ସୋର ଆରି ସିଦନ୍ ଆଡ଼ାତ୍ରା ବବିସତ୍ ବାନି
1 ସୋର ବିସଏରେ ମୁଇଂ ବବିସତ୍ ସାମୁଆଁ । ଅ ତର୍ଶୀଶ୍ନେ ଜାହାଜ୍ ସାପା, ପେଇଂ ଅ ପା । ଡାଗ୍ଲା ଆତାନ୍ ଦେକ୍ରକମ୍ ତେରେପେତେ ଡିଙ୍ଗ୍କେ ଜେ, ଆତ୍ଡାଗ୍ରା ମୁଇଂଡିଗ୍ ଡୁଆ ଣ୍ଡୁ, କି ବିତ୍ରେ ଗିଗାନେ ଗାଲି ଣ୍ଡୁ । କିତ୍ତୀମ ଦେସ୍ବାନ୍ ଏହେନେ ମେଇଂନେ ଆଡ଼ାତ୍ରା ତାର୍କେ ।
2 ଅ ଦ୍ୱୀପ ଡାଗ୍ରା ବାସାଣ୍ଡ୍ରେ, ପେଇଂ ବୁଙ୍ଗ୍ଲାଲାପା । କେଣ୍ଡ୍ୟାଃ ପୁଆଃଚେ ସୀଦୋନନେ ବେପାରି ପେ ଦେସ୍କେ ସାକାର୍ ଆଡିଙ୍ଗ୍କେ ।
3 ଆତାନ୍ ରେମୁଆଁଇଂ କିଆ ତୁର୍ଚେ ଲଣ୍ଡ୍ୟାଃ ଇନୁମେତା ୱେଆର୍କେ । ସୋରନେ ଆତାନ୍ ବେପାରି ନିଲ କେଣ୍ଡ୍ୟାଃନେ କିଆଉଁଆଃ ବିଆର୍ଆର୍କେ ବାରି ବିନ୍ ଦେସ୍ନ୍ୟା ସବିଃଆର୍କେ ।
4 ଅ ସୀଦୋନ, ପେ ଗ୍ୟାସପା, ଡାଗ୍ଲା କେଣ୍ଡିଆ, କେଣ୍ଡିଆନେ ଡାଟ୍ ତିଆର୍ ଡୁଆ ଏହେନେ ସାମୁଆଁ ବାସଙ୍ଗ୍ବକେ, "ନେ ସେଲାମ୍ବୁଏଃଇଂ ଣ୍ଡିଆଃକୁମାନେ ଦୁକାସୁକା ନେବାକେ ଣ୍ଡୁ, ଣ୍ଡିଆଃ ନେକୁମାକେ ଣ୍ଡୁ ଣ୍ଡୁଲା ଙ୍ଗିର୍ବୁଏଃଇଂନେ ସେବା ନେଡିଙ୍ଗ୍କେ ଣ୍ଡୁ, କି ସେଲାମ୍ବୁଏଃଇଂନେ ବିଃତୁଏଃ ନେଡିଙ୍ଗ୍କେ ଣ୍ଡୁ ।"
5 ଆକେନ୍ କବର୍ ମିସର୍ନିଆ ୱେଚାକେ, ରେମୁଆଁଇଂ ସୋର ବିସୟ୍ରେ କବର୍ ଅଁଚେ ଇରିଆତୁଗ୍ ୱେଆର୍ଏ ।
6 ଅ ଜାହାଜ୍ଇଙ୍ଗ୍, ପେଇଂ ତର୍ଶୀଶ୍ନ୍ୟା ଆଣ୍ଡେ ୱେଲାପା । ଅ କୁପ୍ଲି ଡାଗ୍ରା ବାସାଣ୍ଡ୍ରେ, ପେଇଂ ଦୁକ୍ ଡିଂଚେଃ ଅଃପା ।
7 ଅଃସେ ସୋର ପେଇଂନେ ସାର୍ଦା ଡିଙ୍ଗ୍ନେ ଇନି ଲେଃଗେ । ଆତାନ୍ ବାୱିର୍ ଇନି ଅଃସେବାନ୍ ଆଃ ଲ୍ଲେକେ । ଆତାନ୍ ଇନିନେ ରେମୁଆଁ ସ୍ଲ ଦେସ୍ନ୍ୟା ବାସା ନ୍ସା ୱେଲେଃଆର୍କେ ।
8 ମୁକୁଟ୍ ବାଟାଣ୍ଡ୍ରେ ସୋରନେ ବେପାରି ରାଜା ରକମ୍ । ମେଁନେ ମ୍ନାଃ ରେମୁଆଁଇଂ ପୁର୍ତିବିନେ ସକ୍ତିଶାଲି ରେମୁଆଁ । ମେଁନେ ସପଟ୍ରେ ଆକେନ୍ କୁଟ୍ ଜା ଡିଙ୍ଗ୍ବକେ ?
