁଆଁଇଂ ତ୍ମି ତ୍ମି ବପୁ ବା‍ଆର୍‌ଲେଃ; ମେଇଂ ଡାଗ୍ରା ପାଙ୍ଗ୍‌ଆର୍‌ଲେଃ; ତେଲା ସାମୁଆଁ ବାସଙ୍ଗ୍‌ଆର୍‌ଲେଃ; ନେ ମୁଇଂ ଡାଗ୍ରା ରିସିଙ୍ଗ୍‌ଚେ ବିଚାର୍‌ ନେଡିଂଏ । 2 ମେଁ ଦର୍ମରେ ଆଜାକେ ମେଁ ଞ୍ଚ ଡାଗ୍ରା ୱାଡିଂକେ, ଦେକ୍‌ରକମ୍‌ ମୁଇଂଡାକେ ପୁରୁବ୍‌ ଦିଗ୍‌ବାନ୍‌ ଜା ଜନମ୍‌ ଆଃଡିଂବକେ ? ମେଁ ବିନ୍‌ବିନ୍‌ ଦେସ୍‌ଅରିଆ ଲେଃକ୍ନେ ରେମୁଆଁଇଂକେ ମେଁ ସେଃମଁ ଅପେଃ ବିଃଏ ଆରି ରାଜାଇଂନେ ଆଡ଼ାତ୍ରା ଆମେକେ ସାସନ୍‌ ଆଃଡିଂଏ; ମେଁ ମେଁନେ କାଣ୍ଡା ସେଃମଁ ଆମେଇଂକେ ଦୁଲି ରକମ୍‌ ଆରି ମେଁନେ ଙାଁ ଏତେ ୱେଡିଂକ୍ନେ ଗୁଣ୍ଡ୍‌ ରକମ୍‌ ଅପେଃ ବିଃଆର୍‌ଏ । 3 ମେଁ ମେଇଂନେ ପ୍ଲାଃ ନୁଆଁଏ, ଆଣ୍ଡିନେ ଗାଲିଅରିଆ ମେଁ ଅଲେଙ୍ଗ୍‌ ଆବକେ ଣ୍ଡୁ, ଆତେନ୍‌ ଗାଲିଅରିଆ ଆଃ ମେଁ ମାବ୍‌ଟଚେ ସାନ୍ତିରେ ଅଲେଙ୍ଗ୍‌ଏ । 4 ଅଃସେବାନ୍‌ ପିଡ଼ିବାନ୍ ପିଡ଼ି କେ ୱାଚେ ଜାଣ୍ଡେଃ ଏନ୍‌ କାମ୍‌ ପୁରନ୍‌ ଆଃଡିଂବକେ ? ନେ ମାପ୍‌ରୁ ଆରାମ୍‌ ବାରି ସାରାସାରି ଜାକ ରେମୁଆଁଇଂ ଏଃତେ ନେ ନେଲେଃକେ । 5 କେଣ୍ଡିଆ ମଜେ ଲେକ୍ନେ କୁପ୍‌ଲିଇଂ କେଚେଃ ବୁଟ‍ଆର୍‌କେ; ମଚ୍‌ପୁର୍‌ନେ କଣ୍ଡା ସାପା ଲିଗିର୍‌କେ; ମେଇଂ ଡାଗ୍ରା ଡିଂଚେ ପାଙ୍ଗ୍‌ଆର୍‌କେ । 6 ମେଇଂ ସାପାରେ ନିଜର୍‌ କୁଟୁମ୍‌ଇଂନେ ସାଆଜ୍ୟ ଡିଂଆର୍‌କେ ଆରି ସାଆସ୍‌ ଡିଂପା ଡାଗ୍‌ଚେ ସାପାରେ ନିଜର୍‌ ବୟାଁଇଂକେ ବାସଙ୍ଗ୍‌ଆର୍‌କେ । 