ମାପ୍ରୁ କରୋସ୍କେ ବାଚେକେ
1 ମାପ୍ରୁ ନିଜର୍ ଆସିର୍ବାଦ୍ ଡିଙ୍ଗ୍ବକ୍ନେ ରେମୁଆଁକେ ବାଆଃନିଆ ଞ୍ଚୁ କିଗ୍ଚେଃ ଆସିର୍ବାଦ୍ ଡିଂବ୍ନ, ବାରି, କୋରସ୍ନେ ବିସଏରେ ଆକେନ୍ ସାମୁଆଁ ବାସଙ୍ଗ୍ଡିଂକେ, ନେ ମେଁ ସେଃମଁ ବିନ୍ ବିନ୍ ଜାତିକେ ଆଃଆରେ ନ୍ସାଃ ମେଁନେ ଇଂଞ୍ଚଙ୍ଗ୍ତି ସାଃ ନେବକେ ଆରି ନେ ରାଜାଇଂନେ ଗ୍ନାଗ୍ସେଃ ନେଃରାପୁଏଃଚଗ୍ଏ; ନେ ମେଁ ସେଃମଁ କାପାଟ୍ ସାପା ନେରଃଏ ଆରି ଇନିନେ କାପାଟ୍ ସାପା ବନ୍ଦ୍ ଆଡିଂଣ୍ଡୁ; 2 ନେ ନାଁନେ ସିସେ ସିସେ ନେଅଲେଙ୍ଗ୍ଏ, କୁରୁକୁର୍ୟାଃନେ ଗାଲି ସାପା ସମ୍ ନେରାଃଡିଂଏ; ନେ ପିତଲ୍ନେ କାପାଟ୍ ସାପା ପାକ୍ଚିଃଚେ ବାଗ୍ ବାଗ୍ ନେରାଃଡିଂଏ ଆରି ଲୁଆ ଗାଡ଼ା ସାପା ଗୁଆଃତଗ୍ ନେବିଃଏ; 3 ବାରି, ନେ ତାଙ୍ଗ୍କିଗ୍ ଡିଡା ଲାଏଃକ୍ନେ ଦନ୍ ଆରି ବୁଃଡ଼ିକ୍ନେ ଜାଗାଅରିଆ ରାଃସିଙ୍ଗ୍ବ୍ନ ଦନ୍ ସାପା ଆନାକେ ନେବିଃଏ, ତେଲା ନାଁନେ ମ୍ନି ସାଃଚେ ୱାଣ୍ଡ୍ରେ ନେ ଜେ ମାପ୍ରୁ, ଇସ୍ରାଏଲ୍ନେ ପର୍ମେସର୍ ନେଲାଏଃକେ, ଆକେନ୍ ପେ ମ୍ୟାଃ ପେୟାଏ । 4 ନେନେ ଚାକର୍ ଯାକୁବ ଆରି ନେ ସ୍ରିନେବକ୍ନେ ଇସ୍ରାଏଲ୍ ନ୍ସାଃ ନେ ନାଁନେ ମ୍ନି ସାଃଚେ ଆନାକେ ୱାନେବକେ; ନାଁ ଆନେକେ ନାମ୍ୟାଃଲା ଡିଗ୍ ନେ ଆନାକେ ମ୍ନା ପଦ୍ ବିଃନେବକେ । 5 ନେଙ୍ଗ୍ ମାପ୍ରୁ, ନେଙ୍ଗ୍ ରକମ୍ ଆରି ଜାଡିଗ୍ ଣ୍ଡୁ । ଆନେ ଆନ୍ତାର୍ଚେଃ ଆରି ପର୍ମେସର୍ ଆଲେଃଆର୍କେ; ନାଁ ଆନେକେ ନାମ୍ୟାଃଲା ଡିଗ୍ ନେ ଆନାକେ ବପୁ ନେବିଏ । 