ଜିସାୟ 40

ଇସ୍‌ପର୍‌ନେ ରେମୁଆଁଇଂକେ ଆସା ବନେ ସାମୁଆଁ

1 ନିଂନେ ରେମୁଆଁଇଂକେ ସାନ୍‌ତି ଆଃଡିଂ, ସାନ୍ତି ଆଃଡିଂ, ପେନେ ପର୍‌ମେସର୍‌ ଆକେନ୍‌ ବାସଙ୍ଗ୍‌ଡିଂକେ । 2 ପେ ଯିରୂଶାଲମକେ ସାନ୍‌ତିନେ ସାମୁଆଁ ବାସଙ୍ଗ୍‌ପା, ଆରି ମେଁନେ ଜୁଦ୍‌ ଡାକେ, ମେଁନେ ପାପ୍‌ କେମା ଡିଂକେ, ମେଁ ମାପ୍‌ରୁନେ ନ୍ତିବାନ୍‌ ନିଜେନେ ସାପା ପାପ୍‌ ନ୍‌ସାଃ ମ୍ବାର୍‌ ଗୁନ୍‌ ବାଲେଃକେ ଡାଗ୍‌ଚେ ମେଁ ଡାଗ୍ରା ବାସଙ୍ଗ୍‌ । 3 ମୁଇଂଡାନେ ସାମୁଆଁ ବାସଙ୍ଗ୍‌ଏ, ପେ ରେମୁଆଁଗଣ୍ଡ୍‌ ମାଲେଃନେ ଜାଗା‍ଅରିଆ ମାପ୍‌ରୁନେ ଗାଲି ଆଃରେ, ଣ୍ଡିଆଃସୁଆ ମାଲେଃନେ ତୁବଃ ବିତ୍ରେ ନେନେ ପର୍‌ମେସର୍‌ନେ ଆତ୍ଲା ଅସାର୍‌ ଗାଲିକେ ସିଦା ଆଃଡିଂ । 4 ସାପା କୁରୁ ଲେକ୍ନେ କଣ୍ଡା ଉଚା ଆଡିଙ୍ଗ୍‍, ସାପା କଣ୍ଡା ଆରି ଡାଆଁ କଣ୍ଡା ଡାଆଁ ଆଃଡିଂଏ ଆରି ୱେ ଲେଃକ୍ନେ ସିଦା ଆଃଡିଂଏ, ଆରି କୁରୁକୁର୍ୟାଃ ଜାଗା ସାପା ସମାନ୍‌ ଆଃଡିଂଏ ।

ମାଡାନେ କାଲ୍‌ ଜାକ ଲେଃନେ ପର୍‌ମେସର୍‌ନେ ସାମୁଆଁ

5 ବାରି, ମାପ୍‌ରୁନେ ମ‍ଇମା ତ୍ନାଏ ଆରି କ୍ଲିଗ୍‌ ମଚ୍‌ପୁର୍‌ନେ ରେମୁଆଁଇଂ ଆତେନ୍‌ କେଆର୍‌ଏ; ମେଃଡାଗ୍ଲା ମାପ୍‌ରୁନେ ତୁମୁଁଆଃ ଆକେନ୍‌ ବାସଙ୍ଗ୍‌ବକେ । 6 ମୁଇଂଡା ଅଃଚେ ବାସଙ୍ଗ୍‌ଡିଂକେ, ପର୍‌ଚାର୍‌ ଡିଂ, ତେନ୍‌ଇଡ଼ିଂ ମୁଇଂଡା ବାସଙ୍ଗ୍‌କେ, ମେଃନେ ପର୍‌ଚାର୍‌ ନେଡିଂଏ ? ମଚ୍‌ପୁର୍‌ ମାତର୍‌ କ‍ଅଁଲ୍‌ ଚେଃମୁଆଁ ରକମ୍‌ ଆରି ମେଁନେ ସାପା ସୁନ୍ଦର୍‌ ତୁବଃ ସାପା ସାରି ରକମ୍‌; 7 କ‍ଅଁଲ୍‌ ଚେଃମୁଆଁ ନ୍‌ସୁଆର୍‌ ୱେଏ, ସାରି ଲୁଏ ୱେଏ; ମେଃଡାଗ୍ଲା ତେନ୍‌ ଆଡ଼ାତ୍ରା ମାପ୍‌ରୁନେ ଉଁମ୍ପାର୍‌କ୍ନେ ୱେଡ଼୍ୟାଃ ପାଙ୍ଗ୍‌ଏ, ଡିଲାଡିଗ୍‌ ରେମୁଆଁଇଂ କ‍ଅଁଲ୍‌ ଚେଃମୁଆଁ ରକମ୍‌ ଡିଂଆର୍‌ଏ । 8 କ‍ଅଁଲ୍‌ ଚେଃମୁଆଁ ନ୍‌ସୁଆର୍‌ ୱେଏ, ସାରି ଲୁଏ ୱେଏ; ମାତର୍‌ ନେନେ ପର୍‌ମେସର୍‌ନେ ସାମୁଆଁ ମାଡାନେ କାଲ୍‌ ଜାକ ଲେଃଏ ।

9 ଅ ସିୟୋନ ଡାଗ୍ରା ନିମାଣ୍ଡା ସାମୁଆଁ ବାସଙ୍ଗ୍‌ନେ ସେଲାମ୍ବୁଏଃଇଂ, ପେ ତିଆର୍‌ କଣ୍ଡାଅରିଆ ୱେଲାପା; ଅ ଯିରୂଶାଲମ ଡାଗ୍ରା ନିମାଣ୍ଡା ସାମୁଆଁ ବାସଙ୍ଗ୍‌ନେ ସେଲାମ୍ବୁଏଃଇଂ, ପେ ବପୁଅରିଆ ଜାବର୍‌ ୱାଃସାର୍‌ପା, ଜାବର୍‌ ୱାଃସାର୍‌ପା, ଆବ୍‌ଟଗେପା; ଯିହୁଦାନେ ଇନି ସାପାକେ ବାସଙ୍ଗ୍‌ପା, ଇଁୟେଁ କେଲାପା, ପେନେ ପର୍‌ମେସର୍‌ ପାଙ୍ଗ୍‌ଡିଂକେ ! 10 କେଲାପା, ମାପ୍‌ରୁ କାଲାଆଃ ନେ ଏଃତେ ଲେଃନେ ମାପ୍‌ରୁ ବପୁନେ ରକମ୍‌ ପାଙ୍ଗ୍‌ଏ ଆରି ମେଁନେ ଜେବା ମେଇଂନେ ଆତ୍ଲା ସାସନ୍‌ ଡିଂଏ; କେଲାପା, ମେଁ ଏତେ ମେଁନେ ଇନାମ୍‌ ଲେଃକେ ଆରି ମେଁ ସେଃମଁ ମେଁନେ ଇସାବ୍‌ ବିଏ । 11 ମେଁ ତୁର୍ତ୍ୟାମିଃରେ ରକମ୍‌ ନିଜର୍‌ ରାସି ତୁର୍ତ୍ୟାଏ, ଉଙ୍ଗ୍‌ମେଣ୍ଡାଇଂକେ ମେଁ ନିଜର୍‌ ଜେବା ଏଃତେ ରାଃସିଙ୍ଗ୍‌ଏ ଆରି ନିଜର୍‌ ବୁଲୁଅରିଆ ଆମେଇଂକେ ଡୁଙ୍ଗ୍‌ରାଙ୍ଗ୍‌ୱେଏ, ଆରି ତ୍ରାଃଡ଼୍ୟାଃ ଆଃଉଗ୍‌ନେ ମେଣ୍ଡାକେ ଲେଃଗା ଲେଃଗା ଗାଲି ଆଃସୁଏଃଏ ।

ଇସ୍ରାଏଲ୍‌ନେ ପରମେସର୍‌ ରକମ୍‌ ଜାଡିଗ୍‌ ଣ୍ଡୁ

