ଆହାସ୍ନେ ଆତ୍ଲା ମୁଇଂ ସାମୁଆଁ
1 ଯୋଥମ ଉଂଡେ ଆହସ, ଉଷୀୟ ଉଂଡେ ଯୋଥମ, ଅରାମନେ ଇଃସାଙ୍ଗ୍ ରତ୍ସୀନ ବାରି ପେକହ ଇସ୍ରାଏଲ୍ନେ ଇଃସାଙ୍ଗ୍ ରମଲୀୟନେ ଉଂଡେ ଲ୍ଲେକେ । ଯିହୁଦାନ୍ୟା ଆହସ୍ ସାସନ୍ ଡିଙ୍ଗ୍ନେ ବେଲା ରତ୍ସୀନ ବାରି ପେକହ ମେଁନେ ଏତେ ଜୁଦ୍ ଡିଙ୍ଗ୍ନ୍ସାଃ ଯିରୂଶାଲମନ୍ୟା ୱେ ଲେଃ ଆର୍କେ । ମାତ୍ରମ୍ ମେଇଂ ଆତାନ୍ ଇନିକେ ଜିତେ ଆୟାଆର୍କେ ଣ୍ଡୁ ।
2 ଇଡ଼ିଂ ଦାଉଦ ବଂସକେ ମୁଇଂ କବର୍ ଆମ୍ୟାଆର୍କେ ଜେ । ଆତାନ୍ କବର୍ ଡିଙ୍ଗ୍ଡିଂକେ, ଅରାମ ଇଫ୍ରୟିମନେ ପାକା ଡିଂଲାଏଃକେ । ତେନ୍ଇଡ଼ିଂ ମେଁନେ ଜିବନ୍ ଆରି ମେଁନେ ରେମୁଆଁଇଂନେ ଜିବନ୍ ୱେଡ୍ୟାଃଆଃଅରିଆ ଜୁର୍କେ ଆରି କଣ୍ଡାନେ ସ୍ଲାଃ ରକମ୍ ଜୁର୍ୱେକେ ।
3 ଏନ୍ ଇଡ଼ିଙ୍ଗ୍ ସଦାପ୍ରବୁ ଯିଶାଇୟକେ ବାସଙ୍ଗ୍କେ, "ନାଁ ବାରି ନାନେ ଉଂଡେ ଶାର-ଯାଶୁବ ୱେଏ, ଦବାନେ ଲିଜପାକା ୱେକ୍ନେ ଅସାର୍ ଗାଲି ଆଡ଼ାତ୍ରା ଲେକ୍ନେ କୁଣ୍ଡ୍ନେ ନାଲ୍ ଆଡ଼ାତ୍ରା ଆହସ୍ ଏତେ ମିସୁନ୍ସା ୱେଲା ।
4 ଆହସକେ ବାସଙ୍ଗ୍ପା, ତରକ୍ ବାରି ବୁଙ୍ଗ୍ଲାଲା । ଏନ୍ ମାଃସ ତାର୍ଡିଙ୍ଗ୍କ୍ନେ ସୁଆନେ ମ୍ୱାକ୍ଲିଗ୍ ପ୍ଲା, ଣ୍ଡୁଲା ରତ୍ସୀନ ବାରି ଅରାମନେ ବାରି ରମଲୀୟନେ ଉଂଣ୍ଡେନେ ଜାବର୍ ରିସା ନ୍ସା ବୁଟମେଗ୍ ଆଡିଙ୍ଗ୍ଗେନାମଃ, ଣ୍ଡୁଲା ନିଜର୍ ଗାଗ୍ଡ଼େକେ ନିରାସ୍ ଡିଙ୍ଗ୍ନ୍ସା ଆବିଗେ ନାମଃ ।
5 ଡାଗ୍ଲା ଅରାମ, ଇଫ୍ରୟିମ ବାରି ରମଲୀୟନେ ଉଂଡେ ମୁଇଂଡାଗ୍ରା ଡିଙ୍ଗ୍ଚେ ନାଁ ବିରଦ୍ରେ ସଡ଼ଜନ୍ତ୍ର ଡିଙ୍ଗ୍ଆର୍ଡିଂକେ ।
