1 Me balaŋ, ɛ nyii me kawola,

ɛ tei me nɔɔman nombia.

2 Maa gyuusu me nɔɔ kolosi aduya man,

maa yako gyaŋgba nombia ŋan ŋa weesɛɛ.

3 Nombia ŋan dɔɔ nyii na ŋan da gyeŋ,

na ŋan de naanaɔ be yako daa.

4 Daa be gyae dɛɛ mo ŋa weese be bia ya,

dɛɛ yako kalola kegyakaare keŋ ke gyae kekɔŋ nɛ,

abɔɔ kpaakpaa ŋan Degbeŋgyoo be yɛɛ,

ɔ doŋ na gyakoloŋ nombia ŋan ɔ be yɛɛ.

5 Ɔ see adansɛɛ kedi mokɔɔ fa Yakɔbe

te ɔ see mmaraa Iserae,

te ɔ yako de naanaɔ nyi,

baa wola be bia mena mmaraase ŋenaŋ.

6 Na kalola kegyakaare keŋ gyae ke kɔŋ nɛ ka gyeŋ ŋa,

na bia baŋ be ta lolata wɔ ya nɛ,

na baŋ mɔ ka wola be bia.

7 Kenaŋ na baa mo ba wose lɔ Wurubuarɛ dɔɔ,

na bɔɔ wolee abɔɔ ŋan ɔ be yɛɛ nɛ ya,

mɔna baa di wɔ mmaraase ŋan dɔɔ.

8 Baŋ be gyae baa yɛɛ ŋgba be kyaɔ,

kalola kegyakaare deŋele doŋtena na baŋ bɛɛ koro seŋ tia,

baŋ ba te lɛɛ Wurubuarɛ di nideli ya,

te be te di anokoare fa e ya nɛ ya.

9 Doo nyi Ɛferayimtena baala moo baŋdaŋse baa,

mɔna be yeuwɔ yoo wee keŋ.

10 Be te di Wurubuarɛ nɔɔkebakesee keŋ dɔɔ ya

te be bɛɛwɔ be te di wɔ mmaraase ŋan dɔɔ ya.

11 Be wolee ŋan ɔ be yɛɛ,

gyakoloŋ nombia ŋan ɔ be yɛɛ wola wɔ nɛ.

12 Ɔ yɛɛ gyakoloŋ nombia be naanaɔ siaman,

Soan tɛɛle dikpii dinaa keŋ kyaa Igyipite tɛɛle man nɛ.

13 ɔ kpase ɛpo man te ɔ moo wɔ toŋ,

ɔ yelaa loŋ seŋawɔ ŋgba dekyaŋ nɛ.

14 Tɛɛ de naa na ɔ na mo debuŋta ta be siaman,

tɛɛ de yuu na ɔ na mo boalaŋ keŋmaŋee bo.

15 Ɔ yɛlɛɛ kpanaŋse depampaa keŋ man,

te ɔ faa wɔ loŋ burum ŋgba ɛpose nɛ.

16 Ɔ yelaa boŋobiise bɛɛwɔ lee kpanaŋse man,

te ɔ yelaa loŋ waalewɔ ŋgba booneŋ nɛ.

17 Mɔna be gyakaa bɛɛ yɛɛ dukum tia e,

ba seŋawɔ tia Adidote ŋon depampaa keŋ man.

18 Be naawɔna sia kɛɛse Wurubuarɛ kɛɛ,

te be bɔɔse e weenɛɛ ŋan ne gyɔ wɔ loo.

19 Be kolosiwɔ tia Wurubuarɛ,

be yakowɔ nyiaa, <Wurubuarɛ waa tale fa daa weenɛɛ depampaa kei man?

20 Ampaŋ ɔ gyɔɔ kpanaŋ keŋ,

te loŋ bɛɛwɔ lee,

booneŋ wuuwɔ waale,

mɔna waa tale fa daa weenɛɛ mɔ?

Waa tale fa ɔ balaŋ naane?>

21 Mena dɔɔ Wurubuarɛ kenyii mena nɛ, ɔ gyeŋa baŋ nideli,

ɔ yelaa boalaŋ kpaa Yakɔbe,

te ɔ gyeŋa baŋ do Iserae nideli,

22 nawolo nyi ba te lɛɛ Wurubuarɛ di ya,

te be ta mo ba wose lɔ ɔ dɔɔ nyi waa tale lɛɛ ba nyee ya.

23 Mɔna ɔ kolosiwɔ fa ŋɔma adido,

te ɔ toro adido anaanɔɔse.

