1 Tinggwang, hegwame leuhdung n mapwa gumkera gwangbam dida;

penui n kerecaki kemci de tei hera dida;

penui Jerusalem de teingkapcio gwang dida.*

2 Penui n kilame tsaipaaudung de tinggim ruine taktyei ziemne peubam dida,

nah n dade masang kelame paaudung kideu kaune de peu dida.

3 Penui n minadung jai teilwa eh dui nzwa Jerusalem pelane lwa dida,

nah migede penui paau kungdi kera gah da.*

4 Anui namdame dwaga anui anui au kesiame ge dida,

anuide twagwa kebamme dwa gade nuikeneu nah henui ge tei dida.

5 Rampaubo daitie ge zieno? N rata kelungta ladi zieni?

Daitie ge n rata de miheu kecunzwa bamlai?

6 Ncu cimene kela heleuhdung

nah n zi qu kemak deudi hegwangme namdi dung da n rata rui gailo.*

7 Kedanemene penui Jacob de daptset dida

nah pe namdung ngkap dida.

8 Anui paume maudung ziemne anui de mmau diso;

N ngaugia tadung anuida kegwangbe tei lo,

kedanemene anui au mneisüt lu.

9 Anuide ngha lo; anuide kelikelube Tinggwang, n zi kendu de ziemne;

anuide kelibeu lo nah anui maudung gi beulo n zi gade.

10 Daitei heleuhdung depeu, "Daiga penui Tinggwang lano?" De ranglai.

Peu n kilamedung jai lwakegai dene anui miakngau gade

hekum heleuhdung da gwang kelube teilo.*

11 Hebaang tei kelame mra kwa n dwaga peu gwangcang lo;

N kengkieng kedi dele tsai dilai eh kebam nadung de gum beulo.

12 Rampaubo anuide lungh twagwa kebam heleuhdung ncu kemneu ta tei kegai kieege swade

pia hena peu dai beu lo.

13 Iciu eh anui n minadung nah n meurün haudung kelungta

ncu hetwa peula muizie.

Anui lungh cu keleu ceheu leune de ncu twa kera rang beuzie.