1 Ao Wurubuarɛ, tɛɛlese te kaa gyoo n dedii man,

ba te walaa nyɔ ɔsom deni dinaa fereŋkyeŋ keŋ,

ba te yɛlɛɛ Yerusalɛm pou.

2 Be te tina n tewulɛɛ woya,

lɔ gyebuse nyi baa di,

n balaŋ fereŋkyeŋ baŋ naane fa ŋale man wonembia.

3 Ba te kyɛɛkee n balaŋ fatabo leki ŋgba loŋ nɛ,

mo kilisi Yerusalɛm,

te ŋolo be kyaa waa wuu woya baŋ ya.

4 Baŋ ba benaana daa nɛ, bɛɛ mo daa yɛɛ kolo ya,

baŋ bɔɔ kilisi daa nɛ ne kulu daa.

5 Degbeŋgyoo, woromɔ? Nyaŋ ka gyeŋ baŋ kekpaakekpaa?

n nuŋkurili baŋ keŋ yɛɛ ŋgba boalaŋ ne kpaala nɛ, gyae ke doo kelii woromɔ?

6 Lese n baŋ wola tɛɛlese balaŋ,

baŋ bɔɔ gyeŋ neŋ ya,

wola gyooridediise,

baŋ bɔɔ na som neŋ ya nɛ,

7 nawolo nyi be ta ko Yakɔbe,

te be wɔlɛɛ ɔ donɔɔ.

8 Naa wɔŋ da deŋele lee de naanaɔ dukum keŋ bɔɔ yɛɛ dɔɔ ya,

kɛɛ daa na n ke wii de waraŋase,

nawolo nyi ta kela daa nideli.

9 Wurubuarɛ da nyeelɛɛre, kyɔ daa,

lee gyoorobiiri keŋ n yele be lɛɛ dɔɔ,

lɛɛ daa na n ka mo de dukum kyɛɛ daa,

lee n yele keŋ dɔɔ.

10 Woŋ dɔɔ te kaboena nyi tɛɛlese baa bɔɔse nyiaa,

<<Aleŋ yaa be Wurubuarɛ ŋon kyaa?>>

Yela dɛɛ naa tɛɛlese siaman nyi,

n te wɔŋ ba deŋele mo tɔ n tewulɛɛ baŋ bɔɔ koe nɛ kom.

11 Nyii baŋ bɔɔ kyaŋ wɔ tɔ deni nɛ kewii,

mo n doŋ keŋ ka dokoso be kyaa ya nɛ, gyee baŋ bɛɛ gyae baa ko wɔ nɛ.

12 Ao Degbeŋgyoo, tɔ de tebia baŋ kom betabo nyetooro,

lee tuubia ŋan bɔɔ mo wuraa neŋ dɔɔ.

13 Dekɔŋ mena na, daa n balaŋ baŋ de yɛɛ n namensewɔ nɛ,

dɛɛ lese n yele kekpaakekpaa,

de kalola kegyakaare man pou,

dɛɛ lese n yele debaŋ kamasɛ.