ବାବବାଦି ରେମୁଆଁଇଂନେ ପାପ୍ ଆଃସୁଏଃଡିଂକେ
1 କେଲାପା, ସଦାପ୍ରବୁନେ ନ୍ତି ଡାଆଁ ଡିଂଆଲେଃକେ ଣ୍ଡୁ ଜେ, ଆତେନ୍ ପାପ୍ବାନ୍ ରକ୍ୟା ଡିଂ ଆୟା ଣ୍ଡୁ, କି ମେଁନେ ନ୍ଲୁଗ୍ ବଇରା ଡିଂଆଲେଃକେ ଣ୍ଡୁ, ଜେ ଆତେନ୍ ଦ୍ରିଗ୍ ଆୟା ଣ୍ଡୁ । 2 ମାତର୍ ପେନେ ପାପ୍ ସାପା, ପେନେ ଆରି ପେନେ ପର୍ମେସର୍ ବିତ୍ରେ ବିନେ ବିନେ ଆଃଡିଂବକେ ଆରି ପେନେ ପାପ୍ ସାପା ପେନେବାନ୍ ମେଁନେ ସାର୍ମୁଆଃ ବୁଃଡ଼ିବକେ, ଆକେନ୍ସାଃ ମେଁ ଆଦ୍ରିଗ୍ ଣ୍ଡୁ । 3 ମେଃଡାଗ୍ଲା ପେନେ ନ୍ତି ମ୍ମ୍ୟାଁଅରିଆ ଆରି ପେନେ ଆର୍ୱେତି ସାପା ପାପ୍ଅରିଆ ଆବୁଲେଃ ଡିଂଲାଏଃକେ; ପେନେ ତୁମୁଁଆଃ ସାପା ନାଲେ ସାମୁଆଁ ବାସଙ୍ଗ୍ଡିଂକେ, ପେନେ ନ୍ଲିୟା କାରାପ୍ ବାସଙ୍ଗ୍ଡିଂକେ । 4 ଜାଡିଗ୍ ନ୍ୟାୟ୍ରେ ଗୁଆରି ଆଦ୍ରିଗ୍ଆର୍ ଣ୍ଡୁ ଆରି ଜାଡିଗ୍ ସତ୍ ବାବ୍ରେ ଆବାସଙ୍ଗ୍ ଣ୍ଡୁ; ମେଇଂ ବେକାର୍ ସାମୁଆଁଅରିଆ ବିସ୍ବାସ୍ ଡିଂମ୍ୟାଃଆର୍କେ ଆରି ନାଲେ ସାମୁଆଁ ବାସଙ୍ଗ୍ମ୍ୟାଃଆର୍କେ; ମେଇଂ ଦଦ୍ୟାକେ ମନ୍ଅରିଆ ସାଃମ୍ୟାଃଆର୍କେ ଆରି ପାପ୍ କାମ୍କେ ଜନମ୍ ବିଃମ୍ୟାଃଆର୍କେ । 5 ମେଇଂ ବିସ୍ ଲାଏଃକ୍ନେ ବୁବଃନେ ନ୍ତାଃ ଗୁଗଗ୍ ମ୍ୟାଃଆର୍କେ ଆରି ବାଲିଗଗ୍ନେ ଜାଲ୍ ଗାଗ୍ମ୍ୟାଃଆର୍କେ; ଜା ମେଇଂନେ ନ୍ତାଃ ଚଙ୍ଗ୍ଏ, ମେଁ ଗୁଏଃଏ, ଆରି ଆତେନ୍ ନ୍ତାସେଙ୍ଗ୍ ଗଗ୍ଲା, ଆତ୍ବାନ୍ ବିସ୍ ଲାଏଃକ୍ନେ ବୁବଃ ଜନମ୍ ଡିଙ୍ଗ୍ଏ । 