1 ଅ ବାଞ୍ଜି, ଜାଣ୍ଡେକି ଗଡ଼େଅ ଜନମ୍‌ ପେବିକ୍ନେ ସେଲାମ୍ବୁଏଃଇଂ, ପେ ଅସ୍‌ମାର୍‌ ସାର୍‌ପା, ଅ ସେଲାମ୍ବୁଏଃଇଂ ଗର୍ବେଅରିଆ ଦୁକା ବାଣ୍ଡ୍ରେଇଂ, ପେ ୱାଃସାର୍‌ଚେ ସାର୍‌ପା ଆରି ସାର୍ଦା ଡିଙ୍ଗ୍‍ପା, ମେଃଡାଗ୍‌ଲା ମାପ୍‌ରୁ ବାସଙ୍ଗ୍‌ଡିଂକେ, ବିହେକ୍ନେ ସେଲାମ୍ବୁଏଃନେ ଗଡ଼େଅବାନ୍‌ ଚାଡ୍‍ରି ସେଲାମ୍ବୁଏଃନେ ଗଡ଼େଇଂ ଜାବର୍‌ । 2 ପେ ନିଜର୍‌ କୁଡ଼ିଆନେ ଜାଗା ଆଃମ୍ନାଃପା ଆରି ମେଇଂ ପେ ବାସାପେଡିଙ୍ଗ୍‌କ୍ନେ ପର୍‌ଦାକେ ଅସାର୍‌ ଆଃଡିଂଆର୍‌ଲେଃ; ସାଃଚେ ଆବଗ୍‌ପା; ପେନେ ଗେହେଃ ସାପା ଆଃଚ୍ଲେବିଃପା ଆରି କୁଟି ସାପା ଡାଟ୍‌ ଆଃଡିଂପା । 3 ମେଃଡାଗ୍‌ଲା ପେ ବେଃସ୍ୟା ଆରି ଇଞ୍ଚଙ୍ଗ୍‌ତି ପାକା ବେପ୍ରେ ୱେଏ ଆରି ପେନେ ବଂସ ବିନ୍‌ ଦେସ୍‌ନେ ରେମୁଆଁଇଂକେ ଅଦିକାର୍‌ ଡିଂଆର୍‌ଏ ଆରି ରେମୁଆଁଗନ୍‌ ଆଲେଃକ୍ନେ ଇନି ସାପାକେ ବାସାନେ ଜାଗା ଆଃଡିଂଏ । 4 ଆବ୍‌ଟଗେପା; ମେଃଡାଗ୍‌ଲା ପେ ଗିଆସଃ ପେଡିଂ ଣ୍ଡୁ । କି ନାନେ ସାର୍ମୁଆଃ ଆରାଃସୁଏଃଗେ; ମେଃଡାଗ୍‌ଲା ଆନାକେ ଗିଆସଃ ଆରାଃଡିଂ ଣ୍ଡୁ; ପେ ନିଜର୍‌ ସେଲାଙ୍ଗିରେ କେଲାନେ ଗିଆସଃ ଆବଃପେବିଃଏ ଆରି ପେ ନିଜର୍‌ ଗୁଏଃସାଙ୍ଗ୍‌କୁଏଃ ବେଲାନେ ଅପମାନ୍‌ ଆରି ଆଏତେଗେପା । 5 ମେଃଡାଗ୍‌ଲା ଆପେକେ ଆଃରେଣ୍ଡ୍ରେ ପେନେ ଆଣ୍ଡା; ସାପାବାନ୍ ବପୁ ମାପ୍‌ରୁ ମେଁନେ ମ୍ନି ଆରି ଇସ୍ରାଏଲ୍‌ନେ ପବିତ୍ର ରକମ୍‌ ନାନେ ରକ୍ୟା ଡିଂଣ୍ଡ୍ରେ; ମେଁ କ୍ଲିଗ୍‌ ମଞ୍ଚ୍‌ପୁର୍‌ନେ ପର୍‌ମେସର୍‌ ଡାଗ୍‌ଚେଃ ଉଡ୍ରା ଡିଂଏ । 