ପ୍ରଶଂସା ଆରି ଅସ୍ମାର୍
1 ଆତେନ୍ ଦିନ୍ ଯିହୁଦା ଦେସ୍ନ୍ୟା ଏହେନେ ଅସ୍ମାର୍ ସାର୍ ଆର୍ଏ । ନେଇଂନେ ମୁଇଂ ମ୍ନାନେ ଇନି ଲାଏଃକେ । ମେଁ ଉଦାର୍କେ ଆତ୍ଅରିଆ ଲେକ୍ନେ ତୁରାଃ ଆରି ମ୍ନା ଡୁଆନେ ଅସାର୍ ଗାଲି ଆଃରେକେ ।
2 ସତ୍ ପାଲ୍ନ୍ ଡିଂଣ୍ଡ୍ରେ, ଦରମ୍ ଜାତି ଡିରକମ୍ ଗାୟାଆର୍ଏ, ଏହେନ୍ସା ପେଇଂ ଇନିନେ ଗାଲିସାପା ରଃବିପା ।
3 ଜାଣ୍ଡେନେ ମନ୍ ନାଁଡାଗ୍ରା ବିସ୍ବାସ୍ ଲେଃଏ, ଆମେକେ ନାଁ ସାନ୍ତିରେ ନାବଏ । ଡାଗ୍ଲା ମେଁ ନାଁଡାଗ୍ରା ଆସା ବଏ ।
4 ପେଇଂ ସାପାବେଲା ମାପ୍ରୁ ଡାଗ୍ରା ଆସା ବପା । ଡାଗ୍ଲା ସଦାପ୍ରବୁ ଯିହୋବା ଡାଗ୍ରା କାଲାଆଃ ଲେଃନେ ମ୍ନାନେ ତାଲେବିର୍ ଲାଏଃକେ ।
5 ଜାଣ୍ଡେଇଂ ଗର୍ବ ଡିଙ୍ଗ୍ଆର୍ଡିଂକେ ଆମେଇଂକେ ଦରମ୍ ଆଡିଙ୍ଗ୍ବକେ । ମ୍ନା ଇନିନିଆ ବାସାଲେକ୍ନେ ରେମୁଆଁଇଂକେ ନସ୍ଟ ଆଡିଙ୍ଗ୍ବକେ । ଇଡ଼ିଂ ମେଁ ଆମେକେ ଡାଆଁ ଆଡିଙ୍ଗ୍ଚେ ଦଂସ ଆଃଡିଙ୍ଗ୍ବକେ ଆରି ତୁବଃନିଆ ଆଃମିସୁଃବକେ ।
6 ଞ୍ଚ ଆରି ଦରିଦ୍ର ଇଂନେ ଞ୍ଚ ବାରି ଅର୍କିତ୍ ଇଂନେ ଞ୍ଚ ଏତେ ଆତାନ୍ ଲେଚାର୍ ବିଃଏ । 7 ଦରମ୍ ରେମୁଆଁନେ ଗାଲି ସିଦା । ସତ୍ ରେମୁଆଁ ଜେ ନା, ନା ଦରମ୍ ରେମୁଆଁନେ ଗାଲି ଆଃକେନାଡିଂକେ ।
8 ଅ ସଦାପ୍ରବୁ ନେ ନାଁ ସାସନ୍ ଡିଙ୍ଗ୍ନେ ଗାଲିନିଆ ଆନାକେ ଉର୍ଚେ ନେଲେକେ । ନାନେ ମ୍ନିକେ ଆରି ନାନେ ମନେନାବକ୍ନେ ଚିନ୍ ଆଡ଼ାତ୍ରା ନେନେ ଜିବନ୍ ଆସା ଲେଃକେ ।
9 ମିଡିଗ୍ କେଲା ନେଙ୍ଗ୍ନେ ଜିବନ୍ ଆନାକେ ଆସା ଡିଙ୍ଗ୍ଡିଂକେ । ଅ ଅଃ, ନେଙ୍ଗ୍ ନେଙ୍ଗ୍ନେ ବିତ୍ରେନେ ଆତ୍ମା ଏତେ ଜିଆଃ ଆନାକେ ନ୍ତୁର୍ଏ । ମେଃଡାଗ୍ଲା ମଚ୍ପୁର୍ ନିଆ ନାନେ ସାସନ୍ ସାପା ତ୍ନାଲା ମଚ୍ପୁର୍ନେ ରେମୁଆଁଇଂ ଦର୍ମ ସାମୁଆଁ ସିକେ ଆର୍ଏ ।