6 ତେଲା ଆନେ ଆନ୍ତାର୍ଚେଃ ଜା ଆରି ଣ୍ଡୁ, ଆକେନ୍ ତାର୍ସ୍ନି ଗାଲିବାନ୍ ଲଗ୍ସ୍ନି ଗାଲି ଜାକ ରେମୁଆଁଇଂ ମ୍ୟାଃଆର୍ଏ; ନେ ମାପ୍ରୁ, ଆରି ନେଙ୍ଗ୍ ସୁଗୁଆ ଆରି ଜା ଡିଗ୍ ଣ୍ଡୁ । 7 ନେ ତାର୍କିଗ୍ ଆଃରେନେବକେ ଆରି ନେ ତାଙ୍ଗ୍କିଗ୍ ଆଃରେନେବକେ; ନେ ସାନ୍ତି ବିଃଣ୍ଡ୍ରେ, ବିପଦ୍ ଆଃଗଟେଣ୍ଡ୍ରେ । ନେ ମାପ୍ରୁ ଆକେନ୍ ସାପା ପୁରନ୍ ଆଃଡିଂନେବକେ । 8 ଅ କିତଙ୍ଗ୍ଇନି, ପେ ଆଡ଼ାତ୍ରାବାନ୍ ଣ୍ଡିଆଃ ଆଃଗୁର୍, ତ୍ରିଗ୍ଡ୍ୟାଃ ଦାର୍ମିକ୍ ସାମୁଆନେ ଣ୍ଡିଆଃ ଆଃଗୁର୍ । ଡିରକମ୍ ପରିତ୍ରାନ୍ ଜନମ୍ ଡିଂଏ, ଆକେନ୍ସାଃ ମଚ୍ପୁର୍ ଚିନ୍ବିନ୍ ଡିଂଲେଃ ଆରି ମେଁ ଦରମ୍ ସାମୁଆଁ ମୁଇଂଅରିଆ ଆଃପଃଡ଼୍ୟାଲେଃ; ନେ ମାପ୍ରୁ ଆକେନ୍ ଆଃରେନେବକେ ।
ମାପ୍ରୁ ଆଃରେଣ୍ଡ୍ରେ ଆରି ମେଁନେ ଇତିହାସ୍
9 ଜା ନିଜର୍ ସୃଷ୍ଟିକର୍ତାନେ ଏଃତେ ବିରଦ୍ ଡିଂଏ, ମେଁ ଅବିସାପ୍ନେ ରେମୁଆଁ ! ମଚ୍ପୁର୍ନେ ଜିକ୍ରା ବିତ୍ରେବାନ୍ ଇଃତୁଡ଼ାଃ ଜିକ୍ରା ମାତର୍ ଲେଃକେ ! ତୁବଃ ମେଃନେ କୁମାର୍କେ ବାସଙ୍ଗ୍ଏ, ନା ମେଃନେ ଆଃରେନାବକେ ? କି ନାଁ ନାସ୍ଲେକ୍ନେ ନ୍ତି ମେଁନେ ବାସଙ୍ଗ୍ଏ, ମେଁନେ ନ୍ତି ଣ୍ଡୁ ? 10 ଜା ଆବାକେ ବାସଙ୍ଗ୍ଏ, ନାଁ ମେଃନେ ଜନମ୍ ବିଃନାଡିଂକେ, କି ସେଲାମ୍ବୁଏଃ ରେମୁଆଁକେ ବାସଙ୍ଗ୍ଏ, ନାଁ ମେଃନେ ଜନମ୍ ବିଃନାଡିଂକେ ? ମେଁ ଡଣ୍ଡ୍ ବାନେ ଦରକାର୍ ! 