1 Me fae yeesa keŋkeŋ baake Wurubuarɛ,

me fae yeesa keŋkeŋ na Wurubuarɛ ke nyii maŋ.

2 Ma wose kekyaŋ man me kɛo Degbeŋgyoo,

nelim ma tenee me nyiŋmaase menɛɛ keŋ te takaa maŋ ya,

me wɔe mɔ te fɛɛ maŋ ya.

3 Wurubuarɛ me tɔɔse neŋ, te ma toroŋwɔ,

ma gyueŋwɔ te ma wose yɔkɔse maŋ.

4 N te kpeŋ ma dosoroŋ,

ma te yala koyololo keŋ ma te tale kolosi ya.

5 Me tɔɔse gyaŋgba keŋ,

kulutooneŋ akaalaŋaŋ ŋan.

6 Me tɔɔse me nelim nɔɔneŋse ŋan.

Ma gyueŋwɔ te me bɔɔse ma wose nyiaa,

7 <<Degbeŋgyoo waa bɛɛ walaŋ kekpaakekpaa?

Ɔ be gyae waa wii walaŋ bela yee?

8 Ɔ kegyae keŋ taŋ ɔto ya nɛ ta yoo kekpaakekpaa?

Ɔ keyakosee keŋ te taŋ kekpaakekpaa?

9 Wurubuarɛ te wolee nyi waa wii walaŋ?

Ɔ moo baŋ tɔ ɔ deeli keyɛɛ nɔɔ baa?>>

10 Te me yakowɔ nyiaa, <<Keŋ ne takaa maŋ yɛna nyi,

gyaŋgba keŋ na nafɔ Adidote ŋon dunoluŋ nyiŋmaa dana yuŋ.

11 Maa tɔɔse abɔɔ ŋan Degbeŋgyoo be yɛɛ,

Ayi, maa tɔɔse n gyakoloŋ nombia ŋan n be yɛɛ gyaŋgba gyaŋgba nɛ.

12 Maa tɔɔse n tomse ŋan n be yɛɛ nɛ pou,

na maa gyueŋ gyakoloŋ nombia dinaana ŋan n be yɛɛ nɛ.

13 Wurubuarɛ, n gbɛɛneŋ yɛɛ fereŋkyeŋ,

wurubuarɛ woŋti kereela ŋgba de Wurubuarɛ nɛ?

14 Nyaŋ yɛna Wurubuarɛ ŋon n ne yɛɛ gyakoloŋ nombia,

n na lese n baalabiiri wola balaŋ man.

15 N moo n nyiŋmaa dekpataakpere lɛɛ n balaŋ nyee,

Yakɔbe na Yosɛfo duuluŋ man balaŋ.

16 Wurubuarɛ, loŋse naa neŋ,

loŋse naa neŋ te gyakoloŋ gyoo ŋa,

loŋse ateta wosiwɔ.

17 Ŋɔma ŋan yelaa ɔga ŋɛɛwɔ,

ɔga faewɔ lee adido,

n baŋdaŋ nyeela ŋalakeewɔ yenaŋ kamasɛ.

18 Be nyii nyɔ ɔga kefae koloŋoloŋ man.

nyɔ ɔga keŋmaale ŋmaalewɔ tɛɛle pou dɔɔ,

tɛɛle sereewɔ te ke wosiwɔ.

19 N doo gbɛɛ ta ɛpo man,

n gbɛɛ tɛɛwɔ booneŋ dinaana man.

mɔna ba te naa n nawɔɔ detɛe ya.

20 N tɛɛwɔ Mosesi na Aarɔn dɔɔ,

ta n balaŋ siaman ŋgba namense nɛ.