1 Nyaŋ Wurubuarɛ, yɛna me Wurubuarɛ,

me sia te yɛɛ mɛɛ kɛo neŋ,

mɛɛ kɛo neŋ ŋgba loŋboaneŋ kɛɛ ko walaŋ nɛ,

n ne gyɔ ma wose pou loo,

ŋgba depampaa tɛɛle dowolosa nɛ,

botɔɔ keŋ loŋ na loŋ be kyaa ya nɛ.

2 Me naa neŋ nyɔ ɔsom deni keŋ man,

te me naa n doŋ na n gyoorobiiri.

3 N kegyae dei kela nyeedoŋ,

mena dɔɔ me nɔɔsebia gyae ka lese n yele.

4 Maa lese n yele ma kekyaabii man pou,

maa gyina me nyiŋmaase adido n yele man.

5 Gyae ke baa maŋ ŋgba weenɛɛ kpaakpaa ŋaale te me diiwɔ nɛ,

na maa mo me nɔɔsebia kpee nɔɔneŋ lese n yele.

6 Me doo ma dofoŋoŋ dɔɔ na mɛɛ tɔɔse neŋ,

mɛɛ gyueŋ n wose man nelim pou.

7 Nawolo nyi nyaŋ ne kyɔɔna maŋ,

n beŋkelɛɛ wuluŋ tɛɛ te mɛɛ nyaŋee kpee nɔɔneŋ.

8 Ma te gɔtaa neŋ,

n dunoluŋ nyiŋmaa danaana maŋ.

9 Baŋ bɛɛ gyae baa ko maŋ nɛ baa munu,

baa tisi gyoo woyadɛɛ.

10 Baa mo yoosila koe wɔ,

na baa bese gbougbouse weenɛɛ.

11 Mɔna gyoo waa nyaŋee lee Wurubuarɛ dɔɔ,

baŋ bɛɛ mo ba wose lɔ Wurubuarɛ dɔɔ nɛ baa lese ɔ yele,

mɔna baa wuu akɛrɛɛtena nɔɔse.