11 ମାପ୍ରୁ, ଇସ୍ରାଏଲ୍ନେ ପବିତ୍ର ଇସ୍ପର୍ ଆରି ଆମେକେ ଆଃରେଣ୍ଡ୍ରେ ଆକେନ୍ ସାମୁଆଁ ବାସଙ୍ଗ୍ଡିଂକେ, ଇଡ଼ିଂଡେ ଗଟ୍ନାନେ ସାମୁଆଁ ଆନେକେ ସାଲ୍ୟାଃକୁ; ପେ ନେଉଙ୍ଗ୍ଇଂନେ ବିସଏରେ ଆରି ନେ ନ୍ତି ଏଃତେ ଡିଂକ୍ନେ କାମ୍ ବିସଏରେ ଆନେକେ ଆଦେସ୍ ବିଃଲା । 12 ନେ ମଚ୍ପୁର୍ ଆଃରେନେବକେ ଆରି ତେନ୍ ବିତ୍ରେ ରେମୁଆଁ ଆଃରେନେବକେ; ନେ, ନେନେ ନ୍ତି ଆଃ କିତଙ୍ଗ୍ଇନି ସାପାପାକା ଟେକେ ବକେ ଆରି ଆତ୍ନେ ସାପା ବିସଏକେ ନେ ଆଦେସ୍ ବିଃନେବକେ । 13 ନେ ଦର୍ମରେ ଆମେକେ ଜନମ୍ ଆଃଡିଂନେବକେ ଆରି ନେ ମେଁନେ ସାପା ଗାଲି ସିଦା ନେରାଃଡିଂଏ; ମେଁ ନେନେ ଇନି ବାର୍ମୁଇଂତର୍ ଆଃରେଏ ଆରି ମେଁ ବନ୍ଦି ଡିଙ୍ଗ୍ଲାଏଃକ୍ନେ ରେମୁଆଁଇଂକେ ଆନ୍ତାର୍ ବିଃଏ, ଡାବୁ ଆତ୍ଲା ଣ୍ଡୁ କି ପୁରୁସ୍କାର୍ ବାନ୍ ଣ୍ଡୁ, ଆକେନ୍ ସାପା ବାନ୍ ମ୍ନା ମାପ୍ରୁ ବାସଙ୍ଗ୍ଡିଂକେ ।
ସଦାପ୍ରବୁ ମୁଇଂ ମାତର୍ ଉଦାର୍ ଡିଙ୍ଗ୍ଣ୍ଡ୍ରେ
14 ମାପ୍ରୁ ଆକେନ୍ ସାମୁଆଁ ବାସଙ୍ଗ୍ଡିଂକେ, ମିସର୍ନେ ଦୁକ୍ ଆରି କୂଶନେ ବେପାର୍ ଡିଙ୍ଗ୍କ୍ନେ ଚୁଚୁ ଆରି ଚ୍ଲେ ଚ୍ଲେକ୍ନେ ସବାୟୀୟଇଂ ପେ ଡାଗ୍ରା ପାଙ୍ଗ୍ଆର୍ଏ ଆରି ପେନେ ଡିଂଆର୍ଏ; ମେଇଂ ପେନେ ପ୍ଲାଃ ଅଲେଙ୍ଗ୍ଆର୍ଏ; ସିକ୍ଲି ଏତେ ମେଇଂ ଆଃଗାଗ୍ଚେ ପାଙ୍ଗ୍ଆର୍ଏ; ବାରି, ମେଇଂ ଆନାକେ ସାର୍ଲଆର୍ଏ ଆରି ଗୁଆରି ଡିଂଚେଃ ବାସଙ୍ଗ୍ଆର୍ଏ, ଡିଲାଡିଗ୍ ପର୍ମେସର୍ ନାଁ ବିତ୍ରେ ଲାଏଃକେ; ଆମେକେ ଆନ୍ତାର୍ଚେ ଆରି ଜାଡିଗ୍ ଣ୍ଡୁ, ଆରି ଜାଡିଗ୍ ପର୍ମେସର୍ ଣ୍ଡୁ । 