6 ମେଃଡାଗ୍‌ଲା ପେନେ ପର୍‌ମେସର୍‌ ବାସଙ୍ଗ୍‌ଡିଂକେ, ଚାଡ୍‍ରି ଆରି ମନ୍‌ ଦୁକ୍‌ରେ ଲାଏଃକ୍ନେ ସେଲାମ୍ବୁଏଃ ଣ୍ଡୁଲା ଆସେଲ୍ୟାଃକ୍ନେ ସେଲାମ୍ବୁଏଃ ରକମ୍‌ ସଦାପ୍ରବୁ ଆନାକେ ୱାବ‍ଆର୍‌କେ । 7 ନେ ଉଃଡ଼ିପର୍‌ ନ୍‌ସାଃ ଆନାକେ ଆନ୍ତାର୍‌ନେବକେ; ମାତର୍‌ ମ୍ନାଦୟାରେ ଆନାକେ ୱାନେବକେ । 8 ଜାବର୍‌ ରିସା‍ରେ ନେ ମୁଇଂ ମିନିଟ୍‌ ମାତର୍‌ ନିଜର୍‌ ସାର୍ମୁଆଃ ନାଁବାନ୍‌ ନେରାଃବୁଃଡ଼ିକେ; ମାତର୍‌ ମାଡାନେ କାଲ୍‌ ଜାକ ଲେଃନେ ଦୟା‍ରେ ନେ ନାଁ ଆଡ଼ାତ୍ରା ଦୟା ନେଡିଂଏ, ଆକେନ୍‌ ନାଁନେ ରକ୍ୟା ଡିଂଣ୍ଡ୍ରେ ମାପ୍‌ରୁ ବାସଙ୍ଗ୍‌ଡିଂକେ । 9 ମେଃଡାଗ୍‌ଲା ଆକେନ୍‌ ନେ ଆଡ଼ାତ୍ରା ନୋହ ବେଲାନେ ଣ୍ଡିଆଃ ରକମ୍‌ ଲାଏଃକେ; ନୋହ ବେଲାନେ ଣ୍ଡିଆଃ ଆରି ମଞ୍ଚ୍‌ପୁର୍‌କେ ଆରାଃଲଗ୍‌ଡ୍ୟାଃ ଡାଗ୍‌ଚେଃ ନେ ଡିରକମ୍‌ ପାର୍‌ମାନ୍‌ ଡିଂନେବକେ, ଦେତ୍‌ରକମ୍‌ ନେ ନାଁ ଆଡ଼ାତ୍ରା ରିସା, ନେଡିଙ୍ଗ୍‌ କି ଦମକ୍‌ ନେଡିଂ ଣ୍ଡୁ ଡାଗ୍‌ଚେଃ ପାର୍‌ମାନ୍‌ ଡିଂନେବକେ । 10 ମେଃନ୍‌ସାଃଡାଗ୍‌ଲା ନାଁ ଆଡ଼ାତ୍ରା ଦୟା ଡିଂବକେ ଆଣ୍ଡିନେ ମାପ୍‌ରୁ, ମେଁ ବାସଙ୍ଗ୍‌ଡିଂକେ, କଣ୍ଡାଇଂ ବୁଟମେଗ୍‌ଚେଃ ଗୁଚେୱେଆର୍‌ଏ ଆରି କଣ୍ଡାଇଂ ଲିପିଗ୍‌ ୱେଆର୍‌ଏ; ମାତର୍‌ ନେନେ ଦୟା ନାଁନେବାନ୍‌ ଆବ୍‌ଟମେଗ୍‌ ଣ୍ଡୁ, ଣ୍ଡୁଲା ନେନେ ସାନ୍ତିନେ ନିଅମ୍‌ ଆପିଗ୍‌ ଣ୍ଡୁ ।

