1 ମାପ୍‌ରୁ ସଦାପ୍ରବୁନେ ଆତ୍ମା ନେଙ୍ଗ୍‍ନ୍ନିଆ ଲାଏଃକେ; ମେଃଡାଗ୍‌ଲା ଦରମ୍‌ ରେମୁଆଁଇଂନେ ଡାଗ୍ରା ମାପ୍‌ରୁନେ ସାମୁଆଁ ବାସଙ୍ଗ୍‌ନେ ନ୍‌ସାଃ ସଦାପ୍ରବୁ ଆନେଙ୍ଗ୍ ସ୍ରି ଆସିର୍ବାଦ୍‌ ଡିଂବକେ; ମେଁ ମନ୍‌ ବାଙ୍ଗେ ଲାଏଃକ୍ନେ ରେମୁଆଁଇଂନେ ଚିନାବାନା ଗାଗ୍‌ନ୍‌ସାଃ, ବନ୍ଦି ରେମୁଆଁଇଂ ମୁକ୍‍ଲେନ୍‍ସା ଆରି ଜେଲ୍‌କାନା ବିତ୍ରେ ଲାଏଃକ୍ନେ ରେମୁଆଁଇଂକେ ଜେଲ୍‌କାନାବାନ୍‌ ତାର୍‌ନେ ସାମୁଆଁ ବାସଙ୍ଗ୍‌ନ୍‌ସାଃ; 2 ସଦାପ୍ରବୁନେ ଗ୍ର‍ଅନ୍‌ ଡିଂନେ ମୁଆଁ ଆରି ନେନେ ପର୍‌ମେସର୍‌ନେ ବଦ୍‌ଲା ରାଙ୍ଗ୍‌ଡନେ ଦିନ୍‌ ବାଃଲିର୍‍ ଅଲେଙ୍ଗ୍‌ନ୍‍ସାଃ; ଅଃଣ୍ଡ୍ରେ ସାପାରେକେ ସାନ୍ତି ବିଃନ୍‌ସାଃ; 3 ସିୟୋନନେ ଅଃଡିଂଆର୍‌କ୍ନେ ରେମୁଆଁଇଂନେ ବାଆଃ ଆଡ଼ାତ୍ରା କି ଉକ୍‌ସ ସ୍ଲ ଆଃଡିଂଚେଃ ନିମାଣ୍ଡାଃ ପଗ୍‌ଡ଼ି ଗାଗ୍‌ ମ୍ବିଃଏ, କି ମେଁନେ ଅଃନେ ସ୍ଲ ଆଃଡିଂଚେଃ ସୁକ୍‌ ବାନେ ରକମ୍‌ ଞ୍ଚୁ ଲିଗ୍‌ ମ୍ବିଃଏ ଆରି ମେଁନେ ଦୁକ୍‌ ସ୍ଲ ଆଃଡିଂଚେଃ ପ୍ରସଂସା ରକମ୍‌ ସକାପାଟାଇ ବିଃନ୍‌ସାଃ ମେଁ ଆନିଂକେ ବେବକେ; ଆତ୍‌ଅରିଆ ମାପ୍‌ରୁ ଡିରକମ୍‌ ଗୌରବ୍‌ ବାଏ, ଆକେନ୍‌ସାଃ ମେଇଂ ଦରମ୍‌ ସ୍ଲାଃ ଆରି ମେଁନେ ଡୁଗ୍‌ଡି ଡାଗ୍‌ଚେଃ ଉଡ୍ରା ଡିଂଆର୍‌ଏ । 4 ବାରି, ମେଇଂ ବାୱିର୍‌ନେ ଦଂସ ଡିଂକ୍ନେ ଜାଗା ସାପା ଆଃରେଆର୍‌ଏ, ଅଃସେ କାଲ୍‌ନେ ନସ୍‌ଟ ଜାଗା ସାପା ଆଃତଃଡ଼୍ୟାଃଏ, ଆରି ମେଇଂ ବିନାସ୍‌ ଡିଂକ୍ନେ ଆରି ଗୁଲୁଏ ଙ୍ଗିର୍‌ବୁଏଃ ରିତିନିତିନେ ନସ୍‌ଟ ଇନି ସାପା ତିଆର୍ ଡିଙ୍ଗ୍‌ଆର୍‌ଏ । 5 ବାରି, ମାସ୍ନାମୁଆଃ ରେମୁଆଁଇଂ ପେନେ ଗିମିଃ ରାସି ତୁର୍ତ୍ୟା ନ୍‌ସାଃ ତୁଆଁଆର୍‌ଏ ଆରି ବିଦେସି ରେମୁଆଁଇଂ ପେ ଲିଜନେ ଆରି ଅଙ୍ଗୁର୍‌ ଲିଜନେ ଚାସି ରେମୁଆଁ ଡିଂଆର୍‌ଏ । 