1 ତେନ୍‌ବେଲା ହିଜକୀୟନେ ରଗ୍ ଆସାଃଚେ ଦୁର୍ବଲ୍‌ ଡିଙ୍ଗ୍‌ଲାଏଃକେ । ତେନ୍‌ଇଡ଼ିଂ ଆମୋସନେ ଉଙ୍ଗ୍‌ଡେ ଯିଶାଇୟ ବବିସତ୍‌ ବକ୍ତା ମେଁ ଡାଗ୍ରା ପାଙ୍ଗ୍‌ଚେ ବାସଙ୍ଗ୍‌କେ, ମାପ୍‌ରୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ନାଁ ନିଜର୍‌ ଡୁଆ ସାମୁଆଁରେ ସଜେ; ମେଃଡାଗ୍ଲା ନାଁ ନାଗୁଏଃଏ, ନାମ୍ବ୍ର ଣ୍ଡୁ । 2 ଅଃକେନ୍‌ରେ ହିଜକୀୟ କୁଗ୍‌ଡାସା ପାକା ସାର୍ମୁଆଃ ଆଃଆଣ୍ଡେଚେ ମାପ୍‌ରୁନେ ଡାଗ୍ରା ପାର୍‌ତନା ଡିଂଚେ ବାସଙ୍ଗ୍‌କେ, 3 ଅ ମାପ୍‌ରୁ, ନିଂ ଗୁଆରେ ଣ୍ଡିଂକେ, ନିଂ ଡିରକମ୍‌ ସତ୍‌ ବାବ୍‌ରେ ଆରି ଦରମ୍‌ ମନ୍‌ ଏଃତେ ନାଁ ସେଃମଁ ଅଲେଙ୍ଗ୍‌ଡାଲ୍ୟା ଡିଂମ୍ବକେ ଆରି ନାଁ ମ୍‌ମୁଁଆଃନ୍ନିଆ ନିମାଣ୍ଡାଃ କାମ୍‌ ଡିଂମ୍ବକେ, ଆକେନ୍‌ ଏବେ ମନେ ଏତେ । ଆରି, ହିଜକୀୟ ଜାବର୍‌ ଅଃକେ । 4 ଅଃତେନ୍‌ବେଲା ଯିଶାଇୟ ଡାଗ୍ରା ମାପ୍‌ରୁନେ ସାମୁଆଁ ୱେଚାଃକେ । 5 ପେ ୱେଚେ ହିଜକୀୟକେ ବାସଙ୍ଗ୍‌, ମାପ୍‌ରୁ, ନାଁନେ ଅଃସେଣ୍ଡ୍ରେ ଦାଉଦନେ ପର୍‌ମେସର୍‌ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ନେ ନାଁନେ ପାର୍‌ତନା ଦ୍ରିଗ୍‌ନେଲେଃକେ, ନାଁନେ ଡେଃମୁଁଆଃ କେନେଲେଃକେ, କେଲା, ନେ ନାଁନେ ବ୍ରୁଆନେ ବ‍ଏସ୍‌ ପନ୍ଦ୍‌ର ମୁଆଁ ଜାବର୍‌ ନେରାଃଡିଂଏ । 6 ବାରି, ନେ ଆନାକେ ଆରି ଆକେନ୍‌ ଇନିକେ ଅଶୂରନେ ରାଜା ନ୍ତିବାନ୍‌ ରକ୍ୟା ନେଡିଂଏ ଆରି ନେ ଆକେନ୍‌ ଇନିନେ ସାପଟ୍‌ ନେଡିଂଏ । 7 ଆରି, ମାପ୍‌ରୁ ନିଜେ ଗୁଆର୍‌କ୍ନେ ସାମୁଆଁ ଜେ ସପଲ୍‌ ଡିଂଏ, ନାଁ ଆଡ଼ାତ୍ରା ମାପ୍‌ରୁନେବାନ୍‌ ଆକେନ୍‌ ଚିନ୍‌ ଡିଂଏ; 8 କେଲା, ନେ ଆହସ୍‌ନେ ସ୍ନି ଚବିସ୍‌ ମିନିଟ୍‌ରେ ସ୍ନିନେ ନ୍‌ଲୁଡ଼୍ୟାଃ ଉଃଡ଼ି ସିସେ ୱେଲେଃକେ, ଆତେନ୍‌ ଗୁଆ ପାଉଁଚ୍‌ ପ୍ଲାଃ ଆଃଆଣ୍ଡେ ଡୁଙ୍ଗ୍‌ନେପାଙ୍ଗ୍‌ଏ । ତେସାଃ ଚବିସ୍‌ ମିନିଟ୍‌ରେ ସ୍ନି ମୁଃଡ଼ି ଗୁଆ ପାଉଁଚ୍‌ ସିସେ ୱେଲେଃଗେ, ପ୍ଲାଃ ଅଃତେନ୍‌ ଆଣ୍ଡେ ପାଙ୍ଗ୍‌କେ । 