1 ହିଜକୀୟ ରାଜାନେ ସାସନ୍‌ନେ ଗୋଅଁ ମୁଆଁ ବେଲା ଅଶୂରନେ ରାଜା ସନ୍‌ହେରୀବ୍‌ ଯିହୁଦାନେ ତୁରାଃ ଗେରେକ୍ନେ ଇନି ସାପାନେ ବିରୁଦ୍‌ରେ ପାଙ୍ଗ୍‌ଚେ ଆତେନ୍‌ ସାପା ଅଦିକାର୍ ଡିଂକେ । 2 ତେନ୍‌ଇଡ଼ିଂ ଅଶୂରନେ ରାଜା ରବ୍‌ଶାକିକେ ମ୍ନା ସନ୍ୟ ଏଃତେ ଲାଖୀଶ୍‌ଠାବାନ୍‌ ଯିରୂଶାଲମନେ ହିଜକୀୟ ରାଜା ଡାଗ୍ରା ବେକେ । ଆରି, ମେଁ ଦବାଇଂନେ ଲିଜ ଗାଲି ଲେଃକ୍ନେ ଇନ୍ତିପାକା ଲେଃକ୍ନେ କୁଣ୍ଡ୍‌ନେ ନାଲ୍ ଡାଗ୍ରା ତୁଆଁକେ । 3 ତେଲା ହିଲ୍‌କୀୟନେ ଉଙ୍ଗ୍‌ଡେ ଇଲୀୟାକୀମ୍‌ ମ୍ନିକ୍ନେ ରାଜା ଡୁଆନେ ନେତା ଆରି ଶୀବ୍‌ନ ଗୁଗୁଆର୍‌ଣ୍ଡ୍ରେ ଆରି ଆସଫନେ ଉଙ୍ଗ୍‌ଡେ ଯୋୟାହ ମ୍ନିକ୍ନେ ଇତିହାସ୍‌ ଗୁଗୁଆର୍‌ଣ୍ଡ୍ରେ ତାର୍‌ଆର୍‌ଚେ ମେଁ ଡାଗ୍ରା ପାଙ୍ଗ୍‌ଆର୍‌କେ । 4 ତେନ୍‌ଇଡ଼ିଂ ରବ୍‌ଶାକି ଆମେଇଂକେ ବାସଙ୍ଗ୍‌କେ, ଏବେ ପେ ହିଜକୀୟକେ ବାସଙ୍ଗ୍‌ପା, ମ୍ନା ରାଜା ଅଶୂରନେ ରାଜା ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ପେ ଆକେନ୍‌ ମେଃ ବିସ୍‌ବାସ୍‌ ଡିଂପେଡିଂକେ, ଆତେନ୍‌ ଡିରକମ୍‌ ବିସ୍‌ବାସ୍‌ ? 5 ନିଂ ବାସଙ୍ଗ୍‌ଣ୍ଡିଂ, ଜୁଦ୍‌ ଡିଂ ନ୍‌ସାଃ ନାଁନେ ଉପାୟ୍ ଆରି ବପୁ ସରାଃ ଆଃ । ନା ଜା ଆଡ଼ାତ୍ରା ଆସା ଡିଂଚେ ନିଂନେ ବିରଦି ଡିଂନାଲେଃକେ ? 6 କେଲା, ନାଁ ଆକେନ୍‌ ସିତଗ୍‌ ସିତଗ୍‌ ଲାଏଃକ୍ନେ ନାଲାନେ ଡୁଡୁ ରକମ୍‌ ମିସର୍‌ ଆଡ଼ାତ୍ରା ଆସା ଡିଂନାଡିଂକେ; ମାତର୍‌ ଜାଡିଗ୍‌ ତେନ୍‌ ଆଡ଼ାତ୍ରା ଲେଃୱେଏ, ଆତେନ୍‌ ମେଁନେ ନ୍ତିନିଆ ଆଃଚେ ଆଃଗିଃ ବିଃଏ; ଜା ମିସ୍ରିୟ ରାଜା ଫାରୋ ଆଡ଼ାତ୍ରା ଆସା ବ‍ଆର୍‌ଏ, ତେନ୍‌ ସାପାରେ ଆଡ଼ାତ୍ରା ମେଁ ତ ଦେକ୍‌ରକମ୍‌ । 