ଜିସାୟ 48

ଇସ୍ରାଏଲ୍‌ ମନ୍ ବଦ୍‌ଲେନେ

1 ଅ ଇସ୍ରାଏଲ୍‌ ମ୍ନିରେ ଉଡ୍ରା ଡିଂଲାଏଃକ୍ନେ ଆରି ଯିହୁଦାନେ ଣ୍ଡିଆଃବାନ୍‌ ଜନମ୍‌ ଡିଂଲାଏଃକ୍ନେ ଯାକୁବ ବଂସ, ପେ ଆକେନ୍‌ ସାମୁଆଁ ଦ୍ରିଗ୍‌ପା; ପେ ମାପ୍‌ରୁନେ ମ୍ନିରେ ପାର୍‌ମାନ୍‌ ଡିଂପେଡିଂକେ ଆରି ଇସ୍ରାଏଲ୍‌ନେ ପର୍‌ମେସର୍‌ନେ ମ୍ନି ସାର୍‌ ପେଡିଂକେ, ମାତର୍‌ ସତ୍‌ ବାବ୍‌ରେ କି ଦରମ୍‌ ବାବ୍‌ରେ ଣ୍ଡୁ । 2 ମେଃଡାଗ୍‌ଲା ମେଇଂ ନିଜ୍‌କେ ପବିତ୍ର ଇନିନେ ରେମୁଆଁ ଡାଗ୍‌ଚେଃ ପରିଚୟ୍‌ ବିଃଆର୍‌ଏ ଆରି ଇସ୍ରାଏଲ୍‌ନେ ପର୍‌ମେସର୍‌ନେ ଆଡ଼ାତ୍ରା ଆସା ବମ୍ୟାଃଆର୍‌କେ; ମେଁନେ ମ୍ନି ସନ୍ୟାଦିପତି ମାପ୍‌ରୁ । 3 ନେ ଅଃସେ କାଲ୍‌ନେ ସାମୁଆଁ ଅଃସେ କାଲ୍‌ବାନ୍‌ ବାସଙ୍ଗ୍‌ନେବକେ; ହାଁ, ଆତେନ୍‌ ନେ ତୁମୁଁଆଃବାନ୍‌ ତାର୍‌କେ ଆରି ଆତେନ୍‌ ନେ ନେବାସଙ୍ଗ୍‌କେ; ନେ ଆତେନ୍‌ ନେଡିଂକେ ଆରି ମାରିୟାଃତୁଗ୍‌ ତେନ୍‌ ସାପା ଗଟେକେ । 4 ପେ ଅମାନି ରେମୁଆଁ, ନାଁନେ କ୍ଲର୍‌ପିଗ୍ ଲୁଆ ନାଲା ରକମ୍ ଆରି ନାଁନେ କାପାଲ୍‌ ପିତଲ୍‌ ରକମ୍‌ ଡାଗ୍‌ଚେଃ ନେ ନେମ୍ୟାଃକେ । 5 ଏନ୍‌ସାଃ ନେ ବାୱିର୍‌ କାଲ୍‌ବାନ୍‌ ନାଁ ଡାଗ୍ରା ଆତେନ୍‌ ନେରାଃସୁଏଃକେ; ଆତେନ୍‌ ଗଟେନେ ସିସେ ଆନାକେ ନେରାଃମ୍ୟାଃକେ; ଣ୍ଡୁଲା ନା ନାପାବାସଙ୍ଗ୍‌, ନେନେ ଦେବ୍‌ତା ଆକେନ୍‌ ଡିଂବକେ, ନେନେ ନ୍ତି ଏଃତେ ଆଃରେବ୍ନ ଆରି ଚଞ୍ଚ୍‌ ଏଃତେ ଆଃରେକ୍ନେ ମୁର୍ତି ଆକେନ୍‌ ଆଦେସ୍‌ ଡିଂବକେ । 6 ନାଁ ଦ୍ରିଗ୍‌ନାଲେଃକେ; ଆକେନ୍‌ ସାପା କେଲା ଆରି ପେ କି ଆତେନ୍‌ ପେବାସଙ୍ଗ୍‌ ଣ୍ଡୁ ? ଆକେନ୍‌ ବେଲାବାନ୍‌ ନେ ଆନାକେ ତ୍ମି ସାମୁଆଁ ବାରି ନାଁ ନାମ୍ୟାଃକ୍ନେ ସାପା ସାମୁଆଁ ଆଃସୁଏଃନେବକେ । 7 ତେନ୍‌ ସାପା ଅଃସେନେ କାଲ୍‌ବାନ୍‌ ଣ୍ଡୁ, ମାତର୍‌ ଏବେ ତିଆର୍‌ ଡିଂକେ; ଏଃକେନ୍‌ ଦିନ୍‌ନେ ସିସେ ପେ ଆତେନ୍‌ ପେଦ୍ରିଗ୍‌କେ ଣ୍ଡୁ; ଣ୍ଡୁଲା କେଲା, ନେ ଆତେନ୍‌ ସାପା ନେମ୍ୟାଃକେ ଡାଗ୍‌ଚେଃ ପେ ପେପାବାସଙ୍ଗ୍‌ । 8 ସତ୍‌ରେ, ନାଁ ନାଦ୍ରିଗ୍‌କେ ଣ୍ଡୁ; ନାଁ ନାମ୍ୟାଃକେ ଣ୍ଡୁ; ସିସେବାନ୍‌ ନାଁନେ ନ୍ଲୁଗ୍‌ ଅଁ ନାଡିଂଗେ ଣ୍ଡୁ; ମେଃଡାଗ୍‌ଲା ପେ ଜେ ମାଲେ ବିସ୍‌ବାସ୍‌ ନାପାଗ୍‌ଚିଃକେ ଆରି ଗର୍ବେବାନ୍‌ ପାପି ଡାଗ୍‌ଚେଃ ସ୍ନାମୁଁଆଃ ଡିଂନାଲାଏଃଗେ, ଆକେନ୍‌ ନେ ନେମ୍ୟାଃକେ । 9 ନେ ଡିରକମ୍‌ ଆନାକେ ନେବାଗୁଏଃ ଣ୍ଡୁ, ଆକେନ୍‌ସାଃ ନେ ନେନେ ମ୍ନି ନ୍‌ସାଃ ନିଜର୍‌ ରିସା ଗଣ୍ଡାଃ ନେରାଃଡିଙ୍ଗ୍‌ଏ ଆରି ନିଜର୍‌ ପ୍ରସଂସା ନ୍‌ସାଃ ନାଁ ଆଡ଼ାତ୍ରା ଆଲିଆ ଣ୍ଡିଙ୍ଗ୍‌କେ । 10 କେଲା, ନେ ଆନାକେ ପବିତ୍ର ଆଡିଙ୍ଗ୍‌ ନେବକେ, ମାତର୍‌ ରୁପା ରକମ୍‌ ଣ୍ଡୁ; ମାତର୍‌ ନେ ଦୁକ୍‌ ରକମ୍‌ ସୁଆ କୁଣ୍ଡ୍‌ ରକମ୍‌ ଆନାକେ ସ୍ରି ନେବକେ । 11 ନେ ନିଜର୍‌ ନ୍‌ସାଃ, ମାତର୍‌ ନିଜର୍‌ ଆତ୍ଲା ଆତେନ୍‌ ନେଡିଂଏ; ମେଃଡାଗ୍‌ଲା ନେନେ ମ୍ନି ମେଃନ୍‌ସାଃ ଅପବିତ୍ର ଡିଂଏ ? ବାରି, ନେ ନିଜର୍‌ ଗଉରବ୍‌ ବିନ୍‌ ରେମୁଆଁକେ ନେବିଃ ଣ୍ଡୁ ।

