1 A kengha kekie kingnei gailo, Oh RAMPAUBO;

a kehap nang ngking gailo.

2 Ih keherei kelu tingdau nzu pung a dade mbaidi helo.

Acu kingnei beulo.

Ih ncu qugai kecudau, a sam keli kelwa beulo!

3 A tingbadung de mika nzwa kapak tetdi kezeu ziemne,

nah a radung mi nzwa ru bam dida.

4 A nlung pangpop dida, nah Ih au cehei kii kedi be nzwa dida.

Ih magede tyei kera nsungta dida.

5 Ih mra jüja bam sap kecune,

Ih mcimrim gwang dida.

6 Ih au hetaideu ruine ge nzwa dida;

Heni gi kedidung ga Ih biangkang ge nzwa dida,

7 Ih nrak eh zeu, nruine ge nlikwak eh

ki peureu ga kebam ge nzwa,.

8 A ngauraume tingbazie pelane a rata tei,

acu henui tei kelame a zi teu reset la dida,

9 Ih mimüt tangku nzwa tyei

nah miakduidung a piak gage hailu da.

10 Kedanemene n rata kezeu gai kelakne,

nang acu pwahu cuh lwe kelien mie dida.

11 A tingbaziedung au tingkau mie gadi kela nzwa da,

nah Ih au cehei nzwa regui dida.

12 Dede nang, RAMPAUBO, kelungtane ring la,

nah nkendu de au ceheudung pelane ziemne.

13 Nang cuhlwe Zion de ngau nggia zie.

Cu pedage ngau kenggia ting kedine;

mtei pwa kebam tingsiak be gwang kedine.

14 N kilamedung pe tangtsudung kusüt kecu ziemne

nah pa kapkedi rebui de ngau pelung siala.

15 Heleuhdung n zi de rüt zie, RAMPAUBO,

nah kideu ga hegwangmedung leune de nzi zierang kemdu de rüt zie.

16 RAMPAUBE Zion teidai luzie

nah pezierang kemdu de keulia zie.

17 Cipau ting, pa keherei kelame kekie keli beuzie;

pa penui kekie mlai dilak.

18 Gwang kezeu ceheudung ziemne aide rauteu lazie,

nah mina mna mene kebammedung RAMPAUBE de twa zie.

19 Pa kemci kecehu gade pie nghung kecu ziemne;

RAMPAUBE tinggim gade kideu ga pie nghunggai,

20 hebaangmedung mra kwa siu kera,

tsaidi kera mmau kedimede lung mpetpeu kera.

21 Cine Zion ga RAMPAUBE zi rang zie

nah Jerusalem gade pecu twazie.

22 Minadung nah hegwang ramdung ngkwa ncüt lwe

RAMPAUBE tagwa tei kecu dau.

23 A teilung sum gade RAMPAUBE a kengkieng keuteu dida,

pa a tingbaziedung tei mdui dida.

24 Ih ranggai, "A tinggwang teilung sum gade acu keuteudi helo,

nang au ceheudung pelane ga lala.

25 Ndaa ting gade nang kideu teipwa pebam gage kailu;

tinggimdung au n ba bata le teilu.

26 Tingkideu gah dizie, dede nang au bam zie;

penui pelane pai nzwa lung hegwa dizie;

pai nzwa, nang penuide gwagi dizie, nah penui gah dizie.

27 Dede nang au pelui bam muila,

nah n mmidung penli bam ma.

28 N kilamedung namedung* lungh lazie,

nah penui leuhmedung nang kebam gade lungh zie."