6 ମେଇଂନେ ଜାଲ୍ ସକାପାଟାଇ ଆଡିଂ ଣ୍ଡୁ, କି ମେଇଂ ନିଜର୍ କାମ୍ଅରିଆ ନିଜ୍କେ ଆବୁଃଡ଼ିଆର୍ ଣ୍ଡୁ; ମେଇଂନେ କାମ୍ ସାପା ଅଦରମ୍ନେ କାମ୍ ଆରି ମେଇଂନେ ନ୍ତିଅରିଆ କାରାପ୍ କାମ୍ ଲେଃମ୍ୟାଃକେ । 7 ମେଇଂନେ ଞ୍ଚ କାରାପ୍ କାମ୍ ପାକା ୱିର୍ଏ ଆରି ମେଇଂ ନିର୍ଦସିକେ ବାଗୁଏଃ ନ୍ସା ତରକ୍ ଡିଂମ୍ୟାଃଆର୍କେ; ମେଇଂନେ ଚିନ୍ତା ସାପା କାରାପ୍ ଚିନ୍ତା; ମେଇଂନେ ଗାଲିଅରିଆ ଅମଙ୍ଗଲ ଆରି ବିନାସ୍ ଲେଃଏ । 8 ସାନ୍ତିନେ ଗାଲି ମେଇଂ ଆମ୍ୟାଃଆର୍କେ ଣ୍ଡୁ ଆରି ମେଇଂନେ ଗାଲିଅରିଆ ମେଃଡିଗ୍ ବିଚାର୍ ଣ୍ଡୁ; ମେଇଂ ନିଜର୍ ନ୍ସାଃ ବାଙ୍ଗ୍ଟି ଗାଲି ଆଃଡିଂବଆର୍କେ; ଜାଡିଗ୍ ଆତ୍ଅରିଆ ଅଲେଙ୍ଗ୍ଆର୍ଏ, ମେଁ ସାନ୍ତି ଆମ୍ୟାଃ ଣ୍ଡୁ ।
ରେମୁଆଁଇଂ ମେଇଂନେ ପାପ୍ ମାନେଃଡିଂଆର୍କେ
9 ଏନ୍ସାଃ ବିଚାର୍ ନେନେବାନ୍ ସ୍ଲ ଲେଃଏ, ଦରମ୍ ରେମୁଆଁ ନେନେ ନ୍ତି ସାଃଚେ ଆଅଲେଙ୍ଗ୍ ଣ୍ଡୁ; ନେ ତାର୍କିଗ୍ ନ୍ସାଃ ନେଉର୍ଏ, ମାତର୍ କେଲାପା, ତାଙ୍ଗ୍କିଗ୍; ତାର୍କିଗ୍କେ ଉର୍ଲେଃ, ମାତର୍ ନେ ତାଙ୍ଗ୍କିଗ୍ଅରିଆ ନେଅଲେଙ୍ଗ୍ଏ । 10 ନେ କାଣା ରେମୁଆଁ ରକମ୍ କୁଗ୍ଡାସାଃ ନ୍ସାଃ ଗଲେଃ ନେଡିଂକେ, ହାଁ, ମ୍ମୁଁଆଃ ଆଲେଃକ୍ନେ ରେମୁଆଁ ରକମ୍ ନେ ଗଲେଃ ନେଡିଂକେ, ନେ ଲମ୍ଡିଗ୍ ବେଲା ରକମ୍ ସ୍ମି ଟେପ୍ଲଃ ନେଲଃଏ; ନେ ଗାଗ୍ଡ଼େକ୍ନେ ରେମୁଆଁନେ ବିତ୍ରେ ଗୁଏଃକ୍ନେ ରେମୁଆଁ ରକମ୍ ନେଲାଏଃକେ । 11 ନେ ସାପାରେ ଗିବେ ରକମ୍ ସାର ନେଡିଂକେ ଆରି କୁକୁର୍ୟାଃ ରକମ୍ ଜାବର୍ ଅଃନେଡିଂକେ; ନେ ବିଚାର୍କେ ଉର୍ ନେଡିଂକେ, ମାତର୍ ଆତେନ୍ ଣ୍ଡୁ; ପାପ୍ବାନ୍ ଉଦାର୍ ବାନେ ଉର୍ ନେଡିଂକେ, ମାତର୍ ଆତେନ୍ ନେନେବାନ୍ ସ୍ଲ ଲାଏଃକେ । 