7 ଦେକ୍‌ରକମ୍‌ ଆଃରେଣ୍ଡ୍ରେ ସୁନାରିକେ ସାଆସ୍‌ ବିଃକେ ଆରି ଆମ୍ବାର୍‌ ଏଃତେ ସମାନ୍‌ ଆଃଡିଂନେ ରେମୁଆଁ ମିସୁଃନେ କାମ୍‌ ନିମାଣ୍ଡାଃ ଡିଂଲେଃକେ ଡାଗ୍‌ଚେ ବାସଙ୍ଗ୍‌ଚେ, ଆଃଗିଃଚେ ବଗ୍‌ନେ ରେମୁଆଁକେ ସାଆସ୍‌ ବିଃକେ; ବାରି, ମୁର୍ତି ଡିରକମ୍‌ ଆୱେ ଣ୍ଡୁ, ଆକେନ୍‌ସାଃ ମେଁ କୁଟି ଏଃତେ ଆତେନ୍‌ ଡାଟ୍‌ ଆଃଡିଂକେ । 8 ମାତର୍‌ ଅ ନେନେ ଦାସ୍‌ ଇସ୍ରାଏଲ୍‌, ନେ ସ୍ରି ନେବକ୍ନେ ଯାକୁବ୍‌, ନେନେ ରେମୁଆଁ ଅବ୍ରହାମ୍‌ନେ ବଂସ; 9 ନେ ଆନାକେ ସାଃଚେ ମଚ୍‌ପୁର୍‌ନେ ରେମୁଆଁଗଣ୍ଡ୍‌ ଣ୍ଡୁନେ ଜାଗା‍ଅରିଆ ଡୁଙ୍ଗ୍‌ପାଙ୍ଗ୍‌ନେବକେ ଆରି ମଚ୍‌ପୁର୍‌ନେ ସାନ୍ଦିବାନ୍‌ ଆନାକେ ୱାଚେ ବାସଙ୍ଗ୍‌ନେବକେ, ନାଁ ନେନେ ଦାସ୍‌, ନେ ଆନାକେ ସ୍ରି ନେବକେ ଆରି ସ୍ଲ ଆଃଡିଂ ନେବକେଣ୍ଡୁ; 10 ନାଁ ଆବ୍‌ଟଗେ, ମେଃଡାଗ୍ଲା ନେ ନାଁ ଏଃତେ ନେଲେଃକେ; ନିରାସ୍‌ ଆଡିଂଗେ, ମେଃଡାଗ୍ଲା ନେ ନାଁନେ ପର୍‌ମେସର୍‌; ନେ ଆନାଁକେ ଡାଟ୍‌ ନେରାଃଡିଂଏ; ହାଁ, ନେ ନାଁନେ ସାଆଜ୍ୟ ନେଡିଂଏ; ହାଁ, ନେ ନିଜର୍‌ ଦର୍ମ ରକମ୍‌ ଇଞ୍ଚଙ୍ଗ୍‌ତି ଏଃତେ ଆନାକେ ସାଃଚେ ନେବ‍ଏ । 11 କେଲା, ଜାଜା ନାଁ ଆଡ଼ାତ୍ରା ରିସା ଡିଂଲେଃଆର୍‌କେ, ତେନ୍‌ ସାପାରେ ଗିଆସଃ ଆରି ଗାବ୍‌ରା ଡିଂଆର୍‌ଏ; ଜାଜା ନାଁ ଏଃତେ ବିରଦ୍‌ ଡିଂଆର୍‌ଏ, ମେଇଂ ସରା ସ୍ରି ବିନାସ୍‌ ଡିଂଆର୍‌ଏ । 12 ଜାଜା ନାଁ ଏଃତେ ବିରଦ୍‌ ଡିଂଆର୍‌ଏ, ନାଁ ଆମେଇଂକେ ନାତୁର୍‌ଏ, ମାତର୍‌ ମେଇଂକେ ନା‍ଅବା ଣ୍ଡୁ; ଜାଜା ନାଁ ଏଃତେ ଜୁଜ୍‌ ଡିଂଆର୍‌ଏ, ମେଇଂ ସରା ସ୍ରି ଦରିଦ୍ର ଡିଂଆର୍‌ଏ । 