9 ଯିହୁଦାନେ ରାଜା ହିଜକୀୟ ଆଃସିଚେ ନିଜର୍‌ ଆଃସିବାନ୍‌ ନିମାଣ୍ଡାଃ ଡିଂକ୍ନେ ଇଡ଼ିଂ ଆକେନ୍‌ ସାମୁଆଁ ଗୁଆର୍‌କେ, ଜେ, 10 ନିଂ ମ୍ବାସଙ୍ଗ୍‌କେ, ନିଂ ନିଂନେ ବ୍ରୁଆନେ ମଜେ ବେଲା ପାତାଲ୍‌ପୁର୍ ୱେନେ ଗାଲିଅରିଆ ଙ୍ଗାଏ; ନିଂ ନିଂନେ କ୍ଲିଗ୍‌ ମୁଆଁ ବାକି ଲେଃକ୍ନେ ଜିବନ୍‌ବାନ୍‌ ବ୍ରୁଆନେ ଇକ୍‌ଚା ଡିଂକେ । 11 ନିଂ ମ୍ବାସଙ୍ଗ୍‌କେ ନିଂ ମାପ୍‌ରୁକେ, ଜିବିତ୍‌ଇଂନେ ଦେସ୍‌ଅରିଆ ମାପ୍‌ରୁକେ ନ୍ନାକେ ଣ୍ଡୁ; ନିଂ ମଚ୍‌ପୁର୍‌ଅରିଆ ବାସାଲେଃକ୍ନେ ରେମୁଆଁଇଂନେ ଏଃତେ ରେମୁଆଁକେ ଆରି ନ୍ନାକେ ଣ୍ଡୁ । 12 ନିଂନେ ବ‍ଏସ୍‌ ସ୍ଲ ଡିଂଲେଃକେ ଆରି ମେଣ୍ଡା ତୁର୍ତ୍ୟାରେନେ କୁଡ଼ିଆ ରକମ୍‌ ନିଂ ବାନ୍‌ ଗୁଚେ ଲେଃକେ; ନିଂ ସୁତା ରକମ୍‌ ନିଂନେ ଜିବନ୍‌ ଡିଡାମ୍ବକେ; ମେଁ ଆନିଂକେ ପାଟାଇ ତେନେ ଜନ୍ତ୍ରବାନ୍‌ କାଟେ ବିଃଏ; ମୁଇଂ ସ୍ମି ମିଡିଗ୍‌ ବିତ୍ରେ ମେଁ ଆନିଂକେ ଆଃଡା ବିଏ । 13 ନେଙ୍ଗ୍ ଞ୍ଜିର୍‌ ଜାକ ନିଜ୍‌କେ ସାନ୍ତି ଣ୍ଡ୍ରାଃଡିଂକେ; ଡିରକମ୍‌ ସିଂଅଁ ଦେତ୍‌ରକମ୍‌ ମେଁ ନିଂନେ ଞ୍ଚିୟା ସାପା ଗୁଣ୍ଡ୍‌ ଆଃଡିଂଡିଂକେ; ମୁଇଂ ସ୍ମି ମିଡିଗ୍‌ ବିତ୍ରେ ନାଁ ଆନିଂକେ ନାବାଗୁଏଃଏ । 14 ଡିରକମ୍‌ ଅଁସ୍‌ରାଲି ପିଗ୍‌ ଆରି ବୁଟିବଗ୍‌ ପିଗ୍‌ ସବ୍‌ଦ ଡିଂଆର୍‌ଏ, ଦେତ୍‌ରକମ୍‌ ନିଂ ଚିଁ ଚିଁ ସବ୍‌ଦ ଣ୍ଡିଂକେ; ନିଂ କୁକୁର୍ୟାଃ ପିଗ୍‌ ରକମ୍‌ ଙଃକେ; ଆଡ଼ାତ୍ରା କେ କେଚେ ନିଂନେ ମ୍‌ମୁଁଆଃ କାନା ଡିଂଡିଂକେ; ଅ ମାପ୍‌ରୁ, ଆନିଂକେ ଆକେନ୍‌ ସାପା କଷ୍ଟବାନ୍‌ ରକ୍ୟା ଡିଂ । 