1 ସଦାପ୍ରବୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, କିତଙ୍ଗ୍‌ଇନି ନିଂନେ ସିଂଆଁସନ୍‌ ଆରି ମଞ୍ଚ୍‌ପୁର୍‌ ନିଂନେ ଞ୍ଚ ବନେ ଜାଗା; ପେ ନେଙ୍ଗ୍‌ ନ୍‌ସାଃ ଡିରକମ୍‌ ଡୁଆ ପେରାଃରେଏ ? ଆରି ଆଣ୍ଡିନେ ଜାଗା ନିଂନେ ପୁଣ୍ଡେନେ ଜାଗା ଡିଂଏ ? 2 ମେଃଡାଗ୍‌ଲା ନେନେ ନ୍ତି ଆକେନ୍‌ ସାପା ଆଃରେବକେ, ଆରି ଆତେନ୍‌ ନ୍‌ସାଃ ଆକେନ୍‌ ସାପା ତାର୍‌କେ, ଆକେନ୍‌ ସଦାପ୍ରବୁ ବାସଙ୍ଗ୍‌ଡିଂକେ; ମାତର୍‌ ଆକେନ୍‌ ରେମୁଆଁ ଆଡ଼ାତ୍ରା, ଡାଗ୍‌ଲା, ମୁଃଡ଼ି ରେମୁଆଁ ଦୁକ୍‌ରେ ଲାଏଃକେ ଆରି ମନ୍‌ ବାଙ୍ଗେ ଲାଏଃକେ ଆରି ଜା ନେନେ ସାମୁଆଁଅରିଆ ବୁଟଇରିୟାଃଏ, ମେଁ ଆଡ଼ାତ୍ରା ନେ ନେକେଏ । 3 ଜା ଅରେଃ ବାଗୁଏଃଏ, ମେଁ ରେମୁଆଁ ବାଗୁଏଃଣ୍ଡ୍ରେ ରକମ୍‌ ଡିଂଏ; ଜା ଉଂମେଣ୍ଡା ବଲି ଡିଂଏ, ମେଁ ଗୁସୁଃନେ ଲୁଗଃ ସିଃତଗ୍‌ଣ୍ଡ୍ରେ ରକମ୍‌ ଡିଂଏ; ଜା ଅର୍ଣ୍ଣବଲି ବିଃଏ, ଗୁବୁଗ୍‌ ମ୍‌ମ୍ୟାଁ ପୁଜାନ୍ନିଆ ବିଣ୍ଡ୍ରେ ରକମ୍‌ ଡିଂଏ; ଜା ଦୁପ୍‌ ଆଃମଃଏ, ମେଁ ଦେବ୍‌ତାନେ ଦନ୍ୟବାଦ୍‌ ଡିଂନେ ରେମୁଆଁ ରକମ୍‌ ଡିଂଏ; ହାଁ, ମେଇଂ ନିଜର୍‌ ନିଜର୍‌ ଗାଲି ସ୍ରିବ‍ଆର୍‌କେ ଆରି ମେଇଂନେ ଜିବନ୍‌ ନିଜର୍‌ ନିଜର୍‌ ଗିନ୍‌ ଡିଂନେ ସାମୁଆଁଅରିଆ ଇକ୍‌ଚା ଡିଂଏ । 4 ନେ ଡିଗ୍‌ ମେଇଂନେ ଦୁକ୍‌ନେ ବିସ‍ଏ ନେସ୍ରିଏ ଆରି ମେଇଂନେ ବୁଟମେଗ୍‌ନେ ସାମୁଆଁ ମେଇଂନେ ଆଡ଼ାତ୍ରା ନେରାଃଗଟେଏ; ମେଃଡାଗ୍‌ଲା ନେ ୱାନେ ବେଲା ଜାଡିଗ୍‌ ଉତର୍‌ ଆବିଃଆର୍‌କେ ଣ୍ଡୁ; ନେ ସାମୁଆଁ ବାସଙ୍ଗ୍‌ନେ ବେଲା ମେଇଂ ଆଦ୍ରିଗ୍‌ଆର୍‌କେ ଣ୍ଡୁ; ମାତର୍‌ ମେଃନେ ନେନେ ମ୍‌ମୁଁଆଃଅରିଆ ଦଦ୍ୟା, ଆତେନ୍‌ ମେଇଂ ଡିଂଆର୍‌କେ ଆରି ମେଃଅରିଆ ନେନେ ଇକ୍‌ଚା ଣ୍ଡୁ, ଆତେନ୍‌ ମେଇଂ ସ୍ରିଆର୍‌କେ । 