13 ମେଃଡାଗ୍ଲା ନେ ମାପ୍‌ରୁ ନାଁନେ ପର୍‌ମେସର୍‌, ନାଁନେ ଇଞ୍ଚଙ୍ଗ୍‌ତି ସାଃଚେ ଆନାକେ ନେବାସଙ୍ଗ୍‌ଏ, ଆବ୍‌ଟଗେ; ନେ ନାଁନେ ସାଆଜ୍ୟ ନେଡିଂଏ । 14 ଅ ବୁବଃଉଂ ରକମ୍‌ ଯାକୁବ୍‌ ଆରି ଅ ଇସ୍ରାଏଲ୍‌ନେ ରେମୁଆଁଇଂ, ଆବ୍‌ଟଗେ; ମାପ୍‌ରୁ ବାସଙ୍ଗ୍‌ଡିଂକେ, ନେ ନାଁନେ ସାଆଜ୍ୟ ନେଡିଂଏ ଆରି ଇସ୍ରାଏଲ୍‌ନେ ପବିତ୍ର ସଦାପ୍ରବୁ ନାଁନେ ରକ୍ୟା ଡିଂଣ୍ଡ୍ରେ ଲାଏଃକେ । 15 କେଲା, ନେ ଆନାକେ ଡିଗ୍‌କ୍ନେ ନ୍‌ସଗ୍‌ ରକମ୍‌ ମୁଇଂ ତ୍ମି କିଆଉଁଆଃ ଲେଃନେ ଜିନିସ୍‌ ରକମ୍‌ ନେରାଡିଂଏ; ନାଁ କଣ୍ଡାଇଂକେ ଗୁଏଚେ ଗୁଣ୍ଡ୍‌ ନାରାଃଡିଂଏ ଆରି ମ୍ନା କଣ୍ଡାଇଂକେ ପିଆଲ୍‌ ରକମ୍‌ ନାରାଡିଙ୍ଗ୍‌ଏ । 16 ନାଁ ଆମେଇଂକେ କିସଃ ଏଃତେ ନାଗଙ୍ଗ୍‌ଲା, ୱେଡ଼୍ୟାଃ ଆମେଇଂକେ ଆଃୱାଲେଃ ରାଙ୍ଗ୍‌ଡ‍ଏ ଆରି ୱେଗୁର୍‌ ଆମେଇଂକେ ଚିନ୍‌ବିନ୍‌ ଆଃଡିଂବିଃଏ; ବାରି, ନାଁ ମାପ୍‌ରୁନେ ଡାଗ୍ରା ସାର୍ଦା ନାଡିଂଏ ଆରି ଇସ୍ରାଏଲ୍‌ନେ ପବିତ୍ର ସଦାପ୍ରବୁ ଡାଗ୍ରା ମ୍ନା ନାଡିଙ୍ଗ୍‌ଏ । 17 ଦରିଦ୍ର ଆରି ଗରିବ୍‌ଇଂ ଣ୍ଡିଆ ତୁର୍‌ଆର୍‌ଏ, ମାତର୍‌ ଣ୍ଡିଆ ଆହବା ଆର୍‌ ଣ୍ଡୁ, ତେଲା ମେଇଂନେ ନ୍ଲିୟା ଉଗ୍‌ଡ୍ୟାଃ ନ୍‌ସାଃ ନ୍‌ସୁଆର୍‌ଏ; ନେ ମାପ୍‌ରୁ ଆମେଇଂକେ ଉତର୍‌ ନେବିଃଏ, ନେ ଇସ୍ରାଏଲ୍‌ନେ ପର୍‌ମେସର୍‌ ଆମେଇଂକେ ନେଆନ୍ତାର୍‌ ଣ୍ଡୁ । 18 ନେ ସ୍ଲାଃପାଃଡ଼ୁ ମାଲେଃକ୍ନେ ତିଆର୍‌ ଜାଗା‍ଅରିଆ ଲଣ୍ଡ୍ୟାଃପାଃଡ଼୍ୟା ନେରାଃଡିଂଏ ଆରି ସମ୍‌ ଜାଗା‍ ମଜେ ଜଲାଡ଼୍ୟାଃଇଂ ନେରାଃତାର୍‌ଏ; ନେ କଣ୍ଡା ଆଃଡ଼ା କୁଣ୍ଡ୍ ନେରାଡିଙ୍ଗ୍‌ଏ ଆରି ନ୍‌ସୁଆର୍‌ ଲେଃକ୍ନେ ତୁବଃକେ ଣ୍ଡିଆଃ ନେରାଃତାର୍‌ଏ । 