1 Ao Wurubuarɛ, de nyii ke na da deŋela,

de naanaɔ yako daa,

ŋan n be yɛɛ ba debaŋ man,

abɔɔ ŋan n be yɛɛ beneŋ beneŋ keŋ.

2 N moo n doŋ gegi tɛɛlese,

te n yelaa de naanaɔ kyaa gbeli botɔɔ,

n yaasee balaŋ baŋ botɔɔ,

te n yelaa de naanaɔ nyiŋa ba wose botɔɔ.

3 Na be yoosila te ba moowɔ lɛɛ tɛɛle keŋ,

yaa be doŋ te ba moowɔ yoodi ya,

mɔna n doŋ,

na n siagbɛɛ keŋmaŋee keŋ lɛɛna wɔ, nawolo nyi n ne gyae wɔ.

4 Nyaŋ yɛna me gyoo na me Wurubuarɛ,

nyaŋ yelela Yakɔbe yoowɔ di.

5 N dɔɔ te de tɛɛwɔ tɛɛse de kɔlara lɔ,

n yele man te de tɛɛwɔ sakatee de kɔlara.

6 Me ta mo ma wose lɔ me baŋdaŋ dɔɔ ya,

te me yoosila be gyae ke yela maa yoodi ya.

7 Mɔna n yelaa de dii de kɔlara dɔɔ,

n yelaa desɛŋ kyaŋa baŋ bɛɛ kɔla daa nɛ.

8 Wurubuarɛ man te dee gyina da wose wee kamasɛ,

te dɛɛ lese n yele kekpaakekpaa.

9 Mɔna nɛnɛɛ n te bɛɛ daa te n yɔkɔse daa,

n bɛɛ tekaa sila de yoonɔɔtena gyu ya.

10 N yelaa de yeuwɔ lee de kɔlara gyaŋ,

te baŋ bɛɛ kɔla daa nɛ nyiŋa da abɔɔ kuu.

11 N moo daa fa nyi baa ko ŋgba namense nɛ,

te n yaasee daa do tɛɛlese man.

12 N te yɔɔ n balaŋ koyadoŋ ya,

te n te nyiŋ kolo lee ba keyɔɔ man ya.

13 N te yele baŋ be kyaa benaana daa nɛ na boŋo,

baŋ be kyaa benaana daa nɛ ne kulu daa na bɛɛ boŋo daa.

14 N te yele tɛɛlese bɛɛ tekaa mo daa yɛɛ kolo ya,

be naa daa na bee kpiisi ba nyeeya.

15 Wee dibiliŋ pou na me doo bo sia kayeŋ man,

te desɛŋ te wuu me siagbɛɛ,

16 lee baŋ bee kulu maŋ te bɛɛ boŋo maŋ,

na me kɔlara baŋ bɛɛ gyae baa tɔ maŋ kom nɛ dɔɔ.

17 Doo nyi da te wolee neŋ ya,

da te bɛɛ nyi dɔɔ di n nɔɔkebakesee keŋ dɔɔ ya,

mɔna kɛŋa pou ne kɔŋ de dɔɔ.

18 De konɔɔse ta lee n wɔle ya,

te de nawɔɔ mɔ te kpase lee n gbɛɛ man ya.

19 Mɔna n te yɛlɛɛ daa kerekere gbougbouse man,

te n moo detiŋtɛɛ tuum wuu de dɔɔ.

20 Nyi deŋ wolee de Wurubuarɛ yele,

yaa deŋ gyinaa de nyiŋmaase tee wurubuarɛ wɔle ŋolo na,

21 nafɔ Wurubuarɛ ba gyem yee?

Nawolo nyi ɔ gyeŋ konɔɔ man nombia aweeseŋ pou.

22 Mɔna lee nyaŋ dɔɔ be gyakaa bɛɛ koe daa,

bɛɛ kɛɛ daa ŋgba namense baŋ bee gyu be kaa ko wɔ nɛ.

23 Degbeŋgyoo, foŋ. Weera te n doowɔ?

Wosi n wose. Naa bɛɛ daa kekpaakekpaa ya.

24 Weera te n moo n sia weese daa,

te n wolee da diyem kena na be kɛɛ ŋere daa do?

25 Ba te wɔŋ daa lɔ akuŋkuŋ man,

te da te dɔɔ tɛɛle man.

26 Koro na n ke kyɔ daa,

lɛɛ daa lee n kegyae keŋ taŋ ɔto ya nɛ dɔɔ.