1 ସଦାପ୍ରବୁ ଆନେଙ୍ଗ୍‌ ବାସଙ୍ଗ୍‌କେ, ନାଁ ମୁଇଂ ମ୍ନାନେ ପାଟା ରାଙ୍ଗ୍‌ୱେଚେ ଗ୍ନୁଆର୍‌ନେ ଏତେ ମେଁ ଆଡ଼ାତ୍ରା ଏନ୍‌ ସାପା ସାମୁଆଁ ଗୁଆର୍‌ । ଆତାନ୍‌ ଡିଙ୍ଗ୍‌ଡିଂକେ, "ମହେର-ଶାଲଲହାଶ୍‌-ବସ୍‌ ।" ଏନ୍‌ ଅରତ୍‌ ଡିଙ୍ଗ୍‌ଡିଂକେ, ଡଙ୍ଗାକ୍ନେ ଜିନିସ୍ ପାଙ୍ଗ୍‌ଡିଙ୍ଗ୍‌କେ, "ଡଙ୍ଗାକ୍ନେ ଜିନିସ୍ ଦାପ୍ରେ ରାଃରାଙ୍ଗ୍‌ଡଆର୍‌ଏ ।"

2 ବାରି ନେଙ୍ଗ୍‌ ସାକି ନ୍‌ସା ଉରୀୟ ପୁଜାରି ବାରି ଯିବୋରିଖୀୟନେ ଉଂଡେ ସଖରିଅକେ ନିଜର୍‌ନେ ବିସ୍‌ବାସ୍‌ ସାକି ଣ୍ଡିଙ୍ଗ୍‌ଏ ।

3 ତେଲା ନେଙ୍ଗ୍‌ ବବିସତ୍‌ ସାମୁଆଁ ବାସଙ୍ଗ୍‌ନେ ସେଲାନିଆ ୱେଚେ ଲେଃଗେ । ମେଁ ଗାଗ୍‌ଡ଼େଚେ ମୁଇଂ ଉଂଣ୍ଡେକେ ଜନମ୍‌ ବିଃକେ । ବାରି ସଦାପ୍ରବୁ ଆନେଙ୍ଗ୍‌ ବାସଙ୍ଗ୍‌କେ, ମେଁନେ ମ୍ନି ମହେର-ଶାଲଲହାଶ୍‌-ବସ୍‌ ଡାଗ୍‌ଚେ ବ ।

4 ଡାଗ୍ଲା ଗଡ଼େଅ ନେଙ୍ଗ୍‌ନେ ଆବା ବାରି ନେଙ୍ଗ୍‌ନେ ଇୟାଙ୍ଗ୍‌ ଡାଗ୍‌ଚେ ୱାନ୍‌ସା ଜ୍ଞାନ୍‌ ବାନେ ସେନୁଗ୍‌ ଦମ୍ମେଶକ ଦନ୍‌ ବାରି ଶମରୀୟାନେ ଡଙ୍ଗାବକ୍ନେ ଜିନିସ୍‌ ଅଶୂର ଇଃସାଙ୍ଗ୍‌ନେ ସେନୁଗ୍‌ ସେନୁଗ୍‌ ଡୁଙ୍ଗ୍‌ ରାଙ୍ଗ୍‌ୱେ ଆର୍‌ଏ ।

5 ତେଲା ମାପ୍‌ରୁ ଆନେଙ୍ଗ୍‌ ବାର୍‌ମୁଇଂତର୍‌ ବାସଙ୍ଗ୍‌କେ,

6 "ଏନ୍‌ ରେମୁଆଁଇଂ ଶୀଲହନେ ଦିରେ ଦିରେ ଜାର୍‌ନେ ଲଣ୍ଡିଆକେ ଆନ୍ତାର୍‌ଚେ ରତ୍ସୀନ ବାରି ରମଲୀୟନେ ଉଂଡେ ଡାଗ୍ରା ସାର୍ଦା ଡିଙ୍ଗ୍‌ଆର୍‌ଡିଂକେ ।"