5 ମାପ୍‌ରୁନେ ସାମୁଆଁଅରିଆ ବୁଟ‍ଇରିୟାଃ ଡିଂପେଡିଂକେ ଜେ ପେ, ପେ ମେଁନେ ସାମୁଆଁ ଦ୍ରିଗ୍‌ପା; ପେନେ ମୁଃଡ଼ି ବୟାଁଇଂ ଆପେକେ ଗୁର୍‌ନା ଡିଂଆର୍‌ଏ, ନେନେ ମ୍ନି ନ୍‌ସାଃ ଆପେକେ ସ୍ଲ ଆଃଡିଂଆର୍‌ଏ, ମେଇଂ ବାସଙ୍ଗ୍‌ବ‍ଆର୍‌କେ, ନେ ଡିରକମ୍‌ ପେନେ ସାର୍ଦା କେନେୟାଏ, ଆକେନ୍‌ସାଃ ସଦାପ୍ରବୁ ମ‍ଇମା ବାଲେଃ; ମାତର୍‌ ମେଇଂ ଗିଆସଃଆର୍‌ଏ । 6 ଇନିବାନ୍‌ ୱିଙ୍ଗ୍‌ଆଃରିଙ୍ଗ୍‌ଆଃନେ ସବ୍‌ଦ, ମନ୍ଦିର୍‌ବାନ୍‌ ସବ୍‌ଦ, ଜା ନିଜର୍‌ ସତ୍ରୁଇଂକେ ଡଣ୍ଡ୍‌ ବିଃଏ, ଆତେନ୍‌ ସଦାପ୍ରବୁନେ ସବ୍‌ଦ !

7 ଦୁକା ଡିଂନେ ସିସେ ମେଁ ଜନମ୍‌ ବିଃକେ; ସୁଲୁଏଃ ଦୁକାସୁକା ପାଙ୍ଗ୍‌ନେ ସିସେ ଚିର୍‌ଲାଃଅ ଜନମ୍‌ ଡିଂକେ । 8 ଦେକ୍‌ରକମ୍‌ ସାମୁଆଁ ଜା ଦ୍ରିଗ୍‌ଲାଏଃକେ ? ଦେକ୍‌ରକମ୍‌ ସାମୁଆଁ ଜା କେଲାଏଃକେ ? ମେଃସୁଆ କି ମେଃଡିଗ୍‌ ଦେସ୍‌ନେ ଜନମ୍‌ ଡିଂଏ ? ମେଃଡିଗ୍‌ ଜାତିନେ ରେମୁଆଁ କି ଏକାତର୍‌କେ ଜନମ୍‌ ଡିଂଆର୍‌ଏ ? ସିୟୋନ ଦୁକାସୁକା ବାକ୍ନେ ଦାପ୍ରେ, ମେଁ ନିଜର୍‌ ଗଡ଼େଇଂକେ ଜନମ୍‌ ବିଃକେ । 9 ସଦାପ୍ରବୁ ବାସଙ୍ଗ୍‌ଡିଂକେ, ନେ ଜନମ୍‌ ବିଃନେ ବେଲା ଆଃପିଙ୍ଗ୍‌ଚାଃଚେ କି ଜନମ୍‌ ନେରାଃଡିଂ ଣ୍ଡୁ ? ପେନେ ପର୍‌ମେସର୍‌ ବାସଙ୍ଗ୍‌ଡିଂକେ, ଜନମ୍‌ ଆଃଡିଂଣ୍ଡ୍ରେ ଜେ ନିଂ, ନିଂ କି ଗର୍ଭ ନସ୍‌ଟ ଣ୍ଡ୍ରାଃଡିଂଏ ? 