1 Degbeŋgyoo, nyaŋ te me yeuwɔ kaa gyoo,

naa yele desɛŋ ke kyaŋ maŋ korakora ya,

lɛɛ maŋ lee n katenee keŋ dɔɔ.

2 See deŋele na n ke tei maŋ,

kɔŋ bileŋ kaa lɛɛ maŋ,

yɛɛ me kpanaŋ keŋ maa yeu kagyoo,

na dekyaŋ doŋte keŋ gyae ke lɛɛ ma nyee.

3 Nyaŋ yɛna me kpanaŋ na ma dekyaŋ,

lee n yele keŋ dɔɔ ta me siaman na n ke gyee maŋ.

4 Lese maŋ lee kɔta keŋ bɔɔ nyɔɔ maŋ nɛ man,

nawolo nyi nyaŋ yɛna me keyeu kagyoo.

5 Me ta mo ma nyeedoŋ do n nyiŋmaa man,

Degbeŋgyoo me Wurubuarɛ anokoarete lɛɛ maŋ.

6 Mɛɛ kɔla baŋ bɛɛ som bɛɛneŋ behuhoona nɛ,

mɔna maŋ dɔɔ, Degbeŋgyoo dɔɔ te mɛɛ mo ma wose lɔ.

7 Gyae ke yɛɛ maŋ gyoŋ na maa nyaŋee lee n kegyae keŋ dɔɔ,

nawolo nyi n naa me kaale,

te n gyeŋ mena keŋ ma woo na yeyɛɛ.

8 N ta mo maŋ do me kɔlara nyiŋmaase man ya,

mɔna n moo maŋ ka seŋ botɔɔ keŋ fɛlɛɛ.

9 Degbeŋgyoo, wii me waraŋase, nawolo nyi ma wose te kyaŋ maŋ.

Waraŋase te yele mɔɔ ne naa nideli ya,

ma woo na ma wose ne nyii weeleŋ.

10 Weeleŋ kedi te lɛɛ ma kekyaabii man,

te kemutii te lɛɛ me kulutooneŋ pou.

Kayeyɛɛ te yele me doŋ te taŋ,

te me ŋɔɔ mɔ te yɔkɔse.

11 Lee me kɔlara pou dɔɔ,

me ta bese ohuhoo me tebia pou gyaŋ,

me gyoona gbagba koraŋ ne yee maŋ,

baŋ bɛɛ naa maŋ abɔntere man nɛ ne yeu lee me gyaŋ.

12 Ba te wolee maŋ ŋgba ma yeŋae nɛ.

Ma te yɛɛ ŋgba kyooli yaale nɛ.

13 Mee nyii balaŋ burum ne kolosi do dɔŋa deŋela man,

<<Gyakoloŋ dana maŋ yenaŋ kamasɛ.>>

Bɛɛ bake ma nyeeman nyi,

baa ko maŋ.

14 Mɔna me ta mo ma wose lɔ nyaŋ Degbeŋgyoo dɔɔ.

Me yakowɔ nyiaa, <<Nyaŋ yɛna me Wurubuarɛ.>>

15 Ma debaŋ pou doo n nyiŋmaase man,

lɛɛ maŋ lee me kɔlara,

na baŋ bee gegi maŋ nɛ nyiŋmaa man.

16 Booli n sia fa n tobaale,

lɛɛ maŋ lee n kegyae keŋ taŋ ɔto ya nɛ dɔɔ.

17 Degbeŋgyoo, naa yele desɛŋ ke kyaŋ maŋ ya,

nawolo nyi me wiiwɔ fa neŋ.

Mɔna yela desɛŋ ke kyaŋ akpanyanyaŋtena,

na be nɔɔse ke wuu woyadɛɛ.

18 Do akɛrɛɛtena nɔɔse dokɔŋ,

nawolo nyi baŋ bɛɛ gate ba wose te bɔɔ ne bu balaŋ ya nɛ,

bee kolosi agaŋtaŋ man tia baŋ ba tenɛɛ nɛ.

19 N deeli keyɛɛ boe nideli,

n moowɔ see fa baŋ bee yee neŋ nɛ,

te n lesewɔ wola balaŋ baŋ pou

bɔɔ yeu kaa gyoo neŋ nɛ.

20 N moo wɔ weese botɔɔ keŋ n kyaa nɛ,

lee baŋ bɛɛ bake ba nyeeman nɛ gyaŋ.

N moo wɔ see n gyaŋ nideli,

lee laakemse ŋan ŋɛɛ gyae kale nɛ gyaŋ.

21 Ɛ lese Degbeŋgyoo yele,

nawolo nyi ɔ lese ɔ kegyae keŋ dana gyakoloŋ nɛ wola maŋ

debaŋ keŋ me kyaa donɔɔ keŋ bɔɔ tɔ wɔ do nɛ man nɛ.

22 Ma wose ke kyaŋ maŋ nɛ, me yakowɔ nyiaa,

<<Be ta lese maŋ lee n sia man!>>

Mɔna ma ke baake neŋ nyi nyaa kyɔ maŋ na,

n nyii me kasola.

23 Ɛmɛɛ baŋ pou ɛ ne di anokoare fa Degbeŋgyoo nɛ ɛ gyae e.

Degbeŋgyoo ne kɛɛ baŋ bee di anokoare fa e nɛ dɔ,

mɔna ɔ ne wɔŋ agaŋtaŋtena deŋele nideli.

24 Ɛmɛɛ baŋ pou ɛ loo gyakaa Degbeŋgyoo dɔɔ nɛ,

ɛ nyiŋ konɔɔ na n ke yɛɛ doŋ.