12 ମେଃଡାଗ୍ଲା ନା ଡାଗ୍ରା ନେନେ ପାପ୍ ଜାବର୍ ଡିଂଲାଏଃକେ ଆରି ନେନେ ପାପ୍ ନେନେ ବିରୁଦ୍ରେ ସାକି ବିଃଡିଂକେ; ଏନ୍ସାଃ ନେନେ ପାପ୍ ସାପା ନେନେ ଡାଗ୍ରା ଡାଗ୍ରା ଲାଏଃକେ ଆରି ନେନେ ପାପ୍ କାମ୍ ସାପା ନେ ତ ମ୍ୟାଃନେଡିଂକେ; 13 ଆତେନ୍ ପାପ୍ କାମ୍ ଆରି ମାପ୍ରୁକେ ଅସ୍ୱିକାର୍ ଡିଂନେ ଆରି ନେନେ ପର୍ମେସର୍ନେ ପ୍ଲାଃ ଅଲେଙ୍ଗ୍ନେବାନ୍ ଆନ୍ତାର୍ ନେବିଃଏ, ତାଙ୍ଗ୍କିଗ୍ ଆରି ଉଲ୍ଟା ସାମୁଆଁ ନେବାସଙ୍ଗ୍ଏ, ନାଲେ ସାମୁଆଁ ସାଃଚେ ମନ୍ ବିତ୍ରେବାନ୍ ଆଃତାର୍ନେ ଲାଏଃକେ । 14 ଏନ୍ସାଃ ବିଚାର୍ ପ୍ଲାଃପାକା ଗୁଚେ ୱେଲାଏଃକେ ଆରି ଦର୍ମ ସ୍ଲ ତୁଆଁଡିଂକେ; ଚକ୍ ଜାଗାଅରିଆ ସତ୍ ସାମୁଆଁ ବଃୱେଲାଏଃକେ ଆରି ସିଦା ବାବ୍ରେ ସାମୁଆଁ ଗିଗାନେ ୟାଆଡିଂକେ ଣ୍ଡୁ । 15 ହାଁ, ସତ୍ ସାମୁଆଁ ଅବାବ୍ ଡିଂଡିଂକେ ଆରି ଜା କାରାପ୍ କାମ୍ ଆନ୍ତାର୍ଏ, ମେଁ ନିଜ୍କେ ଡଙ୍ଗାରେ ରକମ୍ ଆଃଡିଂଏ; ବାରି, ମାପ୍ରୁ ଆକେନ୍ କେକେ; ଆରି, ନ୍ୟାୟ୍ ବିଚାର୍ ଆଲେଃକେସାଃ ମନ୍ଦୁକ୍ ଡିଂକେ ।
ମାପ୍ରୁ ମେଁନେ ରେମୁଆଁଇଂନେ ମୁକ୍ତିନେ ଗାଲି ଆଃରେଡିଂକେ
16 ଆରି, ମେଁ କେକେ ଜେ, ମେଃଡିଗ୍ ଙ୍ଗିର୍ବୁଏଃ ଣ୍ଡୁ, ବାରି ମଜେ ଜାଡିଗ୍ ଣ୍ଡୁ ଡାଗ୍ଚେଃ ଇରିୟାଃତୁଗ୍ଆର୍କେ; ଏନ୍ସାଃ ମେଁନେ ନିଜର୍ ନ୍ତି ମେଁନେ ନ୍ସାଃ ପାପ୍ ବାନ୍ ଉଦାର୍ ଡିଂନେ ପୁରା ଆଃଡିଂକେ ଆରି ମେଁନେ ଦାର୍ମିକତା ଆଃ ଆମେକେ ସାଃଚେ ବଗେ । 