10 ଅ ଯିରୂଶାଲମକେ ଆଲାଦ୍‌ ଡିଂଣ୍ଡ୍ରେ ସାପାରେ, ପେ ମେଁ ଏଃତେ ସାର୍ଦା ଡିଂପା ଆରି ମେଁ ନ୍‌ସାଃ ଜବର୍ ସାର୍ଦା ଡିଂପା; ମେଁ ବିସ‍ଏରେ ଅଁଣ୍ଡ୍ରେ ସାପାରେ, ପେ ସାର୍ଦା ନ୍‌ସାଃ ମେଁ ଏଃତେ ସାର୍ଦା ଡିଂପା । 11 ତେଲା ପେ ମେଁନେ ସାନ୍ତିରେ ତ୍ରାଃଡ଼୍ୟାଃ ଉଗ୍‌ଚେଃ ସାନ୍ତି ପେଡିଂଏ; ପେ ଆତେନ୍ ଦନ୍‌କେ ସାଇ ସାର୍‌ଦା ଡିଙ୍ଗ୍‌ଚେ ବେସି ସାର୍‌ଦା ପେଡିଙ୍ଗ୍‌ଏ । 12 ମେଃଡାଗ୍‌ଲା ସଦାପ୍ରବୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, କେଲା, ନିଂ ମେଁନେ ଆରି ସାନ୍ତିକେ ଲଣ୍ଡ୍ୟାଃ ସମାନ୍‌, ଆରି ଜାତି ଜାତିନେ ଦନ୍‌କେ ଲଣ୍ଡ୍ୟାଃନେ ବୁରାଣ୍ଡ୍ୟାଃ ସମାନ୍‌ ଲାଃଡ଼୍ୟାଃ ମ୍ବିଃଏ; ଆରି ନାଁ ଆତ୍‌ବାନ୍‌ ନାଉଗ୍‌ଏ, ନାଁ ମେଁନେ ବୁଲୁଅରିଆ ନାକ‍ଏ ଆରି ମେଁନେ ମାଣ୍ଡି ଆଡ଼ାତ୍ରା ନାୱାଃଏ । 13 ଡିରକମ୍‌ ମୁଇଂଡାକେ ମେଁନେ ଇୟାଙ୍ଗ୍‌ଡେ ସାନ୍ତି ଆଃଡିଂଏ, ଦେତ୍‌ରକମ୍‌ ନେ ଆନାକେ ସାନ୍ତି ନେରାଃଡିଂଏ ଆରି ପେ ଯିରୂଶାଲମଅରିଆ ସାନ୍ତି ପେବାଏ । 14 ବାରି, ପେ ଆକେନ୍‌ ପେକେଏ ଆରି ପେନେ ମନ୍‌ ସାର୍ଦା ଡିଂଏ, ଆରି ପେନେ ଞ୍ଚ୍ୟା ତ୍ମି ଚେଃମୁଆଁ ରକମ୍‌ ତ୍ମି ଡିଂଆର୍‌ଏ; ବାରି, ସଦାପ୍ରବୁନେ ନ୍ତି ମେଁନେ ଦାସ‍ଇଂନେ ପାକା ତ୍ନାଏ ଆରି ମେଁ ନିଜର୍‌ ସତ୍ରୁଇଂନେ ବିରୁଦ୍‌ରେ ରିସା ଡିଂଏ ।