7 ମାତ୍ରମ୍‌ ନେଙ୍ଗ୍‌ ମାପ୍‌ରୁ ଅଶୂରନେ ଇଃସାଙ୍ଗ୍‌କେ ବାରି ମେଁନେ ସାପା ବପୁକେ ଯିହୁଦାନେ ବିରଦ୍‌ରେ ଡୁଙ୍ଗ୍‌ମ୍ପାଙ୍ଗ୍‌ଏ । ମେଇଂ ଫରାତ୍‌ କେଣ୍ଡିଆନିଆ ସାର୍‌ଚେ ପାଙ୍ଗ୍‌ଡିଙ୍ଗ୍‌କ୍ନେ ବୁରାଣ୍ଡ୍ୟାଃ ରକମ୍‌ ସକ୍‌ତିସାଲି ଡିଙ୍ଗ୍‌ଚେ ପାଙ୍ଗ୍‌ଏ । ବୁରାଣ୍ଡ୍ୟାଃ ଣ୍ଡିଆ ଡିରକମ୍ ବାବ୍‌ରେ ଆଃଡ଼ାଃ କଣ୍ଡିକେ ବଗ୍‌କ୍ନେ ରକମ୍ ମେଇଂ ସାପାରେନେ ଆଡ଼ାତ୍ରା ମେଁ ଡାରାଙ୍ଗ୍‌ୱେଏ ।

8 ଆତାନ୍‌ ବୁରାଣ୍ଡ୍ୟାଃ ଯିହୁଦା ଜାକ ୱେଏ ବାରି ଯିହୁଦାନେ ଲୁଗ ଜାକ ୱେଚାଏ । ସାରାସାରି ଆମେକେ ଆଲଗ୍‌ଡ୍ୟା ବିଃଏ । "ଅ ଇମ୍ମାନୁୟେଲ, ମେଁନେ ଡେନାଅରିଆ ନାନେ ସାପା ଦେସ୍‌କେ ରକ୍ଷା ଆଡିଙ୍ଗ୍‌ଏ ।"

9 ଅ କୁଟୁମ୍‌ ସାପା, ପେଇଂ ଜୁଦ୍‌ ନ୍‌ସା ତିଆର୍‌ ପେଡିଙ୍ଗ୍‌ଲା ଡିଗ୍‌ ପେଇଂ ହାରେ ପେୱେଏ । ଅ ସ୍ଲ ଦେସ୍‌ନେ ରେମୁଆଁଇଂ, ପେଇଂ ଦ୍ୟାନ୍‌ ବିଃଚେ ଅଁପା । ପେଇଂ ଜୁଦ୍‌ ନ୍‌ସା ତିଆର୍‌ ପେଡିଙ୍ଗ୍‌ଲା ଡିଗ୍‌ ପେଇଂ ହାରେ ପେୱେଏ ।

10 ପେଇଂ ଜୁଦ୍‌ ନ୍‌ସା ଉଡ଼ି ଉପାୟ୍ ଡିଙ୍ଗ୍‌ଲା ଡିଗ୍‌ ପେଇଂନେ ଉପାୟ୍‌ କାମ୍ ଆବି ଣ୍ଡୁ । ସାମୁଆଁ ବାସଙ୍ଗ୍‌ଲା ଡିଗ୍ ଆତେନ୍ ଟିକ୍ ଆଡିଙ୍ଗ୍ ଣ୍ଡୁ, ମେଁ ଡାଗ୍ଲା ପର୍‌ମେସର୍‌ ନେଇଂନେ ଏତେ ଲ୍ଲେକେ ।

11 ସଦାପ୍ରବୁ ମେଁନେ ମ୍ନା ସକ୍‌ତିରେ ଆନେଙ୍ଗ୍‌ ବାସଙ୍ଗ୍‌କେ । ବିନ୍‌ କୁଟୁମ୍‌ନେ ରେମୁଆଁଇଂନେ ରକମ୍‌ ଆଡିଙ୍ଗ୍‌ ନ୍‌ସା ମେଁ ଆନେଙ୍ଗ୍‌ ତରକ୍‌ ଆଡିଙ୍ଗ୍‌ଚେ ବାସଙ୍ଗ୍‌କେ ।