19 ନେ କଣ୍ଡାଅରିଆ ଏରସ, ଶିଟିମ୍‌ ସୁଆ ଆରି ମେହେନ୍ଦି ଆରି ଞ୍ଚୁ ତାର୍‌ନେ ସ୍ଲାଃ ନେଉଙ୍ଗ୍‌ଏ; ନେ ମରୁବୁମିଅରିଆ ଦେବଦାରୁ, ତିଧର ଆରି ତାଶୂର ସ୍ଲାଃ ମୁଇଂଅରିଆ ନେଉଙ୍ଗ୍‌ଏ; 20 ତେଲା ମାପ୍‌ରୁନେ ନ୍ତି ଆକେନ୍‌ କାମ୍‌ ଡିଂବକେ ଆରି ଇସ୍ରାଏଲ୍‌ନେ ପବିତ୍ର ମାପ୍‌ରୁ ଆକେନ୍‌ ଆଃରେ ବକେ ଡାଗ୍‌ଚେ ରେମୁଆଁଇଂ ସାପାରେ କେଆର୍‌ଏ ଆରି ଚିନ୍ତା ଡିଂଚେ ବୁଜେଆର୍‌ଏ ।

ମିଚ୍‌ ଦେବିଦେବ୍‌ତାଇଂ ଏତେ ମାପ୍‌ରୁ ଜିଦ୍ ଡିଙ୍ଗ୍‌ନେ

21 ମାପ୍‌ରୁ ବାସଙ୍ଗ୍‌ଡିଂକେ, ପେ ନିଜର୍‌ ୱିଙ୍ଗ୍‌ଆଃ ଡୁଙ୍ଗ୍‌ପାଙ୍ଗ୍‌ଲା; ଯାକୁବନେ ରାଜା ବାସଙ୍ଗ୍‌ଡିଂକେ, ପେ ନିଜର୍‌ ଡାଟ୍‌ ସାକିରେନେ ପର୍‌ମାନ୍‌ ସାପା ଆଃତାର୍‌ପା । 22 ମେଇଂ ତେନ୍‌ ସାପା ଆଃତାର୍‌ଚେ ମେଃ ମେଃନେ ଗଟେଏ, ଆତେନ୍‌ ନେ ଡାଗ୍ରା ବାସଙ୍ଗ୍‌ଲେଃ; ଅଃସେନେ ସାମୁଆଁଇଂ ମେଃନେ, ଆତେନ୍‌ ପେ ବାସଙ୍ଗ୍‌ପା, ଆତେନ୍‌ ପେଡିଂଲା, ନେ ଚିନ୍ତା ଡିଂଚେ ଆତ୍‌ନେ ସାରାସାରି କେଲାନେ ଗଟ୍‌ନା ମ୍ୟାଃ ୟାଡିଂଏ; ଣ୍ଡୁଲା ଇଡ଼ିଂଡେ ଗଟେନେ ଗଟ୍‌ନା ଆନେକେ ଆଃସୁଏଃ । 23 ଏନ୍‌ଇଡ଼ିଂ ମେଃ ମେଃ ଗଟେଏ, ଆତେନ୍‌ ବାସଙ୍ଗ୍‌ପା, ତେଲା ପେ ଜେ ଇସ୍‌ପର୍‌ଇଂ, ଆକେନ୍‌ ନେ ନେମ୍ୟାଃଏ; ହାଁ, ବଲ୍ ଡିଙ୍ଗ୍‌ଲେ, କି ଦଦିଆ ଡିଙ୍ଗ୍‌ଲେ, ତେଲା ନେ ନିରାସ୍‌ ଡିଂଚେ ମୁଇଂତୁଗ୍‌ ରିସିଙ୍ଗ୍‌ଚେ ଆତାନ୍‌ ନେକେଏ । 