17 ବାରି, ମେଁ ଗ୍ରି ବାବ୍ରେ ଦାର୍ମିକତା ଆରି ଉଦାର୍ନେ ଟପି ନିଜର୍ ବାଆଃଅରିଆ ତାଙ୍ଗ୍କେ; ଆରି, ମେଁ ପ୍ରତିସଦ୍ ରକମ୍ନେ ସକାପାଟାଇ ସଃକେ ଆରି ତଗ୍ରିୟାଃ ସକା ରକମ୍ ସାର୍ଦାରେ ସକାପାଟାଇ ସଃକେ । 18 ମେଇଂନେ କାମ୍ ପର୍ମାନ୍ ନ୍ସାଃ ମେଁ ନିଜର୍ ବିରଦିଇଂକେ ବେସି ରିସା ରକମ୍ ପ୍ରତିଦାନ୍ ଆରି ନିଜର୍ ସତ୍ରୁଇଂକେ ଡଣ୍ଡ୍ ବିଃଏ; କଣ୍ଡା ସାପାକେ ପ୍ରତିପଲ୍ ବିଃଏ । 19 ତେଲା ରେମୁଆଁଇଂ ପଶ୍ଚିମ୍ ଦିଗ୍ବାନ୍ ମାପ୍ରୁନେ ମ୍ନିକେ ଆରି ସ୍ନି ତାର୍ନେ ଜାଗାବାନ୍ ରେମୁଆଁଇଂ ମେଁନେ ତାର୍କିଗ୍କେ ବୁଟଆର୍ଏ; ମେଃଡାଗ୍ଲା ମାପ୍ରୁନେ ପୁଣ୍ଡାଅରିଆ ଚାଲେଡିଂକ୍ନେ ଜାବର୍ ୱେଡ଼୍ୟାଃ ରକମ୍ ମେଁ ଟମେଗ୍ ରାଙ୍ଗ୍ପାଙ୍ଗ୍ଏ । 20 ବାରି, ମାପ୍ରୁ ବାସଙ୍ଗ୍ଡିଂକେ, ସିୟୋନକେ ଆରି ଯାକୁବ ବିତ୍ରେ ଜାଜା ପାପ୍ ଗାଲିବାନ୍ ଆଣ୍ଡେଆର୍ଏ, ମେଇଂନେ ଡାଗ୍ରା ମୁଇଂ ରକ୍ୟା ଡିଂଣ୍ଡ୍ରେ ପାଙ୍ଗ୍ଏ । 21 ନିଜର୍ ବିସଏରେ ମାପ୍ରୁ ବାସଙ୍ଗ୍ଡିଂକେ, ମେଇଂ ଏଃତେ ନେନେ ଆକେନ୍ ନିଅମ୍ ନେଡିଙ୍ଗ୍ଏ, ନେନେ ମୁଃଡ଼ି ଆତ୍ମା ନାଁ ଆଡ଼ାତ୍ରା ଜାର୍ଡିଂକେ ଆରି ନେନେ ମେଃ ସାପା ସାମୁଆଁ ନାଁନେ ତୁମୁଁଆଃଅରିଆ ନେବକେ, ଆତେନ୍ ନାଁନେ ତୁମୁଁଆଃବାନ୍ ଆରି ନାଁନେ ବଂସନେ ତୁମୁଁଆଃବାନ୍ ଆରି ନାଁନେ ବଂସବାନ୍ ଜନମ୍ ଡିଂକ୍ନେ ବଂସନେ ତୁମୁଁଆଃବାନ୍ ଏଃ ଜାକ ମାଡାନେ କାଲ୍ ଜାକ ସ୍ଲ ନେରାଃଡିଂ ଣ୍ଡୁ, ଆକେନ୍ ସଦାପ୍ରବୁ ବାସଙ୍ଗ୍ଡିଂକେ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)