1 ତଃଡ଼୍ୟାଃପା, ତାର୍କିଗ୍‌ ରକମ୍‌ ଡିଂପା, ମେଃଡାଗ୍‌ଲା ପେନେ ତାର୍କିଗ୍‌ ପିଙ୍ଗ୍‌ଚାଃଲାଏଃକେ ଆରି ସଦାପ୍ରବୁନେ ତାର୍କିଗ୍‌ ପେନେ ଆଡ଼ାତ୍ରା ତାର୍‌ଲାଏଃକେ । 2 ମେଃଡାଗ୍‌ଲା, କେଲାପା, ତାଙ୍ଗ୍‌କିଗ୍‌ ମଞ୍ଚ୍‌ପୁର୍‌କେ ଆରି ଜାବର୍‌ ତାଙ୍ଗ୍‌କିଗ୍‌ ରେମୁଆଁ ଜାତିକେ ଡିଡାବିଃଏ; ମାତର୍‌ ପେ ଆଡ଼ାତ୍ରା ମାପ୍‌ରୁ ତାର୍‌ଏ ଆରି ମେଁନେ ତାର୍କିଗ୍‌ ପେ ଆଡ଼ାତ୍ରା ତ୍ନାଏ । 3 ବାରି, ବିନ୍‌ ଦେସ୍‌ନେ ରେମୁଆଁଇଂ ପେନେ ତାର୍କିଗ୍‌ ଡାଗ୍ରା ଆରି ଇଃସାଙ୍ଗ୍‌ଇଂ ପେନେ ସ୍ମିନେ ତାର୍କିଗ୍‌ ଡାଗ୍ରା ପାଙ୍ଗ୍‌ଆର୍‌ଏ । 4 ନାଁ କ୍ଲିଗ୍‌ପାକା କେଲା, ତେନ୍‌ ସାପାରେ ମୁଇଂଡାଗ୍ରା ରିସିଙ୍ଗ୍‌ଡିଂଆର୍‌କେ, ମେଇଂ ନାଁ ଡାଗ୍ରା ପାଙ୍ଗ୍‌ଡିଂଆର୍‌କେ; ନାଉଙ୍ଗ୍‌ଇଂ ସ୍ଲବାନ୍‌ ପାଙ୍ଗ୍‌ଆର୍‌ଏ ଆରି ନାଁନେ ସେଲାମ୍ବୁଏଃଉଂଇଂକେ କଃଚେ ରାଙ୍ଗ୍‌ପାଙ୍ଗ୍‌ଆର୍‌ଏ । 5 ଅଃତେନ୍‌ବେଲା ନାଁ ଆତେନ୍‌ କେଚେଃ ଇରିୟାଃତୁଗ୍‌ଏ ଆରି ନାଁନେ ଜିବନ୍‌ ଦକ୍‌ ଦକ୍‌ ଡିଂଚେଃ ଜୁର୍‌ୱେଏ; ମେଃଡାଗ୍‌ଲା କେଣ୍ଡିଆଃନେ ସାପା ଦନ୍‌ ନା ପାକା ନେରାଃଆଣ୍ଡେଏ, ବିନ୍‌ ଦେସ୍‌ନେ ରେମୁଆଁଇଂନେ ଦନ୍‌ସମ୍ପତି ନାଁ ଡାଗ୍ରା ପାଙ୍ଗ୍‌ଏ । 6 ଜାବର୍‌ ଉଁଟ୍‌, ମିଦିୟନ୍‌ ଆରି ଐଫାନେ ଦାପ୍ରେ ଅଲେଙ୍ଗ୍‌ନେ ଉଁଟ୍‌, ଆନାକେ ଗେରେଆର୍‌ଏ; ତେନ୍‌ ସାପା ଶିବା ଦେସ୍‌ବାନ୍‌ ପାଙ୍ଗ୍‌ଆର୍‌ଏ; ମେଇଂ ସୁନା ଆରି ଦୁପ୍‌ ଡୁଙ୍ଗ୍‌ପାଙ୍ଗ୍‌ଆର୍‌ଏ ଆରି ମାପ୍‌ରୁନେ ପ୍ରସଂସା ବାସଙ୍ଗ୍‌ଆର୍‌ଏ । 