1 ବାବିଲ୍ ବିସୟ୍‌ନେ ସାମୁଆଁ, ଆମୋସନେ ଉଂଡେ ଯିଶାଇୟ ଏନ୍‌ ଦର୍ସନ୍‌ ବାକେ ।

2 ପେଇଂ "ସ୍ଲାଃପାଡ଼ୁ ଆଲେକ୍ନେ କଣ୍ଡା ଆଡ଼ାତ୍ରା ମୁଇଂ ଜେଣ୍ଡା ଲିଙ୍ଗ୍‌ପା । ନ୍ତି ଆଃୱେଃଚେ ରେମୁଆଁଇଂକେ ଜାବର୍‌ ୱାସାର୍‌ଚେ ୱାପା । ଆମେଇଂକେ ବାସଙ୍ଗ୍‌ପା ସାସନ୍‌ ଡିଙ୍ଗ୍‌ଣ୍ଡ୍ରେ ଗାଲି ବିଃଚେ ମେଇଂ ୱେ ଆର୍‌ଏ ।"

3 ନେ ନେଙ୍ଗ୍‌ନେ ପବିତ୍ର ରେମୁଆଁଇଂ ଆଦେସ୍‌ ଡିଙ୍ଗ୍‌ମ୍ୱକେ ଆରି, ନେ ନେଙ୍ଗ୍‌ନେ ରିସା ସପଲ୍‌ ଡିଙ୍ଗ୍‌ ନ୍‌ସାଃ ନେନେ ବିରଇଂକେ ବାରି ନେନେ ସାର୍ଦା ଡିଙ୍ଗ୍‌ଣ୍ଡ୍ରେକେ ୱାଆର୍‌ଏ ।

4 କଣ୍ଡା ଡାଗ୍ରା ରେମୁଆଁଇଂନେ ନିଆୟ୍‌ ଆତ୍‌ଲା ରେମୁଆଁଇଂନେ ବିତ୍‌ରେ ୱାସାର୍‌ ଆର୍‌କ୍ନେ । ମୁଇଂତୁଗ୍‌ ରିସିଙ୍ଗ୍‌ ଲେକ୍ନେ କୁଟୁମ୍‌ଇଂନେ ରାଇଜ ବିସୟ୍‌ରେ ୱାସାର୍‌ ଡିଙ୍ଗ୍‌ଆର୍‌କେ । ସାପାବାନ୍ ବପୁ ମାପ୍‌ରୁ ଜୁଜ୍‌ ଡିଙ୍ଗ୍‌ନ୍‌ସାଃ ସେନାକେ ରାସିଙ୍ଗ୍‌ ଡିଙ୍ଗ୍‌କେ ।

5 ସଦାପ୍ରବୁ ବାରି ମେଁନେ ସନ୍ୟ ଦଲ୍‌ ଜାବର୍‌ ସ୍ଲ ଦେସ୍‌ବାନ୍‌ ପାଙ୍ଗ୍‌ଏ । ମେଇଂ କିତଙ୍ଗ୍‌ଇନିନେ କନେବାନ୍‌ ପାଙ୍ଗ୍‌ଆର୍‌ଏ । ଏନ୍‌ ସନ୍ୟ ଦଲ୍‌କେ ସଦାପ୍ରବୁ ମେଁନେ ଅସ୍ତ୍ର ରକମ୍‌ ବେବଆର୍‌ ଡିଙ୍ଗ୍‌ଏ ବାରି ମେଁ ରିସା ଡିଙ୍ଗ୍‌କ୍ନେ ଆଃକେ ବିଃଏ । ଏନ୍‌ ସୈନ୍ୟ ସାପା ଦେସ୍‌କେ ଦଂସ ଆଡିଙ୍ଗ୍‌ଏ ।