15 ଅ ଉଦାର୍ଡିଂଣ୍ଡ୍ରେ, ଇସ୍ରାଏଲ୍ନେ ପର୍ମେସର୍, ନାଁ ନିଜେକେ ନିଜେ ବୁଃଡ଼ିଚେଃ ବନେ ପର୍ମେସର୍ । 16 ମେଇଂ ଗିଆସଃଆର୍ଏ, ହାଁ, ତେନ୍ ସାପାରେ ଗାବ୍ରା ଡିଂୱେଆର୍ଏ; ମୁର୍ତି ଆଃରେଣ୍ଡ୍ରେ ସାପାରେ ମୁଇଂମାଣ୍ଡ୍ରେ ଅପମାନ୍ ବାଆର୍ଏ । 17 ମାତର୍, ଇସ୍ରାଏଲ୍, ମାପ୍ରୁନେ ବାନ୍ ମାଡାନେ କାଲ୍ ଜାକ ଉଦାର୍ ବାଆର୍ଏ; ପେ ଜୁଗ୍ ଜୁଗ୍ ଜାକ ଗିଆସଃ କି ଗାବ୍ରା ପେଡିଙ୍ଗ୍ ଣ୍ଡୁ । 18 ମେଃଡାଗ୍ଲା କିତଙ୍ଗ୍ଇନିନେ ଆଃରେଣ୍ଡ୍ରେ ମାପ୍ରୁ ଦେକ୍ରକମ୍ ବାସଙ୍ଗ୍ଡିଂକେ; ମେଁ ପର୍ମେସର୍; ମେଁ ମଚ୍ପୁର୍କେ ଆଃରେଚେଃ ଆଃର୍ମେବକେ; ମେଁ ଆତେନ୍ ଆଃରେକେ, ମେଁ ଆତେନ୍ କାଲି ଆଃଡିଂଚେଃ ମାରାଃରେଚେଃ ବାସାନେ ଜାଗା ଆତ୍ଲା ଆଃରେକେ, ନେ ମାପ୍ରୁ, ଆରି ନେଙ୍ଗ୍ ରକମ୍ ଜା ଡିଗ୍ ଣ୍ଡୁ । 19 ନେ ବୁଃଡ଼ିଚେଃ ତାଙ୍ଗ୍କିଗ୍ ଲାଏଃକ୍ନେ ଦେସ୍ନେ ମେଃଡିଗ୍ ଜାଗାଅରିଆ ନେବାସଙ୍ଗ୍କେ ଣ୍ଡୁ; ପେ ସରାଃ ସ୍ରି ଆନେକେ ତୁତୁର୍ ଡାଗ୍ଚେ, ଆକେନ୍ ନେ ଯାକୁବ ବଂସକେ ବାସଙ୍ଗ୍ନେବକେ ଣ୍ଡୁ, ନେଙ୍ଗ୍ ମାପ୍ରୁ ଦରମ୍ ସାମୁଆଁ ବାସଙ୍ଗ୍ଣ୍ଡ୍ରେ, ନେ ସତ୍ ସାମୁଆଁ ନେବାସଙ୍ଗ୍ଏ ।
ମଚ୍ପୁର୍ନେ ପର୍ମେସର୍ ବାରି ବାବିଲ୍ନେ ମୁର୍ତି
20 ଅ ବିନ୍ ବିନ୍ ଜାତିବାନ୍ ରକ୍ୟା ବାପେଲାଏଃକ୍ନେ ରେମୁଆଁଇଂ, ପେ ମିସୁଃଚେ ପାଙ୍ଗ୍ଲାପା, ସାପାରେ ମିସୁଃଚେ ପାଙ୍ଗ୍ଲାପା; ଜାଜା ନିଜର୍ ନ୍ତି ଏଃତେ ଆଃରେକ୍ନେ ମୁର୍ତିନେ ସୁଆ ଡୁଙ୍ଗ୍ଚେଃ ଅଲେଙ୍ଗ୍ଆର୍ଏ ଆରି ଉଦାର୍ ଡିଂନେ ମାୟାନେ ଦେବ୍ତା ଡାଗ୍ରା ପାର୍ତନା ଡିଂଆର୍ଏ, ମେଇଂନେ ମେଃଡିଗ୍ ବୁଦି ଣ୍ଡୁ । 