Salmos 99

Wurubuarɛ gyoo dinaa

1 Degbeŋgyoo ne diina gyoori,

tɛɛlese baa seree,

ɔ kyaa kerubise nsana ɔ ne di gyoori,

tɛɛle dee wosi.

2 Degbeŋgyoo kerɛɛ Siyɔn

be te gyina e adido kela tɛɛlese pou.

3 Yela baa lese n yele dinaa keŋ ke dana gyakoloŋ nɛ,

Ɔ yɛɛ fereŋkyeŋ.

4 Gyoo ŋon yɛɛ dekpataakpere, ɔ ne gyae nombia kedi kegbɛɛ dɔɔ,

nyaŋ seena nombia kedi kyɛɛkyɛɛ mokɔɔ,

nyaŋ ne diina nombia kegbɛɛ dɔɔ,

te n yɛɛ keŋ doona ke gbɛɛ Yakɔbe.

5 Ɛ gyina Degbeŋgyoo de Wurubuarɛ ŋon adido,

na ɛ ka som e ɔ nawɔɔtɛɛ,

ɔ yɛɛ fereŋkyeŋ.

6 Mosesi na Aarɔn kpuɛ ɔ saese man,

Samuɛle kpuɛ baŋ bɔɔ som e nɛ man,

be baake Degbeŋgyoo,

te ɔ kpaa wɔ.

7 Ɔ kolosiwɔ fa wɔ lee debuŋta tuum man,

be dii wɔ mmaraase na ɔ kawolase ŋan ɔ be fa wɔ nɛ dɔɔ.

8 Degbeŋgyoo de Wurubuarɛ,

n kpaa wɔ,

nyaŋ yɛna Iseraetena Wurubuarɛ ŋon n na mo dukum kyɛɛ,

mɔna nyi be yɛɛ dukum na n ne wɔŋ ba deŋele tɔ kom.

9 Ɛ gyina Degbeŋgyoo de Wurubuarɛ ŋon adido,

na ɛ ka som ɔ bula fereŋkyeŋ keŋ dɔɔ,

nawolo nyi Degbeŋgyoo de Wurubuarɛ ŋon yɛɛ fereŋkyeŋ.