Salmos 14

Walaŋ akpanyanyaŋ keyɛɛ

1 Diyiŋte ne yako ɔ konɔɔ man nyiaa,

<<Wurubuarɛ be kyaa ya.>>

Bɛɛ yɛɛ detiŋtɛɛ man abɔɔ na abɔɔ anekɔlaŋ.

ŋolo be kyaa keŋ ɔ ne yɛɛ nombia kpaakpaa ya.

2 Degbeŋgyoo kyaa adido ɔ ne kɛɛ denibalaŋ pou,

nyi ŋolo kyaa keŋ ɔ ne nyi nombia man,

yaa ɔ ne kɛo Wurubuarɛ gbɛɛ.

3 Be popou ta yo gbɛɛ, be popou te wɔlɛɛ,

ŋolo be kyaa keŋ ɔ ne yɛɛ kolo kpaakpaa ya,

dokoloŋ kooŋ gba be kyaa ya.

4 Mena nombiakumɛɛ yɛɛra kɛwɔ pou ba gyeŋ nyi kolo kyaa yee?

Bɛɛ tao me balaŋ ŋgba bee di weenɛɛ bo nɛ,

te bɔɔ na som Degbeŋgyoo ya.

5 Mɔna gyakoloŋ gyae ka gyoo wɔ nideli botɔɔ,

nawolo nyi Wurubuarɛ kpuɛna baŋ ba tenɛɛ nɛ duuluŋ man balaŋ.

6 Ɛmɛɛ nombiakumɛɛ yɛɛra, ne wɔlɛɛ kpene keŋ diyemte be bake nɛ,

mɔna Degbeŋgyoo yɛna ba keyeu kagyoo.

7 Ao, nafɔ nyeekelɛɛ gyae ka lee Siyɔn kɔŋ fa Iseraetena!

Akpaa Degbeŋgyoo da besena ɔ balaŋ see ba beneŋ man na,

Yakɔbe waa nyaŋee, na ke yɛɛ Iserae gyoŋ!