1 ଏ ଉଗ୍‌ଡ୍ୟାଃରେଇଂ, ପେ ଣ୍ଡିଆଃ ଡାଗ୍ରା ପାଙ୍ଗ୍‌ଲାପା, ବାରି ଜାନେ ଡାଗ୍ରା ଡାବୁ ଣ୍ଡୁ, ମେଁ ପାଙ୍ଗ୍‌ଲେଃ; ପେ ପାଙ୍ଗ୍‌ଲାପା, ବିଆର୍‌ପା ଆରି ଉଗ୍‌ଚଙ୍ଗ୍‌ପା; ଆଁ, ପାଙ୍ଗ୍‌ଲାପା, ଡାବୁ ଆରି ବିନା ମୁଲ୍ୟରେ ଦ୍ରାକ୍ୟା ରସ୍‌ ଆରି ତ୍ରାଃଡ଼୍ୟାଃ ବିଆର୍‌ପା । 2 ଆଣ୍ଡିନେ କାଦି ଣ୍ଡୁ, ଆତେନ୍‌ ନ୍‌ସାଃ ପେ ମେଃନ୍‌ସାଃ ଡାବୁ ସଃ ପେଡିଂକେ ? ଆରି ଆଣ୍ଡିନେ ସାନ୍ତି ଆବିଃ ଣ୍ଡୁ, ତେନ୍‌ ନ୍‌ସାଃ ମେଃନ୍‌ସାଃ ପେ କସ୍‌ଟ କାମ୍‌ ଡିଂପେଡିଂକେ ? ମନ୍‌ଦିଆନ୍‌ ବିଃଚେ ନିଂନେ ସାମୁଆଁ ଦ୍ରିଗ୍‌ ଆରି ନିମାଣ୍ଡାଃ ଜିନିସ୍‌ ଉଗ୍‌ଚଙ୍ଗ୍‌ ଆରି ନିମାଣ୍ଡାଃ ନିମାଣ୍ଡାଃ ଜିନିସ୍ଅରିଆ ପେନେ ଜିବନ୍‌କେ ସାନ୍ତି ଆଃଡିଂନ୍‌ସାଃ ବିଃପା । 3 ଆଃନାଙ୍ଗ୍‌ଲୁଗ୍‌ ଆରି ନେ ଡାଗ୍ରା ପାଙ୍ଗ୍‌ଲା; ଦ୍ରିଗ୍‌, ତେଲା ପେନେ ଜିବନ୍‌ ମ୍ବ୍ର‍ଏ; ବାରି, ନେ ପେ ଏଃତେ ମୁଇଂ କାଲାଆଃ ଲେଃନେ ନିଅମ୍‌, ଡାଗ୍‌ଲା, ଦାଉଦ ଡାଗ୍ରା ଡିଲାଡିଗ୍‌ ଦୟା ତିଆର୍‌ ନେଡିଂଏ । 4 କେଲା, ନେ ଆମେକେ ରେମୁଆଁ ଜାତିନେ ସାକି ରକମ୍‌ ଆଃଡିଙ୍ଗ୍‌ନେବକେ, ରେମୁଆଁ ଜାତିନେ ସାମ୍‌ନାରେ ଆଦେସ୍‌ ବିଣ୍ଡ୍ରେ ରକମ୍‌ ବାଚେ ନେବକେ । 5 କେଲା, ମୁଃଡ଼ି ରେମୁଆଁକେ ନାଁ ନାମ୍ୟାଃକେ ଣ୍ଡୁ, ଆମେକେ ନାଁ ନାୱାଏ ଆରି ମୁଃଡ଼ି ରେମୁଆଁ ଆନାକେ ଆମ୍ୟାଃକେ ଣ୍ଡୁ, ମେଁ ନାଁ ଡାଗ୍ରା ୱିର୍‌ଏ, ସଦାପ୍ରବୁ ନାଁନେ ପର୍‌ମେସର୍‌ନେ ଆରି ଇସ୍ରାଏଲ୍‌ନେ ପବିତ୍ର ନ୍‌ସାଃ ଆକେନ୍‌ ଗଟେଏ; ମେଃଡାଗ୍‌ଲା ମେଁ ଆନାକେ ଗ‍ଉରବ୍‌ ଡିଂବ‍ଆର୍‌କେ । 6 ଉଡ଼ିଦିନ୍‌ ଜାକ ସଦାପ୍ରବୁକେ ପେଅବା ଣ୍ଡୁ ଆତେନ୍‌ ପର୍‌ ଜାକ ପେ ତୁର୍‌ପା, ଉଃଡ଼ିସି ଜାକ ମେଁ ଡାଗ୍ରା ଲେଃକେ, ଅଃତେନ୍‌ସି ଜାକ ମେଁ ଡାଗ୍ରା ପାର୍‌ତନା ଡିଂପା । 