6 ନେ ୱେଚେ ଯିହୁଦା ବିରଦ୍ରେ ଜୁଦ୍ ନେଃଡିଙ୍ଗ୍ପା ଆରି ନେଃଜିତେପା । ନେ ଆତ୍ଲା ଯିହୁଦାକେ ବାଗ୍ ବାଗ୍ ନେରାଡିଙ୍ଗ୍ପା । ନେ ଟାବେଲନେ ଉଂଣ୍ଡେକେ ଯିହୁଦାନେ ଇଃସାଙ୍ଗ୍ ରକମ୍ ତିଆର୍ ନେଡିଙ୍ଗ୍ପା ।"
7 ମାପ୍ରୁ ଆକେନ୍ ସାମୁଆଁ ବାସଙ୍ଗ୍ଡିଙ୍ଗ୍କେ, "ଆତେନ୍ ବୁଙ୍ଗ୍ଚେଃ ଆଲେଃ ଣ୍ଡୁ କି ସିଦା ଡିଂଚେ ଆଲେ ଣ୍ଡୁ ।"
8 ଡାଗ୍ଲା ଅରାମନେ ଇନିବାନ୍ ଦମ୍ମେଶକ ବେସି ମ୍ନା ଇନି ଡିଙ୍ଗ୍ଏ ବାରି ଦମ୍ମେଶକନେ ଇନିବାନ୍ ରତ୍ସୀନ ଇନି ମ୍ନା ଇନି ଡିଙ୍ଗ୍ଏ । ବାରି ଞ୍ଜିକୁଡ଼ି ମାଲ୍ ମୁଆଁ ବିତ୍ରେ ଇଫ୍ରୟିମ ବାଗ୍ ବାଗ୍ ଡିଙ୍ଗ୍ଚେ ଦେକ୍ରକମ୍ ପାକ୍ଚି ୱେଏ ଜେ, ମେଁ ବାରି ମୁଇଂ କୁଟୁମ୍ ଡିଙ୍ଗ୍ଚେ ଆଲେଃ ଣ୍ଡୁ ।
9 ବାରି ଇଫ୍ରୟିମନେ ଇନିବାନ୍ ଶମରୀୟା ମ୍ନାଇନି ଡିଙ୍ଗ୍ଏ ବାରି ଶମରୀୟାନେ ଇନିବାନ୍ ରମଲୀୟନେ ଉଂଡେ ରାଜା ଡିଂଏ । ଅଃନା ପେଇଂ ବିସ୍ବାସ୍ ପେଡିଙ୍ଗ୍ । ତେଲା ଚୁପ୍ଚାପ୍ ଆଡୁଲେଗ୍ପା, ଏନ୍ ସତ୍ ।
ଇମ୍ମାନୁୟେଲ୍ ପରମେସର୍ନେ ଚିନ୍
10 କାଲାଆଃନେ ମାପ୍ରୁ ଆହସ୍କେ ବାରି ବାସଙ୍ଗ୍କେ,
11 "ନାଁ ସଦାପ୍ରବୁକେ ନିଜର୍ ପର୍ମେସର୍କେ ମୁଇଂ ଚିନ୍ ସାଲ୍ୟାଃ । ପୁର୍ତିବିନିଆ ଡିଙ୍ଗ୍ଲ୍ଲେ କି ସର୍ଗେନିଆ ଡିଙ୍ଗ୍ଲ୍ଲେ, ସାଲ୍ୟାଃ ।"
12 ମାତ୍ରମ୍ ଆହସ୍ ବାସଙ୍ଗ୍କେ, ନେଙ୍ଗ୍ ନାସାଲ୍ୟାଃ ଣ୍ଡୁ କି ସଦାପ୍ରବୁକେ ପରିକ୍ୟା ନ୍ନାଡିଙ୍ଗ୍ଣ୍ଡୁ ।
13 ଏନ୍ବାନ୍ ମେଁ ବାସଙ୍ଗ୍କେ, ଅ ଦାଉଦ ବଂସ, ପେଇଂ ଏବେ ଦ୍ରିଗ୍ପା । ରେମୁଆଁକେ ପରିକ୍ୟା ଡିଙ୍ଗ୍ନେ ପେଇଂନେ ଆଡ଼ାତ୍ରା ଡାଆଁ ବିସଏ ଡାଗ୍ଚେ କି ପେଇଂ ନେଙ୍ଗ୍ନେ ପର୍ମେସର୍କେ ପରିକ୍ୟା ଡିଙ୍ଗ୍ସା ସାଆସ୍ ପେଡିଙ୍ଗ୍ଏ ?
