Salmos 10

Kefane fa nombia kedi kegbɛɛ dɔɔ

1 Degbeŋgyoo, weera n seŋɛɛ lemlem mena?

Weera n moo n wose weese daa da wose kekyaŋ man?

2 Agaŋtaŋtena ne yele ayematena wose ne kyaŋ wɔ,

na ba te yale gyoo kɔtase ŋan bɔɔ nyɔɔ nɛ man.

3 Nombiakumɛɛ yɛɛre ne gate ɔ wose lee kpene keŋ ɔ konɔɔ ne gyae nɛ man,

ŋon ɔ sia ne yɛɛ balaŋ abɔɔ nɛ ne falaa Degbeŋgyoo na ɔ te bɛɛ e.

4 Akpanyanyaŋtena ne gate ba wose te bɔɔ ne kɛo Wurubuarɛ ya,

ɔ nyeempɔ pou yɛna, Wurubuarɛ ŋolo be kyaa ya.

5 Kpene kamasɛ ne dee fa e,

ɔ te bɛɛ nyaŋ mmaraase dɔɔ kedi,

ɔ bɛɛ kala ɔ kɔlara pou do kolo man ya.

6 Ɔ ne yako ɔ konɔɔ man nyiaa, <<Kolo be tale tɛɛse maŋ ya.>>

Ɔ ne kaŋ ntam nyiaa, <<Ŋolo be tale yɛɛ maŋ kolo kum ya.>>

7 Kefaala na akɛrɛɛ na balaŋ kaŋeredo te wulu ɔ nɔɔman,

abɔɔ kewɔlɛɛ na mmusuo nombia doo ɔ laakem ateta.

8 Ɔ na yoo benaana akuraase,

ɔ na yoo koe balaŋ baŋ be nombia dei nɛ,

ɔ na yoo deke balaŋ baŋ bɔɔ tale lɛɛ ba wose ya nɛ.

9 Ɔ na yoo deke ŋgba dinaate nɛ.

Ɔ na deke nyi waa kyaŋ ŋon ɔ be tale lɛɛ ɔ wose ya nɛ,

ɔ ne kyaŋ ŋon ɔ be yɔkɔse ɔ kɔta man na ɔ te wɔŋee e laŋ.

10 Ɔ ne gyɔ ŋon ɔ be yɔkɔse nɛ lɔ tɛɛle man,

na ɔ ta mo ɔ doŋ ŋere e.

11 Ɔ ne yako ɔ konɔɔ man nyiaa, <<Wurubuarɛ te wolee,

ɔ te wuu ɔ sia, mena dɔɔ ɔ be naa korakora ya.>>

12 Ao Degbeŋgyoo, koro, Ao Wurubuarɛ, gyina n nyiŋmaa adido.

Naa wolee baŋ bɔɔ yɔkɔse nɛ ya.

13 Weera dɔɔ te Akpanyanyaŋtena bɛɛ mo Wurubuarɛ yɛɛ kolo ya?

Weera ɔ ne yako ɔ konɔɔ man nyi,

<<Ɔ be gyae waa wɔŋ ma deŋele ya>>?

14 Mɔna n sia gyakaa baŋ bɛɛ naa diyem,

na baŋ ba wose be kyaŋ wɔ nɛ dɔɔ.

Baŋ bɔɔ dana ŋolo ya nɛ ta mo ba wose lɔ n dɔɔ,

nyaŋ ne kyɔɔna yoyolobia.

15 Tekeri Akpanyanyaŋte ŋon baam,

wɔŋ nombiakumɛɛ yɛɛre deŋele lee ɔ nombiakumɛɛ dɔɔ,

kelii debaŋ keŋ waa tina nombiakumɛɛ keyɛɛ yela.

16 Degbeŋgyoo yɛna gyoo kekpaakekpaa,

tɛɛlese baa wɔlɛɛ ɔ nyiŋmaa man.

17 Nyaŋ Degbeŋgyoo, nyii baŋ ba woɛ nɛ kegyaebii,

n na do wɔ kakyeŋ te n ne nyii be kewii.

18 Di lɛɛ yoyolobia na baŋ bɛɛ ŋere wɔ do nɛ,

na deniwalaŋ ba tekaa nyiŋ ŋmaase ŋolo bela ya.