6 ମାପ୍‌ରୁନେ ଦିନ୍‌ ଡାଗ୍ରା ପିଙ୍ଗ୍‌ଚା ଡିଙ୍ଗ୍‌କେ । ତେସା ନିଜେ ନିଜେ ଅଃପା ବାରି ଦୁକ୍‌ ଡିଙ୍ଗ୍‌ପା । ମୁଇଂ ବେଲା ପାଙ୍ଗ୍‌ଏ ଉଡ଼ିବେଲା ସତ୍ରୁ ପେନେ ଦନ୍‌ସମ୍ପତିକେ ଡଙ୍ଗାରାଙ୍ଗ୍‌ଡଏ । ପର୍‌ମେସର୍‌ ସାପାଟୁ ବପୁ ଏନ୍‌ ଗଟେନ୍‌ସା ବିଃଏ ।

7 ଏନ୍‌ସା ସାପା ନ୍ତି ଦୁର୍ବଲ୍‌ ଡିଙ୍ଗ୍‌ଏ ବାରି ସାପା ରେମୁଆଁନେ ରୁଦୟ୍‌ ତର୍‌ଲେ ୱେଏ ।

8 ବାରି ମେଇଂ ବୁଟମେଗ୍‌ ଆର୍‌ଏ । ଦୁକାସୁକା ବାରି କସ୍ଟ ଆମେଇଂକେ ତାର୍‌ଏ । ମେଇଂ ଣ୍ଡିଆକୁମାନେ ସେଲାମ୍ବୁଏଃ ରକମ୍‌ ଦୁକାସୁକା ଡିଙ୍ଗ୍‌ ଆର୍‌ଏ । ମେଇଂ ନିଜର୍‌ ନିଜର୍‌ ବିତ୍ରେ ବୁଟମେଗ୍‌ ଆର୍‌ଏ । ମେଇଂ ସାର୍ମୁଆଃ ଡୁଆକ୍ନେ ସୁଆ ରକମ୍‌ ଚିପ୍ଲେଗ୍‌ ୱେଏ ।

9 କେଲାପା, ଦେସ୍‌ ଦଂସ ଆଡିଙ୍ଗ୍‌ ନ୍‌ସା ବାରି ଆତାନ୍‌ ବିତ୍ରେ ପାପି ଇଂକେ ବିନାସ୍‌ ଆଡିଙ୍ଗ୍‌ ନ୍‌ସା ସଦାପ୍ରବୁନେ ଦିନ୍‌ ବୟାଙ୍କାର୍‌ ପାଙ୍ଗ୍‌ଡିଙ୍ଗ୍‌କେ । ରିସା ବାରି ଜାବର୍‌ ରିସା ଜଡ଼େଚେ ପାଙ୍ଗ୍‌ଡିଙ୍ଗ୍‌କେ ।

10 ଡାଗ୍ଲା ତ୍ରିଗ୍‌ଡ୍ୟାନେ ଚାଙ୍କୁଆଇଂ ବାରି ଆତ୍‌ଡାଗ୍ରାନେ ମ୍ନା ଚାଙ୍କୁଆ ଆଣ୍ଡେଙ୍ଗ୍‌ ତାର୍‌କିଗ୍‌ ଆବିଃ ଣ୍ଡୁ । ସ୍ନି ନିଜେ ତାର୍‌ନେ ବେଲା ତାଙ୍ଗ୍‌କିଗ୍‌ ଡିଙ୍ଗ୍‌ଏ ବାରି ଆର୍କେ ନିଜର୍‌ ତାର୍କିଗ୍ ଆବିଃ ଣ୍ଡୁ ।

11 ବାରି ନେ ମଚ୍‌ପୁର୍‌ନ୍ୟା ଦୁସ୍‌ଟ ନ୍‌ସାଃ ବାରି ଦୁସ୍‌ଟ ରେମୁଆଁଇଂନେ ଅଦରମ୍‌ ନ୍‌ସା ଡଣ୍ଡ୍‌ ବିଃଏ ବାରି ଆଙ୍କାର୍‌ ରେମୁଆଁଇଂନେ ବଡ଼୍‌ପନ୍‌ ବାଙ୍ଗେ ୱେଏ ବାରି ବୟାଙ୍କାର୍‌ ରେମୁଆଁନେ ଗରବ୍‌ ପାକ୍‌ଚି ୱେଏ ।