12 ଗୁଲୁଏ ରେମୁଆଁ ବାସଙ୍ଗ୍ଆର୍‌ଙ୍କେ ଜେ, "ବିନ୍‌ ରେମୁଆଁଇଂ ମେଇଂନେ ବିରଦ୍‌ରେ ଉପାଇ ଡିଙ୍ଗ୍‌ଆର୍‌ଡିଂକେ । ପେ ଆତାନ୍‌ ସାପାକେ ବିସ୍‌ବାସ୍‌ ଆଡିଙ୍ଗେପା । ବିନ୍‌ ରେମୁଆଁଇଂ ବୁଟମେଗ୍‌କେ ରକମ୍‌ ପେ ଆବୁଟଗେପା । ଆତାନ୍‌ ସାପାକେ ପେ ଅଃନାଡିଗ୍‌ ତେରେପେତେ ଆଡିଂଗ୍‌ପା ।"

13 ସାପାବାନ୍ ବପୁ ମାପ୍‌ରୁକେ ମାତ୍ରମ୍‌ ପେ ବୁଟପା । ଆମେକେ ଆଃ ମାନେପା । ମେଁ ଡିଙ୍ଗ୍‌ଡିଂକେ ମୁଇଂଜା ଆଃ ପେ ଆମେକେ ବୁଟପା ।

14 ଜଦି ପେ ସଦାପ୍ରବୁକେ ସନ୍‌ମାନ୍‌ ବାରି ବକ୍‌ତି ପେଡିଙ୍ଗ୍‌ଏ ବାରି ପବିତ୍ରରେ ଆମେକେ ଗ୍ରହନ୍‌ ପେଡିଙ୍ଗ୍‌ଏ, ତେଲା ମେଁ ମୁଇଂଜା ଆଃ ସାହା ଡିଙ୍ଗ୍‌ଏ । ମାତ୍ରମ୍‌ ମେଁ ଆଡ଼ାତ୍ରା ସନ୍‌ମାନ୍‌ ପେବି ଣ୍ଡୁ । ତେସା ମେଁ ବ୍ରି ରକମ୍‌ ଡିରକମ୍‌ ଟେପ୍‌ଲଏ, ଯିରୂଶାଲମ ରେମୁଆଁଇଂନେସା ମୁଇଂ ପାସି ବାରି ବ୍ନେଗ୍‌ ରକମ୍‌ ଡିଙ୍ଗ୍‌ଏ ।

15 ବାରି ଗୁଲୁଏ ରେମୁଆଁ ଆତ୍‌ବାନ୍‌ କସ୍ଟ ବାଆର୍‌ଏ ବାରି ଆଙ୍କ୍‌ ଆନ୍ତ୍‌ ଡିଙ୍ଗ୍‌ଆର୍‌ଏ ବାରି ପାନ୍ଦ୍‌ନ୍ୟା ଲଃଆର୍‌ଏ ।

16 ପେ ଏନ୍‌ ପର୍‌ମାନ୍‌ ସାମୁଆଁକେ ମନେ ବପା, ନେଙ୍ଗ୍‌ ସିସ୍‌ଇଂନେ ବିତ୍ରେ ନିଅମ୍‌କେ ସିଲ୍‌ ବଗ୍‌ପା ।

17 ବାରି ଜା ଯାକୁବ ବଂସବାନ୍‌ ନିଜର୍‌ ସାର୍‌ମୁଆଁ ବୁଃଡ଼ିପା, ନେଙ୍ଗ୍‌ ଆତାନ୍‌ ସଦାପ୍ରବୁକେ ଉର୍‌ ନ୍ଲେଃଏ ବାରି ମେନ୍‌ସା କେ ନ୍ଲେଃଏ ।