ଇସ୍ରାଏଲ୍‌ନେ ଆଡ଼ାତ୍ରା ଇସ୍‌ପର୍ ୱାନେ

12 ଅ ଯାକୁବ, ଅ ନେନେ ୱାବ୍ନ ଇସ୍ରାଏଲ୍‌, ନେନେ ସାମୁଆଁଅରିଆ ଦିଆନ୍‌ ବିଃପା; ନେ ଆତେନ୍‌ ନେଲାଏଃକେ; ନେ ସିସେ, ନେ ଆଃ ସାରାସାରି । 13 ଆରି, ନେନେ ନ୍ତି ମଚ୍‌ପୁର୍‌ନେ ପାଣ୍ଡୁସନ୍‌ ଆଃରେବକେ ଆରି ନେନେ ବେଃସ୍ୟାଃ ନ୍ତି କିତଙ୍ଗ୍‌ଇନି ଅସାର୍‌ ଆଃଡିଂବକେ; ନେ ଆମେଇଂକେ ନେୱାଲା, ମେଇଂ ମୁଇଂଅରିଆ ତୁଆଁଆର୍‌ଏ । 14 ପେ ସାପାରେ ମୁଇଂଅରିଆ ରିସିଙ୍ଗ୍‌ଚେଃ ଦ୍ରିଗ୍‌ପା; ମେଇଂନେ ବିତ୍ରେ ଜା ଆକେନ୍‌ ସାପା ବାସଙ୍ଗ୍‌ବକେ ? ମାପ୍‌ରୁ ଆମେକେ ଆଲାଦ୍‌ ଡିଂବକେ; ମେଁ ବାବିଲ୍‌ ଆଡ଼ାତ୍ରା ମେଁନେ ଇକ୍‌ଚା ପୁରନ୍‌ ଆଃଡିଂଏ ଆରି କଲଦୀୟଇଂନେ ଆଡ଼ାତ୍ରା ମେଁନେ ନ୍ତି ଲେଃଏ । 15 ନେ, ନେ ଆଃ ସାମୁଆଁ ବାସଙ୍ଗ୍‌ନେବକେ; ହାଁ, ନେ ଆମେକେ ୱାନେବକେ; ନେ ଆମେକେ ଡୁଙ୍ଗ୍‌ପାଙ୍ଗ୍‌ନେବକେ, ଆରି ମେଁ ନିଜର୍‌ ଗାଲିଅରିଆ ସପଲ୍‌ ଡିଂଏ । 16 ପେ ନେ ଡାଗ୍ରା ପାଙ୍ଗ୍‌ଚେଃ ଆକେନ୍‌ ସାମୁଆଁ ଦ୍ରିଗ୍‌ପା; ନେ ମୁଲେବାନ୍‌ ବୁଃଡ଼ିଚେ ବାସଙ୍ଗ୍‌ନେବକେ ଣ୍ଡୁ; ଆତେନ୍‌ ଡିଂଡିଂକ୍ନେ ବେଲାବାନ୍‌ ନେ ଆତ୍‌ଅରିଆ ନେଲାଏଃକେ; ବାରି, ଏବେ ମାପ୍‌ରୁ, ଆନିଂକେ ଆରି ମେଁନେ ଆତ୍ମାକେ ବେବକେ ।