15 ମେଃଡାଗ୍‌ଲା କେଲା, ଜାବର୍‌ ରିସା ଆରି ଡୁଆକ୍ନେ ସୁଆ ଏଃତେ ନିଜର୍‌ ବୁଃଡ଼ିବ୍ନ ଦାନ ବିଃନ୍‌ସାଃ ଆଃଡିଙ୍ଗ୍‌ସା ସଦାପ୍ରବୁ ସୁଆ ଏଃତେ ପାଙ୍ଗ୍‌ଏ ଆରି ମେଁନେ ରତ୍‌ ସାପା ୱେଡ଼୍ୟାଃଗୁର୍ୟାଃ ରକମ୍‌ ଡିଂଏ । 16 ମେଃଡାଗ୍‌ଲା ମାପ୍‌ରୁ ସୁଆ ଏଃତେ ଆରି ନିଜର୍‌ କାଣ୍ଡା ଏଃତେ କ୍ଲିଗ୍‌ ମଞ୍ଚ୍‌ପୁର୍‌ ଏଃତେ ୱିଙ୍ଗ୍‌ଆଃରିଙ୍ଗ୍‌ଆଃ ବନ୍ଦ୍‌ ଆଃଡିଂଏ; ତେଲା ସଦାପ୍ରବୁନେ ବାନ୍‌ ଗୁଏଃକ୍ନେ ରେମୁଆଁ ଜାବର୍‌ ଡିଂଆର୍‌ଏ । 17 ସଦାପ୍ରବୁ ବାସଙ୍ଗ୍‌ଡିଂକେ, ଜାଜା ମଜେ ଲେଃଆର୍‌କେ ମୁଇଂଜାନେ ପ୍ଲାଃ ଡୁଗ୍‌ଡି ପାକା ୱେନ୍‌ସାଃ ନିଜ୍‌କେ ପବିତ୍ର ଆରି ସୁଚି ଆଃଡିଂଆର୍‌ଏ, ଗୁବୁଗ୍‌ନେ ଚିଲି ଆରି ଗୁର୍‌ନା ଜିନିସ୍‌ ଆରି ଗିଡ଼ାଃ ଚଙ୍ଗ୍‌ଆର୍‌ଏ, ମେଇଂ ମୁଇଂଅରିଆ ଗୁଏଃଆର୍‌ଏ । 18 ମେଃଡାଗ୍‌ଲା ନେ ମେଇଂନେ କାମ୍‌ ଡିଙ୍ଗ୍‌ପେଡିଙ୍ଗ୍‌କ୍ନେ ଆରି ଜଜନା ଡିଙ୍ଗ୍‌ପେଡିଙ୍ଗ୍‌କ୍ନେ ସାପା ନେମ୍ୟାଃକେ; ସାପା ଦେସ୍‌ନେ ରେମୁଆଁଇଂ ଆରି ବ୍ନାସାଣ୍ଡ୍ରେକେ ନେନେ ରାଃସିଙ୍ଗ୍‌ନେ ବେଲା ପାଙ୍ଗ୍‌ଡିଂକେ ଆରି ମେଇଂ ପାଙ୍ଗ୍‌ଚେଃ ନେନେ ମ‍ଇମା କେଆର୍‌ଏ । 19 ବାରି, ନେ ମେଇଂନେ ବିତ୍ରେ ମୁଇଂ ଚିନ୍‌ ନେରାଃରେଏ ଆରି ମେଇଂ ବିତ୍ରେ ମ୍ବ୍ରଲାଏଃକ୍ନେ ରେମୁଆଁଇଂକେ ନିଂ ଆତେନ୍‌ ଜାତିନେ ଡାଗ୍ରା ମ୍ବେଏ, ଜାଣ୍ଡେଃ କି ନିଂନେ ନିମାଣ୍ଡା ସାମୁଆଁ ଦ୍ରିଗ୍‌ଲାଏଃକେ ଆରି କି ନିଂନେ ମ‍ଇମା କେଲାଏଃକେ, ଡାଗ୍‌ଲା, ତର୍ଶୀଶ୍‌, ଆଁୟାଃ ସାଃଣ୍ଡ୍ରେ ଆରି ପୁଲ ଆରି ଲୂଦ‌ ଡାଗ୍ରା ଆରି ତୁବଲ ଆରି ଯବନ ଆରି ସ୍ଲ ଦେସ୍‌ ବାସାଲାଏଃକ୍ନେ ରେମୁଆଁଇଂ ଡାଗ୍ରା ଡିଗ୍‌ ବେ ମ୍ବିଃଏ ଆରି ମେଇଂ ଜାତି ଜାତିଅରିଆ ନିଂନେ ମ‍ଇମାନେ ସାମୁଆଁ ବାସଙ୍ଗ୍‌ଆର୍‌ଏ । 