15 ନିଂ ମେଃନେ ମ୍ବାସଙ୍ଗ୍‌ଏ ? ମେଁ ତ ଆନିଂକେ ବାସଙ୍ଗ୍‌ବକେ, ଆରି ଡିଗ୍‌ ମନ୍‌କେମନ୍‌ ଆତେନ୍‌ ପୁରନ୍‌ ନିଂ ନିଂନେ ଜିବନ୍‌ନେ କସ୍ଟରେ ଜିବନ୍‌ସାରା ଲେଃଗା ଲେଃଗା ଙଲେଙ୍ଗ୍‌ଏ । 16 ଅ ମାପ୍‌ରୁ, ଆକେନ୍‌ ସାପା ବାନ୍‌ ରେମୁଆଁଇଂ ବ୍ରୁଆଆର୍‌ଏ, ଆରି ଆତ୍‌ଅରିଆ ଆଃ ପୁରାପୁରି ବାବ୍‌ରେ ନିଂନେ ଆତ୍ମାନେ ଜିବନ୍‌ ଲେଃକେ, ଏନ୍‌ସାଃ ନାଁ ଆନିଂକେ ନିମାଣ୍ଡାଃ ଆଃଡିଂଚେ ଆଃମ୍ବ୍ର । 17 କେଲା, ନିଂ ନିଂନେ ସାନ୍ତି ଆତ୍ଲା ମ୍ନାଃ ଦୁକ୍‌ ମ୍ବାକେ; ମାତର୍‌ ନାଁ ନିଂନେ ଜିବନ୍‌ ଆଡ଼ାତ୍ରା ଆଲାଦ୍‌ ଡିଂଚେ ବିନାସ୍‌ ଡିଂନେବାନ୍ ଆମେକେ ରକ୍ୟା ନାଡିଂକେ; ମେଃଡାଗ୍ଲା ନାଁ ନାନେ ପ୍ଲାଃ ପାକା ନିଂନେ ପାପ୍‌ ସାପା ଜଗ୍‌ତ୍ଲାଗ୍‌ ବିଃନାବକେ । 18 ମେଃଡାଗ୍ଲା ପାତାଲ୍‌ ନାଁନେ ପ୍ରସଂସା ଡିଂ ଆୟା ଣ୍ଡୁ, ମରନ୍‌ ନାଁନେ ଗୁନ୍‌ ସାର୍‌ ଆୟା ଣ୍ଡୁ; ରାଃଚ୍ୟା ନିଆ ୱେଣ୍ଡ୍ରେଇଂ ପେନେ ସତ୍‌ ସାମୁଆଁକେ ବାସଙ୍ଗ୍ଆୟାଆର୍‌ ଣ୍ଡୁ । 19 ଡିରକମ୍‌ ଏଃକେ ନିଂ ଡିଂଣ୍ଡିଂକେ, ଦେତ୍‌ରକମ୍‌ ଜିବିତ୍‌ ରେମୁଆଁ ଡିଙ୍ଗ୍ ଆର୍‌ଏ, ମୁଇଂ ଜିବିତ୍‌ ରେମୁଆଁ ନାଁନେ ପ୍ରସଂସା ଡିଂଏ; ବାଡ଼େଇଙ୍ଗ୍‌ ମେଇଂନେ ଉଙ୍ଗ୍‌ଇଂକେ ନାଁନେ ସତ୍‌କେ ଆଃମ୍ୟାଃଏ । 20 ମାପ୍‌ରୁ ନିଂନେ ପାପ୍‌ ବାନ୍‌ ଉଦାର୍‌ ଡିଂନେ ତିଆର୍‌ ଡିଂଲେଃକେ; ଏନ୍‌ସାଃ ନେ ଜିବନ୍‌ ଜାକ ମାପ୍‌ରୁନେ ଡୁଆନ୍ନିଆ କାଣ୍ଡେଙ୍ଗ୍ ବଗ୍‌ଡେଙ୍ଗ୍‌ଚେ ନିଂନେ ଅସ୍‌ମାର୍‌ ନାସାର୍‌ଏ । 21 ଯିଶାଇୟ ବାସଙ୍ଗ୍‌ବଗେ, ମେଇଂ ଲିୱା ଚାଲିକେ ଉଃକ୍ନେ ସିର ରାଙ୍ଗ୍‌ୱେଚେ ଇମୁର୍‌ ଆଡ଼ାତ୍ରା ଲିଗ୍‌ଆର୍‌ଲେଃ, ତେଲା ମେଁ ନିମାଣ୍ଡାଃ ଡିଂଏ । 22 ହିଜକୀୟ ଡିଗ୍‌ ବାସଙ୍ଗ୍‌ବଗେ, ନିଂ ତ ମାପ୍‌ରୁନେ ଡୁଆ ଉଁୱେଏ, ଆତ୍‌ନେ ଚିନ୍‌ ମେଃନେ ?