7 ମାତର୍‌ ଅଃନା ପେ ଆନିଂକେ ପେବାସଙ୍ଗ୍‌ଏ, ନେ ମାପ୍‌ରୁ ନିଜର୍‌ନେ ପର୍‌ମେସର୍‌ ଆଡ଼ାତ୍ରା ଆସା ବନେଃଡିଂକେ; ତେଲା ହିଜକୀୟ ଜାନେ ତିଆର୍‌ ଜାଗା ଆରି ଜାନେ ପୁଜା ବେଦି ସାପା ସ୍ଲ ଆଃଡିଂବକେ, ଆରି ଯିହୁଦାକେ ଆରି ଯିରୂଶାଲମକେ ବାସଙ୍ଗ୍‌ବକେ, ପେ ଆକେନ୍‌ ପୁଜା ବେଦି ସେଃମଁ ପେସାର୍ଲ‍ଏ, ମେଁ ମେଃନେ ଆତେନ୍‌ ମାପ୍‌ରୁ ଣ୍ଡୁ ? 8 ଏନ୍‌ସାଃ ନିଂ ଗୁଆରେ ଣ୍ଡିଂକେ, ନିଂନେ ମାପ୍‌ରୁ ଅଶୂରନେ ରାଜା ଏଃତେ ରାଜିନାମା ଡିଂ, ନିଂ ଆନାକେ ମ୍ବାର୍‌ ଅଜାର୍‌ ଗଡ଼ା ମ୍ବିଏ, ଜଦି ନାଁ ନାୟାଏ, ତେଲା ମେଇଂ ଆଡ଼ାତ୍ରା ଡିଡେଃନେ ନ୍‌ସାଃ ନା ପାକାବାନ୍‌ ରେମୁଆଁ ଡୁଙ୍ଗ୍‌ପାଙ୍ଗ୍‌ଲା । 9 ତେଲା ଡିରକମ୍‌ ନାଁ ନିଂନେ ମାପ୍‌ରୁନେ ଦାସ୍‌ଇଂନେ ବିତ୍ରେବାନ୍‌ ଡାଆଁ ସ‍ଏଟା ସନ୍ୟ‍ଇଂନେ ନେତାକେ ଆଃବେମ୍ବ୍ରେ ପେୟାଏ । ଆରି ରତ୍‌ ଆରି ଗୋଡ଼ା ଆତ୍‌ଲା ମିସର୍‌ ଆଡ଼ାତ୍ରା ବିସ୍‌ବାସ୍‌ ନାଡିଂଏ ? 10 ନିଂ ମେଃନେ ମାପ୍‌ରୁ ବିନା ଆକେନ୍‌ ଜାଗା ଦଂସ ଆଃଡିଂନ୍‌ସାଃ ପାଙ୍ଗ୍‌ନ୍ଲେଃକେ ? ମାପ୍‌ରୁ ଆନିଂକେ ବାସଙ୍ଗ୍‌କେ, ଆକେନ୍‌ ଦେସ୍‌ ବିରୁଦ୍‌ରେ ୱେଚେ ଆତେନ୍‌ ଦଂସ ଆଃଡିଂ । 11 ତେନ୍‌ଇଡ଼ିଂ ଇଲୀୟାକୀମ୍‌ ଆରି ଶୀବ୍‌ନ ଆରି ଯୋୟାହ ରବଶାକିକେ ବାସଙ୍ଗ୍‌ଆର୍‌କେ, ଗୁଆରେ ନେଡିଂକେ, ନାଁ ଅରାମୀୟ ବ୍ନାସାରେ ନିଜର୍‌ ଦାସ୍‌ଇଂକେ ବାସଙ୍ଗ୍‌; ମେଃଡାଗ୍‌ଲା ନେ ଆତେନ୍‌ ବୁଜେ ନେଡିଂକେ; ବାରି, ତୁରାଃନେ ଇନ୍ତିପାକା ଲେଃକ୍ନେ ରେମୁଆଁଇଂନେ ନ୍ଲୁଗ୍‌ଅରିଆ ଆନେକେ ଯିହୁଦି ବ୍ନାସାରେ ଆବାସଙ୍ଗ୍‌ଲେଃ । 