1 Ao Degbeŋgyoo me Wurubuarɛ,

n dɔɔ te ma moo ma wose lɔ.

2 Me ta mo ma wose lɔ n dɔɔ,

naa yele desɛŋ kekyaŋ maŋ,

yaa me kɔlara ke nyaŋee lee me dɔɔ ya.

3 Walaŋ kamasɛ ŋon ɔ mo wose lɔ n dɔɔ na,

desɛŋ be gyae ke kyaŋ e korakora ya.

Mɔna desɛŋ gyae ke kyaŋ baŋ,

bee dii akɛrɛɛ yakaa yakaa nɛ.

4 Degbeŋgyoo, wola maŋ n gbɛɛneŋ,

wola maŋ n detɛese.

5 Mo maŋ ta nya anokoare keŋ man, na n ka wola maŋ nombia,

nawolo nyi nyaŋ yɛna ma nyeelɛɛre Wurubuarɛ ŋon,

n dɔɔ te me loo gyakaa weeya pou.

6 Degbeŋgyoo, tɔɔse n waraŋase kewii na n kegyae keŋ taŋ ɔto ya nɛ,

nawolo nyi ŋe wulaa kyaa leenaŋ gyaŋgba gyaŋgba keŋ.

7 Naa tɔɔse me biatɛɛ nombiakumɛɛ,

na ma deŋeledoŋ keŋ mɔɔ yɛɛ nɛ ya.

Tɔɔse maŋ lee n kegyae keŋ taŋ ɔto ya nɛ dɔɔ,

nawolo nyi nyaŋ Degbeŋgyoo, n dei.

8 Degbeŋgyoo dei te ɔ tenɛɛ.

Mena dɔɔ te ɔ na wola nombiakumɛɛ yɛɛra ɔ gbɛɛneŋ.

9 Ɔ na mo baŋ bɛɛ yɔkɔse ba wose nɛ ta katenee gbɛɛ,

te ɔ na wola wɔ ɔ gbɛɛ.

10 Degbeŋgyoo gbɛɛneŋ pou yɛɛ kegyae na anokoare kedi,

fa balaŋ baŋ bee di ɔ nɔɔkebakesee dɔɔ nɛ.

11 Degbeŋgyoo, lee n yele keŋ dɔɔ,

doo nyi me nombiakumɛɛ boe koraŋ na mo ŋa kyɛɛ maŋ.

12 Nɛnɛɛ amɔte ne yeena Degbeŋgyoo?

Waa wola wɔ gbɛɛ keŋ man baa ta.

13 Ba kekyaabii man gyae ke de fa wɔ,

na be duuluŋmantena kaa mo tɛɛle keŋ ŋgba be dedii nɛ.

14 Degbeŋgyoo na lese ɔ nyeeman nombia wola baŋ bee yee e nɛ,

ɔ ne yele bɛɛ gyeŋ ɔ nɔɔkebakesee keŋ man.

15 Me sia gyakaa Degbeŋgyoo dɔɔ debaŋ kamasɛ,

nawolo nyi ŋon waageŋ ne gyaela waa lese me nawɔɔ lee kɔta man.

16 Besena n sia kɛɛ maŋ na n ke wii maŋ,

nawolo nyi teka maageŋ, te mɛɛ kaa.

17 Lese nombia ŋan ne takaa maŋ nɛ lee me konɔɔ man,

na n ka lese maŋ lee ma wose kekyaŋ man.

18 Kɛɛ me kaale na me kayeyɛɛ,

na n ka mo me nombiakumɛɛ pou kyɛɛ maŋ.

19 Kɛɛ mena keŋ me kɔlara boe,

na mena keŋ bɛɛ kɔla maŋ nideli.

20 Gyee maŋ na n ke lɛɛ ma nyee,

naa yele desɛŋ ke kyaŋ maŋ ya,

nawolo nyi ma te yeu kaa gyoo neŋ.

21 Yela anokoare na katenee ke gyee maŋ,

nawolo nyi nyaŋ Degbeŋgyoo dɔɔ te me loo gyakaa.

22 Ao Wurubuarɛ, lɛɛ Iserae

lee be kayeyɛɛ pou man.