14 ଡିଲାଡିଗ୍ ମାପ୍ରୁ ନିଜେ ଆପେକେ ମୁଇଂ ଚିନ୍ ବିଃଏ । ମୁଇଂ ସେଲା ଗାଗ୍ଡ଼େଚେ ମୁଇଂ ଉଂଡେ ଜନମ୍ ଆଡିଙ୍ଗ୍ଏ ବାରି ମେଁନେ ମ୍ନି ଇମ୍ମାନୁୟେଲ ବା ନେ ଏତେ ପରମେସର୍ ଲେଃକେ ଡାଗ୍ଚେ ଆକେନ୍ ଅର୍ତ ।
15 ଇମ୍ମାନୁୟେଲ ଦହି ବାରି ଞ୍ଜୁଙ୍ଗ୍ ଚଙ୍ଗ୍ଏ । ତେସା ମେଁ ନିମାଣ୍ଡାଃକେ ସାଃଏ ବାରି ଦଦ୍ୟାକେ ଆତାର୍ ବିଃନେ ମ୍ୟାଏ ।
16 ଡାଗ୍ଲା ଗଡ଼େଅ ନିମାଣ୍ଡାଃକେ ସାଃଏ ବାରି ଦଦ୍ୟାକେ ଆତାର୍ ବିଃନେ ସେନୁଗ୍ ପେଇଂ ଇଫ୍ରୟିମକେ ବାରି ଅରାମକେ ଆତାର୍ ପେବିଏ । ଡାଗ୍ଲା, "ପେଇଂ ଆତାନ୍ ମ୍ୱାକ୍ଲିଗ୍ ଇଃସାଙ୍ଗ୍କେ ଇଙ୍ଗ୍ଚେଃ ପେବକେ । ଆତେନ୍ ଦେସ୍ ଆରି ରେମୁଆଁ ଆଲେ ଣ୍ଡୁ ।"
17 ଇଫ୍ରୟିମ ଯିହୁଦାବାନ୍ ଅଲ୍ଗା ଡିଙ୍ଗ୍ନେ ଦିନ୍ବାନ୍ ଦେତ୍ରକମ୍ ବେଲା ଅଃନା ଆଡିଂକେ ଣ୍ଡୁ, ଦେତ୍ରକମ୍ ବେଲା ସଦାପ୍ରବୁ ପେ ଆଡ଼ାତ୍ରା ବାରି ପେଇଂନେ ରେମୁଆଁ ଆଡ଼ାତ୍ରା ବାରି ପେ ଆବାନେ ବଂସ ଆଡ଼ାତ୍ରା ଗଟେଏ । ଣ୍ଡୁଲା ଅଶୂରନେ ଇଃସାଙ୍ଗ୍କେ ରାଙ୍ଗ୍ପାଙ୍ଗ୍ଏ ।
18 ବାରି ଆତେନ୍ ଦିନା ସଦାପ୍ରବୁ ମିସର୍ ଦେଶ୍ନେ ଲଣ୍ଡିଆଃ ସାପାପାକା ଲେକ୍ନେ ଣ୍ଡ୍ରୁଏ ଆଡ଼ାତ୍ରା । ଆରି ଅଶୂର ଦେସ୍ନ୍ୟା ଲେକ୍ନେ ଞ୍ଜୁଙ୍ଗ୍କେ ପୁଇଃତିଗ୍ଚେ ୱାଏ ।
19 ଆତାନ୍ ସତ୍ରୁ ଆଣ୍ଡେଙ୍ଗ୍ ପ୍ଲଗ୍ନ୍ୟା, କଣ୍ଡା ଗୁମ୍ପାନ୍ୟା ଗ୍ରେ ଲାଟାବୁଟାନ୍ୟା ବାରି ଚଙ୍ଗାଃନେ ଟିକ୍ରାନେ ସାମ୍ନାରେ କଆର୍ଏ ।
