ଜିସାୟ 57

ଇସ୍ରାଏଲ୍‌ ରେମୁଆଁଇଂନେ ମୁର୍ତି ପୁଜା

1 ଦାର୍ମିକ୍‌ ରେମୁଆଁ ବିନାସ୍‌ ଡିଂଡିଂକେ ଆରି ତେନ୍‌ ବିସ‍ଏରେ ଜାଡିଗ୍‌ ଦିଆନ୍‌ ବିଃଆଡିଂକେ ଣ୍ଡୁ; ବାରି, ବକ୍ତ ରେମୁଆଁଇଂକେ ରାଙ୍ଗ୍‌ୱେଡିଂଆର୍‌କେ, ଦାର୍ମିକ୍‌ଇଂକେ ଜେ ପାଙ୍ଗ୍‌ଡିଂକ୍ନେ ବିପଦ୍‌ବାନ୍‌ ରାଙ୍ଗ୍‌ୱେଡିଂଆର୍‌କେ, ଆକେନ୍‌ ଜାଡିଗ୍‌ ଚିନ୍ତା ଡିଂଆଡିଂକେ ଣ୍ଡୁ । 2 ମେଁ ସାନ୍ତିରେ ଗାମ୍ୟାଃକେ; ସିଦା ଗାଲି ଅଲେଙ୍ଗ୍‌ଣ୍ଡ୍ରେ ନିଜର୍‌ ନିଜର୍‌ ଡୁଲେଗ୍‌ନେ ଜାଗା‍ଅରିଆ ପୁଣ୍ଡେମ୍ୟାଃଆର୍‌କେ । 3 ଅ ଜାଦୁ ଡିଙ୍ଗ୍‍ନେ ଗଡ଼େଇଂ, ଦାରି ଆରି ବେସ୍ୟାନେ ବଂସ, ପେ ନେଙ୍ଗ୍‌ଡାଗ୍ରା ପାଙ୍ଗ୍‌ଲାପା । 4 ପେ ଆଜାକେ କେଚେ ଅପମାନ୍‌ ପେଡିଂକେ ? ପେ ଜା ପାକା ତୁମୁଆଃ ଗାଃଟାଚେ ନ୍ଲ୍ୟା ଆଃତାର୍‌ପେଡିଂକେ ? ପେ କି ପାପ୍‌ନେ ଉଙ୍ଗ୍‌ଇଂ ଆରି ମିଚ୍‌ନେ ବଂସ ଣ୍ଡୁ ? 5 ପେ ଅଲୋନ ସ୍ଲାଃଇଂ ବିତ୍ରେ, ସର୍‌ତେ ଅରିତ୍‌ ସ୍ଲାଃ ଆଲ ତାର୍‌ଲାଏଃକ୍ନେ ସ୍ଲାଃ ଆଲ ଲାଲ୍‌ସା ରକମ୍‌ ସୁଆ‍ଅରିଆ ନିଜ୍‌କେ କି ଗରମ୍‌ ଆଃଡିଂପେଡିଂକେ ଣ୍ଡୁ; ପେ ଗୁଲୁଏ କଣ୍ଡା‍ଅରିଆ, ବ୍ରି‍ଇଂନେ ପାଙ୍କା ଆଲ ଗଡ଼େଇଂକେ କି ବାଗୁଏଃ ପେଡିଂକେ ଣ୍ଡୁ ? 6 କଣ୍ଡାନେ ଚିକ୍‌ନା ବ୍ରି ସାପା ବିତ୍ରେ ପେନେ ବାଟା, ତେନ୍‌ ସାପା ପେନେ ଅଦିକାର୍‌; ଆରି, ମେଇଂନେ ମ୍ନିରେ ପେ ଉଗ୍‌ନେ ପୁଜା ଜିନିସ୍‌ କିଗ୍‌ନାବକେ, ପୁଜା ଜିନିସ୍‌ ଅପେଃ ନାବକେ । ଆକେନ୍‌ ସାପା ନ୍‌ସାଃ ନେ କି ସାନ୍ତି ନେଡିଂଏ ? 7 ତିଆର୍‌ ଆରି ମ୍ନାଃ କଣ୍ଡା ଆଡ଼ାତ୍ରା ନା ନିଜର୍‌ ସିଙ୍ଗ୍‌ଲାଃ ବେଃନାବକେ; ତେନ୍‌ ଜାଗାକେ ଡିଗ୍‌ ପେ ବଲି ବିଃନ୍‌ସାଃ ୱେନାଲାଏଃକେ । 