24 Ɔ yelaa maana yalawɔ lee adido fa wɔ te be diiwɔ,

ɔ faa wɔ adido weenɛɛ.

25 Denibalaŋ dii Wurubuarɛ kpilara weenɛɛ,

ɔ faa wɔ weenɛɛ ŋan gyae ka yee wɔ.

26 Ɔ yelaa weese dɛɛlee feliŋ gyɔɔwɔ lee adido,

te ɔ moo ɔ doŋ yela ata yenaŋ feliŋ gyɔɔwɔ.

27 Ɔ yelaa naane yalawɔ be dɔɔ lee adido ŋgba akuŋkuŋ nɛ,

gyebuse ŋgba ɛpo nɔɔman aŋasa nɛ.

28 Ɔ yelaa be yalawɔ be deyilae kyaa keŋ man,

mo kilisi ba dekyae keŋ gyaŋee.

29 Be diiwɔ baa ba kegyaebii,

nawolo nyi ɔ faa wɔ kpene keŋ be gyɔ wɔ loo.

30 Mɔna pɛ baa koro lee weenɛɛ ŋan tɛɛ,

keŋ weenɛɛ ŋan sɛɛ doo be nɔɔse man nɛ,

31 Wurubuarɛ gyeŋa baŋ do wɔ nideli,

ɔ koe be man doŋ nyibaŋ baŋ,

te ɔ gyɔɔ Iserae tewulɛɛ lɔ.

32 Kɛŋa pou wɔle na, be gyakaa bɛɛ yɛɛ dukum,

lee gyakoloŋ nombia ŋan ɔ be yɛɛ pou wɔle na, bɔɔ ne lɛɛ e di ya.

33 Mena dɔɔ ɔ kara ba weeya dɔɔ ŋgba weesɛɛ nɛ,

te ba kulutooneŋ ŋaalaawɔ kayeyɛɛ man.

34 Akpaa Wurubuarɛ da koe wɔ na, bee sila ɔ gbɛɛ,

bɛɛ kyɛɛkee lee be gbɛɛneŋ kumɛɛ man bese kɔŋ ɔ gyaŋ.

35 Be tɔɔsewɔ nyi Wurubuarɛ yɛna be kpanaŋ,

nyi Wurubuarɛ Adidote ŋon lɛɛna wɔ.

36 Mɔna ba moo be nɔɔse gyaabii e bo,

te ba moo be laakemse dii akɛrɛɛ fa e,

37 be te di anokoare fa e ya,

be te di ɔ nɔɔkebakesee keŋ dɔɔ ya.

38 Mɔna ɔ wii be waraŋase,

ɔ moo be nombiakumɛɛ kyɛɛ wɔ,

keŋ ɔ te wɔlɛɛ wɔ ya.

Debaŋ kamasɛ akpaa ɔ gyeŋ baŋ na ɔ ne nyiŋ konɔɔ,

keŋ ɔ bɛɛ mo ɔ baŋ nedoŋ keŋ wɔŋ ba deŋele ya.

39 Ɔ tɔɔsewɔ nyi be yɛɛ wosenaane ke,

ŋgba feliŋ keŋ ne gyɔɔ gyu te bɛɛ bese kɔŋ ya nɛ.

40 Ba korowɔ seŋ tia e depampaa keŋ man agbaatee agbaatee,

te be yelaa waraŋase kyaŋa e depampaa keŋ man.

41 Be kɛɛse Wurubuarɛ kɛɛ agbaatee agbaatee,

ba doo Iserae fereŋkyeŋte ŋon baŋ.

42 Ba te tɔɔse ɔ doŋ,

wee keŋ ɔ be lɛɛ ba nyee lee be kɔlara nyiŋmaa man nɛ ya,

43 wee keŋ ɔ be yɛɛ gyakoloŋ nombia Igyipite,

na nombia dinaana Soan tɛɛle man nɛ.

44 Ɔ yelaa be booneŋ bese fatabo,

ba te tale nyɔɔ ba loŋse ŋan ya.

45 Ɔ kpila keraase akpii akpiise kaa doŋee wɔ,

te apɔtɔrɔse kaa wɔlɛɛ ba abɔɔ.

46 Ɔ moo be wɔɔse man weenɛɛ fa akpataana,

te ɔ moo abɔɔ ŋan bɔɔ duu be wɔɔse man nɛ fa akpataanabia.

47 Ɔ yelaa akpeleŋkpeleŋbia wɔlɛɛ be gerepose,

na be fiigi daase.

48 Ɔ moo akpeleŋkpeleŋbia koe be nunkyuese,

ɔ moo ɔga keŋmaale koe be namense.

