1 Me Wurubuarɛ, me Wurubuarɛ, weera te n bɛɛ maŋ?

Weera te n kyaa lem keŋ n be lɛɛ maŋ ya?

Weera te n bee nyii ma weeleŋ man kewii ya?

2 Me Wurubuarɛ, mee wii baake neŋ weese teŋteŋ, mɔna n bɛɛ kpa maŋ ya,

nelim, mɔna mɔɔ ne nyiŋ wosefɛɛreŋ ya.

3 Mɔ nyaŋ yɛna fereŋkyeŋte ŋon,

bɔɔ see neŋ gyoori,

nyaŋ te Iseraetena na lese n yele.

4 N dɔɔ te de naanaɔ moo ba wose lɔ,

ba moo ba wose lɔ n dɔɔ te n lɛɛ wɔ.

5 Nyaŋ te be wiiwɔ baake te n lɛɛ wɔ,

ba moo ba wose lɔ n dɔɔ, te n ta do wɔ desɛŋ ya.

6 Mɔna maŋ yɛɛ feeliibii e, ma te yɛɛ deniwalaŋ e ya,

walaŋ kamasɛ na boŋo maŋ, bɔɔ na mo maŋ yɛɛ kolo ya.

7 Baŋ pou bɛɛ naa maŋ ne kulu maŋ,

Bɛɛ mo tuubia wuraa maŋ, na bee kpiisi ba nyeeya.

8 Bɛɛ yako nyiaa, <<Ɔ na mo ɔ wose lɔ Degbeŋgyoo dɔɔ,

Degbeŋgyoo waa lɛɛ e,

akpaa ɔ nombia na gyoo ɔ sia na,

waa lɛɛ e.>>

9 Mɔna nyaŋ lesena maŋ lee me naa tɔɔman,

debaŋ keŋ me nɔɔ tosɛɛ me naa dide nɔɔman nɛ, n yelaa ma moo me loo gyakaa n dɔɔ.

10 Be kɛɛ ŋmase koraŋ nɛ n yelaa ma moo me loo gyakaa n dɔɔ,

nyaŋ yɛna me Wurubuarɛ lee me naa tɔɔman.

11 Naa kyaana lem lee me gyaŋ ya,

nawolo nyi wosekekyaŋ benaana maŋ,

te ŋolo be kyaa waa kyɔ maŋ ya.

12 Nunkyue baala burum te kilisi maŋ,

Basan nunkyue baala doŋ nyibaŋ te tɔ maŋ do.

13 Ba te wola be nɔɔse tee maŋ,

ŋgba dinaate ŋon tanam na ko e te ɔ ne gyae kolo waa kyaŋ nɛ.

14 Ma te gbalase,

me ŋɔɔ pou ta lee ŋa dedoi man.

Me konɔɔ te yɛɛ ŋgba aŋɔɔ nɛ,

ka te yalakee me tɔɔman.

15 Me nɔɔ ta wolo ŋgba osuŋ yaale nɛ,

me laakem te mataa me nɔɔ adido,

n moo maŋ doosi yeŋ aŋasa man.

16 Balaŋ kumɛɛ te kilisi maŋ,

ŋgba babaase dikpii nɛ,

ba te sɔkee me nyiŋmaase na me naawɔ.

17 Maa tale kala me ŋɔɔ pou,

balaŋ ne fɛɛ sia kɛɛ maŋ na bɛɛ nyaŋee.

18 Be kpala me kanyaŋse,

te be lɔɔ boe ma kegba dɔɔ.

19 Ao Degbeŋgyoo, naa kyaa lem lee me gyaŋ ya,

nyaŋ yɛna me doŋ, yɛɛ bileŋ na n kaa kyɔ maŋ.

20 Lɛɛ maŋ lee yoosila nɔɔ man,

ma nyeedoŋ lee babaase baŋ doŋ man.

21 Lɛɛ maŋ lee dinaatese baŋ nɔɔse man,

lɛɛ maŋ lee ŋale man namense baŋ woose man.

22 Maa baake n yele fa me balaŋ,

maa lese n yele balaŋ degyaŋee man.

23 Ɛmɛɛ baŋ ɛ ne yee Degbeŋgyoo nɛ, ɛ lese ɔ yele!

Ɛmɛɛ Yakɔbe duuluŋmantena pou, ɛ mo obuo fa e!

Ɛmɛɛ Iserae duuluŋmantena pou ɛ yee e!

24 Nawolo nyi ɔ ta leseta ɔ sia yaa waa bɛɛ

ŋon ɔ doo kayeyɛɛ man nɛ ya,

ɔ ta moota ɔ sia weese e ya,

mɔna ɔ ne nyii ɔ kewii baake.

25 Maa lese n yele balaŋ burum degyaŋee man lee keŋ n be yɛɛ nɛ dɔɔ,

maa tɔ ma alaŋaŋ balaŋ baŋ bɛɛ yee neŋ nɛ siaman.

26 Ayematena baa di baa,

baŋ bɛɛ kɛo Degbeŋgyoo nɛ baa lese ɔ yele,

ɛ kekyaabii man dee de fa ŋon.

27 Tɛɛlese pou

baa tɔɔse na baa bese kɔŋ Degbeŋgyoo gyaŋ,

tɛɛlese loŋtona pou,

baa buŋ ɔ siaman.

28 Nawolo nyi Degbeŋgyoo ne diina gyoori,

te ŋon ne diina tɛɛlese dɔɔ.

29 Baŋ bɔɔ nyiŋ ba wose tɛɛle kei dɔɔ pou baa di na baa som e,

baŋ pou baa bese gyu tɛɛle man nɛ,

baŋ bɔɔ gyae baa tale lɛɛ ba wose ya nɛ baa buŋ e.

30 Be duuluŋ man balaŋ baa som e,

kalola kegyakaarese baa kaa nyii Degbeŋgyoo wose man nombia.

31 Baa yako ɔ katenee nombia,

fa bia baŋ be ta lolata wɔ ya nɛ,

Ŋon yɛɛla.