7 କେଦାରନେ ସାପା ମେଣ୍ଡା ରାସି‍ଇଂ ନାଁ ଡାଗ୍ରା ରିସିଙ୍ଗ୍‌ଆର୍‌ଏ, ନବାୟୋତନେ ମେଣ୍ଡାଇଂ ନାଁନେ ସେବା ଡିଂଆର୍‌ଏ; ମେଇଂ ଗ୍ର‍ଅନ୍‌ ଡିଂଆର୍‌ଚେଃ ନେନେ ପୁଜା ବେଦି ଆଡ଼ାତ୍ରା ପାଙ୍ଗ୍‌ଆର୍‌ଏ, ବାରି ନେ ନିଜର୍‌ ସୁନ୍ଦର୍‌ ରକମ୍‌ ଡୁଆକେ ଆସିର୍ବାଦ୍‌ ନେଡିଂଏ । 8 ତ୍ରିଗ୍‌ଡ୍ୟା ରକମ୍ ନେ ୱାଲେଃଚେ ନିଜର୍ ଉଙ୍ଗ୍‌ଚ୍ୟାଃଅରିଆ ପାଙ୍ଗ୍‌ନେଡିଙ୍ଗ୍‌କେ ଆରି କୁକୁର୍ୟାଃ ରକମ୍ ୱାଲେଃଚେ ପାଙ୍ଗ୍‌ଆର୍‌ଡିଂକେ କିମେଇଂ ଜାଣ୍ଡେ ? 9 ଡିଲାଡିଗ୍‌ କଣ୍ଡାଇଂ ଆନେକେ ଉର୍‌ଆର୍‌ଏ, ବାରି ତର୍ଶୀଶନେ ଜାହାଜ୍‌ ସାପା ସିସେ ୱେଚେଃ ନିଜର୍‌ ନିଜର୍‌ ଏଃତେ ମେଇଂନେ ରୁପା ଆରି ସୁନା ରାଙ୍ଗ୍‌ୱେଚେଃ, ପେଉଙ୍ଗ୍‌ଇଂକେ ସ୍ଲବାନ୍‌ ଡୁଙ୍ଗ୍‌ପାଙ୍ଗ୍‌ଚେଃ, ପେନେ ପର୍‌ମେସର୍‌ ମାପ୍‌ରୁନେ ମ୍ନି ନ୍‌ସାଃ ଆରି ଇସ୍ରାଏଲ୍‌ନେ ପବିତ୍ର ମାପ୍‌ରୁ ଆତ୍‌ଲା ପାଙ୍ଗ୍‌ଆର୍‌ଏ, ମେଃଡାଗ୍‌ଲା ମେଁ ଆନାକେ ମହିମା ଆଃଡିଂବକେ । 10 ବାରି, ବିଦେସି‍ଇଂ ନାଁନେ କନ୍ତି ଆଃରେଆର୍‌ଏ ଆରି ମେଇଂନେ ଇଃସାଙ୍ଗ୍‌ଇଂ ନାଁନେ ପ୍ରସଂସା ଡିଂଆର୍‌ଏ; ମେଃଡାଗ୍‌ଲା ନେ ନିଜର୍‌ ରିସାରେ ଆନାକେ ନେବଗ୍‌କେ, ମାତର୍‌ ନିଜର୍‌ ଦୟାରେ ନେ ନାଁ ଆଡ଼ାତ୍ରା ଦୟା ଡିଂନେବକେ । 11 ବିନ୍‌ ଦେସ୍‌ଣ୍ଡ୍ରେନେ ସମ୍ପତି ଆରି ତେନ୍‌ ଏଃତେ ମେଇଂନେ ଇଃସାଙ୍ଗ୍‌ଇଂ ଡିରକମ୍‌ ନାଁ ଡାଗ୍ରା ଡୁଙ୍ଗ୍‌ପାଙ୍ଗ୍‌ଆର୍‌ଏ, ଆକେନ୍‌ସାଃ ପେ ଇନିନେ କାପାଟ୍‌ ସାପା କାଲାଆଃ ମେଲା ଲେଃଏ, ସ୍ମି ମିଡିଗ୍‌ ତେନ୍‌ ସାପା ବନ୍ଦ୍‌ ଆଡିଂ ଣ୍ଡୁ । 12 ମେଃଡାଗ୍‌ଲା ମୁଃଡ଼ି ଦେସ୍‌ ଆରି ରାଜ୍ୟ ନାଁନେ ସେବା ଆଡିଂଆର୍‌, ଆତେନ୍‌ ବିନାସ୍‌ ଡିଂଏ, ହାଁ, ଆତେନ୍‌ ଦେସ୍‌ ସାପା ପୁରାପୁରି ବାବ୍‌ରେ ବିନାସ୍‌ ଡିଂଏ । 