11 ଅ ଦୁକ୍‌ରେ ଲାଏଃକ୍ନେ ସେଲାମ୍ବୁଏଃ, ୱେଗୁର୍‌କେ ବୁଟମେଗ୍‌ଣ୍ଡ୍ରେ ଆରି ସାନ୍ତିରେ ଆଲେଃକ୍ନେଣ୍ଡ୍ରେ, କେଲାପା, ନେ ଗୁଲୁଏ ସୁନ୍ଦର୍‌ ବାନା‍ଅରିଆ ନାଁନେ ବ୍ରି ନେରାଃକ‍ଏ ଆରି ନୀଳମଣି ଏଃତେ ନାଁନେ ପାଣ୍ଡୁସନ୍‌ ନେରାଃରେଏ । 12 ନେ ପଦ୍ମରାଗ ମଣୀ ଏଃତେ ନାଁନେ ମନ୍ଦିର୍‌ ଟିପେନିଆ ଆରି ସୂର୍ଯ୍ୟକାନ୍ତ ମଣୀ ଏଃତେ ନାଁ ଇନିନେ ବାଜାର୍‌ ସାପା ଜାବର୍ ଦାମ୍‌ନେ ସବାକ୍ନେ ମଣୀ ଏଃତେ ନାଁନେ ସାପା ଏରିଆ ନେଃରାଃରେପା । 13 ନାଁନେ ଗଡ଼େଇଂ ସାପାରେ ସଦାପ୍ରବୁନେ ବାନ୍ ଗ୍ୟାନ୍ ବାଆର୍‌ଏ ଆରି ନାଉଙ୍ଗ୍‌ଇଂନେ ଜାବର୍‌ ସାନ୍ତି ଡିଂଏ । 14 ନାଁ ଦରମ୍‌ ଡିଙ୍ଗ୍‌ଚେ ସାନ୍ତିରେ ନାଲେଃଏ; ନାଁ ତାଙ୍ଗ୍‌କିଗ୍‌ବାନ୍‌ ସ୍ଲ ନାଲେଃଏ, ମେଃଡାଗ୍‌ଲା ନାଁ ନାବୁଟ ଣ୍ଡୁ; ବାରି ନାଁ ବୁଟମେଗ୍‌ନେବାନ୍‌ ସୁଲ ନାଲେଏ, ମେଃଡାଗ୍‌ଲା ଆତେନ୍‌ ନାଁ ଡାଗ୍ରା ଆପାଙ୍ଗ୍‌ ଣ୍ଡୁ । 15 କେଲା, ରେମୁଆଁଇଂ ଗହଲି ଡିଂୟାଆର୍‌ଏ, ମାତର୍‌ ନେବାନ୍‌ ଣ୍ଡୁ; ଜାଡିଗ୍‌ ନାଁ ବିରୁଦ୍‌ରେ ମୁଇଂଡାଗ୍ରା ଡିଂଏ, ମେଁ ନାଁ ନ୍‌ସାଃ ପରାସ୍ତ ଡିଂଏ । 16 କେଲା, ମୁଃଡ଼ି କାମାର୍‌ ଏଲେଃସକେ ସୁଆ ଆଃଡୁଆଚେଃ ଆଃଗିଃଏ ଆରି ନିଜର୍‌ କାମ୍‌ ନ୍‌ସାଃ ଜିନିସ୍‌ ଆଃରେଏ, ନେ ମେଁନେ ଆଃରେନେବକେ ଆରି ବିନାସ୍‌ ଆଃଡିଂନ୍‌ସାଃ ବିନାସ୍‌ ଆଃଡିଙ୍ଗ୍‌ଣ୍ଡ୍ରେକେ ଆଃ ନେ ଆଃରେ ନେବକେ । 17 ମେଃଡିଗ୍‌ ଅସ୍ତ୍ରସସ୍ତ୍ର ନାଁ ବିରଦ୍‌ରେ ତିଆର୍‌ ଡିଂଏ, ଆତେନ୍‌ ପୁରନ୍‌ ଆଡିଂ ଣ୍ଡୁ ଆରି ଜା ସାପାନେ ନ୍ଲ୍ୟା ବିଚାର୍‌ଅରିଆ ନାଁ ବିରୁଦ୍‌ରେ ବାସଙ୍ଗ୍‌ଏ, ନାଁ ଆମେକେ ଦସି ନାରାଃଡିଂଏ । ମାପ୍‌ରୁନେ ଦାସ‍ଇଂନେ ଅଦିକାର୍‌ ଆରି ଆନେକେ ବିଃବ୍ନ ମେଁନେ ଦାର୍ମିକତା ଆକେନ୍‌, ଆକେନ୍‌ ମାପ୍‌ରୁ ବାସଙ୍ଗ୍‌ଡିଂକେ ।