10 ଦୁସ୍ଟ ରେମୁଆଁ ଆଡ଼ାତ୍ରା ଦୟା ଆଃସୁଏଃଲା ଡିଗ୍ ମେଁ ଦର୍ମ ଆସିକେ ଣ୍ଡୁ । ସିଦାସାଦା ରେମୁଆଁଇଂନେ ଦେସ୍ନ୍ୟା ମେଁ ଅନ୍ୟାୟ୍ ଡିଙ୍ଗ୍ଏ ବାରି ସଦାପ୍ରବୁନେ ମ୍ନା ମହିମାକେ ଆକେ ଣ୍ଡୁ ।
11 ଅଃ ସଦାପ୍ରବୁ, ନାନେ ନ୍ତି ମ୍ନା ଡିଙ୍ଗ୍ଲେକେ, ଏଲେଡିଗ୍ ମେଇଂ ଆଃକେ ଆର୍ ଣ୍ଡୁ, ମାତର୍ ରେମୁଆଁଇଂନେ ପାକା ନାନେ ଇକ୍ଚା କେଚେଃ ମେଇଂ ଗିଆସ ଆର୍ଏ । ଅ ଅଃ, ସୁଆ ନାନେ ରେମୁଆଁଇଂକେ ନାସ୍ ଆଡିଙ୍ଗ୍ଏ ।
12 ଅ ସଦାପ୍ରବୁ ନାଁ ନେନ୍ସା ସାପା କାମ୍ ସାନ୍ତି ନାରାଃଡିଙ୍ଗ୍ଏ । ମେଃଡାଗ୍ଲା ନା ନେ ଆତ୍ଲା ନେନେ ସାପା କାମ୍ ପୁରନ୍ ଆଡିଙ୍ଗ୍ ନାବକେ ।
13 ଅ ସଦାପ୍ରବୁ, ନେଇଂନେ ପର୍ମେସର୍, ଆନାକେ ଆତାର୍ଚେ ନେ ବିନ୍ ମାପ୍ରୁନେ ପ୍ଲା ୱେ ନେଡିଙ୍ଗ୍କେ ବାରି ବିନ୍ ମାପ୍ରୁ ନେଇଂନେ ଆଡ଼ାତ୍ରା ସାସନ୍ ଡିଙ୍ଗ୍ଡିଂକେ । ମାତ୍ରମ୍ ନେ ନାଁନେ ମ୍ନିକେ ନେସାଏ ବାରି ନା ମିନିରେ ଅସ୍ମାର୍ ନେସାର୍ଏ ।
14 ମେଇଂ ଗୁଏଃଲାଏଃଆର୍କେ, ମେଇଂ ବାରି ଆମ୍ୱ୍ର ଆର୍ ଣ୍ଡୁ । ମେଇଂ ଗୁଏଃଲାଏଃଆର୍କେ, ମେଇଂ ଆତଡ଼୍ୟାଆର୍ ଣ୍ଡୁ । ଏହେନ୍ସା ନାଁ ଆମେଇଂକେ ଡଣ୍ଡ୍ ବିଃଚେଃ ବିନାସ୍ ଆଃଡିଙ୍ଗ୍ନାବକେ ବାରି ମେଇଂ ମନେବକ୍ନେ ନସ୍ଟ ଆଃଡିଙ୍ଗ୍ନାବକେ ।
15 ନାଁ ଏହେନେ ଦେସ୍ନେ ରେମୁଆଁକେ ଆମ୍ନା ନାବକେ । ଅ ସଦାପ୍ରବୁ, ନାଁ ଏହେନେ ଦେସ୍ନେ ରେମୁଆଁକେ ଆମ୍ନା ନାବକେ । ନାଁ ନିଜେ ମହିମାନିତ୍ ଡିଙ୍ଗ୍ନାଲାଏଃକେ । ନାଁ ଦେସ୍ନେ ସାନ୍ଦି ସାପା ଆମ୍ନା ନାବକେ ।