49 Ɔ lese ɔ baŋ nedoŋ wola wɔ,

ɔ tɔɔman ŋan na ɔ sibii keyɛɛ,

na Wurubuarɛ kpilara dikpii baŋ bɛɛ wɔlɛɛ abɔɔ nɛ.

50 Ɔ lese ɔ baŋ wola,

ɔ ta lese wɔ lee yeŋ man ya,

mɔna ɔ yelaa yeŋ kawee kaa yala wɔ.

51 Ɔ koe Igyipitetena bia gyaŋgba nyibaŋ pou,

be bia gyaŋgba nyibaŋ lee Ham kanyaŋ deni man.

52 Mɔna ɔ lese ɔ balaŋ lee Igyipite ŋgba namense nɛ,

ɔ tɛɛwɔ be siaman depampaa keŋ man ŋgba namense nɛ.

53 Ɔ gyee wɔ wɔe kefɛɛ man keŋ ba te yee ya,

mɔna ɛpo keŋ wuu be kɔlara dɔɔ,

54 Ɔ moo wɔ kɔŋ ɔ tɛɛle fereŋkyeŋ keŋ wulu man,

kelii bula dɔɔ donɔɔ keŋ ɔ ba mo ɔ dunoluŋ nyiŋmaa lɛɛ ke nɛ.

55 Ɔ gegi tɛɛlese lee be siaman,

te ɔ moo be tɛɛlese fa wɔ ŋgba be dedii nɛ,

ɔ yelaa Iserae akpaŋalaŋse ŋan kyaawɔ be denɛɛ man.

56 Mɔna be kɛɛse Wurubuarɛ kɛɛ,

te ba korowɔ seŋ tia Adidote ŋon,

be te di wɔ mmaraase dɔɔ ya.

57 Mɔna be yɛɛ deŋele doŋ keŋ be te di anokoare ya ŋgba be naanaɔ nɛ,

ŋgba baŋdaŋ keŋ be goo ke na bee de ketɔ ya nɛ.

58 Ba moo bulase ŋan dɔɔ bɛɛ som be bɛɛneŋ nɛ do e baŋ,

be yelaa ɔ yoo nuŋkurili lee be bɛɛneŋ baŋ dɔɔ.

59 Wurubuarɛ kenyii wɔ nɛ, ɔ gyeŋa baŋ nideli,

ɔ bɛɛ Iserae korakora.

60 Ɔ bɛɛ ɔsom deni keŋ kyaa Silo,

kanyaŋ deni keŋ ɔ be bam denibalaŋ man nɛ.

61 Ɔ yelaa be kɔlara yoowɔ di ɔ doŋ dɔɔ,

ɔ moo ɔ doŋ na ɔ gyoorobiiri do ɔ kɔlare nyiŋmaa man.

62 Ɔ yelaa ba moo yoosila koe ɔ balaŋ,

ɔ gyeŋa baŋ do ɔ dedii.

63 Boalaŋ kpaa be bia tewulɛɛ,

keŋ be bia alebia te kpee alowɔlere nɔɔneŋ ya.

64 Ba moo yoosila koe be saese,

keŋ be liala te nyiŋ gbɛɛ wii ya.

65 Keŋte Degbeŋgyoo korowɔ ŋgba ɔ foŋae lee dosoroŋ man nɛ,

ŋgba doŋte ŋon ɔ be dɛɛse doo foŋ nɛ.

66 Ɔ yoo ɔ kɔlara yela ba besewɔ be wɔle,

ɔ yelaa desɛŋ kyaŋa wɔ kekpaakekpaa.

67 Keŋte ɔ bɛɛ Yosɛfo ɔsom deni,

ɔ ta lese Ɛferayim dekpaŋalaŋ ya.

68 Mɔna ɔ lese Yuda dekpaŋalaŋ,

Siyɔn bula keŋ ɔ ne gyae nɛ.

69 Ɔ baŋa ɔ dekyae fereŋkyeŋ keŋ ka korowɔ ŋgba adido,

ŋgba ɔ ka see tɛɛle kei mokɔɔ kekpaakekpaa nɛ.

70 Ɔ lese ɔ tobaale Dawide,

te ɔ moo e lee namense dɔɔ kekɛɛ man.

71 Ɔ lese e lee namense dɔɔ kekɛɛ man,

nyi ɔ kaa kɛɛ ɔ balaŋ Yakɔbe,

na ɔ dedii Iserae dɔɔ.

72 Dawide lese ɔ konɔɔ man kɛɛ Iseraetena dɔɔ nideli,

ɔ moo adao gbɛɛneŋ man ta be sia man.