ଜିସାୟ 39

ବାବିଲ୍‌ନେ କବର୍ ବିଃଣ୍ଡ୍ରେ

1 ତେନ୍‌ବେଲା ବଲଦନନେ ଉଙ୍ଗ୍‌ଡେ ବାବିଲ୍‌ନେ ରାଜା ମରୋଦକ୍‌-ବଲ୍‌ଦନ୍‌ ହିଜକୀୟ ଡାଗ୍ରା ଚିଟି‍ଇଂ ଆରି ଟିକା ଜିନିସ୍ଇଂ ବେକେ; ମେଃଡାଗ୍ଲା ମେଁନେ ଆଃସି ଲେଃକ୍ନେ ଆରି ନିମାଣ୍ଡାଃ ଡିଂକ୍ନେ କବର୍‌ ମେଁ ଅଁଲେଃଗେ । 2 ତେଲା ହିଜକୀୟ ମେଇଂନେ ଆଡ଼ାତ୍ରା ସାର୍‌ଦା ଡିଂଚେ ମେଁନେ ସାପାବାନ୍ ଦାମ୍‌ନେ ଜିନିସ୍‌ ଲାଏଃକ୍ନେ ଡୁଆ, ରୁପା ଆରି ସୁନା ଆରି ନିମାଣ୍ଡାଃ ବାସ୍ନାକ୍ନେ ଜିନିସ୍‌ ଆରି ଜାବର୍‌ ଡାବୁନେ ଞ୍ଚୁ ଆରି ନିଜର୍‌ ଅସ୍ତ୍ର ବନେ ଡୁଆ ଆରି ନିଜର୍‌ କିଆଉଁଆଃ ଲେଃକ୍ନେ ସାପା ଜିନିସ୍‌ ଆମେଇଂକେ ଆଃସୁଏଃକେ; ହିଜକୀୟ ମେଁନେ ଆମେଇଂକେ ଆରାଃସୁଏଃକେ ଣ୍ଡୁ, ଦେକ୍‌ରକମ୍‌ ମେଃଡିଗ୍‌ ଜିନିସ୍‌ ମେଁନେ ଡୁଆ‍ଅରିଆ କି ମେଁନେ କ୍ଲିଗ୍‌ ଦେସ୍‌ଅରିଆ ଆଲେଃଗେ । 3 ଅଃତେନ୍‌ବେଲା ଯିଶାଇୟ ବବିସତ୍‌ ବକ୍ତା ହିଜକୀୟ ରାଜା ଡାଗ୍ରା ପାଙ୍ଗ୍‌ଚେ ଆମେକେ ବାସଙ୍ଗ୍‌କେ, ଆକେନ୍‌ ରେମୁଆଁଇଂ ମେଃନେ ବାସଙ୍ଗ୍‌ଆର୍‌କେ ? ତେଲା ହିଜକୀୟ ବାସଙ୍ଗ୍‌କେ, ମେଇଂ ସ୍ଲ ଦେସ୍‌ ବାବିଲ୍‌ବାନ୍‌ ନିଂ ଡାଗ୍ରା ପାଙ୍ଗ୍‌ଲେଃଆର୍‌କେ । 4 ଅଃକେନ୍‌ରେ ମେଁ ସାଲ୍ୟାଃକୁକେ, ମେଇଂ ନାଁ ଡୁଆ‍ଅରିଆ ମେଃନେ କେଲେଃଆର୍‌କେ ? ତେସାଃ ହିଜକୀୟ ବାସଙ୍ଗ୍‌କେ, ନିଂ ଡୁଆ‍ଅରିଆ ମେଃ ମେଃନେ ଲେଃକେ, ସାପା ମେଇଂ କେଲେଃଆର୍‌କେ; ଆଣ୍ଡିନେ ନିଂ ଆମେଇଂକେ ନ୍ନାରାଃସୁଏଃକେ ଣ୍ଡୁ, ଦେକ୍‌ରକମ୍‌ ମେଃଡିଗ୍‌ ଜିନିସ୍‌ ନିଂ କିଆଉଁଆଃ ବନେ ଡୁଆ ସେଃମଁ ଣ୍ଡୁ । 5 ତେନ୍‌ଇଡ଼ିଂ ଯିଶାଇୟ ହିଜକୀୟକେ ବାସଙ୍ଗ୍‌କେ, ସାପାଟୁ ବପୁକ୍ନେ ମାପ୍‌ରୁନେ ସାମୁଆଁ ଦ୍ରିଗ୍‌ । 6 କେଲା, ନାଁନେ ଡୁଆ‍ଅରିଆ ଲେଃକ୍ନେ ସାପା ଜିନିସ୍‌ ଆରି ଏଃ ଜାକ ନାଁନେ ଅଃସେଣ୍ଡ୍ରେଇଂ ରାଃସିଙ୍ଗ୍‌ବକ୍ନେ ସାପା ଜିନିସ୍‌ ବାବିଲ୍‌ ପାକା ରାଙ୍ଗ୍‌ୱେନେ ବେଲା ପିଙ୍ଗ୍‌ଚାଃଡିଂକେ; ମାପ୍‌ରୁ ବାସଙ୍ଗ୍‌ଡିଂକେ, ମେଃଡିଗ୍‌ ଆଆନ୍ତାର୍‌ ଣ୍ଡୁ । 7 ଆରି, ନାଁନେ ଉଙ୍ଗ୍‌ଇଂ ବିତ୍ରେ ଜାଜା ନାଁ ଗର୍ବେବାନ୍‌ ଜନମ୍‌ ଆରି ନାଁବାନ୍‌ ତାର୍‌ଆର୍‌ଏ, ଆମେଇଂକେ ମେଇଂ ରାଙ୍ଗ୍‌ଡ‍ଆର୍‌ଏ ଆରି ମେଇଂ ବାବିଲ୍‌ ରାଜାନେ ରାଜା ଡୁଆନ୍ନିଆ ଆଣ୍ଡାରି ଡିଂଚେ ଲେଃଆର୍‌ଏ । 8 ଅଃତେନ୍‌ବେଲା ହିଜକୀୟ ଯିଶାଇୟକେ ବାସଙ୍ଗ୍‌କେ, ନାଁ ମାପ୍‌ରୁନେ ମୁଃଡ଼ି ସାମୁଆଁ ବାସଙ୍ଗ୍‌ନାବକେ, ଆତେନ୍‌ ନିମାଣ୍ଡାଃ । ମେଁ ଆରି ବାସଙ୍ଗ୍‌କେ, ମେଃଡାଗ୍ଲା ନିଂ ବେଲା ସାନ୍ତି ଆରି ସତ୍‌ ଲେଃଏ ।