6 ମାତର୍‌ ପେ ସଦାପ୍ରବୁନେ ପୁଜାରି ଡାଗ୍‌ଚେଃ ଉଡ୍ରା ପେଡିଂଏ; ରେମୁଆଁଇଂ ଆପେକେ ନେନେ ପର୍‌ମେସର୍‌ନେ ସେବକ ଡାଗ୍‌ଚେଃ ୱାଆର୍‌ଏ; ପେ ବିନ୍‌ ଦେସ୍‌ନେ ରେମୁଆଁଇଂନେ ଦନ୍‌ସମ୍ପତି ପେଚଙ୍ଗ୍‌ଏ ଆରି ମେଇଂନେ ସମ୍ପତିଅରିଆ ପେ ବଡ଼୍‌ପନ୍‌ ପେଡିଂଏ । 7 ପେ ଗିଆସଃନେ ବାଦୁଲ୍‌ ମ୍ବାର୍‌ ଗୁନ୍‌ ସନ୍‌ମାନ୍‌ ପେବାଏ; ବାରି, ଅପମାନ୍‌ନେ ବାଦୁଲ୍‌ ମେଇଂ ନିଜର୍‌ ନିଜର୍‌ ଅଦିକାର୍‌ଅରିଆ ସାର୍ଦା ଡିଂଆର୍‌ଏ; ଆକେନ୍‌ସାଃ ମେଇଂ ନିଜର୍‌ ଦେସ୍‌ଅରିଆ ମ୍ବାର୍‌ ଗୁନ୍‌ ବାଗ୍‌ ବାଆର୍‌ଏ; ମେଇଂନେ ଅଃନା ମାଡାନେ ସାର୍ଦା ବିଃଏ । 8 ମେଃଡାଗ୍‌ଲା ନେ ସଦାପ୍ରବୁ ସତ୍‌ ବିଚାର୍‌ ବଲ୍‌ ନେବାଏ, ନିଂ ଅଦରମ୍‌ ରକମ୍‌ ଡଙ୍ଗା କାମ୍‌କେ ଗ୍ରୁନା ଣ୍ଡିଂଏ; ଆରି, ନିଂ ସତେଆଃ ଆମେଇଂକେ ଡଣ୍ଡ୍‌ ମ୍ବିଃଏ ଆରି ମେଇଂ ଏଃତେ ଅଃନା ମାଡାନେ ମୁଇଂ ନିଅମ୍‌ ଡିଂଏ । 9 ବାରି, ମେଇଂନେ ବଂସ ବିନ୍‌ ଦେସ୍‌ନେ ରେମୁଆଁଇଂ ବିତ୍ରେ ଆରି ମେଇଂନେ ଉଙ୍ଗ୍‌ଡେଇଂ ସାପା ଜାତି ବିତ୍ରେ ମ୍ନାଃ ଡିଂଆର୍‌ଏ; ମେଇଂ ସଦାପ୍ରବୁନେ ଆସିର୍ବାଦ୍‌ ବାକ୍ନେ ବଂସ ଡାଗ୍‌ଚେ ଆମେଇଂକେ କେକ୍ନେ ରେମୁଆଁ ସାପାରେ ମାନେଆର୍‌ଏ । 10 ନିଂ ସଦାପ୍ରବୁଅରିଆ ଜାବର୍‌ ସାର୍ଦା ଣ୍ଡିଂଏ; ନିଂନେ ଜିବନ୍‌ ନିଂନେ ପର୍‌ମେସର୍‌ଅରିଆ ସାର୍ଦା ଡିଂଏ; ମେଃଡାଗ୍‌ଲା ଙ୍ଗିରେ ଡିରକମ୍‌ ପଗ୍‌ଡ଼ି ଏଃତେ ନିଜ୍‌କେ ସବା ଆଃଡିଂଏ ଆରି ସେଲା ଡିରକମ୍‌ ନିଜର୍‌ ସାରିନେ ତ‍ଅଁ ଏଃତେ ନିଜ୍‌କେ ସବା ଆଃଡିଂଏ, ଦେତ୍‌ରକମ୍‌ ମେଁ ପରିତ୍ରାନ୍‌ ରକମ୍‌ ସକାପାଟାଇ ଏଃତେ ଆନିଂକେ ଆଃସଃବକେ ଆରି ଦରମ୍‌ ରକମ୍‌ ଇଃସାଙ୍ଗ୍‌ ସକାପାଟାଇ ଏଃତେ ଆନିଂକେ ଆଃକୁଇବକେ । 11 ମେଃଡାଗ୍‌ଲା ତୁବଃ ଡିରକମ୍‌ ନିଜର୍‌ ସ୍ଲାଃପାଃଡ଼ୁ ଆଃପଡ଼୍ୟାଃଏ ଆରି ଡୁଗ୍‌ଡି ଡିରକମ୍‌ ନିଜର୍‌ ବିତ୍ରେ ବିଗ୍‌ବ୍ନ ଜିନିସ୍‌ ସାପା ଆଃପଡ଼୍ୟାଃଏ, ଦେତ୍‌ରକମ୍‌ ମାପ୍‌ରୁ ସଦାପ୍ରବୁ କ୍ଲିଗ୍‌ ଦେସ୍‌ନେ ରେମୁଆଁ ସେଃମଁ ଦର୍ମ ଆରି ପ୍ରସଂସା ଆଃପଡ଼୍ୟାଃଏ ।