12 ମାତର୍‌ ରବ୍‌ଶାକି ଆମେଇଂକେ ବାସଙ୍ଗ୍‌କେ, ନିଂନେ ମାପ୍‌ରୁ କି ନାଁନେ ମାପ୍‌ରୁକେ ଆରି ଆନାକେ ଆକେନ୍‌ ସାପା ସାମୁଆଁ ବାସଙ୍ଗ୍‌ ନ୍‌ସାଃ ଆନିଂକେ ବେବକେ ? ଆକେନ୍‌ ମୁଃଡ଼ି ରେମୁଆଁଇଂ ପେନେ ଏଃତେ ନିଜେ ନିଜେ କାଜ୍‌ରା ଚୁଚଙ୍ଗ୍‌ ନ୍‌ସାଃ ଆରି ଡିଡ୍ୟାଃପାର୍‌ ଉଗ୍‌ ନ୍‌ସାଃ ତୁରାଃ ଆଡ଼ାତ୍ରା କଲେଃଆର୍‌କେ, ମେଇଂନେ ଡାଗ୍ରା ମେଃନେ ଆନିଂକେ ବେଆବକେ ଣ୍ଡୁ ? 13 ତେସାଃ ରବ୍‌ଶାକି ତୁଆଁଚେ ଜାବର୍‌ ୱାସାର୍‌ଚେ ଯିହୁଦି ବ୍ନାସାରେ ଆକେନ୍‌ ସାମୁଆଁ ବାସଙ୍ଗ୍‌କେ, ପେ ମ୍ନା ରାଜା ଅଶୂରନେ ରାଜାନେ ସାମୁଆଁ ଦ୍ରିଗ୍‌ । 14 ରାଜା ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ଆପେକେ ଆଃନାଲେ ନ୍‌ସାଃ ହିଜକୀୟକେ ଆବେଗେ; ମେଃଡାଗ୍‌ଲା ମେଁ ଆପେକେ ଉଦାର୍‌ ଡିଂଆୟା ଣ୍ଡୁ । 15 ଣ୍ଡୁଲା ମାପ୍‌ରୁ ଡିଲାଡିଗ୍‌ ଆନେକେ ଉଦାର୍‌ ଡିଂଏ ଆରି ଆକେନ୍‌ ଇନି ଅଶୂରୀୟ ରାଜାନେ ସାସନ୍‌ ଆଡିଂ ଣ୍ଡୁ, ଆକେନ୍‌ ସାମୁଆଁ ବାସଙ୍ଗ୍‌ଚେ ହିଜକୀୟ ଆପେକେ ମାପ୍‌ରୁଅରିଆ ବିସ୍‌ବାସ୍‌ ଆରାଃଡିଂଲେଃ । 16 ହିଜକୀୟନେ ସାମୁଆଁ ଆଦ୍ରିଗ୍‌ଗେପା; ମେଃଡାଗ୍‌ଲା ଅଶୂରୀୟ ରାଜା ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ପେ ନିଂ ଏଃତେ ମିସୁଃପା ଆରି ନିଂ ଡାଗ୍ରା ତାର୍‌ଚେ ପାଙ୍ଗ୍‌ଲାପା ଆରି ସାପାରେ ନିଜର୍‌ ନିଜର୍‌ ଅଙ୍ଗୁର୍‌ ଚୁଚୁ ଆରି ସାପାରେ ନିଜର୍‌ ନିଜର୍‌ ଲିୱା ଚୁଚୁ ଚଙ୍ଗ୍‌ପା, ଆରି ସାପାରେ ନିଜର୍‌ ନିଜର୍‌ କୁଇଁସାଲ୍‌ ଣ୍ଡିଆଃ ଉଗ୍‌ପା । 