8 ବାରି, କାପାଟ୍‌ ଆରି କାପାଟ୍‌ନେ ପ୍ଲାଃପାକା ପେ ପେନେ ମନେ ବନେନ୍‌ସାଃ ଡେଲି ଆଃରେନାବକେ; ମେଃଡାଗ୍‌ଲା ପେ ଆନେକେ ଆନ୍ତାର୍‌ଚେ ବିନ୍‌ରେ ଆଡ଼ାତ୍ରା ନିଜ୍‌କେ ଡିଡାଚେଃ ଆଡ଼ାତ୍ରା ୱେନାଲାଏଃକେ; ପେ ନିଜର୍‌ ସିଙ୍ଗ୍‌ଲାଃ ଆଃମ୍ନାଃଚେ ମେଇଂ ଏଃତେ ନିଅମ୍‌ ଡିଂନାବକେ; ନାଁ ଆଣ୍ଡିଅରିଆ ମେଇଂନେ ସିଙ୍ଗ୍‌ଲାଃ ନାକେକେ, ଆତେନ୍‌ ବଲ୍‌ ବାନାବକେ । 9 ବାରି, ନାଁ ଞ୍ଚୁ ସାଃଚେ ମଲେକ୍‌ ଇଃସାଙ୍ଗ୍‌ ଡାଗ୍ରା ୱେନାଲେଃକେ ଆରି ନିଜର୍‌ ବାସ୍‌ନା ଜିନିସ୍‌ ଜାବର୍‌ ଆଃଡିଂନାବକେ, ଆରି ନାଁ ସ୍ଲ ଦେସ୍‌ ପାକା ନିଜର୍‌ ଦୁତ୍‌ଇଂ ବେନାବକେ ଆରି ପାତାଲ୍‌ ଜାକ ୱେଏ ନାଲେକେ । 10 ନାଁ ନିଜର୍‌ ଗାଲିନେ ଚ୍ଲେ ନ୍‌ସାଃ ହାଲିଆ ଡିଂନାଲାଏଃଗେ, ଏଲେଡିଗ୍‌ ଆରି ଆସା ଣ୍ଡୁ ଡାଗ୍‌ଚେଃ ନାବାସଙ୍ଗ୍‌କେ ଣ୍ଡୁ; ନାଁନେ ବପୁ ଡାଟ୍‌ ଡିଂଗେ ଡାଗ୍‌ଚେଃ ବୁଦି ନାବାକେ, ଆକେନ୍‌ସାଃ ନାଁ ହାଲିଆ ନାଡିଂକେ ଣ୍ଡୁ । 11 ବାରି, ଜା ନ୍‌ସାଃ ନାଁ ଦେକ୍‌ରକମ୍‌ ବୁଟଚେ ନା ଇରିଆଃତୁଗ୍‌ ଆରି ବୁଟମେଗ୍‌ ଡିଂନାଲାଏଃକେ ଜେ, ନାଁ ନାଲେ ବାସଙ୍ଗ୍‌ନାଡିଂକେ ଆରି ଆନେକେ ମନେ ନାଏତେକେ, କି ନିଜର୍‌ ମନ୍‌ ଆତ୍‌ଅରିଆ ବିଃନାବକେ ଣ୍ଡୁ ? ନେ କି ଜାବର୍‌ ମୁଆଁ ଚୁପ୍‌ଚାପ୍‌ ନେଲେଃଗେ ଣ୍ଡୁ, ତେସାଃ ନାଁ କି ଆନେକେ ବୁଟନାଡିଂକେ ଣ୍ଡୁ ? 12 ନେ ନାଁନେ ଦାର୍ମିକତା ନେବାସଙ୍ଗ୍‌ଏ; ବାରି, ନାଁନେ କାମ୍‌ ସାପା ନାଁନେ ଦର୍‌କାର୍‌ ଆଡିଂ ଣ୍ଡୁ । 13 ନାଁ ଆଜାଆଜାକେ ରାଃସିଙ୍ଗ୍‌ନାବକେ, ନାଁ ଅଃନେ ବେଲା ମେଇଂ ରକ୍ୟା ଡିଂଆର୍‌ଲେଃ; ମାତର୍‌ ୱେଡ଼୍ୟାଃ ଆମେଇଂକେ ଆଃୱାଲେଃ ରାଙ୍ଗ୍‌ଡ‍ଏ, ମୁଇଂ ପୁଣ୍ଡା ତେନ୍‌ ସାପାରେକେ ରାଙ୍ଗ୍‌ଡ‍ଏ; ମାତର୍‌ ମୁଃଡ଼ି ରେମୁଆଁ ନେନେ ମ୍ନି ସାଃଏ, ମେଁ ଦେସ୍‌ ସାସନ୍‌ ଡିଂଏ ଆରି ନେନେ ପବିତ୍ର କଣ୍ଡାନେ ଅଦିକାରି ଡିଂଏ ।

ଦରମ୍‌ ରେମୁଆଁଇଂ ଆତ୍‌ଲା ଇସ୍‌ପର୍‌ ସାଆଜ୍ୟ