18 କେଲା, ନେଙ୍ଗ୍ ଆରି ମାପ୍‌ରୁନେବାନ୍ ଆନିଂକେ ବିଃବ୍ନ ଗଡ଼େଇଂ ସିୟୋନ କଣ୍ଡା ବାସାଲାଏଃକ୍ନେ ସାପାବାନ୍ ବପୁ ମାପ୍‌ରୁବାନ୍ ଇସ୍ରାଏଲ୍ ବିତ୍ରେ ଚିନ୍‌ ଆରି କାବା ଡିଂନେ ଚିନ୍‌ ରକମ୍ ଡିଂନେଲାଏଃକେ ।

19 ବାରି ଉଡ଼ିବେଲା ମେଇଂ ଆପେକେ ବାସଙ୍ଗ୍‌ଆର୍‌ଏ, ଆଣ୍ଡିନେ ସିରୁଆ ବାରି ଦିସାରିଇଂ ପୁସୁର୍‌ ପୁସୁର୍‌ ଡିଙ୍ଗ୍‌ଚେ ବାସଙ୍ଗ୍‌ଆର୍‌ଏ, ମେଇଂନେ ପ୍ଲା ୱେଲାପା । ପେଇଂ ବାସଙ୍ଗ୍‌ପା ରେମୁଆଁଇଂ ମେଁନେ ନିଜର୍‌ନେ ପର୍‌ମେସର୍‌ନେ ପ୍ଲା ଆୱେଆର୍‌ ଣ୍ଡୁ ? ମେଇଂ ମେଃନେ ଜିବନ୍‌ ଲେଃକ୍ନେ ରେମୁଆଁଇଂନେ ପାକା ଗୁଏଃକ୍ନେ ରେମୁଆଁଇଂନେ ପ୍ଲା ୱେଆର୍‌ଏ ?

20 ନିଅମ୍‌ ବାରି ପ୍ରମାନ୍‌ ସାମୁଆଁନେ ପ୍ଲା ୱେଲାପା । ଅଃନା ମେଇଂ ଆକାନ୍‌ ସାମୁଆଁ ଅନୁସାରେ ସାମୁଆଁ ଆବାସଙ୍ଗ୍‌ ଆର୍‌, ତେଲା ମେଇଂ ଆତ୍‌ଲା ଦୟା କେମା ଣ୍ଡୁ ।

21 ବାରି ମେଇଂ ଜାବର୍‌ କସ୍‌ଟ ବାରି କେଡ଼େସ ଲେଃଚେ ଦେସ୍‌ ଦେସ୍‌ ଅଲେଙ୍ଗ୍‌ଏ, ବାରି କେଡ଼େସ ଡଲା, ମେଇଂ ବିରକ୍ତ ଡିଙ୍ଗ୍‌ଚେ ନିଜର୍‌ ଇଃସାଙ୍ଗ୍‌ ବାନ୍‌ ବାରି ନିଜର୍‌ନେ ପର୍‌ମେସର୍‌ନେ ବାନ୍‌ ଅବିସାପ୍‌ ବିଃଚେ ତାଣ୍ଡେଚେ ନିଜର୍‌ ନିଜର୍‌ ସାର୍‌ମୁଆଁ ଆଡ଼ାତ୍ରା ଆଡିଙ୍ଗ୍‌କେ ।

22 ଜଦି ମେଇଂ ମେଁନେ ଦେସ୍‌ନେ ପିତୁର୍‌ ପାକା ମ୍ମୁଆଁ କେଏ ତେଲା ମେଇଂ କସ୍‌ଟ, ତାଙ୍ଗ୍‌କିଗ୍‌, ବାରି ବୟଙ୍କାର୍‌ନେ ଆମାସ୍ ମିଡିଗ୍‌କେ ପେକେଏ, ଆରି ମେଇଂ ଆତାନ୍‌ ଆମାସ୍ ମିଡିଗ୍‌ନେ ତାଙ୍ଗ୍‌କିଗ୍‌ନିଆ ଜଗ୍‌ତ୍ଲାଗ୍ ବିଏ ।