21 ପେ ଆତେନ୍ ବାସଙ୍ଗ୍ପା ଆରି ଆତେନ୍ ଡୁଙ୍ଗ୍ପାଙ୍ଗ୍ଲାପା; ହାଁ, ମେଇଂ ନିଜେ ନିଜେ ଚିନ୍ତା ଡିଂଆର୍ଲେଃ; ଅଃସେ କାଲ୍ବାନ୍ ଜା ଆକେନ୍ ଆଃମ୍ୟାଃବକେ ? ବାୱିର୍ କାଲ୍ବାନ୍ ଜା ଆକେନ୍ ବାସଙ୍ଗ୍ବକେ ? ନେ ମାପ୍ରୁ କି ଆକେନ୍ ଡିଂନେବକେ ଣ୍ଡୁ ? ଆନେକେ ଆନ୍ତାର୍ଚେ ବିନ୍ ପର୍ମେସର୍ ଣ୍ଡୁ, ନେ ଦରମ୍ ପର୍ମେସର୍ ଆରି ଉଦାର୍ଡିଂଣ୍ଡ୍ରେ; ଆନେକେ ଆନ୍ତାର୍ଚେଃ ଆରି ଜାଡିଗ୍ ଣ୍ଡୁ । 22 ଅ ମଚ୍ପୁର୍ନେ ସ୍ଲ ସ୍ଲ ବାସାଣ୍ଡ୍ରେ ସାପାରେ, ପେ ନେ ଡାଗ୍ରା ପାଙ୍ଗ୍ଚେ ଉଦାର୍ ବାପା; ମେଃଡାଗ୍ଲା ନେ ପର୍ମେସର୍, ଆନେ ଆନ୍ତାର୍ଚେଃ ଆରି ଜା ଡିଗ୍ ଣ୍ଡୁ । 23 ନେ ନିଜର୍ ମ୍ନି ସାଃଚେ ପାର୍ମାନ୍ ଡିଂନେବକେ ଆରି ଦରମ୍ ସାମୁଆଁ ନେ ତୁମୁଁଆଃବାନ୍ ତାର୍ଲାଏଃକେ, ଆତେନ୍ ବିନ୍ ଆଡିଂ ଣ୍ଡୁ, ନେ ଡାଗ୍ରା ସାପା ମାଣ୍ଡି ବ୍ରିଙ୍ଗ୍ଏ, ବାରି ସାପା ନ୍ଲିୟା ପର୍ମାନ୍ ଡିଂଆର୍ଏ । 24 ରେମୁଆଁଇଂ ନେ ମ୍ନିରେ ବାସଙ୍ଗ୍ଆର୍ଏ, ମାତର୍ ମୁଇଂ ମାପ୍ରୁଅରିଆ ଦରମ୍ ସାମୁଆଁ ଆରି ବପୁ ଲାଏଃକେ; ମେଁନେ ଡାଗ୍ରା ରେମୁଆଁଇଂ ପାଙ୍ଗ୍ଆର୍ଏ, ବାରି ଜାଜା ମେଁନେ ଆଡ଼ାତ୍ରା ରିସା ଡିଂଲେଃଆର୍ଗେ, ତେନ୍ ସାପାରେ ଗିଆସଃଆର୍ଏ । 25 ଇସ୍ରାଏଲ୍ନେ ସାପା ବଂସ ମାପ୍ରୁଅରିଆ ଦରମ୍ରେ ଡିଂଆର୍ଏ ଆରି ମେଁନେ ମହିମା ଡିଂଆର୍ଏ ।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)