14 ଆରି, ମେଁ ବାସଙ୍ଗ୍‌ଏ, ପେ ତିଆର୍‌ ଆଃଡିଂପା, ତିଆର୍‌ ଆଃଡିଂପା, ଗାଲି ଆଃରେପା, ନେ ରେମୁଆଁଇଂନେ ଗାଲିବାନ୍‌ କସ୍ଟ ସ୍ଲ ଆଃଡିଂପା । 15 ମେଃଡାଗ୍‌ଲା ଜା ମାଡାନେ କାଲ୍‌ ବାସାଣ୍ଡ୍ରେ, ଜାନେ ମ୍ନି ଦର୍ମମୟ, ଆତେନ୍‌ ତିଆର୍‌ ଆରି ମ୍ନାଃ ରେମୁଆଁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ; ନେ ଆଡ଼ାତ୍ରା ଆରି ପବିତ୍ର ଜାଗା‍ଅରିଆ ବାସାନେଡିଂକେ, ଡିଗ୍‌ ଦରମ୍‌ ରେମୁଆଁଇଂନେ ଆତ୍ମାକେ ଜିବନ୍‌ ଆରି ମନ୍‌ ବାଙ୍ଗେକ୍ନେ ରେମୁଆଁଇଂନେ ମନ୍‌କେ ଜିବନ୍‌ ଆଃଡିଂନ୍‌ସାଃ ନେ ବାଙ୍ଗେକ୍ନେ ଆରି ଦରମ୍‌ ମନ୍‌ ରେମୁଆଁନେ ଏଃତେ ଆଃ ବାସା ନେଡିଂକେ । 16 ମେଃଡାଗ୍‌ଲା ନେ କାଲାଆଃ ବିରଦ୍‌ ନେଡିଂ ଣ୍ଡୁ, ଣ୍ଡୁଲା କାଲାଆଃ ରିସା ନେଡିଂ ଣ୍ଡୁ; ନେଡିଂଲା, ଆତ୍ମା ଆରି ନେ ନେରାଃରେକ୍ନେ ଜିବ୍‌ଇଂ ସାପା ନେ ସେଃମଁ ଦୁର୍ବଲ୍‌ ଡିଂଆର୍‌ଏ । 17 ନେ ମେଁନେ ଆସାଇ ରକମ୍‌ ପାପ୍‌ ନ୍‌ସାଃ ରିସା ଡିଂଚେଃ ଆମେକେ ନେବଗ୍‌କେ, ନେ ନିଜର୍‌ ସାର୍ମୁଁଆଃ ବୁଃଡ଼ିଚେ ରିସା ନେଡିଂକେ, ତେଲା ମେଁ ଅମାନି ଡିଂଚେଃ ନିଜର୍‌ ଇକ୍‌ଚାନେ ଗାଲି‍ଅରିଆ ଅଲେଙ୍ଗ୍‌କେ । 18 ନେ ମେଁନେ ଗାଲି କେନେବକେ ଆରି ଆମେକେ ସୁସ୍‌ତ ନେରାଃଡିଂଏ; ଡିଗ୍‌ ନେ ଆମେକେ ଗାଲି ନେରାଃସୁଏଃଏ, ବାରି ଆମେକେ ଆରି ମେଁନେ ଦୁକ୍ ରେମୁଆଁଇଂକେ ବାର୍‌ମୁଇଂତର୍‌ ସାନ୍ତି ନେବିଃଏ । 19 ନେ ତୁମୁଁଆଃନେ ଚୁଚୁ ନେରାଃରେଏ; ମାପ୍‌ରୁ ବାସଙ୍ଗ୍‌ଡିଂକେ, ସ୍ଲ ଲାଏଃକ୍ନେ ଆରି ଡାଗ୍ରା ଲାଏଃକ୍ନେ ରେମୁଆଁ ଆଡ଼ାତ୍ରା ସାନ୍ତି, ସାନ୍ତି ଡିଂଲେଃ ଆରି ନେ ଆମେକେ ସୁସ୍‌ତ ନେରାଃଡିଂଏ । 20 ମାତର୍‌ ଦୁସ୍‌ଟ‍ଇଂ ଲ‍ଉଡ଼ି ବଗ୍‌କ୍ନେ କେଣ୍ଡିଆଃ ରକମ୍‌, ମେଃଡାଗ୍‌ଲା ଆତେନ୍‌ ଚୁପ୍‌ଚାପ୍‌ ଡିଂଆଲେଃ ଣ୍ଡୁ, ଆରି ତେନ୍‌ ଣ୍ଡିଆଃଅରିଆ ରୁବୁଗ୍‌କ୍ନେ ତୁବଃ ଆରି ବୁର୍ଦା ତାର୍‌ଏ । 21 ନେନେ ପର୍‌ମେସର୍‌ ବାସଙ୍ଗ୍‌ଡିଂକେ, ଦୁସ୍‌ଟ‍ଇଂନେ ମେଃଡିଗ୍‌ ସାନ୍ତି ଣ୍ଡୁ ।