9 ସାପାବାନ୍ ବପୁ ମାପ୍ରୁ ମଚ୍ପୁର୍ନେ ସାପା ଆଙ୍କାର୍ ରେମୁଆଁଇଂନେ ଗର୍ବ, ମ୍ନାଃରେଇଂନେ ମହିମାକେ କରାପ୍ ଆଡିଙ୍ଗ୍ ନ୍ସା ଜଜନା ଡିଙ୍ଗ୍ବକେ ।
10 ଅ ତର୍ଶୀଶ୍ନେ ସେଲାଇଂ, ପେ ନିଲ କେଣ୍ଡ୍ୟାଃ ରକମ୍ ନାନେ ଦେସ୍ ବିଚେ ୱେଲା, ଆପେକେ ଜା ମନା ଆଡିଙ୍ଗ୍ ଣ୍ଡୁ ।
11 ସଦାପ୍ରବୁ କେଣ୍ଡ୍ୟାଃ ଆଡ଼ାତ୍ରା ମେଁନେ ନ୍ତି ଆଲମ୍ୱେ ବକେ । ମେଁ ରାଜି ସାପାକେ ତର୍ବର୍ ଆଡିଙ୍ଗ୍ବକେ । ସଦାପ୍ରବୁ କିଣାନନେ ମ୍ନା ମ୍ନା ଡୁଆ ଆଣ୍ଡେଙ୍ଗ୍ ଦଂସ ଆଡିଙ୍ଗ୍ନ୍ସା ଆଜ୍ଞା ବିଃବକେ ।
12 ବାରି, ସଦାପ୍ରବୁ ବାସଙ୍ଗ୍ଡିଂକେ, "ଅ ସୀଦୋନ ଆଡ଼ାତ୍ରା ଲେକ୍ନେ ରେମୁଆଁ, ଡିଣ୍ଡା ସେଲା, ପେ ଆରି ସାର୍ଦା ପେଡିଙ୍ଗ୍ ଣ୍ଡୁ, ତଃଡ଼୍ୟାଃପା, ପୁଆଚେ ବାରି କିତ୍ତୀମନିଆ ୱେଲାପା ଆତ୍ଅରିଆ ଡିଗ୍ ନା ପୁଣ୍ଡେନେ ଜାଗା ନାବା ଣ୍ଡୁ ।"
13 କଲଦୀୟଇଂନେ ଦେସ୍କେ କେଲାପା । ବାବିଲ୍ ଏବେ ବାରି ଦେସ୍ ଣ୍ଡୁ । ଅଶୂରୀୟଇଂ ଆମେକେ ଆକ୍ରମନ୍ ଡିଙ୍ଗ୍ଚେ ମେଁନେ ପିତୁର୍ ପାକା ମ୍ନାଃ ମ୍ନାଃ ଡୁଆ ଆଃରେବକେ । ମେଁନେ ସନ୍ୟଇଂ ଆତାନ୍ ରମଣୀୟ ରାଜାନେ ବାଜାର୍ବାନ୍ ସାପା ଜିନିସ୍ ଡଙ୍ଗାରାଙ୍ଗ୍ଡବକେ । ବାବିଲକେ ଦଂସ ଡିଙ୍ଗ୍କ୍ନେ ଡୁଆଇଂ ତ୍ରିଆଞ୍ଜା ସୁଗୁଆ ଡିଙ୍ଗ୍ଲାଏକେ ଆରି ଆମେକେ କଣ୍ଡା ଜନ୍ତୁଇଂନେ ବାସାନେ ଜାଗା ରକମ୍ ଆଃଡିଙ୍ଗ୍ବଆର୍କେ ।
14 ଅ ତର୍ଶୀଶ୍ନେ ଜାହାଜ୍ ସାପା, ତରଅର ଡିଙ୍ଗ୍ପା । ଡାଗ୍ଲା ପେନେ ତିଆର୍ ଡୁଆ ସାପା ଦଂସ ଡିଙ୍ଗ୍ୱେଲେଃକେ ।
