Salmos 35

Kefane fa kekyɔ

1 Degbeŋgyoo, kalana baŋ bɛɛ kalena maŋ nɛ.

yoona baŋ bee yoona maŋ nɛ.

2 Mo n yoo nyeele pampasaŋ na n yookegba,

koro na n kaa kyɔ maŋ.

3 Wɔŋ nya apia na n debeŋa,

tɔ baŋ bee gegi maŋ nɛ gbɛɛ.

Yako maŋ nyi,

<Maŋ yɛna n nyeekelɛɛ.>

4 Yela baŋ bɛɛ gyae maŋ baa ko nɛ,

sia ka yeŋ na desɛŋ ke kyaŋ wɔ,

yela baŋ bɛɛ bake ma nyeeman dukum nɛ,

ka mo desɛŋ bese be wɔle.

5 Yela baa yɛɛ ŋgba wura keŋ feliŋ ne gyɔɔ,

te Degbeŋgyoo kpilare ne gegi wɔ nɛ.

6 Yela detiŋtɛɛ ka gyoo be gbɛɛ na ke sarakee,

na Degbeŋgyoo kpilare ke gegi wɔ.

7 Ma te yɛɛ wɔ kolo ya te be nyɔɔ maŋ kɔta,

ma te yɛɛ wɔ kolo ya, te be wula dowokom fa maŋ.

8 Yela kewɔlɛɛ kaa futaa wɔ,

yela be kɔta keŋ bɔɔ nyɔɔ weese nɛ ke kyaŋ wɔ,

yela baa yala gyoo dowokom keŋ bɔɔ wulu nɛ man na baa munu.

9 Kenaŋ na maa nyaŋee Degbeŋgyoo man,

na ke yɛɛ maŋ gyoŋ lee ɔ nyeekelɛɛ dɔɔ.

10 Ma wose pou gyae ke yako nyiaa,

<<Degbeŋgyoo, amɔte kyaala ŋgba nyaŋ nɛ?>>

N ne lɛɛ ayematena lee baŋ be dana doŋ kela wɔ nɛ nyiŋmaa man,

diyemte na ŋon ɔ be dana kolo ya nɛ lee baŋ bɛɛ mo doŋ ŋmɛɛle wɔ nɛ nyiŋmaa man.

11 Akɛrɛɛ adansɛɛtena na koro tia maŋ,

bɛɛ bɔɔse maŋ nombia ŋan mɔɔ gyeŋ ŋe man ya.

12 Bɛɛ mo dukum tɔ maŋ deeli kom,

te be tina maŋ yela ŋgba walaŋ ŋon ɔ ne di waraŋsa nɛ.

13 Mɔna be kɛɛ wee na, ma moo titire wuu ma wose,

me yɔkɔse ma wose bake me nɔɔ.

Mɔna me te nyii ke man daale ya,

14 mena dɔɔ me tɛɛwɔ waraŋsa man,

ŋgba me gyoo yaa me naabu yaa mee wii fa nɛ,

Me wuluŋu ma nyee waraŋase man,

ŋgba me gyoo yaa me naa yaa mee wii fa nɛ.

15 Mɔna ma kegyɔ me nae nɛ, be yilaawɔ bɛɛ nyaŋee,

balaŋ kumɛɛ yilaawɔ kilisi maŋ keŋ mɔɔ gyeŋ ya,

bɛɛ wɔlɛɛ maŋ keŋ bɔɔ ne tina yela ya.

16 Balaŋ behuhoona ne kulu maŋ,

ba te ŋɛɛ be kela tee maŋ.

17 Degbeŋgyoo, nyaŋ ke kyaa kɛɛ wɔ kelii woromɔ?

Lɛɛ maŋ lee ba kewɔlɛɛ man,

ma nyeedoŋ lee dinaatese kɛwɔ nɔɔman.

18 Maa fa neŋ karaŋ balaŋ burum degyaŋee man,

maa lese n yele balaŋ dikpii degyaŋee man.

19 Naa yele baŋ bɛɛ kɔla maŋ yakaa nɛ,

ke nyaŋee lee me dɔɔ ya,

naa yele baŋ bɛɛ kɔla maŋ yakaa nɛ,

ke baŋ maŋ deneŋkɔɔle ya.

20 Bɔɔ ne kolosi wosefɛɛreŋ man ya,

mɔna bee dii akɛrɛɛ

gyakaa baŋ be kyaa tɛɛle keŋ dɔɔ diiŋ nɛ dɔɔ.

21 Bee gyuusu be nɔɔse yako nyiaa, <<Mbo, Mbo,

Daa gbagba sia te naa ke.>>

22 Degbeŋgyoo, n te naa ke, naa wuu n nɔɔ ya,

Degbeŋgyoo, naa kyaana lem lee me gyaŋ ya.

23 Me Wurubuarɛ na me Gbeŋgyoo, yoo fa maŋ,

koro seŋ wosi n wose, na n ke yako me nombia fa maŋ.

24 Degbeŋgyoo me Wurubuarɛ, yela maa di deŋele lee n katenee dɔɔ,

naa yele baa nyaŋee lee me dɔɔ ya.

25 Naa yele baa yako nyi, <<Mbo, kei yɛna keŋ dɛɛ gyae,>>

yaa nyi, <<Da te wɔlɛɛ e korakora ya.>>

26 Baŋ pou bɛɛ nyaŋee me kayeyɛɛ man nɛ,

kekolosi na desɛŋ dɛɛ kyaŋ wɔ,

baŋ pou bee gyina ba wose lee maŋ dɔɔ nɛ

sia dɛɛ yeŋ na desɛŋ kekyaŋ wɔ.

27 Mɔna yela baŋ me katenee ba gyoo be sia nɛ,

ka mo gyoŋ na kenyaŋee fae yeesa,

na baa yako debaŋ kamasɛ nyiaa,

<<Degbeŋgyoo boe, ɔ ne yele abɔɔ ne gyu nideli fa ɔ tobaale.>>

28 Me laakem gyae ke kolosi n katenee nombia,

na maa lese n yele debaŋ kamasɛ.