16 ଅ ସଦାପ୍ରବୁ, ବିପଦ୍ ବେଲା ମେଇଂ ଆନାକେ ତୁର୍ ଆର୍କେ । ଉଡ଼ିବେଲା ନାଁ ଆମେଇଂକେ ସାସ୍ତି ନାବିକେ, ମେଇଂ ଆନାକେ ପାର୍ତନା ଡିଙ୍ଗ୍ ଆର୍କେ ।
17 ଗାଗ୍ଡ଼େ ଲାଏଃକ୍ନେ ସେଲାମ୍ବୁଏଃ ଣ୍ଡିଆକୁମାନେ ଡାଗ୍ରା ଡିଙ୍ଗ୍ନେ ବେଲା ଡିରକମ୍ ତେରେପେତେ ଡିଙ୍ଗ୍ଏ ବାରି ଦୁକାଲା ଅଃଏ, ଦେତ୍ରକମ୍ ଅ ସଦାପ୍ରବୁ, ନେ ନାଁ ସେଃମଁ ପାଙ୍ଗ୍ନେଲାଏଃକେ ।
18 ନେ ଗାଗ୍ଡ଼େ ଡିଙ୍ଗ୍ଲେକ୍ନେ ସେଲାମ୍ବୁଏଃ ରକମ୍ ଡିଙ୍ଗ୍ନେଲେଃ, ନେ ଦୁକା ବାଚେଃ ୱେଡ଼୍ୟାଃ ଜନମ୍ ବିଃନେବକେ । ନେ ଦେସ୍ନେ ଉଦାର୍ ବାନେ ପୁରନ୍ ଆଃଡିଙ୍ଗ୍ନେବକେ ଣ୍ଡୁ । କି ମଚ୍ପୁର୍ନେ ରେମୁଆଁଇଂ ମୁଣ୍ଡିଆ ଆବଗ୍ଆର୍କେ ।
19 ମାତ୍ରମ୍ ସଦାପ୍ରବୁ ବାସଙ୍ଗ୍ଡିଂକେ, "ପେନେ ଗୁଏଃକ୍ନେ ରେମୁଆଁଇଂ ମ୍ୱ୍ରଆର୍ଏ । ନେଙ୍ଗ୍ନେ ଗୁଏଃକ୍ନେ ମଡ଼ା ସାପା ତଃଡ଼୍ୟାଃଆର୍ଏ । ଅ ଗୁଏକ୍ନେ ରେମୁଆଁଇଂ ପେ ତଡ଼୍ୟାଚେ ଅସ୍ମାର୍ ସାର୍ପା । ଡାଗ୍ଲା ନାନେ ଅସ୍ଡ଼୍ୟାଃ ଚେଃମୁଆନେ ଅସ୍ଡ଼୍ୟାଃ ରକମ୍ ଆରି ତୁବଃ ଗୁଏକ୍ନେ ରେମୁଆଁଇଂକେ ଆଃତାର୍ ବିଏ ।"
ବିଚାର୍ ଆରି ଉଦାର୍
20 ଅ ନେଙ୍ଗ୍ନେ ରେମୁଆଁଇଂ, ଏଲାପା, ପେନେ ଡୁଆ ବିତ୍ରେ ଗାଚେ ନା ପିତୁର୍ ପାକାନେ କାପାଟ୍ ଡିଡା ବିଃ । ରିସା ୱେନେ ଜାକ ଉଡ଼ିଦିନା ଜାକ ନିଜ୍କେ ବୁଃଡ଼ିବିଃ ।
21 କେଲାପା, ସଦାପ୍ରବୁ ମଚ୍ପୁର୍ ବାସାଣ୍ଡ୍ରେକେ ମେଇଂନେ ପାପ୍ ନ୍ସା ଡଣ୍ଡ୍ ବିଃନ୍ସା ନିଜର୍ ଜାଗାବାନ୍ ତାର୍ଚେ ପାଙ୍ଗ୍ଡିଙ୍ଗ୍କେ । ମଚ୍ପୁର୍ ନିଜର୍ ମ୍ୟା ଆତ୍ନା ବିଃଏ । ମେଁ ବାରି ଗୁଏଃକ୍ନେ ରେମୁଆଁଇଂକେ ୱେଁଚେଃ ଆଃବ ଣ୍ଡୁ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)