13 ଲିବାନୋନନେ ଗଉରବ୍‌ ନାଁ ଡାଗ୍ରା ପାଙ୍ଗ୍‌ଏ, ଦେବଦାରୁ, ତିଧର, ତାଶୂର ସ୍ଲାଃ ମୁଇଂଅରିଆ ରିସିଙ୍ଗ୍‌ଚେଃ ନେନେ ପବିତ୍ର ଜାଗା ସୁନ୍ଦର୍‌ ଆଃଡିଂନ୍‌ସାଃ ପାଙ୍ଗ୍‌ଆର୍‌ଏ, ବାରି ନେ ନିଜର୍‌ ଞ୍ଚ ଆଲନେ ଜାଗା ଗୌରବ୍‌ ନେଡିଂଏ । 14 ଆରି, ଜାଜା ଆନାକେ କସ୍‌ଟ ବିଃଆର୍‌କେ, ମେଇଂନେ ଗଡ଼େଇଂ ଦରମ୍‌ ଡିଂଚେଃ ନାଁ ଡାଗ୍ରା ପାଙ୍ଗ୍‌ଆର୍‌ଏ ଆରି ଜାଜା ଆନାକେ ଗ୍ରୁନା ଡିଂଆର୍‌କେ, ତେନ୍‌ ସାପାରେ ନାଁ ଞ୍ଚ ଆଲ ସାର୍ଲ‍ଆର୍‌ଏ; ଆରି, ମେଇଂ ଆନାକେ ମାପ୍‌ରୁନେ ଇନି, ଇସ୍ରାଏଲ୍‌ନେ ପବିତ୍ର ଇସ୍‌ପର୍‌ ସିୟୋନ ଡାଗ୍‌ଚେଃ ବାସଙ୍ଗ୍‌ଆର୍‌ଏ । 15 ପେ ଆଃଆନ୍ତାର୍‌ ପେଲାଏଃକେ ଆରି ଗ୍ରୁନା ବାପେଲାଏଃକେସାଃ ଜାଡିଗ୍‌ ପେନେ ମଜେ ଆ‍ଅଲେଙ୍ଗ୍‌ଆଡାଲ୍ୟାକେ ଣ୍ଡୁ, ତେନ୍‌ ବାଦୁଲ୍‌ ନେ ଆନାକେ ମାଡାନେ କାଲ୍‌ ଜାକ ଲେଃନେ ଗୌରବ୍‌ ଆରି ଗୁଲୁଏ ଜୁଗ୍ ଜୁଗ୍ ଜାକ ସାର୍ଦା ରକମ୍‌ ନେରାଃଡିଂଏ । 16 ପେ ବିନ୍‌ ଦେଶ୍‌ନେ କୁଟୁମ୍‌ ଆରି ରାଜାଇଂ ଆପେକେ ଲାଲନ୍‌ ପାଲନ୍‌ ଡିଙ୍ଗ୍‌ଆର୍‌ଏ । ପେନେ ଜତନ୍‌ ଡୁଙ୍ଗ୍‌ଡଆର୍‌ଏ ଆରି ଡିରକମ୍‌ ଇୟାଙ୍ଗ୍‌ ମେଁନେ ଉଂଡେଇଂକେ ଜତନ୍‌ ଡୁଙ୍ଗ୍‌ଡମ୍ୟାଃକେ । ତେଲା ନେ ଜେ ମାପ୍‌ରୁ ପେନେ ରକ୍ୟା ଡିଂଣ୍ଡ୍ରେ ଆରି ପେନେ ମୁକ୍‌ତି ବିଃଣ୍ଡ୍ରେ, ଯାକୁବକେ ବପୁ ବିଃଣ୍ଡ୍ରେ ନେଲାଏଃକେ, ଆକେନ୍‌ ପେ ପେମ୍ୟାଃଏ । 