12 ଜାଣ୍ଡେଃ ନିଜର୍‌ ନ୍ତିନେ ମୁଟା ଏଃତେ ଣ୍ଡିଆଃ ମାପେ ବକେ ଆରି ବିତା ଏଃତେ କିତଙ୍ଗ୍‌ଇନିନେ ଇସାବ୍‌ ଡିଂବ‍ଆର୍‌କେ ଆରି ଚାଟ୍‌ନା ଅରିଆ ମଚ୍‌ପୁର୍‌ନେ ଦୁଲି ସାପା ତାଃନବ‍ଆର୍‌କେ, କଣ୍ଡାଇଂକେ ଡୁଡୁ ଏତେ ମାପେ ବକେ ଆରି ମ୍ନାକଣ୍ଡାଇଂକେ ଜା କେଜି ଗୁଣ୍ଡୁ ଏଃତେ ମାପେବଆର୍‌କେ ? 13 ମାପ୍‌ରୁନେ ଆତ୍ମାକେ ଜାଣ୍ଡେଃ ଆଦେସ୍‌ ବିଃବକେ, କି ଗ୍ର ଡିଂଚେ ଜାଣ୍ଡେଃ ଆମେକେ ସିକ୍ୟା ବିଃବକେ ? 14 ମେଁ ଜା ଏଃତେ ବିତ୍ରେ ବିତ୍ରେ ବାଃଲିର୍‌ବାତାଲା, ଜାଣ୍ଡେଃ ଆମେକେ ସିକ୍ୟା ବିଃକେ ବିଚାର୍‌ନେ ଗାଲି ଆମେକେ ଆଃସିକେକେ ଆରି ଗିଆନ୍‌ ସିକ୍ୟା ବିଃକେ ଆରି ବୁଦି ବିନେ ଗାଲି ଆମେକେ ଆଃସୁଏଃକେ ? 15 କେଲାପା, ଜାତିନେ ରେମୁଆଁଇଂ ଙ୍କୁଇ ଣ୍ଡିଆଃ ଟିପା ରକମ୍‌ ଆରି କେଜି ଗୁଣ୍ଡୁନିଆ ଲଃକ୍ନେ ଦୁଲି ଗୁଣ୍ଡ୍‌କେ ଡିଗ୍ ଏଜାବକେ । କେଲା, ମେଁ କେଣ୍ଡିଆ ମଜେ ଲେକ୍ନେ କୁପ୍‌ଲିକେ ମୁଇଂ ଡାଆଁ ଜିନିସ୍‌ ରକମ୍‌ ଆଡିଙ୍ଗ୍‌ଏ । 16 ବାରି, ଲିବାନୋନ ସୁଆ ଗୁଇଗ୍‌ନ୍‌ସା ଆରି ଆତ୍‌ଅରିଆ ଜନ୍ତୁଇଂକେ ସୁଆ ବଲି ନ୍‌ସାଃ ଜାବର୍‌ ଦର୍‌କାର୍ ଣ୍ଡୁ । 17 ସାପା ଦେସ୍‌ନେ ରେମୁଆଁଇଂ ମେଁ ଡାଗ୍ରା ମେଃଡିଗ୍‌ ଣ୍ଡୁ । ମେଇଂ ମେଙ୍ଗ୍‌ ଡାଗ୍ରା ମେଃଡିଗ୍‌ ଣ୍ଡୁ । 18 ତେଲା ପେ ଜା ଏଃତେ ପର୍‌ମେସର୍‌ ଏତେ ସମାନ୍ ପେରାଡିଙ୍ଗ୍‌ଏ ? ବାରି ଆଣ୍ଡିନେ ମୁର୍ତିକେ ମେଁ ରକମ୍‌ ପେରାଡିଂଏ ? 19 ମୁର୍ତି ଆଃରେଣ୍ଡ୍ରେ ମୁର୍ତିକେ ଚଞ୍ଚ୍‌ଅରିଆ କିଗ୍‌ମ୍ୟାଃକେ ଆରି ସୁନାରି ସୁନା‍ଅରିଆ ଆତେନ୍‌ ସାଜ ଆଃଡିଂମ୍ୟାଃକେ, ଆରି ତେନ୍‌ ଏତେ ରୁପା ସିକ୍‌ଲି ଆଃରେମ୍ୟାଃକେ । 