17 ସାରାସାରି ନିଂ ପାଙ୍ଗ୍‌ଚେ ପେନେ ନିଜର୍‌ ଦେସ୍‌ ରକମ୍‌ ମୁଇଂ ଦେସ୍‌କେ ମ୍ୱିଏ, ଆତ୍‌ଅରିଆ, କିଆଉଁଆଃ ଆରି ଅଙ୍ଗୁର୍‌ରସ୍‌ ଲେକ୍ନେ ଦେସ୍‌, ଆରି ରୁଟି ଆରି ଅଙ୍ଗୁର୍‌ ଲିଜ ଲେକ୍ନେ ଦେଶ୍‌ନିଆ ଆପେକେ ଡୁଙ୍ଗ୍‌ଉଁୱେଏ । 18 ମାପ୍‌ରୁ ଆନେକେ ରକ୍ୟା ଡିଂଏ ଡାଗ୍‌ଚେ ବାସଙ୍ଗ୍‌ଚେ ହିଜକୀୟ ଡିରକମ୍‌ ଆପେକେ ବକୁଆ ଆରାଃଡିଂ ଣ୍ଡୁ, ଆକେନ୍‌ସାଃ ତରକ୍‌ ଲାଃଲାପା । ବିନ୍‌ ବିନ୍‌ ଜାତି‍ଇଂନେ ଦେବ୍‌ତାଇଂ ବିତ୍ରେବାନ୍‌ ମୁଃଡ଼ି ଦେବ୍‌ତା ମେଃନେ ଅଶୂରୀୟ ରାଜାନେ ନ୍ତିବାନ୍‌ ନିଜର୍‌ ଦେସ୍‌ ରକ୍ୟା ଡିଂବକେ ? 19 ହମାତନେ ଆରି ଅର୍ପଦନେ ଦେବ୍‌ତାଇଂ ଆଣ୍ଡି ୱେଆର୍‌ଗେ ? ସଫର୍ବୟିମନେ ଦେବ୍‌ତାଇଂ ଆଣ୍ଡି ୱେଆର୍‌ଗେ ? ଆରି ମେଇଂ ମେଃନେ ନିଂନେ ନ୍ତିବାନ୍‌ ଶମରୀୟାକେ ରକ୍ୟା ଡିଂବଆର୍‌କେ ? 20 ଆକେନ୍‌ ସାପା ଦେସ୍‌ନେ ଦେବ୍‌ତାଇଂ ବିତ୍ରେବାନ୍‌ ଆଣ୍ଡିନେ ଦେବ୍‌ତାଇଂ ନିଂନେ ନ୍ତିବାନ୍‌ ନିଜର୍‌ ନିଜର୍‌ ଦେସ୍‌କେ ରକ୍ୟା ଡିଂବ‍ଆର୍‌କେ ଜେ, ମାପ୍‌ରୁ ନିଂନେ ନ୍ତିବାନ୍‌ ଯିରୂଶାଲମକେ ରକ୍ୟା ଡିଂଏ ? 21 ମାତର୍‌ ରେମୁଆଁଇଂ ଚୁପ୍‌ ଡିଂଚେ ଲେଃଆର୍‌ଗେ, ଆମେକେ ମୁଇଂ ପଦ୍‌ ଡିଗ୍‌ ଆବାସଙ୍ଗ୍‌ଆର୍‌କେ; ମେଃଡାଗ୍‌ଲା ଆମେକେ ମେଃଡିଗ୍‌ ଆବାସଙ୍ଗ୍‌ଗେ ଡାଗ୍‌ଚେ ରାଜାନେ ଆଦେସ୍‌ ଲେଃଗେ । 22 ତେନ୍‌ଇଡ଼ିଂ ହିଲ୍‌କୀୟନେ ଉଙ୍ଗ୍‌ଡେ ଇଲୀୟାକୀମ୍‌ ମ୍ନିକ୍ନେ ରାଜା ଡୁଆନେ ନେତା ଆରି ଶୀବ୍‌ନ ଗୁଗୁଆର୍‌ଣ୍ଡ୍ରେ ଆରି ଆସଫନେ ଉଙ୍ଗ୍‌ଡେ ଯୋୟାହ ମ୍ନିକ୍ନେ ଇତିହାସ୍‌ ଗୁଗୁଆର୍‌ଣ୍ଡ୍ରେ ନିଜର୍‌ ନିଜର୍‌ ସକା ସ୍ୟାଃଚେ ହିଜକୀୟ ଡାଗ୍ରା ପାଙ୍ଗ୍‌ଚେ ରବ୍‌ଶାକିନେ ସାମୁଆଁ ସାପା ଆମେକେ ବାସଙ୍ଗ୍‌ଆର୍‌କେ ।