15 ଆତେନ୍ ଦିନ୍ ଦେକ୍ରକମ୍ ଗଟେଏ ଜେ, ମୁଇଂ ରାଜାନେ ଅଦିକାର୍ ଡିଙ୍ଗ୍ନେ ବେଲା ଜାକ ସୋର ସତୁରି ମୁଆଁ ଜାକ ଆବଃ ବିଃଆର୍ଏ । ସତୁରି ମୁଆଁ ଡାଃକ୍ନେ ଇଡ଼ିଙ୍ଗ୍ ଦାରି ସେଲାନେ ଅସ୍ମାର୍ ଇସାବ୍ରେ ସୋର ଆରାତ୍ରା ଗଟେଏ ।
16 "ଅ ଅଲେଙ୍ଗ୍ନେ ଦାରି । ଟଇଲା ସାଚେ ଇନି ଇନି ଅଲେଙ୍ଗ୍ । ନିମାଣ୍ଡାଃ ବାବ୍ରେ ବଗ୍ ଆରି ବାରି ଗୁଲୁଏ ଅସ୍ମାର୍ ସାର୍ । ତେଲା ଆପେକେ ମନେ ବଆର୍ଏ । ଆତେନ୍ସା ମନ୍କେ ୱେକେ ସୁଗୁଆ ଅସ୍ମାର୍ ସାର୍ଚେ ବାଃତି, ବାରି ଗୁଲେ ଅସ୍ମାର୍ ସାର୍ ।"
17 ବାରି ସତୁରି ମୁଆଁ ଡାକ୍ନେ ଇଡ଼ିଙ୍ଗ୍ ସଦାପ୍ରବୁ ସୋର ବିସଏରେ ଟିକିନିକି ବାବ୍ରେ ତୁର୍ଏ, ଆତ୍ବା ମେଁ ସିସେ ଡିଙ୍ଗ୍ନେ କରାପ୍ କାମ୍ ଏବେ ଡିଙ୍ଗ୍ଏ । ବାରି ମଞ୍ଚ୍ପୁର୍ନିଆ ଲେକ୍ନେ ସାପା ପୁର୍ତିବିନେ ସାପା ରାଇଜ୍ ଏତେ ବେସ୍ୟା କାମ୍ ଡିଙ୍ଗ୍ଏ ।
18 ଆରି, ମେଁନେ ବେପାର୍ ଆରି ବଡ଼ା ବିଃନେ ଜିନିସ୍ ସଦାପ୍ରବୁନେ ଉଦେସ୍ରେ ପବିତ୍ର ଡିଙ୍ଗ୍ଏ । ଆତେନ୍ କିଆ ଉଁୱାଃ ଲେକ୍ନେ ଡୁଆନିଆ ଆବ ଆର୍ କି ଆତେନ୍ ରାସିଙ୍ଗ୍ଚେ ଆବ ଆର୍ ଣ୍ଡୁ । ମେଃଡାଗ୍ଲା, ଜାଣ୍ଡେଇଂ ସଦାପ୍ରବୁନେ ସାମ୍ନାରେ ଲେଃଆର୍ଏ, ମେଙ୍ଗ୍ନେ ଚଙ୍ଗ୍ନେ ଆରି ୱାଃଡ଼େଗ୍ନେ ପାଟେଇ ଆତ୍ଲା ମେଁ ବେପାର୍ ଡିଙ୍ଗ୍ନେ ଜାଗା ଡିଙ୍ଗ୍ଏ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)