20 ମୁଃଡ଼ି ଦରିଦ୍ର ରେମୁଆଁ ଦେକ୍‌ରକମ୍ ଜିନିସ୍ ବିଃଆୟା । ମେଁ ତାଃଡିର୍‌ ମାଚଙ୍ଗ୍‌ନେ ମୁଇଂ ସୁଆ ସ୍ରିଏ, ମେଁ ଡାଟାମ୍‌ ମୁଇଂ ଗଗ୍‌କ୍ନେ ମୁର୍ତି ଆଃରେନ୍‌ସାଃ ମୁଇଂ ସାପା ମ୍ୟାଃଲେଃକ୍ନେ ଆଃରେଣ୍ଡ୍ରେକେ ତୁର୍‌ଏ । 21 ପେ କି ମେଃନେ ମ୍ୟାଃପେଲେଃକେ ? ପେ କି ଦ୍ରିଗ୍‌ପେଲେଃକେ ? ଅଃସେକାଲ୍‌ କି ଆପେକେ ଆଃମ୍ୟାଃ ଆବକେ ଣ୍ଡୁ ? ମଚ୍‌ପୁର୍‌ନେ ଆରାମ୍‌ ବାନ୍‌ କି ପେ ବୁଜେ ପେଲେଃକେ ? 22 ମେଁ ମଚ୍‌ପୁର୍‌ ଆଡ଼ାତ୍ରା କଲାଏଃକେ ଆରି ଆଲ ଲେକ୍ନେ ସାପାରେମୁଆଇଂ ଗିତାଙ୍ଗ୍‌ଡ଼୍ୟାଃ ରକମ୍‌; ମେଁ ଆର୍କେନେ ତାର୍କିଗ୍‌ ରକମ୍‌ କିତଙ୍ଗ୍‌ଇନି ଅସାର୍‌ ଆଃଡିଂଏ, ବାରି ବାସା ନ୍‌ସାଃ କୁଡ଼ିଆ ରକମ୍‌ ଆତେନ୍‌ ଅସାର୍‌ ଆଃଡିଂଆର୍‌ଏ; 23 ମେଁ ରାଜାଇଂକେ ଗ୍ରୁନା ଡିଂଏ; ମେଁ ମଚ୍‌ପୁର୍‌ନେ ବିଚାର୍‌ ଡିଂଣ୍ଡ୍ରେଇଂକେ ବୁଦିବାନା ଆଃଡିଂବିଏ । 24 ହଁ, ଆମେଇଂକେ ଉଂ ଆବକେ ଣ୍ଡୁ; ହଁ, ଆମେଇଂକେ ବିଗ୍‌ ଆବକେ ଣ୍ଡୁ; ହଁ, ମେଇଂନେ ମୁଲ୍‌ନେ ଚେର୍‌ ତୁବଃଅରିଆ ୱେଆଲେଃକେ ଣ୍ଡୁ, ଆରି ମେଁ ମେଇଂନେ ଆଡ଼ାତ୍ରା ଉଁମ୍ପାର୍‌ ବିଃଏ, ତେଲା ମେଇଂ ନ୍‌ସୁଆର୍‌ ୱେଏ ଆରି ୱେଗୁର୍‌ ଆମେଙ୍ଗ୍ ନାଡ଼ା ରକମ୍‌ ଡୁଙ୍ଗ୍‌ହ୍ୱେ ରାଙ୍ଗ୍‌ଡ‍ଏ । 25 ଏନ୍‌ସାଃ ଆତେନ୍‌ ପବିତ୍ର ମାପ୍‌ରୁ ବାସଙ୍ଗ୍‌ଡିଂକେ, ନେ ଜା ଏତେ ସମାନ୍‌ ଡିଂନେୟାଏ, ଦେକ୍‌ରକମ୍‌ ଜା ଏତେ ପେ ଆନେକେ ସମାନ୍ ପେରାଡିଙ୍ଗ୍‌ଏ ? 