12 ନେ ନିମାଣ୍ଡା ସୁନା ବାନ୍‌ ମଚ୍‌ପୁର୍‌କେ ଆରି ଦେତ୍‌ରକମ୍‌ ଓଫୀରନେ ନିର୍‌ମଲ୍‌ ସୁନା ବାନ୍‌ ରେମୁଆଁକେ ମୁଲ୍ୟବାନ୍‌ ନେରାଡିଙ୍ଗ୍‌ଏ ।

13 ଆତେନ୍‌ସା ନେ କିତଂଇନିକେ ନେରାଃଜୁର୍‌ଏ, ଆରି ସାପାବାନ୍ ବପୁ ମାପ୍‌ରୁନେ ରିସାରେ ଆରି ମେଁନେ ବୟଙ୍କାର୍‌ ରିସାନେ ଦିନ୍‌କେଲା ପୁର୍‌ତିବି ଲଃଚେ ଗୁଚେ ୱେଏ ।

14 ଆତ୍‌ଡାଗ୍ରା ଦେକ୍‌ରକମ୍‌ ଗଟେଏ ଜେ, ଲାଗ୍‌ଡନେ ଏଲାନେ ନ୍ୟାୟ୍ ବାରି ତୁର୍‌ତିଆରେ ଆଲେକ୍ନେ ମେଣ୍ଡା ରକମ୍‌ ରେମୁଆଁଇଂ ସାପା ନିଜର୍‌ ନିଜର୍‌ କୁଟୁମ୍‌ ଡାଗ୍ରା ପାଙ୍ଗ୍‌ଆର୍‌ଏ ବାରି ସାପା ନିଜର୍‌ ନିଜର୍‌ ଦେସ୍‌ ପାକା ଲାଗ୍‌ଡ ଆର୍‌ଏ ।

15 ମୁଡ଼ି ରେମୁଆଁନେ କବର୍‌ ମିଲେଏ, ଆମେକେ ସୁଲ୍‌ ଏତେ ବାଗୁଏଃ ବିଃଆର୍‌ଏ ବାରି ମୁଡ଼ି ରେମୁଆଁକେ ସାଃ ଆର୍‌ଏ ଆମେକେ କାଣ୍ଡା ଏତେ ସିତଗ୍‌ ଆର୍‌ଏ ।

16 ମେଇଂନେ ଉଂଡେଇଂକେ ଡିଗ୍‌ ମେଙ୍ଗ୍‌ନେ ମୁଆଁ ସାମ୍‌ନାରେ ଜଗ୍‌ତ୍ଲାଗ୍‌ ବିଃଆର୍‌ଏ । ମେଙ୍ଗ୍‌ନେ ଡୁଆ ଡଙ୍ଗା ରାଙ୍ଗ୍‌ଡ ଆର୍‌ଏ ଆରି ମେଙ୍ଗ୍‌ନେ ସେଲାମ୍ବୁଏଃଇଂକେ ନାନା ଆର୍‌ଲା ଡିଙ୍ଗ୍‌ଚେ କରାପ୍‌ ଆଡିଙ୍ଗ୍‌ଆର୍‌ଏ ।

17 କେଲା, ନେ ମେଙ୍ଗ୍‌ନେ ଆଡ଼ାତ୍ରା ମାଦୀୟଇଂକେ ରିସା ନେରାଡିଙ୍ଗ୍‌ଏ, ମେଇଂ ରୁପାକେ ଆକେ ଆର୍‌ ଣ୍ଡୁ କି ସୁନା ଏଃତେ ମେଇଂ ସାନ୍ତି ଆଡିଙ୍ଗ୍‌ ଆର୍‌ ଣ୍ଡୁ ।

