1 Ao Wurubuarɛ, woŋ dɔɔ te n bɛɛ daa kekpaakekpaa?

Woŋ dɔɔ te n gyeŋa baŋ nideli do n namense baŋ n ne kɛɛle nɛ mena?

2 Tɔɔse tɛɛlese baŋ n be lɛɛ gyaŋgba nɛ,

balaŋ baŋ n be lɛɛ ba nyee mo yɛɛ n dedii,

Siyɔn bula botɔɔ keŋ n kyaa nɛ.

3 Kulu n nae kaa kɛɛ akyaŋse ŋan bɔɔ yɛlɛɛ kekpaakekpaa nɛ.

Kɔlare ŋon te wɔlɛɛ kpene kamasɛ deni fereŋkyeŋ keŋ man.

4 N kɔlara ne fae yeesa botɔɔ keŋ n ne gyaŋeena daa nɛ.

be ta gyene botɔɔ na kawola nyi be te di de dɔɔ.

5 Bɛɛ yɛɛ ŋgba balaŋ baŋ bɔɔ gate abeŋase adido,

baa tuŋii daase laaman nɛ.

6 Be ta mo abeŋase na kpɛkyɛɛse,

wɔlɛɛ daase ŋan bɔɔ mo adao yae ŋa nɛ.

7 Be ta too n fereŋkyeŋ keŋ mɔnaa,

ba te walaa n yele dedoi keŋ.

8 Bɛɛ yako be konɔɔse man nyiaa, <Dee munu wɔ korakora,

ba te wɔlɛɛ botɔɔse ŋan pou bɛɛ som Wurubuarɛ nɛ tɛɛle keŋ dɔɔ.

9 Da te naa kolo lee Wurubuarɛ gyaŋ keŋ dɛɛ mo gyene ya,

Wurubuarɛ gbalara baale ba tekaa kyaa ya,

te de man ŋolo ba gyeŋ debaŋ keŋ ke gyae ke kɔŋ ɔto ya.

10 Wurubuarɛ, woromɔ yaa n kɔlare ŋon waa tina neŋ kekulu yela?

N kɔlare ŋon waa wɔlɛɛ n yele kekpaakekpaa?

11 Woŋ dɔɔ te n wɔŋa n nyiŋmaa lee wɔle, n dunoluŋ nyiŋmaa keŋ?

Wɔŋ ke lese lee n kegba man na n ke wɔlɛɛ wɔ.

12 Mɔna Wurubuarɛ yɛna me Gyoo leenaŋ gyaŋgba gyaŋgba,

ŋon ne lɛɛna balaŋ nyee tɛɛle dɔɔ.

13 Nyaŋ moona n doŋ kpase ɛpo man,

n yɛlɛɛ wonembukum ŋon nyee loŋ man.

14 Nyaŋ yɛlɛɛna wonembukum ŋon nyee,

te n moo e fa wonembia baŋ be kyaa depampaa man nɛ nyi baa di.

15 Nyaŋ yelela te boŋobiise na atiribuŋse torowɔ,

te n yelaa booneŋ ŋan bɛɛ yoo ya nɛ yoowɔ.

16 Tɛɛkena yɛɛ n wui, te nelim mɔ yɛɛ n wui,

nyaŋ moona weese na gyaalaŋ see ŋa akyaese man.

17 Nyaŋ doona tɛɛle kei wuluse pou,

nyaŋ seena dekpao na dugbutu.

18 Degbeŋgyoo, tɔɔse mena keŋ n kɔlara ne kulu neŋ,

na mena keŋ ayiŋtena ne wɔlɛɛ n yele.

19 Na mo n duwuluŋ fa ŋale man wonembiakumɛɛ ya,

naa wolee n balaŋ baŋ bɛɛ naase wɔ diyem nɛ nyeedoŋ kekpaakekpaa ya.

20 Tɔɔse n nɔɔkebakesee keŋ,

nawolo nyi nombiakumɛɛ keyɛɛ te lɛɛ tɛɛle keŋ yenaŋ kamasɛ keŋ ba gyoo detiŋtɛɛ nɛ.

21 Naa yele baa do baŋ bɔɔ ŋere wɔ do nɛ desɛŋ ya,

yela ayematena na baŋ bɔɔ dana kolo ya nɛ ka lese n yele.

22 Ao Wurubuarɛ, koro yoo lɛɛ n wose,

tɔɔse mena keŋ ayiŋtena ne kulu neŋ wee kamasɛ.

23 Naa wolee mena keŋ n kɔlara ne kolosina neŋ baŋ man,

na yeesa ŋan bɛɛ mo fae neŋ debaŋ kamasɛ nɛ ya.