26 ଆଡ଼ାତ୍ରା କେଲା, ପେ ଆଣ୍ଡିନେ ଚାଙ୍କୁଆଇଂକେ କିକେପେଡିଙ୍ଗ୍‌କେ ଆମେକେ ଜା ଆଃରେ ବକେ ? ମେଁ ସାପା ଚାଙ୍କୁଆଇଂନେ ମାନ୍ଦାବାନ୍ ମୁଇଂ ମୁଇଂ ଡିଙ୍ଗ୍‌ଚେ ଆଃତାର୍‌ ମ୍ୟାଃକେ, ଆରି ମେଁ ଆତେନ୍ ସାପାରେକେ ମିନି ସାଃଚେ ୱାମ୍ୟାଃକେ, ମେଁନେ ବେସି ବପୁ ଲେଃକେ ଆରି ଆତେନ୍ ସକ୍‌ତିରେ ମେଁବାନ୍ ମୁଇଂ ଡିଗ୍ ବୁଃଡ଼ି ଆଲେଃ ଣ୍ଡୁ । 27 ନେନେ ଗାଲି ମାପ୍‌ରୁନେବାନ୍‌ ବୁଃଡ଼ି ଲେଃକେ ଆରି ନେନେ ବିଚାର୍‌ ନେ ପର୍‌ମେସର୍‌ନେ ମେଃଡିଗ୍ ଚିନ୍ତା ଆଡିଙ୍ଗ୍‌କେ ଣ୍ଡୁ, ଅ ଯାକୁବ, ନାଁ ମେଃନ୍‌ସାଃ ଆକେନ୍‌ ବାସଙ୍ଗ୍‌ନାଡିଂକେ, ଅ ଇସ୍ରାଏଲ୍‌, ନାଁ ମେଃନ୍‌ସାଃ ଆକେନ୍‌ ବାସଙ୍ଗ୍‌ନାଡିଂକେ ? 28 ନାଁ କି ନାମ୍ୟାଃକେ ଣ୍ଡୁ ? ନାଁ କି ଦ୍ରିଗ୍‌ନାଲେଃକେ ଣ୍ଡୁ ? ମଚ୍‌ପୁର୍‌ନେ କନେମନେ ସାପାକେ ଆଃରେଣ୍ଡ୍ରେ ଅନାଦି ପର୍‌ମେସର୍‌ ସଦାପ୍ରବୁ ଆଲିଆ ଆଡିଂ ଣ୍ଡୁ, କି ଆପୁଣ୍ଡେ ଣ୍ଡୁ; ମେଁନେ ବୁଦିନେ ସାମୁଆଁ ଜା ବୁଜେ ୟା ଆଡିଂ ଣ୍ଡୁ । 29 ମେଁ ଆଲିଆ ରେମୁଆଁକେ ବପୁ ବିଃଏ ଆରି ବପୁ ଆଲେଃକ୍ନେ ରେମୁଆଁନେ ବପୁ ଜାବର୍‌ ଆଃଡିଂବିଃଏ । 30 ଙ୍ଗିରେଇଂ ଆଲିଆ ଡିଙ୍ଗ୍ ଆର୍‌ଏ ବାରି ପୁଣ୍ଡେଆର୍‌ଏ, ବାରି ଙ୍ଗିରେଇଂ ଟେପ୍‌ଲଚେ ଲଃଆର୍‌ଏ; 31 ମାତର୍‌ ଜାଜା ମାପ୍‌ରୁକେ ଉର୍‌ଆର୍‌ଏ, ମେଇଂ ତ୍ମି ତ୍ମି ବପୁ ବା‍ଆର୍‌ଏ; ମେଇଂ ଚାଃଟିଃଆଁ ପିଗ୍‌ ରକମ୍‌ ଡେନା ଏଃତେ ଆଡ଼ାତ୍ରା ୱାଲେଃଆର୍‌ଏ; ମେଇଂ ମାପୁଣ୍ଡେଚେ ୱିର୍‌ଆର୍‌ଏ; ମେଇଂ ଆଲିଆ ମାଡିଂଚେ ଅଲେଙ୍ଗ୍‌ଆର୍‌ଏ ।