1 Ampaŋ ma woo waa fɛɛfo Wurubuarɛ man,

ma nyeekelɛɛ na lee bo ɔ gyaŋ.

2 Ampaŋ ŋon yɛna me kpanaŋ na ma nyeekelɛɛ,

ŋon yɛna me gyeere, kolo be tale tɛɛse maŋ ya.

3 Woromɔ yaa ɛ ke tina maŋ diyem kenaase yela?

Ɛ popou ɛ ke tɛɛse maŋ lɔ,

ŋgba dekyaŋ keŋ be gɛɛse, yaa abaŋ keŋ ba woo nɛ?

4 Ampaŋ ba te bake nyi baa lese maŋ,

lee ma dekyae kpaakpaa keŋ man,

akɛrɛɛ kedi dana wɔ gyoŋ.

Bɛɛ mo be nɔɔse hiraa,

mɔna bɛɛ falaa lee be konɔɔse man.

5 Ampaŋ ma woo waa fɛɛfo Wurubuarɛ man,

me lookegyakaa na lee bo ɔ gyaŋ.

6 Ampaŋ ŋon yɛna me kpanaŋ na ma nyeekelɛɛ,

ŋon yɛna me gyeere, kolo be tale tɛɛse maŋ ya.

7 Ma nyeekelɛɛ na me gyoorobiiri lee Wurubuarɛ gyaŋ,

ŋon yɛna me kpanaŋ dekpataakpere, ŋon mee yeu kagyoo.

8 Ɛmɛɛ balaŋ, ɛ mo ɛ wose lɔ ɔ dɔɔ debaŋ kamasɛ,

ɛ yako e keŋ doo ɛ konɔɔ man,

nawolo nyi Wurubuarɛ yɛna da keyeu kagyoo.

9 Ampaŋ balaŋ yakaa nyibaŋ yɛɛ ŋgba weesɛɛ nɛ,

balaŋ baŋ be dana yele nɛ yɛɛ akɛrɛɛtenawɔ.

Nyi n mo wɔ gyakaa sikeli dɔɔ na, be yɛɛ yakaa,

be popou yɛɛ yakaa ŋgba weesɛɛ nɛ.

10 Ɛ naa mo ɛ wose lɔ balaŋ kaŋeredo dɔɔ,

yaa ɛ ka mo ɛ loo gyakaa ŋmɛɛleŋ abɔɔ dɔɔ ya.

Nyi ɛ nyiŋ dedii burum koraŋ nɛ,

ɛ naa mo ɛ konɔɔ lɔ ŋe dɔɔ ya.

11 Nombii dokoloŋ te Wurubuarɛ kolosiwɔ,

nombia ala te me nyiiwɔ nyi,

<Wurubuarɛ nyiŋmaa man te doŋ doo,

12 te nyaŋ Degbeŋgyoo man te kegyae doo kekpaakekpaa,

<<N ne tɔ walaŋ kamasɛ kom,

ŋgba mena keŋ ɔ be yɛɛ ɔ tom nɛ.>>