7 ଦୁସ୍‌ଟ ନିଜର୍‌ ଗାଲି ଆରି ଦରମ୍‌ ରେମୁଆଁ ନିଜର୍‌ ଇକ୍‌ଚା ଆନ୍ତାର୍‌ ବିଃଲେଃ; ବାରି, ମେଁ ମାପ୍‌ରୁ ଡାଗ୍ରା ଆଣ୍ଡେଲେଃ, ତେଲା ମେଁ ଆମେକେ ଦୟା ଡିଂଏ; ଆରି, ମେଁ ନେନେ ପର୍‌ମେସର୍‌ନେ ଡାଗ୍ରା ଆଣ୍ଡେଲେଃ, ମେଃଡାଗ୍‌ଲା ମେଁ ଜାବର୍‌ ବାବ୍‌ରେ କେମା ଡିଂଏ । 8 ମେଃଡାଗ୍‌ଲା ମାପ୍‌ରୁ ବାସଙ୍ଗ୍‌ଡିଂକେ, ନେନେ ଇକ୍‌ଚା ସାପା ପେନେ ଇକ୍‌ଚା ରକମ୍‌ ଣ୍ଡୁ, କି ପେନେ ଗାଲି ସାପା ନେନେ ଗାଲି ରକମ୍‌ ଣ୍ଡୁ । 9 ମେଃଡାଗ୍‌ଲା ମଞ୍ଚ୍‌ପୁର୍‌ବାନ୍‌ କିତଙ୍ଗ୍‌ଇନି ଡିରକମ୍‌ ତିଆର୍‌, ଦେତ୍‌ରକମ୍‌ ନେନେ ଗାଲି ସାପା ପେନେ ଗାଲିବାନ୍‌ ଆରି ନେନେ ଉପାୟ୍ ସାପା ପେନେ ଉପାୟ୍ ବାନ୍‌ ତିଆର୍‌ ଲାଏଃକେ । 10 ମେଃଡାଗ୍‌ଲା ଡିରକମ୍‌ ଗୁର୍‌କ୍ନେ ଣ୍ଡିଆଃ ଆରି ତାଉଲଃ କିତଙ୍ଗ୍‌ବାନ୍‌ ଆଲ ପାଙ୍ଗ୍‌ଏ ଆରି ଆଡ଼ାତ୍ରା ଆଣ୍ଡେ ଆୱେ ଣ୍ଡୁ, ମାତର୍‌ ତୁବଃକେ ନରମ୍‌ ଆଃଡିଂଏ, ବାରି ଚୁଚୁ ଆରି ଚେଃମୁଆଁ ଗୁଲୁଏ ଆଃପଃଡ଼୍ୟାଚେଃ ବିବିଗ୍‌ଣ୍ଡ୍ରେକେ ମୁଞ୍ଜି ବିଃଏ ଆରି ଚୁଚଙ୍ଗ୍‌ଣ୍ଡ୍ରେକେ କାଦି ବିଃଏ; 11 ନେ ତୁମୁଁଆଃବାନ୍‌ ତାର୍‌କ୍ନେ ସାମୁଆଁ ଦେତ୍‌ରକମ୍‌ ଡିଂଏ; ଆତେନ୍‌ ସପଲ୍‌ ମାଡିଂଚେଃ ନେ ଡାଗ୍ରା ଆଣ୍ଡେ ଆପାଙ୍ଗ୍‌ ଣ୍ଡୁ, ମାତର୍‌ ନେ ମେଃ ଇକ୍‌ଚା ନେଡିଂଏ, ଆତେନ୍‌ ପୁରନ୍‌ ଡିଂଏ ଆରି ମୁଃଡ଼ି କାମ୍‌ ନ୍‌ସାଃ ନେ ନେବେଏ, ମେଁ ଆତେନ୍‌ ସପଲ୍‌ ଆଡିଙ୍ଗ୍‌ଏ । 12 ଏନ୍‌ସାଃ ପେ ସାର୍ଦାରେ ତାର୍‌ଚେଃ ସାନ୍ତିରେ ସିସେ ସିସେ ପେୱେଏ; କଣ୍ଡା ଆରି ମ୍ନାଃ କଣ୍ଡାଇଂ ପେନେ ସେଃମଁ ୱାଃସାର୍‌ଚେଃ ଅସ୍‌ମାର୍‌ ସାର୍‌ଆର୍‌ଏ ଆରି ତୁବଃଅରିଆନେ ସ୍ଲାଃ ସାପା ବାଃତିଆର୍‌ଏ । 13 ଗ୍ରେଃ ସ୍ଲାଃ ବାଦୁଲ୍‌ ଦେବଦାରୁ ଆରି ଗ୍ରେଃ ଲାଟା ବାଦୁଲ୍‌ ମେହେନ୍ଦି ସ୍ଲାଃ ପଃଡ଼୍ୟାଃଏ; ବାରି, ଆତେନ୍‌ ମାପ୍‌ରୁନେ ଚିନ୍‌ ରକମ୍‌ ଆରି ନସ୍‌ଟ ମାଡିଂନେ କାଲାଆଃ ଲେଃନେ ଚିନ୍‌ ରକମ୍‌ ଡିଂଏ ।