24 କେଲା, ପେ ମେଃଡିଗ୍ ଣ୍ଡୁ ଆରି ପେନେ ମେଃଡିଗ୍‌ କାମ୍‌ ଆଃ ଣ୍ଡୁ; ମୁଃଡ଼ି ରେମୁଆଁ ଆପେକେ ସ୍ରିଏ, ମେଁ ଗ୍ରୁନା ଡିଙ୍ଗ୍‌ନେ ରେମୁଆଁ । 25 ନେ ଉତର୍‌ ଦିଗ୍‌ବାନ୍‌ ମୁଇଂଡାକେ ଆଃତାର୍‌ନେବକେ ଆରି ମେଁ ପିଙ୍ଗ୍‌ଚାଃ ଲେଃକେ; ମେଁ ସ୍ନି ତାର୍‌ନେ ଦିଗ୍‌ବାନ୍‌ ନେନେ ମ୍ନି ୱାଏ; ମେଁ ଲାଃମୁଆର୍‌କ୍ନେ ମସ୍‌ଲା ଆରି କୁମ୍ବାର୍‌ ଲାଃମୁଆର୍‌କ୍ନେ ତୁବଃ ରକମ୍‌ ଦେସ୍‌ନେ ନେତାଇଂକେ ଟେମ୍ବୁର୍‌ଏ । 26 ନେ ଡିରକମ୍‌ ମ୍ୟାଃନେୟାଏ, ଆକେନ୍‌ସାଃ ଅଃସେବାନ୍‌ ଜାଣ୍ଡେଃ ଆକେନ୍‌ ବାସଙ୍ଗ୍‌ବକେ ? ବାରି, ମେଁ ଦାର୍ମିକ୍‌ ଡାଗ୍‌ଚେ ଡିରକମ୍‌ ନେ ବାସଙ୍ଗ୍‌ନେୟାଏ, ଆକେନ୍‌ସାଃ ସିସେବାନ୍‌ ଜା ଆକେନ୍‌ ବାସଙ୍ଗ୍‌ବକେ ? ହାଁ, ବାସଙ୍ଗ୍‌ଣ୍ଡ୍ରେ ଜାଡିଗ୍‌ ଣ୍ଡୁ, ହାଁ, ଆଃସୁଏଃଣ୍ଡ୍ରେ ଜାଡିଗ୍‌ ଣ୍ଡୁ, ହାଁ, ପେନେ ସାମୁଆଁ ଦ୍ରିଗ୍‌ ନ୍‌ସାଃ ଜାଡିଗ୍‌ ଣ୍ଡୁ । 27 ନେ ପର୍‌ତୁମ୍‌ ସିୟୋନକେ ନେବାସଙ୍ଗ୍‌ଏ, କେଲା, ଆମେଇଂକେ କେଲା, ବାରି ନେ ଯିରୂଶାଲମଅରିଆ ମାପ୍‌ରୁନେ ସାମୁଆଁ ଡୁଙ୍ଗ୍‌ପାଙ୍ଗ୍‌ନେ ମୁଇଂ ରେମୁଆଁକେ ନେବିଃଏ । 28 ନେ କିକେନେ ବେଲା ଜାଡିଗ୍‌ ଣ୍ଡୁ; ନେ ସାଲ୍ୟାଃକୁନେ ବେଲା ଜା ମୁଇଂ ପଦ୍‌ ଉତର୍‌ ବିଃ ୟାଏ, ମେଇଂନେ ବିତ୍ରେ ଦେକ୍‌ରକମ୍‌ ଗ୍ର ରକମ୍‌ ବୁଦି ବିଃଣ୍ଡ୍ରେ ଜାଡିଗ୍‌ ଣ୍ଡୁ । 29 କେଲା, ତେନ୍‌ ସାପାରେ, ମେଇଂନେ କାମ୍‌ ସାପା ବେକାର୍‌ ଆରି ସରାଃ ଆଃ ମାତର୍‌; ମେଇଂନେ ଚଞ୍ଚ୍‌ ଏଃତେ ଆଃରେକ୍ନେ ମୁର୍ତି‍ଇଂ ୱେଡ଼୍ୟାଃ ରକମ୍ ଆରି ମେଃଡିଗ୍‌ ଣ୍ଡୁ ।