1 Kengkingbe, Tinggwang, RAMPAUBE, ranggai da

nah kideube naimiak kepetle gade naimiak kenlütle kecang de qugai.

2 Zion, hezu yicang kecu gade,

bagai zeu Tinggwang.

3 Anui Tinggwang gwangla nah zing de bam ma;

miheu ge pe dwa ga la,

nah heratingkai le pecu twagwalu.

4 Tinggwang nreu ga kebam tinggimdung de qula

nah kideube de iciu eh pa pe minadung de tiaklu kerane:

5 "A mina samsang kelame de hekwalu,

ratak gade acu ngngwa samkak kelumedung de."

6 Tinggimdung pa masang lie de eh rang mdulia zie,

kedanemene Tinggwang au pekatei de hetuketiakbe kecune.* Selah

7 "Kingneilu, a minadung, nah Ih rangzie;

Ih au Tinggwang, n Tinggwang.

8 Ih nnui ratakdung ziemne nnuide kesiu ma;

nnui gu keru ratakdung a dwa ga bammuila.

9 Ih nnui ki gade hetumseu ge de keulak,

mede n meu ki gade hemeuseudung de keu lak.

10 Kedanemene renaam kaune pelane au agu kecune,

nah kideutudung cangcang ga hetumdung.

11 Lamlwatudung ga nruine leune de Ih cibam,

nah luh ga renaam kaunedung au agu.

12 Magade Ih mzeu liede, Ih ncu ranglak;

kedanemene kideube agu kecune, nah cika kebam pelane.*

13 Ih hetumseudung teih tyei zie ni

mede hemeudung jai sak zie ni?

14 Tinggwang dage ketwa ratak teigailu,

nah nnui sampet kelu pelane pwa Hutube Tinggwang de peulo.*

15 Keherei kegwangdau acu qulu;

Ih ncu keli beuzie, nah nang acu twa zie."

16 Dede kemaume dage Tinggwang ranggai,

"Nang a zaidung pei lwe nang dai tei lai,

nang n mui gade ruine Ih samkak kebeude rang kegai,

17 kedanemene nang keledeu de de ngkau

nah a samdung de heling gidi zie?

18 Nang keragame ge de ngau kecudau, nang pecu suizwala;

nang kemmha ta tei kelame de ngngwa kemmha ta teila.

19 Nang n mui kesiabe de peu dila,

nah n mleu kenret rangla.

20 Nang mtum bam eh n sinabe de mmau lala;

nang ngkatei n pui napei de rangmsia la.

21 Nang aidungde tei, dede Ih zingde bam,

cine nang Ih nang kenzwame gelie de cetdi.

Dede Ih nnuide kesiu zie nah teucuh beuzie, n miak dwade, nang tei kegai leune.

22 Aide kingnei teune lu, nnui Tinggwang de nsungta di kelame,

meliecai Ih nnuide teu rak takcai dizie,

nah migede ncu gwang ngha kera gah dizie!

23 Ketwa reca ratak tei kebeube acu twala la,

nah keheibe de lampui kemzuibe ga tet kelame de

Ih Tinggwang kelikelu de lia zie."*