20 ଆତାନ୍ ଦିନ୍ ମାପ୍ରୁ କେଣ୍ଡିଆ ଇନୁମେତା ବାଡ଼ା ଡିଙ୍ଗ୍ଚେ ଡୁଙ୍ଗ୍ପାଙ୍ଗ୍ବକ୍ନେ ବାଣ୍ଡାରି ବାନ୍, ଣ୍ଡୁଲା, ଅଶୂରନେ ଇଃସାଙ୍ଗ୍ ବାନ୍ ବାଆଃ ବାରି ଞ୍ଚନେ ଉଗ୍ବ କୁଆର୍ ଜଗ୍ତ୍ଲାଗ୍ଏ ବାରି କର୍ତାକେ ଡିଗ୍ କୁଆର୍ ଜଗ୍ତ୍ଲାଗ୍ଏ ।
21 ଆତାନ୍ ଦିନ୍ ମୁଇଂ ରେମୁଆଁ ମୁଇଂ ବାଚି ବାରି ମ୍ୱାକ୍ଲିଗ୍ ମେଣ୍ଡାକେ ବିଃଚଙ୍ଗ୍ଲା,
22 ଆତାନ୍ ଅରେଃ ବିଃଡିଙ୍ଗ୍କ୍ନେ ତ୍ରାଃଡ଼୍ୟାଃ ବାଦୁଲ୍ରେ ମେଁ ଦହି ଚଙ୍ଗ୍ଏ ମେଁ ଡାଗ୍ଲା ଦେସ୍ନେ ବାକି ସାପା ରେମୁଆଁ ଦଇ ବାରି ଞ୍ଜୁଙ୍ଗ୍ ଚଙ୍ଗ୍ ଆର୍ଏ ।
23 ବାରି ଆଣ୍ଡି ଆଣ୍ଡିନେ ଜାଗାନ୍ନିଆ ଅଜାର୍ଟା ରୁପାନେ ଅଙ୍ଗୁର୍ ସ୍ଲାଃ ଲେଃଗେ । ଆତାନ୍ ଦିନ୍ ଆତେନ୍ ସର୍ତେ ଜାଗା କାଟାକଲି ବାରି ଗ୍ରେଃ ଲାଟାବୁଟା ଡିଙ୍ଗ୍ଏ ।
24 ବାରି ସାପା ଦେସ୍ କାଟାକଲି ବାରି ଗ୍ରେ ଲାଟାବୁଟା ଡିଙ୍ଗ୍ଲା ରେମୁଆଁ ଙାଁ ବାରି ଆଁୟାଃ ସାଚେ ଆତାନ୍ ଜାଗାନ୍ୟା ୱେ ଆର୍ଏ ।
25 ବାରି, ଆଣ୍ଡିନେ ସାପା କଣ୍ଡାନିଆ ଗଃବଆର୍ଗେ, ପେ କାଟାକଲି ବାରି ଗ୍ରେ ଲାଟାବୁଟାକେ କେଚେଃ ପେବ୍ଟଏ ଆରି ଆତେନ୍ ଜାଗାନ୍ନିଆ ପେୱେ ଣ୍ଡୁ, ମାତ୍ରମ୍ ଆତାନ୍ ଅରେଃ ଚଙ୍ଗାଃନେ ଜାଗା ବାରି ମେଣ୍ଡାନେ ଞ୍ଚବାନ୍ ଲେଚାର୍ ବିଃନେ ଜାଗା ଡିଙ୍ଗ୍ଏ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)