ମେଁନେ ରେମୁଆଁଇଂ ନ୍‌ସାଃ ମାପ୍‌ରୁନେ ଜଜନା

17 ମାପ୍‌ରୁ ପେନେ ରକ୍ୟା ଡିଂଣ୍ଡ୍ରେ, ଇସ୍ରାଏଲ୍‌ନେ ପବିତ୍ର ଇସ୍‌ପର୍‌ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ; ନେ ମାପ୍‌ରୁ, ପେନେ ପର୍‌ମେସର୍‌, ଆପେକେ କାମ୍‌ଅରିଆ ପାଙ୍ଗ୍‌ନେ ସିକ୍ୟା ରକମ୍‌ ସିକ୍ୟା ନେବିଃଏ, ପେନେ ଅଲେଙ୍ଗ୍‌ନେ ଗାଲିପାକା ଆପେକେ ୱା ଡୁଙ୍ଗ୍‌ନେୱେଏ । 18 ଆଃ, ପେ ଅଃନା ନେ ସାମୁଆଁଅରିଆ ଦିଆନ୍‌ ପେପାବିଃ ! ତେଲା ପେନେ ସାନ୍ତିନେ ଲଣ୍ଡ୍ୟାଃ ରକମ୍‌ ଆରି ପେନେ ଦରମ୍‌ କାମ୍‌ କେଣ୍ଡିଆଃନେ ଲ‍ଉଡ଼ି ରକମ୍‌ ପାଡିଂ; 19 ପେନେ ବଂସ ଡିଗ୍‌ ବାଲି ରକମ୍‌ ଆରି ପେନେ ସୁଲୁଏଃବାନ୍‌ ଜନମ୍‌ ଡିଂକ୍ନେ ଗଡ଼େଇଂ ଆତ୍‌ନେ ଦୁଲି ଗୁଣ୍ଡ୍ଇଂ ରକମ୍‌ ପାଡିଂଆର୍‌; ମେଁନେ ମ୍ନି ନେ ସେଃମଁବାନ୍‌ ଆଗୁଏଃଆର୍‌ପାଡିଂ ଣ୍ଡୁଲା ବିନାସ୍‌ ଆଡିଂପାଡିଂଆର୍‌ । 20 ପେ ବାବିଲ୍‌ବାନ୍‌ ତାର୍‌ୱେଲାପା, କଲଦୀୟଇଂନେ ବିତ୍ରେବାନ୍‌ ଲାଗ୍‌ଡଲାପା; ପେ ଅସ୍‌ମାର୍‌ ସାର୍‌ ସାର୍‌ଚେଃ ବାସଙ୍ଗ୍‌ ଆଃମ୍ୟାଃପା, ମଚ୍‌ପୁର୍‌ନେ କନେ କନେ ସାରାସାରି ଜାକ ଆକେନ୍‌ ବାସଙ୍ଗ୍‌ପା; ପେ ବାସଙ୍ଗ୍‌ପା, ମାପ୍‌ରୁ ନିଜର୍ ଦାସ ଯାକୁବକେ ଉଦାର୍‌ ଡିଂବକେ । 21 ବାରି, ମେଁ ମରୁବୁମି ଗାଲି ଆମେଇଂକେ ଆଃଅଲେଙ୍ଗ୍‌ନେ ବେଲା ଆମେଇଂକେ ଉଗ୍‌ଡ୍ୟାଃ ଆଡକେ ଣ୍ଡୁ, ମେଁ ମେଇଂନେ ନ୍‌ସାଃ ବ୍ରିବାନ୍‌ ଣ୍ଡିଆଃ ଆତାର୍‌କେ, ଆରି ମେଁ ବ୍ରିକେ ବଗ୍‌କେ, ବାରି ଆତ୍‌ବାନ୍‌ ଣ୍ଡିଆଃ ତାର୍‌କେ । 22 ମାପ୍‌ରୁ ବାସଙ୍ଗ୍‌ଡିଂକେ, ଦୁସ୍‌ଟ ରେମୁଆଁଇଂନେ ମେଃଡିଗ୍‌ ସାନ୍ତି ଣ୍ଡୁ ।