20 ବାରି, ସଦାପ୍ରବୁ ବାସଙ୍ଗ୍‌ଡିଂକେ, ଇସ୍ରାଏଲ୍‌ନେ ରେମୁଆଁଇଂ ଡିରକମ୍‌ ପବିତ୍ର ମୁତାଅରିଆ ସଦାପ୍ରବୁନେ ଡୁଆ‍ଅରିଆ ଜିନିସ୍‌ ଡୁଙ୍ଗ୍‌ପାଙ୍ଗ୍‌ଆର୍‌ଏ, ଦେତ୍‌ରକମ୍‌ ମେଇଂ ପେନେ ବୟାଁ ସାପାରେକେ ମାପ୍‌ରୁନେ ମ୍ନିରେ ପୁରୁସ୍‌କାର୍‌ ନ୍‌ସାଃ, ଜାତି ଜାତି ବିତ୍ରେବାନ୍‌ ଆମେଇଂକେ ଗଡ଼ା, ରତ୍‌ ଆରି ଉଁଟ୍‌, ଖଚର ଆରି ଦାପ୍ରେ ଅଲେଙ୍ଗ୍‌ନେ ପସୁଇଂ ଆଡ଼ାତ୍ରା ନେନେ ପବିତ୍ର କଣ୍ଡା ଯିରୂଶାଲମଅରିଆ ଡୁଙ୍ଗ୍‌ପାଙ୍ଗ୍‌ଆର୍‌ଏ । 21 ଆରି, ନେ ମେଇଂନେ ବିତ୍ରେବାନ୍‌ ପୁଜାରି ଆରି ଲେବୀୟ ଡିଂନ୍‌ସାଃ ରେମୁଆଁ ନେସାଃଏ, ଆକେନ୍‌ ସଦାପ୍ରବୁ ବାସଙ୍ଗ୍‌ଡିଂକେ । 22 ମେଃଡାଗ୍‌ଲା ନେ ମୁଃଡ଼ି ତ୍ମି କିତଙ୍ଗ୍‌ଇନି ଆରି ତ୍ମି ମଞ୍ଚ୍‌ପୁର୍‌ ନେଙ୍ଗ୍‌ନେ ସକ୍‌ତିରେ ନେରାଃରେଏ, ଆତେନ୍‌ ଡିରକମ୍‌ ନେ ସେଃମଁ ସାନ୍‌ତିରେ ଲେଃଏ, ଦେତ୍‌ରକମ୍‌ ପେନେ ବଂସ ଆରି ପେନେ ମ୍ନି ଲେଃଏ, ଆକେନ୍‌ ସଦାପ୍ରବୁ ବାସଙ୍ଗ୍‌ଡିଂକେ । 23 ଆରି, ମୁଇଂ ଆମାସ୍‌ବାନ୍‌ ବିନ୍‌ ଆମାସ୍‌ ଜାକ ଆରି ମୁଇଂ ପୁଣ୍ଡେନେ ଦିନାବାନ୍‌ ବିନ୍‌ ପୁଣ୍ଡେନେ ଦିନା ଜାକ କ୍ଲିଗ୍‌ ମଞ୍ଚ୍‌ପୁର୍‌ ନେ ସେଃମଁ ମୁଣ୍ଡିଆ ବଗ୍‌ନ୍‌ସାଃ ପାଙ୍ଗ୍‌ଆର୍‌ଏ, ଆକେନ୍‌ ସଦାପ୍ରବୁ ବାସଙ୍ଗ୍‌ଡିଂକେ । 24 ବାରି, ମେଇଂ ବାଏରେ ୱେଚେଃ, ଜାଜା ନେ ବିରଦ୍‌ରେ ଅଦରମ୍‌ କାମ୍‌ ଡିଂବ‍ଆର୍‌କେ, ଆତେନ୍‌ ରେମୁଆଁଇଂନେ ମଡ଼ା କେଆର୍‌ଏ; ମେଃଡାଗ୍‌ଲା ମେଇଂନେ ବୁବଃଉଂ ଆଗୁଏଃ ଣ୍ଡୁ, କି ମେଇଂନେ ସୁଆ ଆଲିଗ୍‌ ଣ୍ଡୁ; ବାରି, ମେଇଂ ବଇକୁଣ୍ଡ୍‌ନିଆ ଗୁର୍‌ନା ବାଆର୍‌ଏ ।