1 Degbeŋgyoo, nyii maŋ, me kasola doona kegbɛɛ,

tei me kewii baake,

nyii ma kefane,

ke ta lee nɔɔ keŋ ne di akɛrɛɛ man ya.

2 Yela ma deŋele kedi ka lee n gyaŋ,

yela n sia kena kpene keŋ doo kegbɛɛ dɔɔ.

3 Akpaa n gyoo me konɔɔ man kɛɛ,

te n gyoo me man nelim te n kɛɛse maŋ kɛɛ nɛ,

n be gyae n kena nombiikum daale me man ya,

me nɔɔ te kolosita nombiikum ya.

4 Balaŋ gyaewɔ nyi baa yo fa maŋ kolo,

mɔna me wɔŋa ma wose lee balaŋ kumɛɛ gbɛɛneŋ man,

lee nombia ŋan ba lee n nɔɔman dɔɔ.

5 N gbɛɛneŋ man te me dɔŋ debaŋ kamasɛ,

me nawɔɔ te kpaŋte lee n gbɛɛneŋ man ya.

6 Me Wurubuarɛ, nyaŋ te mee wii baake, nawolo nyi nyaŋ ke kpa maŋ,

see deŋele na n ke nyii ma kefane.

7 Lese gyakoloŋ nombia ŋan doo n kegyae man nɛ wola maŋ,

nyaŋ ŋon n na mo n doŋ lɛɛ balaŋ nyee,

baŋ bee yeu kaa gyoo neŋ nɛ lee be kɔlara nyiŋmaa man.

8 Gyee maŋ ŋgba n sibiibii nɛ,

mo maŋ weese n beŋkelɛɛ wuluŋ man,

9 lee akpanyanyaŋtena baŋ bɛɛ gyae baa wɔlɛɛ maŋ,

na me kɔlara baŋ bɔɔ kilisi maŋ nɛ nyiŋmaa man.

10 Bɔɔ ne wii walaŋ waraŋase ya,

te be nɔɔ ne kolosi agaŋtaŋ man.

11 Ba deke maŋ, te nɛnɛɛ be te kilisi maŋ,

be sia gyakaa me dɔɔ nyi baa lɔ maŋ tɛɛle man.

12 Be yɛɛ ŋgba dinaate ŋon ɔ na deke kolo waa kyaŋ,

ŋgba dinaate talabo ŋon ɔ yoɛ ɔ na deke nɛ.

13 Degbeŋgyoo koro seŋ, yoo me kɔlara na n ke yɔkɔse wɔ,

mo n yoosila lɛɛ maŋ lee akpanyanyaŋtena nyiŋmaa man.

14 Degbeŋgyoo, mo n doŋ lɛɛ maŋ lee mena balaŋ benaŋ nyiŋmaa man,

lee baŋ bɔɔ nyiŋ be wui dedii tɛɛle kei dɔɔ nɛ nyiŋmaase man.

Mo abɔɔ ŋan n be desina see balaŋ kumɛɛ nɛ wulu be tɔɔse,

yela be bia ke nyiŋ kela mena keŋ bɛɛ gyae,

na ŋaale ke tuŋ be naanasebia.

15 Maŋ dɔɔ maa kɛɛ n siaman katenee man,

Akpaa me fom te me naa n siagbɛɛ na, me wɔe gyae ke fɛɛ maŋ.