18 ମେଙ୍ଗ୍‌ନେ ଆଁୟାଃ ଙ୍ଗିରେଇଂକେ ଜଗ୍‌ତ୍ଲାଗ୍‌ ବିଏ । ଆରି ମେଇଂ ଗର୍‌ବେ ନିଆ ଲେକ୍ନେ ଚିର୍‌ଲାଃଅ ଆଡ଼ାତ୍ରା ମେଃଡିଗ୍‌ ଦୟା ଆରାସୁଏ ଆର୍‌ ଣ୍ଡୁ, ଗଡ଼େଙ୍ଗ୍‌ଇଂ ଆଡ଼ାତ୍ରା ମେଇଂ ନେ ଦୟା ଆରାସୁଏଆର୍‌ ଣ୍ଡୁ ।

19 ବାରି, ସାପା ରାଜ୍ୟନେ ଗୌରବ୍‌ ରକମ୍‌ ଆରି କଲଦୀୟଇଂନେ ଗର୍ବନେ ସୁନ୍ଦର୍‌ ରକମ୍‌ ଜେ ବାବିଲ, ଆତେନ୍‌ ପର୍‌ମେସର୍‌ନେ ନ୍ତିବାନ୍‌ ବିନାସ୍‌ ଡିଂଲାଏଃକ୍ନେ ସଦୋମ ଆରି ହମୋରାନେ ରକମ୍‌ ଡିଂଏ ।

20 ମାତ୍ରମ୍‌ ଆତାନ୍‌ ବାରି ସୁନ୍ଦର୍‌ ଡିଙ୍ଗ୍‌ଚେ ଆଲେ ଣ୍ଡୁ । ରେମୁଆଁଇଂ ଜାଡିଗ୍‌ ଆତ୍‌ଅରିଆ ବାସା ଆଲେଃଆର୍‌ ଣ୍ଡୁ । ଆରବୀୟଇଂ ବାରି ଆତ୍‌ଡାଗ୍ରା ତମ୍ୱୁ ଆତ୍ଲାଗ୍‌ ଆର୍‌ ଣ୍ଡୁ । ମେଣ୍ଡା ବିଃଚଙ୍ଗ୍‌ଣ୍ଡ୍ରେ ମେଇଂନେ ମେଣ୍ଡାଇଂକେ ଆତ୍‌ଅରିଆ ତୁର୍‌ତ୍ୟା ନ୍‌ସା ରାଙ୍ଗ୍‌ଆପାଙ୍ଗ୍‌ଆର୍‌ ଣ୍ଡୁ ।

21 ଆତାନ୍‌ ଜାଗାନ୍ନିଆ କଣ୍ଡାନେ ପସୁ ବାସାଆର୍‌ଏ । ବାବିଲନୀୟଇଂ ମେଇଂନେ ନିଜର୍‌ ଡୁଆ ବାରି ଆଲେଃଆର୍‌ ଣ୍ଡୁ । ଆତାନ୍‌ ଡୁଆ ଆଣ୍ଡେଙ୍ଗ୍‌ କୁର୍ମା ବାରି ହାନାଲ୍ୟା ପିଗ୍‌ ବାସାଆର୍‌ଏ ବାରି କଣ୍ଡାନେ ଗିମିଃ ଆତ୍‌ଡାଗ୍ରା ୱାଃଡ଼େଙ୍ଗ୍‌ ୱାଃଆର୍‌ଏ ।

22 ବାରି ଗଦବାଗ୍‌ଇଂ ରାଜାନେ ବାଜାର୍‌ନିଆ ବାଆର୍‌ଏ ଆରି ନାକାଇଂ ମେଇଂନେ ସୁନ୍ଦର୍‌ ବାଜାର୍‌ନିଆ ବାଆର୍‌ଏ । ମେଁନେ କାଲ୍‌ ଡାଗ୍ରା ପାଙ୍ଗ୍‌ଡିଙ୍ଗ୍‌କେ ଆରି ମେଁନେ ଦିନ୍‌ ସାପା ଜାବର୍‌ସି ଆଡିଙ୍ଗ୍‌ ଣ୍ଡୁ ।