1 Acu ngau nggia lo, Tinggwang, minadung acu ketang kebam ziemne!

Tingbazie pelane a ngauraume acu teikeherei bamdi delu.

2 A ngauraume tingbazie pelane acu daucim;

kedanemene penui zaisia eh acu regi ketang kecume kieesüt.

3 Ih ngngidi kecudau,

Ih a kenlum de n da bam zie.

4 Tinggwang dage, pe sam Ih hetwa peu kelabe,

Tinggwang da Ih a kenlum kai pwabam; Ih ngngi di lak;

migede acu daige tei lulai?

5 Tingbazie pelane penui a samdung de teukerui la;

penui kecet pelane kesiabe ziemne acu mmau.

6 Penui penuikatei gwang ngkwalu la, penui penuikatei mbailu la,

nah penui a pipadung ling la,

penui a teilung kwa kebam de nzwa.

7 Kemau tei eh penui de peu paktet diso.

N rata gade minadung de teu nghung gailu, Tinggwang.

8 Ih tetgwang kecudung de nang peeibam

nah a miakduidung n labung gage kailu;

penui n laisiukwak ga bam meni?

9 Iciu eh Ih ncu qu kegai benai a ngauraume nreu caili dizie;

aide Ih cibam, Tinggwang a ziemne kecu.

10 Tinggwang gade, pe sam Ih twa kelabe,

RAMPAUBE gade, pe sam Ih twa kelabe,

11 Tinggwang gade Ih nlum,

Ih ngngi di lak.

Cauge ada dai teilu laino?

12 Ih sampet keludung n dage a tah teicang gailu kera au ada bam, Tinggwang;

Ih ncu ketwa recadung pwapeu zie.

13 Kedanemene nang ketsai gade a teilung kelibeu da;

Ih kaudi kera de a pi gi beuda,

ciu eh acu peu Tinggwang dwaga tetlu kerane

keringbe kebaabe ga.