17 ନେ ପିତଲ୍‌ ବାଦୁଲ୍‌ ସୁନା ଡୁଙ୍ଗ୍‌ନେପାଙ୍ଗ୍‌ଏ ଆରି ଲୁଆ ବାଦୁଲ୍‌ ରୁପା ଡୁଙ୍ଗ୍‌ନେପାଙ୍ଗ୍‌ଏ, ସୁଆ ବାଦୁଲ୍‌ ପିତଲ୍‌ ଆରି ବ୍ରି ବାଦୁଲ୍‌ ଲୁଆ ଡୁଙ୍ଗ୍‌ନେପାଙ୍ଗ୍‌ଏ; ଆରି, ନେ ନାଁନେ ନେତା ପଦ୍‌ଅରିଆ ସାନ୍ତି ଡୁଙ୍ଗ୍‌ନେପାଙ୍ଗ୍‌ଏ ଆରି ପେନେ ଅଦିକାର୍‌ ପଦ୍‌ଅରିଆ ଦରମ୍‌ ସାମୁଆଁକେ ନେରାଃକ‍ଏ । 18 ପେନେ ଦେସ୍‌ଅରିଆ କାରାପ୍‌ ସାମୁଆଁ ପେଅଁ ଣ୍ଡୁ ଆରି ପେନେ ଗିରା ବିତ୍ରେ ବାଗୁଏଃନେ ଆରି ବିନାସ୍‌ନେ ସାମୁଆଁ ଆଅଁ ଣ୍ଡୁ ଆରି ଆନ୍ନାଙ୍ଗ୍‌ସା ଣ୍ଡୁ; ମାତର୍‌ ପେ ନିଜର୍‌ କାନ୍ତି ସାପାନେ ମ୍ନି ଉଦାର୍‌ ଆରି ନିଜର୍‌ ଇନି କାପାଟ୍‌ ସାପାନେ ମ୍ନି ପ୍ରସଂସା ନାବ‍ଏ । 19 ସ୍ମି ସ୍ନି ନାଁନେ ତାର୍କିଗ୍‌ ଆରି ଆଡିଂ ଣ୍ଡୁ, କି ତାର୍କିଗ୍‌ ନ୍‌ସାଃ ଆର୍କେ ଆନାକେ ତାର୍କିଗ୍‌ ଆବିଃ ଣ୍ଡୁ; ମାତର୍‌ ମାପ୍‌ରୁ ନାଁ ଆଡ଼ାତ୍ରା ମାଡାନେ କାଲ୍‌ ଜାକ ଲେଃନେ ତାର୍କିଗ୍‌ ଆରି ନାଁନେ ପର୍‌ମେସର୍‌ ନାଁନେ ଗୌରବ୍ ରକମ୍‌ ଡିଂଏ । 20 ନାଁନେ ସ୍ନି ଆରି ଆଲଗ୍‌ ଣ୍ଡୁ, କି ନାଁନେ ଆର୍କେ ନିଜ୍‌କେ ଆରାଃଅଟ୍‌କେ ଣ୍ଡୁ; ମେଃଡାଗ୍‌ଲା ମାପ୍‌ରୁ ପେନେ ମାଡାନେ କାଲ୍‌ ଜାକ ଲେଃନେ ତାର୍କିଗ୍‌ ରକମ୍‌ ଡିଂଏ ଆରି ନାଁନେ ଅଃନେ ଦିନ୍‌ ଡାଏ । 21 ଡିଗ୍‌ ନାଁନେ ରେମୁଆଁ ସାପାରେ ଦାର୍ମିକ୍‌ ଡିଂଆର୍‌ଏ, ମେଇଂ ମାଡାନେ କାଲ୍‌ ଜାକ ଦେସ୍‌ ସାସନ୍‌ ଡିଂଆର୍‌ଏ, ମେଇଂ ନେନେ ଗୌରବ୍‌ ନ୍‌ସାଃ ନେନେ ଉଙ୍ଗ୍‌କ୍ନେ କେନ୍ଦା ଆରି ନେନେ ନ୍ତି ଏଃତେ ଆଃରେକ୍ନେ କାମ୍‌ । 22 ଡାଆଁ ରେମୁଆଁ ମୁଇଂ ଅଜାର୍‌ ଡିଂଏ ଆରି ଡାଆଁ ରେମୁଆଁ ସକ୍‌ତିସାଲି ଜାତି ଡିଂଆର୍‌ଏ; ନେ ମାପ୍‌ରୁ ସମାନ୍‌ ବେଲା ଆକେନ୍‌ ଦାପ୍ରେ ପୁରା ନେରାଃଡିଂଏ ।